طبعا صفاء ادت ناس البيت خبر .. قبل ما أنا اصل ليهم ..
وصلت وقفلت عربيتي ودخلت.. لقيت ابوها وواعمامها ااتنين وخالها وكم نفر كدا يعني زي سبعة انفار قاعدين .. بتونسوا وواستقبلوني احسن استقبال .. انا طبعا كان هدفي القى ابوها براهو .. عشان اتفاهم معاهو براحتي .. لكن مامشكلة .. الناس ديل شكلهم حالتهم واحدة .. وشكلهم ساكنين قريب بعض .. جيران او حاجة كدا المهم .. جابو الشاي والنوسة مدورة .. في السياسة والحاصل في البلد ..
وبتكلمو عن تفاهة البنات .. وقلة الادب الموجودة عند الشباب .. والفساد الحاصل في البلد .. ياها النقاشات العادية البتكلمو فيها اعمامك الكبار .. وماعندهم موضوع غيرها ..
فجأة كدا الونسة كملت .. والكلام انقطع .. وقبل علي ابوها .. قال لي حبابك يامحمد .. ان شاء الله انت طيب ياخي .. ده فلان ودفلان وده فلان المهم عرفني بيهم عادي وانا اتشرفت بالمعرفة .. وقال ليهم ده طبعا محمد احمد عبدالرحمن الحكيت ليكم بيهو قبل شوية وبتكونوا شفتوهو يوم حادث صفاء .. ومواصل في كلامو ..
اها يامحمد انا طبعا كلمت الجماعة ديل بالغرض الانت جاي من أجله ..
انت جاي تتكلم معانا في موضوع صفاء بنتي .. ولا شنو .. موش كلامي صاح؟ قلت ليهو نعم نعم ..
طبعا انا اتفاجأت المفروض اقول الكلام ده انا .. لكن شكلو شافني متحفظ .. وحب يمهد لي الطريق .. ويرمي لي اللحن الشرقي .. هه
انا صلحت قعدتي .. واتنحنحت وقولت ليهو نعم صحيح .. فعلا والله انا عندي رغبة في صفاء وقلت اول حاجة اجيك انت ..
قال لي والله يامحمد ياولدي على حسب معرفتي البسيطة بيك .. ولاقيتك مرة واحدة .. انت مافيك كلام ..
لكن طبعا صفاء دي متكلم فيها ود عمتها .. ومصر عليها اصرار شديد .. ونحن طبعا متمنين انها تكون في قسمتو ..بس المشكلة هي رافضة .. وكل مانتكلم معها رافضة الموضوع ده جملة وتفصيلا .. وانا طبعا لايمكن اغصبها على حاجة هي ماعايزاها ..
وهسي انت قبل ماتجي .. اتناقشتا معاها في الموضوع ده .. وقالت لي انت اتعرف بمحمد .. لو ماوافق معاك انا بقبل بي اي كلام تقولو لي .. كان زياد كان غيره ..
انا طبعا ارتبكت من الكلام ده .. وماعارفت اقول ليهو شنو.. بس قلت ليهو ربنا يسوي الفيهو الخير ياعمي ..
والقسمة مامعروفة لمنو .. بس انا والله بتمنى اكون ليكم نسيب .. وتكون صفاء ست بيتي ..
قال لي طيب يامحمد ..قول قول نحن وافقنا ..
دايرين نعرف انت شغال وين .. ودرجتك التعليمية شنو .. ووصلت وين .. واسرتك .. واهلك .. وقبيلتك ..
وبعد داك طبعا لازم نسأل منك ولا كيف؟ .. لاني معرفتي بيك محدودة ..
ايوة صفاء بتعرفك .. لكن نحن مااابنقتنع بمعرفة الحريم .. عندنا موازين تانية ..
يعني باختصار بعد نتعرف .. عليك تدينا فرصة نعرف سيرتك .. واهلك ونرد ليك .. وان شاء الله مايحصل الا الخير ...
غايتو الزول ده وشو قوي .. وكلامو زي الرصاص .. ومابتردد في اي كلمة .. وصلو مامطمن ..
المهم حكيت ليهو الحاصل .. عني وعن حياتي واسرتي .. بدون كذب وتزوير ..
وركزت ليهو علي نقطة .. انو ح يكون بيتي في بيت ابوي الكبير .. بس ما قلت ليهو ح تسكن مع امي وكدا .. بس عرف انو ماعندي بيت .. تمام؟
المهم بعد خلصت كلامي قعدو يتململو وكل زول قبل ليهو على جهة .. وجاني احساس قوي .. انو الناس ديل ماعندهم رغبة يدوني بتهم .. وخاصة ابوها ده .. لكن ده كلو بعملو فيهو ترضية للبت .. عشان ماتحس انها ظلموها .. ورفضو رغبتها .. وفرضو رايهم عليها ..
بس انا حا واصل كفاحي للنهاية ..
المهم اخدت معاهم قعدتي .. والزول قال ح يمشي يسأل مني .. يعني ح يعرف شنو غير سمعتي البوظوها لي ناس عمار وعابد .. لكن لو سأل عن ابوي واهلي ح يسمع الشي المشرف جدا ..
اها يازوووول ..ابو صفاء بدأ في التحريات عن شخصي الضعيف وده من حقو طبعا ..
في واحد من اصحابو شغال معاهو في السوق .. من ناس صالحة .. مشى ليهو مخصوص في دكانه .. وقال ليهو ياخي انا بٍسأل من واحد .. اسمو محمد احمد عبد الرحمن .. ساكن في حي الجامعة .. شغال مكانيكي وسايق لانسر عنابية .. عنده اخوه في السعودية اسمه عمر .. بتعرفه؟
قال ليهو والله انا ساكن بعيد من حي الجامعة .. لكن انت عايز بيهو شنو بتسأل منه ؟
قال ليهو والله الزول ده اتقدم لبتي .. وعايز اسأل منه .. ومن اهلو واصله وفصله .. قال ليهو والله انا مابعرفو .. لكن في زول ساكن في حيهم ده .. خليني اتصل عليهو .. لو موجود في السوق .. يجينا هسي .
اتصلو علي واحد اسمو نجم الدين ود عم ياسين صاحبي .. وزول حاقد .. وبكرهنا .. كلنا بي ياسين .. لانه كان بيناتنا موقف .. ما في وقت هسي عشان احكيهو .. المهم ..
نجم الدين جاهم في الدكان .. وسألوهو .. قال ليهو والله الزول اهله كويسين .. ابوهو راجل محترم .. وعنده خاله عقيد في الشرطة .. لكن هو زول رمة بس ..
قبل كدا قابضنو في قضية مخدرات .. تجارة عديل ..
معاهو واحد صاحبو شديد من الحلة اسمو عمار .. عمار اتحاكم واتسجن تلاتة سنة .. لكن هو مرق منها بوساطة خالو ده ..
عليك الله ياحاج .. في البلد دي خالك عقيد بتنسجن ياحاج؟ قال ليهو والله في الفساد .. الشايفنو ده ماااا اطن ..
قالي ليهو ياخي محمد ده .. ابعدوووو منه نصيحة لله .. مصايبو كتيرة ..هو اصحابه ديل عاملين عصابة في الحلة ..
قبل فترة برضو عندو صاحبو نط في في بيت واحد من حلتنا .. وسكوهو قام جاري مشى لي محمد ده في البيت .. ومحمد دساهو ونكره ..
وعرفنا في النهاية انو متفق معاهو .. في دهب في البيت كانو دايرين يجاسفوه..
لكن الراجل سيد البيت كان راجل فاضل .. وقال اطفو الموضوع ده .. والناس خلوهو خوفا من الفضايح .. وسمعة الحلة ..
الراجل ابو صفاء ده .. قال ليهو طيب .. انا هسي اصدقك انت كيف يا نجم الدين؟؟ احتمال بينك وبينو .. في مشكلة .. ماممكن اخد كلام كبير قدر ده كدا من طرف واحد ..
نجم الدين قال ليهو طيب .. لو ما مصدقني دقيقة .. طلع تلفونو .. واتصل على لؤي عم مودة .. متذكرنو ؟؟ .. عمها الصحا بي تليبة عابد في البيت .. وهو اول زول سكاهو .. لمن وصلو بيت ناس محمد ..
اها اتصل عليهو قال لابوصفاء .. ده لؤي من ناس البيت النطو فيهو ذاته اسأله ..
ولؤي طبعا .. ممغوص علي .. اصلا مابريدني .. بكرهني عمى من يوم دسيت عابد منهم ونكرتو ..
بس ماصدق .. وفتل فوقي نفس الكلام القالو نجم الدين بالنص ..
والله تقول متواصين .. هنا طبعا ابو صفاء خلاص صدق .. وامن واتأكد من اني انا مجرم درجة اولى .. وخاف على بتو عديييل مني ..
وقال ليهم .. سبحان الله .. والله الزول البشوف محمد ده .. اصلا ما يشك فيهو حاجات زي دي .. غايتو .. الزول اصلا ماينخدع بالمظاهر ..
الحمد لله صفاء بتي على حسب نياتها .. ربنا بريدها كشف لينا الزول ده .. قبل ما نتدبس فيهو ..
طوالي طلع منهم واتصل علي .. السلام عليكم .. محمد كيف حالك ياخ.
قلت ليهو عليكم السلام ياعم ..
قال لي.. والله يا محمد يا ابني .. انا أسف جدا .. اني اقول ليك الكلام ده .. بس مافي قسمة .. وربنا يكتب لك ماهو ابرك واخير ..
وان شاء الله تبقى الخوة في مكانها والأقسام بيد الله ..
طبعا رماها لي كدا (تج) بدون اي مقدمات ..
انا طبعا حسيت بانو قلبي ده وقع من صدري .
وحيلي مات وعيوني ضلمن .. والله كنت واقف قعدت في الواطة .. عشان ما اقع من طولي .. شدة الخبر ماكان صعب علي .. قلت ليهو خير يا عمي الحمد لله على ما اراد الله .. لكن ممكن أسال من سبب المنع وكدا ولا ما من حقي ؟ قال لي ابدا مامن حقك .. بس انا كلمتك قلت ليك انا برجع ليك بقراري.. وده قراري .. تسلم في امان الله .. وقفل الخط خلاني فاتح خشمي ..
ولغاية الان انا ماعارف موقف صفاء شنو؟ وهل قرار ابوها ده هي عارفاهو ولالا..
وغلبني اتصل عليها اقول ليها الكلام ده كلو كلو.. مابقدر اوصف ليكم حجم الشبكة الكنت فيها .. غلبني اتصرف وماعارف اعمل شنو؟
وما كنت متوقع انو الموضوع بتحسم بالسرعة دي .. بس قلبي يسال ياربي صفاء عندها خبر بالكلام ده ؟
قلت في نفسي انا ما ح اتصل عليها انقل ليها خبر زي ده .. الا هي لو عرفت بتتصل علي تحكي لي براها ..
انا ح اسألها..ليه ابوها اتخذ القرار ده بالطريقة دي ؟.. المفروض يتفاهم معاي وكل شي بتحلا .. حتى لو موضوع البيت.. ماكنت عارف الفضايح دي المهم..
بالمساء كدا اتصلت علي صفاء..
وكانت بتبكي بحرقة .. وفي الاول ماقدرت تتكلم ..حاولت أهديها هديتها واتكلمت معاها ..
بس بتقول لي انت ماعارف الحاصل علي ..انا قاعدة اموت .. .. طبعا كدا عرفت انو ابوها كلمها انو رفضني.. لكن بس داير اعرف منها.. رفضني ليه؟
المهم هدأت ..وحكت لي انو ابوها حكا ليها.. الحكيتو ليكم ده .. ابوها وراها بالتفاصيل .. الكلام القالو ليهم نجم الدين .. ووافقوا عليهو لؤي عم مودة
قالت لي وبعد ابوي ماحكى لي .. قال انو اتصل عليك.. وقال ليك مافي قسمة ..
انا يا محمد اتكلمت معاهو .. وقلت ليهو محمد ماكدا ..اصحابو الاتنين ديل صاح الكلام فيهم.. بس محمد مختلف .. وحكيت ليهو الحقايق .. ابوي قال لي اسمعي انا بسألك سؤالين .. انتي بتعرفي اكتر ..ولا الناس الساكنين معاهو في الحلة .. معقول ياصفاء نفرين يتفقوا على كلام واحد.. ومافي واحد فيهم عارف التاني قال شنو؟
بعدين لو فرضنا جدلا ..انو هو مختلف عن اصحابه .. ماسمعتي بالشاعر القال عن المرء لا تسأل وسل عن قرينه
ففيه دليلٌ عنه بالطبع تهتدي
ولا بدع في وفق الطباع إذا اقتدت
فكلّ قرينٍ بالمقارن يقتدي
والشافعي قال..
واختر قرينك واصطفيه تفاخرا ان القرين الى المقارن ينسب .. يابتي .. حتى لو محمد ماكدا..بس سمعتو في الحلة زي السجم.. انا ليه اجازف بي بتي حبييتي.. عشان بتحب ليها واحد.. سمعتو زي الطين ..
بعدين انتي عرفتي الحقايق دي منه هو صاح ؟ كيف صدقتيهو؟.. ماعارفة الشينه منكورة .. معقول يعترف ليك بكلام زي ده؟ .يعني كلام الناس كلهم غلط وهو كلامو صاح .. ولاعايزة تتفاجئ بالحقايق بعد الفأس يقع في الراس .. المهم يابتي والله لو ما الكلام ده انا كان ممكن اتنازل واوافق .. بس بعد السمعتو ده .. والله تاني.. الا تتبرأي من ابوك حتى تمشي في الموضوع ده ..
الى اللقاء ..
