ومن دربي داك على المستشفى.. المستشفى الاصلا جيت عشان اودي ليها البت دي ..
مشيت حوادث مستشفى ام درمان التعليمي .. ودخلت جوة سريع كأني انا جوة بالعربية .. و جريت كلمتهم يجيبو نقالة ..
ودخلناها .. الدكتورات جن جاريات بي همة على البت .. واحدة كشفت عيلها بالسماعة .. واحدة فتحت ليها عينها .. الدكتور الكبيرة دي طلعت االسماعة من اضنيها .. وقالت لينا .. احسن الله عزاكم .. انتو بتبقو ليها شنو؟ .. انا قلت ليها نحن جيرانها والله .. جينا لقيناها دايخة في مظلة في الشارع . والناس متلمين فيها .. لمن نزلنا نشوف عرفناها اسمها مودة من حلتنا ..
قالت طيب كان تتصلو على اهلها..
قلت ليها والله ماركزنا قلنا بس نسعفها سريع ..
قالت تسعفو ليها شنو؟ البت دي ميتة من اكتر من ساعتين .. اتصلو علي اهلها سريع .. وشيل الورقة امشي قابل منو كدا ماعارف.. المهم في اجراءات كدا مالها حد مافي داعي ادوشكم بيها..
قلت لي عابد عندك اي تلفون من الناس ديل؟ .. قال لي ماعندي والله .. انا اتصلت علي ياسين .. قلت ليهو شوف لينا تلفون من ناس عز الدين .. قال لي عندي تلفون لؤي اخوه الصغير.. اللهو عم مودة .. اتصلت عليهو .. قلت ليهو نحن في مستشفى ام درمان .. ومودة دي في الحوادث تعالو لينا .. قال لي مودة الوداها الحوادث شنو؟ ..
قلت ليهو بس انتو تعالو هنا وح تفهم اي حاجة.. وكلم ابوها لو سمحت .. باختصار شديد .. بيتهم كلو جو المستشفى .. ولقوني انا واقف ومربع ايدي .. وعابد قاعد بعيد عشان مايشوفوه .. لانهم بعرفوه انو يوم نط في بيتهم .. وطاردوهو بشوارع الحلة .. انا ولا سلمو علي ..
بس جو كابسين على الدكاترة.. وين البت؟؟ وين البت؟؟ الدكتورة اشرت ليهم عليها .. راقدة في سرير ومغطين ليها وشها ..
جرو عليها قالو ليها مالا؟ .. الدكتورة بكل بساطة ..قالت ليهم احسن الله عزاكم .. البت وصلت هنا متوفية .. ما ماتت عندنا ..
والله الناس ديل اتبشتنو بشتنة.. بس ابوها راجل ثابت.. ماشاء الله عليهو .. اصلا هو راجل تقي .. وعلامة الصلاة في وشو ..وشو منور .. وزول عنده يقين عجيب ..
اول الدكتورة ماقالت ليهم كدا .. بصوت واحد ..قالو للدكتورة الجابها منو ؟؟ انا قلت ليهم جبناها نحن .. ابوها قال لي ماتت وين و كيف ؟
قلت ليهم نفس الكلام القلتو للدكتورة.. انو البت دي لقيناها دايخة في المظلة في الشارع .. شكلها كانت كانت منتظرة المواصلات ..وداخت بس لقينا الناس ملموين وسبحان الله .. نزلنا نشوف الحاصل شنو .. لانو في بنات كانو ببكو . لقيناها دي مودة .. لمن عرفناها قلنا للناس البت دي بتنا .. زحو كدا منها .. نسعفها للمستشفى احتمال تكون مغمى عليها ..
بس بدون مانفكر خطفناها .. جبناها هنا .. ابوها قال لي الله يجزيكم خير كان معاك منو ؟
قلت ليهو معاي عابد ؟؟ عمها قال لي عابد؟ وكلهم طيرو عيونهم ..
لمن سمعوا اسم عابد ...
طوالي عمها لؤي وابوها .. نادو الدكتور واتكلمو معاها .. قالو ليها عايزين نعرف سبب الوفاة .. وهل في اي اثار اذى او اعتداء علي البت ؟
انا هنا خوفت خوف شديد ..لانو احتمال عابد يكون .. بكذب علي ..واعتدى على البت .. او هبشها .. لانه عابد ما بتصدق ..عندو الكذب زي شراب الموية .. ..
المهم باختصار شديد طلع ليهم تقرير .. انو البت ماتت نتيجة هبوط في الدورة الدموية .. والوفاة طبيعية .. ومافي اي اثر اعتداء جنسي ولاغيره .. حتى الدكتورة قالت لابوها .. بتك الله يرحمها تمام ..مافي اي زول هبهشا ..اطمن
وقال ليها انا يادكتورة عمري كله ما لمست لي بت ناس .. من الله خلقني .. وفي كل صلاة بسأل الله .. انو ربنا يحفظ لي بناتي .. عشان كدا بتي حية ولا ميتة مافي زول بقدر يهبشها ... واثق من الله ..
سبحان الله ياجماعة ..انا طوالي اتذكرت كلام عابد الملعون ..انو اصلا ما اتوفق انو يلمسها .. قدر ماخطط وهي خططت معاهو ..
ماااااااقدرو نهائي يعملو اي شي .. وربنا في اخر يوم ..فداها من الرزيلة بعمرها ..
اتاريهو .. السبب ده ابوها .. والناس شايلنها في خشومهم.. مودة كعبة مودة كعبة .. وهي اشرف بت في امدرمان .. سبحان الله ..
ما كل شي المفروض يتصدق .. انا ذاتي كنت قايل مودة كعبة ..عشان كلام الناس فيها كتير ..
لكن عمها لؤي بتكلم قدامنا .. قال والله الموضوع ده فيهو ان ياعز الدين ..
محمد وعابد ؟ الاتنين ؟..
والله ماااااااااااا .. لكن ماعنده اي اثبات .. وفي النهاية انا العملتو ده عشان استر البت .. البت ماتت ربنا يرحمها .. لو في زول عرف انها ماتت في بيت ناس .. ومعاها عابد .. تاني اهلها ديل ماح يقدرو يرفعو راسهم قدام الرجال ..
انا اي كذبت واخفيت عنهم معلومات مهمة .. لكن دي حاجة املاها علي ضميري .. ورجعنا معاهم الحلة .. على قريب الصباح .. والبكا انطلق في الحلة .. والناس كلها عرفت البت ماتت وجابوها من المستشفى ..
ماتت بأزمة قلبية . وقعت في الشارع .. واسعفوها المستشفى .. وماتت قبل ماتصل ..
وبما انو الناس كلهم عارفين البت عندها مرض قلب .. كانت القصة ساهلة .. والمكنة قسمت بطريقة سلسة جدا .. ونحن كنا في العزاء والدفن .. زينا وزي الناس .. والله الناس ديل بكو على مودة دي بكا .. حتى انا بكيت عليها واتأثرت جدا جدا .. بس عابد ولا دمعة ماذرفها .. عليها مطير عينيو زي الضب
وخايف خوف غريب .. لدرجة انو انا قلت ممكن الناس يشكو فيهو .. انو عنده يد .. مسكتو من يدو .. وقلت ليهو اتخارج من هنا ..
واليوم داك ماقدرت امشي المنطقة .. من التعب .. رجعت البيت واليوم كلو عديتو نوم .. وصحيت لقيت خمسة مكالمات من صفاء ..
لمن شفت رقمها جاتني خوفة .. وجات في راسي ستمية فكرة .. ياربي تكون عرفت بالوفاة .. وانو البت لقيناها انا وعابد . وناس القوالات يكونوا وصلوها الكلام مقلبن .. ناس نسرين يسلمو .. رجعت ليها وقلت ليها نحن عندنا عزاء في الحلة ..
قالت لي سمعت بيهو .. كلمتني عفراء قالت لي حبيبة عابد ماتت .. وقالت دي الزولة الخليت عابد عشانها .. اسمها مودة صاح يامحمد؟
قلت ليها نعم .. انتي اخبارك شنو؟ المهم برضو صفاء .. موضوعها طبيعي وعبرت عن حبها واشواقها عااادي ..
تاني يوم الوفاة العصر .. انا مشيت لناس العزاء .. على الاقل عشان اتشمشم .. واشوف الحاصل شنو؟ لكن الموضوع طبيعي .. والناس ديل بس متأثرين على بنتهم ..
اها غايتو العزاء انتهى ..والحمد لله عدت على خير .. لكن والله انا من الخوف والتوتر الحصل لي كان ح يجيني سكري ..
بس تعالو شوفو الحصل بعد داك .. حصلت قصة .. والله اصلا انا ماكنت متخيلها .. ولامتوقعها .. واصلا ماخطرت على بالي .. ولا على بال عابد ..
وده لمن ربنا يدور يفضحك ويكشف سرك ..
والحمد لله على كل حال ..
طبعا حافظ لمن جاء البيت بالليل .. ولقى عابد ومودة مافي .. والبيت مقفل عادي .. باب الحوش نحن قفلناهو .. ومفتاح الغرفة في مكانه .. حافظ ما اشتغل بالموضوع كتير .. واعتبر الموضوع انتهى .. وماعارف انو حصل موت في البيت ده... حلو؟
اها اهلو لمن جو .. من السقاي .. امه كانت بتنضف الغرفة .. لقت ليها شنطة يد واقعة تخت السرير .. نادت بناتها .. وقالت ليهم الشنطة دي حقة منو؟
قالو ليها والله ماعندنا اي خبر منها .. وشالو الشنطة .. وفتحوها لقو في موبايل مقفول .. وبطاقات .. شالو البطاقة لقو مكتوب فيها .. مودة عز الدين محمد بخيت المتروس. ورقم تلفون والعنوان واي شي ..
واستغربو البيت كله ياربي الشنطة الجابها هنامنو؟؟
وسبحان الله اصلا فكروا في حافظ .. ولافكرو يتصلو عليهو يسألوهو لانو معروف ماعنده علاقة بالبنات ..
اتصلو في التلفون لقو اللفون مقفول .. الام قالت لبتها كدي ياسارة افتحي التلفون ده .. فتحت التلفون اتصلت في بالرقم المكتوب في البطاقة .. التلفون دقه ..
قالت ليها ياهو ده تلفون الرقم ..ده ذاااته يا امي ؟؟
البت الاسمها سارة دي مسلطة قالت ليها .. كدي النجرب الرقم السري من واحد لي ستة .. سبحان الحي القادر .. طوالي التلفون فتح .. شوف لمن ربنا يكون مقدر حاجة .. يعني البت من اول تخمينة فتحت التلفون ..ولا احتاجت تكرر المحاولة .. والبنات اخوات حافظ قعدن يضحكن من التلفون الفتح من اول تخمينة ..
امهن قالت ليهن جيبن التلفون ده جاي .. دي اسرار ناس .. هاك يا سارة الغي القفل .. من جوة عشان مايقفل لي تاني .. وافتحي لي الاسماء ..
فتشت لاسم تتصل عليهو .. لقت اسم (بابا ) .. بس قالت ليهم.. تقريبا لقيت رقم ابوها .. واتصلت عليهو بتلفون بتو ..
وماعارفة انو ده تلفون المرحومة .. وابوها لسه قلبو مابرد من موت بنتو .. شفت العجايب دي .؟؟
ابوها تلفونه ضرب .. طلع التلفون من جيبو .. لقى (مودة تتصل بك) ..الراجل ده قرب يجن .. لمن قام علي حيلو ..
ورد .. قال الو .. المراة قالت ليهو .. السلام عليكم ..
قال ليها عليكم السلام ..
قالت ليهو انت ابو مودة عز الدين ؟
قال ليها نعم معاي منو؟
قالت ليهو نحن لقينا شنطتها في بيتنا .. وماعارفين الجابها هنا شنو؟ .. قال ليها انتو ساكنين وين الثورة موش كدا؟
قالت ليهو لالا .. نحن في العرضة ..
قال ليها مودة قالت ماشة الثورة .. لي حنة واحدة صاحبتها .. الجابها العرضة شنو؟
قالت ليهو والله نحن اصلا مابنعرفها مودة دي .. واول مرة نشوفها في صورة البطاقة .. اللقيناها في الشنطة .. والشنطة فيها بطاقات واوراق وحاجات .. والتلفون المتصلة عليك بيهو ده ..
قال ليها خير وصفي لي انا جاييكم .. والراجل سرح هناك.. وراسه ضرب وماعارف الامور الح تتكشف من الحاصل ده ..
وما كلم اي زول بالاتصال ده ..
اهااا .. ابو حافظ جاء داخل البيت .. لقى مرتو بتتكلم مع راجل بتلفون غريب استغرب في الكلام ده .. حكو ليهو .. وراسه ضرب ..
وطلع بالكرسي مع اعمامك ديك يتونسوا .. وحكى ليهو قصة الشنطة اللقوها في الاوضة ..
عمك جاره بالحيطة .. قال ليهو والله بعد انتو ما مشيتو السقاي .. في ولد شاب جاء بعربيو .. وقف هنا مسافة .. وتاني دخل العربية جوة البيت .. ونحن افتكرناهو منكم .. او صاحب حافظ .. لكن الغريبة . حافظ كان مافي الولد . وقف جنب الباب و في زول من جوة فتح ليهو الباب ..
نحن استغربنا لكن ما اشتغلنا بالموضوع ..
نحن بعد ما العربية دخلت البيت ماقعدنا كتير ..اتفرقنا .. بس انا جيت داخل الحمام الجنب حيطتكم ده ..سمعتهو بتكلم معاهو واحد ..
بس انا متأكد ماحافظ لانو حافظ شفناهو طلع .. اها سمعتهم بتكلمو وكانهم رافعين ليهم حاجة .. وختوها في العربية .. لانو بقول ليهو شيل سمح ياخ ماتقع منك .. و طلعو العربية وقفلو الباب ..
الكلام ده كلو وابو مودة لسع ماوصل العرضة .. جاي في الشارع ..
الى اللقاء ..
.
