تنزيل اتخلعت من السؤال وبقت تقطع ..قالت ليها . هو ياعمتو قال ليك كدا؟ قالت ليها اي والله قال لي كدا ..
قالت ليها والله .. ياعمتو ..الراي رايك انتي وراي ابوي .. بس كان علي انا ماعندي اي مانع.. بدون مااقول ليك عايزة افكر حتى .. زول ود عمتي وما فيهو اي كلمة .. فاهم ومتعلم وطيب وبار بوالديه .. اكتر حاجة عاجباني فيهو .. برو بيكم انتي وابوهو .. كفاية انو تربيتك انتي .. يا اطيب عمة في الدنيا .. امي قربت تبكي من الشكر ههه
المهم امي كوركت لي وقالت لي تعال يامحمد ..شيل الشنطة حقة تنزيل وديها العربية ..البت شايلا ليها شنطة فيها غيارات .. قدر الليلة وباكر التقول تاني ماراجعة .. قالت لي بختك قبلانة ماعندها اي مانع .. كمان ماصدقت هه
انا لمن امي قالت لي كدي.. حيلي كلو مات.. لمن الشنطة دايرة تقع مني ..لكن عملت فيها ولا هاميني ..
امي مبسوطة شكلها كأنها ضامنة الموضوع.. ماخاتة بالها للعقبات الواقفه في المووضوع ..
طلعت شايل الشنطة لقيت تنزيل واقفة راجياني جم العربية وتتبسم وتتخجل .. فتحت ليها الباب ركبت.. وقالت لي تسلم .. ركبت ودروت وطلعت ..
قلت ليها عليك الله ياتنزيل مليني رقم ابوك .. النقول ليهو نحن جايين
.. قالت لي كلمتهم انا .. وقلت ليهم جايبني محمد ود عمتي ..
قلت ليها يعني ابوك قاعد وعنده خبر باني جاي معاك ..
قالت لي نعم ..
قلت ليها والله ياتنزيل اصلا مالقيت لي معاك فرصة اتونس معاك.. واسألك من اخبارك ..
قالت لي .. صاح والله .. فعلا انت تعبان شديد على امك وابوك.. ياسلام عليك والله ربنا يديك العافية.. انا شايفاك بتقوم بدري وكتير بتجي متاخر وتعبان ..
انا مرات على بال ما اجيب ليك الأكل بجي القاك نمت .. قلت ليها والله صدقتي ..
قلت ليها اها انتي قريتي وين؟ .. وعملتي شنو في حياتك الدراسية؟ ..قالت لي انا بتخرج السنة دي من صيدلة ..
والحمد لله كويسة يعني.. ممكن تقول زولة اكاديمية .. وبقدس التعليم والدراسة .. قلت ليها ده كلام جيد..
اها في حياتك الخاصة .. وعلاقاتك الاجتماعية؟ .. قالت لي والله ياها صداقة بنات الجامعة المؤقتة .. اغلبيتها بتنتهي بانتهاء الدراسة .. الا القليل طبعا .. وعندي صحباتي في حلتنا ..
قلت ليها .اها يعني علاقات عاطفية جادة كدا في حياتك .. قالت لي والله مرة كان عندي علاقة مع سنيري.. بس ما استمرت اكتر من خمس شهور .. جيت لقيتو بغش فيني.. وعندو سطاشر واحدة في حياتو .. خليتو طوالي .. تاني مادخلت في حاجة زي دي .. لكن الصراحة بنتونس ساي .. مافي حاجة جادة ..
واي زول يجي يكضب لينا بنمشيهو البنات ديل كلهن فاهمات .. الزول الجادي ظاهر ..والعايز يكذب ويرواغ ظاهر..
قلت ليها كلامك صاح ..
اها يا تنزيل امي قالت ليك شنو؟ قالت لي كلمتني بي رغبتك ..
انا والله يسعدني يامحمد وما فيك حاجة تترفض.. واي واحدة تتمناك .. لكن طبعا الكلام ماعندي انا زي ماعارف ابوي .. عامل لينا ارهاب في البيت ودكتاتور كبير .. وبتحكم في اي حاجة .. يعني مافي واحدة بتقدر تقرر حياتها ..
قلت ليها غريبة نحن فاهمين من سماح غير كدا ..
مفهمانا انو زول متفهم وديمقراطي وبخلي اي زول يقرر مصيرو بنفسه .. قالت لي لالا ابدا والله ..بس سماح مابتخاف منه ..وبتتناقش معاهو .. نحن بهرشنا ..
المهم ونستي معاها جرت .. وشلت رقمها وسجلت رقمي.. واتفقنا نكون متواصلين .. وطلعت زولة ظريفة شديد .. ومتواضعة عكس ماكنت متصور .. وصلنا الجريف مع ساعة الفطور ..
لقيت ليك خالي قاعد في الصالون .. مسوي كرشو .. وجلحاته اصلو مابريده .. سلمت عليهو .. كيفك يا خال ان شاء الله كويس.. والغريبة سلم علي كويس .. واستقبلني بفرحة شديد .. وسالني من امي ووجع ضهرها ..
قلت ليهو والله بقت تمام امبارح تزحزح في السراير..
قال لي والله الحمد لله .. لكن انا والله اتوعكت وعكة قربت اروح فيها قلت ليهو مالك ؟؟ سلامتك..
قال لي والله كومة سكري كانت دايرة تودرني ..
وقعد يتونس معاي ونسه بي صحك .. واتبسط جدا من جيتي في البيت
والله لمن فاجأني .. قربت اقول ليهو .انا داير تنزيل.. لكن خوفت منه يقوم يطقني بمصيبة قدامو ..
وجابو الفطور فطرنا فضلة خيركم .. واتونسنا فوق الفطور معانا اولادو الاتنين معز وقصي .. اول مرة اعرف اسماهم . اصغر من البنات ..
ظريفين لكن بهرشو من ابوهم .. مابتكلمو قدامو ساكتين ساي ..
باختصار الزول ده فارض قرصنة في البيت ماطبيعية.. انا زمان كنت قايل ضباط الجيش هم العندهم الظبط والربط في البيت .. لكن اتاريهو حتى ناس البوليس بكونو صارمين كدا ..
انا غايتو اتونست معاهو وكملت ونستي والضحك ومشيت منهم بعد صلاة الجمعة ..
وانا في الشارع ..اتصلت علي تنزيل قالت لي اسمع اوعه يكون جبت لابوي سيرة حاجة؟
قلت ليها هو متين يا بت ابوها ؟ لالا لسه .. هسي انا بمهد في الطريق واصلح العلاقات .. قالت لي لالا كان كدي خلاس ..
المهم انا وصلت البيت .. استخرت بعد عصر الجمعة .. لانه وقت فيهو استجابة الدعوة .. واتوكلت علي الله .. والفيها خير ربنا يسويها ..
مرت الايام .. وكانت في امور بتجري في الخفاء .. بتدبير رب العالمين انا ماعندي عنها اي فكرة ..
امي قالت لي عارف يامحمد .. انا مشيت اتكلم مع ابوك في موضوع تنزيل ..
عايزة اقول احاول احنسو .. قام ابوك براهو فاجأني .. و قال لي اسمعي يا سعاد ..
اخوك البومة ده مابدينا تنزيل دي لمحمد؟؟ .. والله البت دي عندها همة واهتمام وخدومة وعندها اخلاق وادب ماشاء الله .. والله ياسعاد عجبتني ..
رايك شنو ياسعاد؟ والله حيرني ابوك ده ..
عارف يامحمد .. والله انا بقيت اتبسم من جواي .. قلت ليهو والله عاد ياحاج البت بت السرور .. لكن اقولك قولة .. انا بتكلم مع عبد العظيم ...
ابوي قال لي لالا .. اصبري بضرب ليهو بتكلم معاهو براي .. اول حاجة ارقد ليهو شعر جلدو بكلام حلو كدي .. وبعداك اطلبها منو عديل .. اخير الكلام يجي بالعدل.. بس انتي اتاكدي من محمد دايرها ولا ما دايرها ..
قلت ليهو محمد عاجباهو داير يموت فوقها .. اسألني انا ..
ــــــــــ
يعني ابوي عقبة وازالها رب العالمين براهو ..بدون اي مجهود مني ولا من امي براهو طلب الموضوع ..
وتاني يوم من كلام امي ده .. اتصلت علي تنزيل .. قالت لي في خبر حلو يا محمد .. قلت ليها بشري يا بت خالي .. انتي دايما جايبة البشاير .. والخير قولي ارح ..
قالت لي طبعا انا حكيت لامي عنك كتير .. وقلت ليها محمد قال لامو اطلبي لي تنزيل .. وامه اتكلمت معاي .. وانا يا امي خايفة من ابوي مايقبل ..
قامت امي قالت لي .. ابوك ده خليهو علي ..
تتخيل يامحمد مشت امي اتكلمت مع ابوي ..وحكت ليهو الحاصل قال ليها محمد زول ممتاز ..ومافيهو اي كلمة .. بس زول مسكين وبتغشه بسهولة .. لو اتلحلح شوية .. وبقى مفتح عينيهو .. مافي زول زيو .. لكن نقول خير مافي مشكلة .. انا من جانبي موافق ..
ده كلام ابوي ياامحمد .. قادر تتخيل ؟؟
قلت ليها معناها امورنا وضحت ياتنزيل ..
قالت لي بالجد؟ اقسم بالله انا مامصدقة .. واخدت ليها بكية من الفرحة .. هههه البت مكسرة بالجد اتاريها ..
والله ياجماعة انا فرحت فرحة ماتخطر على بال ..
الموضوع ده اتسهل تسهيل ما طبيعي .. وده شي بيعني انو ان شاء الله البت دي فيها لي خير ..
انا طبعا طوالي بديت اقرط واوفر وادسدس في القروش .. وزدت معدل وتيرة الشغل .. وفعلا قالو ربنا بعين الزول الداير يعرس .. انا الشغل ازدحم علي .. وبقيت بشتغل لامن الواطة تضلم .. وامرق الصباح بدري وبرضو مابخلص الشغل .. والحمد لله القروش جرت في يدي وبديت اشتري في حاجاتي ..
عشان ما اضغط على ناس ابوي ..
ابوي طبعا قال لامي .. انو طلب البت من ابوها .. وابوها بارك ليهو ..
وابوي ده فرحان بالبت دي فرح .. اكتر من فرحتو بسماح .. لكن والله هي متفوقة على سماح في اي شي ..
المهم ابوي جاب العمال .. وفصل لي البيت .. فصل لي اوضة وبرندة وعمل لي مطبخ وحمام .. بالناحية الشرقية الجنوبية للبيت ..
هاكم القنبلة دي .. ههههه
في يوم انا بصلي في الشفع والوتر في الجامع .. اتلفت وراي القى ليك عمك عز الدين ابو مودة قاعد وراي بالضبط ..
قمت سلمت عليهو .. قال لي اقعد عندي معاك كلمتين .. قعدت قال لي .. صاحبك مشى وين؟ قلت ليهو صاحبي منو.؟
قال لي عابد .. يعني منو غيرو ؟ قلت ليهو والله الزول ده انا قطعت علاقتي معاهو .. لكن قالو كان عيان شوية .. وسافر لكن سافر وين ماعارف ..
قال لي عيان مالو عنده شنو؟ قلت ليهو والله تقريبا اضطرابات نفسية ..
قال لي انا موش قلت ليك الزول ده مابخليهو ؟ قلت ليهو اي قلت لي ..
يعني ياحاج سبب المرض العندو ده منك انت؟
قال لي لالا .. انا لاشفتو ولا لاقيتو .. لكن هو الحصل ليهو مابقدر يتكلم بيهو ..
واحتمال سبب نفسياتو من الحصل ليهو الكلب .. قسما بالله .. انا لاهسي ممغضوص عليهو .. وقلبي دم دم ..
قلت ليهو المهم ياحاج .. انا الزول ده بالنسبة لي انتهى .. وماعندي استعداد نفسي اجيب سيرتو على لساني ..
في امان الله .. وقمت من جنبو سريع ..
ومن هنا عرفت من الطبق النظرية القاسية على عابد .. هو عمك عز الدين ابو مودة بواسطة اخرين .. احتمال مـاجورين ..
بالنسبة لموضعي مع تنزيل ماشي تمام .. وبقينا نحب بعض حب ماطبيعي ..
ومكالماتنا مستمرة .. وانا فرحان بيها شديد .. والله لمن مامصدق .. لو ماعقدولي ما بتأكد انها دي ... حقتي انا ..
طبعا الصادق اخوي .. ماجايب اي خبر من الحاصل في بيتنا .. وماعارف انو انا طلبو لي تنزيل .. وخلاص زواجي على الابواب ..
لانو قافل على نفسو.. ومرمي في غرفتو .. والاربعة وعشرين ساعة قافلة معاهو وزهجان .. ومابتكلم مع زول .. بس يطلع الصباح يمشي يجيب الفطور والخدار من الشارع ويجي .. دي كل البعملو في اليوم الكامل ..
اها القنبلة التانية .. يوم الصادق جاء لابوي .. وقال ليهو البنيان ده لمنو يا ابوي؟ ..
قال ليهو ده لمحمد اخوك .. داير يتزوج ان شاء الله ..
الصادق قال ليهو طيب يا ابوي .. انا برضو عندي موضوع انا عايز اتكلم معاك فيهو ..
قال ليهو اها انا سامعك قول ..
قال ليهو .. انا عايزك تمشي تخطب لي تنزيل بت خالي عبد العظيم .. الكانت قاعدة معانا في البيت دي ..
محــــــن
الى اللقاء
