طبعا ابو حافظ لمن سمع الكلام ده من جاره .. راسو ضرب .. واستغرب جدا .. كيف يكون ناس في البيت ..؟ وحافظ ولدي مافي؟ .. قال ليهو ياحاج فلان .. يعني انت ماعرفت الزول الجوة مع بتاع العربية ده منو؟ وماشفتوه لمن دخل.
قال ليهو والله نحن طبعا.. زي ماعارف بنقعد هنا من بعد المغرب .. والزول الا يكون دخل قبال مانحن نقعد .. لكن بتاع العربية جا متأخر.. لمن نحن خلاص قربنا نقوم ..
قال ليهو العربية شكلها شنو؟ قال ليهو والله عربية صغيرة كدا لونها عنابية ..
لكن ما ركزت في ماركتها ..
عمك ابو حافظ شال المعلومات دي ..كلها وبيها ح تتكشف معلومات مهمة من قصة الشنطة ..
بعد داك قام دخل بيتو.. وسأل المراة .. وقال ليها الراجل ابو البت ست الشنظة جاي متين؟ .. قالت ليهو من قبيل قال جاي .. بعد كدا بكون قرب يصل .. قال ليها المفروض يجيب معاهو بتو عشان نسألها..
وحافظ وين .. قالت ليهو حافظ كمان بتعرف وين؟ .. تلفونو يهوداك في الشاحن.. وهو مافيش طافش زي عادته .. قال ليها لو جاء بورينا الحاصل .. لانو بكون عارف الناس الجو البيت ديل منو؟
وسكت مسافة وقال ليها .. في ولد وبت جو لي حافظ هنا.. بس لشنو ماعارف .. وجا واحد بالعربية ساقهم .. وحافظ عنده خبر بكل الحاصل ده .. انا عايز اعرف جو في بيتي لشنو؟ وعلاقتهم شنو بينا .. والله في اسئلة كتيرة ماقادر القى ليها حل ..
بعد شوية وصل عمك عزالدين ابو مودة راكب عربية كوريلا سايقها براهو .ومامعاهو اي زول .. دق الباب وفتحو ليهو .. سلم عليهم وقعد ضيفوه .. وهو متمحن قاعد .. جاء عمك ابو حافظ.. والمراة ام حافظ قعدو الاتنين.. في السرير المقابلو ..وهو قاعد في كرسي جلوس دمياطي .وفي غرفة ضيوف فاتحة في الهول .. والغرفة التانية الغربية دي هي الغرفة الماتت فيها مودة ..
قال ليهم وينها الشنطة ..؟ قال ليهو كدي ياحاج فهمنا الحاصل .. بتك الجابها هنا شنو؟ .. المراة قالت ليهو بناتي قالو مابعرفوها.. واول مرة يسمعو باسمها ويشوفو صورتها.. ونحن اصلا ماكنا بنصل ليك ..لو ما بتي فتحت الرمز بتاع تلفون البت .. هسي انت بتك مالك ماجتها معاك نفهم منها..
قال ليهم انا بتي ست الشنطة دي اتوفت .. ولقوها ميتة في المظلة .. ودوها المستشفى .. ميتة .. اتنين من اولاد الحلة .. لقو الناس ملمومين في المظلة ..ولمن نزلو يشوفو الحاصل شنو .. لقوها بتي وعرفوها ...
عمك قال ليهو والله انا هسي كنت قاعد برة مع الجماعة جيراني ديل ..بنقعد برة هنا في طرف الميدان ده .. قالو انو اليوم داك جاء واحد بعربية .. وقف وفي زول فتح ليهو الباب دخل.. زول كان منتظره جوة ..وبعداك دخلو العربية جوة.. ورفعو حاجة في العربية وطلعو..
عمك ابو مودة قال ليهو وماكان في زول في بيتكم ده اليوم داك؟ ..
قال ليهو والله نحن خلينا حافظ ولدي .. ومشينا السقاي ..
عمك عز الدين قال ليهو طيب وينو حافظ ولدك ؟..
حافظ هو البكون عارف الكان هنا منو .. وانا اعتقد ديل نفرين كانت معاهم مودة بتي .. لكن الجابها هنا شنو؟ كان المفروض تمشي الثورة لحنة صديقتها ..
بعد شوية حافظ وصل بسلامتو ..
ابوهو قال اها ياهوده حافظ جاء ..وبكون عنده الخبر الاكيد .. تعال ياحافظ .
حافظ جاء ..وماا كان متوقع انو في اي مشكلة.. لانه عابد ما اتصل عليهو ولاحكى ليهو الحاصل .. وهو كان زعلان من عابد كيف مايرجع لي.. على الاقل يشكرني اني فتحت ليهو بيتي .. المهم الحصل الان شنو؟
حافظ قعد.. وطبعا هو مابعرف الراجل ده منو .. عز الدين قريب التمانية وخمسين سنة .. وعمره اكبر من صلاح ابو حافظ ..
ابوه قال ليهو ياحافظ.. انا عايز اسألك سؤال ضروري شديد .. انت لمن نحن كنا في الساقاي.. الجاك هنا في البيت ده منو؟
قال ليهو في شنو يا ابوي؟ .. فهمني الحاصل اول حاجة .. حتى تسألوني ..
قال ليهو جدا بنفهمك.. حاصل كيت كيت .. والبت ست الشنطة دي لقوها ميتة في الشارع.. والقدامك ده ابوها ..
حافظ خاف خوف شديد خلاص. وكت قالو ليهو البت ماتت. وبقى يهضرب .. قال ليهم والله انا ماعارف حاجة.. جاني صاحبي زيارة .. ومعاهو بت .. انا مابعرفها .. وانا طلعت اجيب ليهم عشا اتأخرت حصل لي ظرف جيت مالقيتهم ..
عز الدين قال ليهو صاحبك ده اسمو منو ياحافظ الجاك مع بتي ؟
قال ليهو اسمو عابد من اولاد صالحة .. عمك سكت مساااافة .. وقعد يتلفت ويحك في راسه ... وحصلت عليهو حالة اقرب للتوهان .. وغضب وارتباك لمن ريقو نشف..وقال ليهو خلاص يا ابو حافظ .. انا فهمت الحاصل .. المسألة اتحلت.. بس عايز اسألك الزول الجاهم بالعربية ده انت ماحاضره يا حافظ.. قال ليهو ابدا والله الا يكون جا بي وراي ومشو معاهو .. احتمال اتصلو عليهو يوصلهم ..
ابو حافظ قال ليهو بس ياحاج قالو العربية صغيرة ولونها عنابي ..
عز الدين قال ليهو تمااااااام ده محمد ود احمد عبدالرحمن .. والحاجة الرفعوها في العربية دي مودة بتي.. يا اما ماتت ليهم هنا ... او اغمي عليها واسعفوها وماتت في العربية ..
المهم ياجماعة انا شاكر ليكم كل المجهود .في انكم توصلو لي اغراض بتي الله يرحمها .. وحليتو نص اللغز الفي راسي
والباقي بعرفو براي ..
وجابو ليهو الشنطة بتاعة بتو ..ولمن فتحها لقى جواها البطاقات والتلفون.. عاين لصورتها في البطاقة كدا ..ودموعه ملن وقش دميعاتو ..وهم يعيانو ليهو المراة وراجلها وحافظ العبيط الوسخان ..
عمك عز الدين ودعهم وقام ..ركب عربيتو ومشى على صالحة ..
في الطريق اتصل علي انا .. جاب تلفوني من وين ماعارف.. المهم قال لي الو السلام عليكم .. محمد ؟
قلت ليهو نعم معاي منو ؟
قال لي انا عزالدين ابو مودة .. انا عايز الاقيك هسي الان ..
قلت ليهو انت وين؟ بجيك..
قال لي انا في الزلط بره قدام المخبز الفلاني بتلقى عربيتي الكرولا البيضاء عامل اشارات حذر اربعة ..
تعال لي هناك.. عايزك في موضوع ضروري ومهم جدا .. طبعا انا قلبي ضرب ضرب ..طاحونة بس.. ونفسي قام.. وعرقت.. والله خوفت خوفة غريبة خلاص.. وحسيت انو الزول ده ربما يكون كشف المستور وعرف القصة ..
المهم رميت الفي يدي.. ودورت عربيتي وجيتو بره في الزلط الرئيسي .. وعاينت قدام المخبز.. اشوف ليكك الكرولا العاملة الكنتاكات الاربعة .. طوالي قفلت عربيتي ونزلت مشيت عليهو .. نزل القزاز وقال لي اتفضل يامحد اركب معاي هنا ..
ركبت معاهو.. شال نفسو وختاهو و قال لي طبعا انا بعرفك معرفة قوية ..وعارف اخلاقك.. حتى لمن عابد صاحبك جا تلب في بيتي .. وهرب جا اتدسى عندك انا عارف ماعندك ذنب في الموضوع ده.. بس انت حاولت تحميهو من الناس عشان ما يأذوه .. وده تفكير كبير .. وانا دافعت عنك والناس لاموني..
وهسي انا عرفت قصة عايز احكيها ليك وتتم لي الناقص فيها ..بس عايزك تكون صادق
انا ممكن كان اسألك اسئلة مباشرة .. لكن احتمال الخوف يجبرك على اخفاء الحقائق .. لكن انا احب اطمنك لو.. صدقت معاي.. مابتجيك عوجة ..
انا بحكي ليك وانت كمل لي الناقص منها.. القصة دي بالنسبة لي ناقصة ..لو ماتميتها لي بالحقيقه انا مابرتاح ..
قلت ليهو احكي ياعمي .. انا سامعك ووالله ما اكذب عليك في كلمة ..
بس بدا يحكي لي ..قال لي عابد مشى لحافظ صلاح في العرضة .. ومعاهو بتي مودة.. وجيت انت بالعربية وسقتهم من البيت ..
ووديتو بتي ميتة للمستشفى.. وكذبتو قلتو لقيناها في المظلة ..بس ربنا لمن داير يفضحكم ويكشف المستور.. نسيتو حاجة مهمة وما انتبهتو ليها ..لا انت لاصاحبك.. وهي شنطة مودة النستها في بيت ناس حافظ ..
ولمن جو اهل حافظ لقو الشنطة تحت السرير.. باختصار ياجماعة الزول ده حكى لي القصة الحكيتها ليكم دي بضبانتها ..
قال لي واهو انا جاي منهم.. اتصلت عليك .. اها يامحمد دي القصة الناقصة تمها لي ..
قلت ليهو جدا ياعمي .. اولا انا صح كذبت عليكم .. وهدفي انت ح تعرفو ..
انا ياعمي.. اتصل علي عابد ..اليوم داك بعد العشاء ..وقال لي حصلني يامحمد حصلني .. قلت ليهو مالك في شنو؟
قال لي انا في بيت ناس حافظ معاي مودة .. ومودة اغمي عليها جيب العربية عشان نسعفها ..وانا سقت العربية مسرع .. ولمن جيت البيت وقفت العربية اكتشفت انو مودة متوفية .. وسترا ليها وخوف على سمعتكم انتو .. بقيت ساكت.
لانو ماصاح مودة تمشي مع راجل غريب لبيت فاضي ..
لكن والله يا عمي عابد مالحق يلمسها بيده .. وده من حفظ الله . زي ماقلت انت للدكتورة في المستشفى ..
المهم انا الكذبت.. عشان استرها ومافي زول يعرف انها ماتت هنا .. يعني اتخيل ياعمي.. لو ناس الحلة كلهم عرفو انو مودة ماتت في بيت في العرضة ..ومعاها عابد الوسخ ده ..وكل الناس عارفة سمعتو السيئة .. الناس ح يقولو فيكم شنو؟
دي الحقيقة.. وتمامة القصة.. وانا مستعد لاي عقاب منك.. لو كنت غلطاان في العملتو ده ..
بعد سمع كلامي قال لي يعني مودة مشت مع عابد للبيت الفاضي بقصد معين.. وماتت هناك .. قلت ليهو نعم ده الحاصل .. بس اتوفت نظيفة زي ما انت عارف ووصلت لربها طاهرة ..وربنا حفظها من خاتمة السوء ..
وده كلو انت عارفو من كلام الدكتورة ..
قال لي اسمع يامحمد .. انا ماجيت عشان اعاقبك انا جيت اعرف الحقيقة ..
وانا والله صدقتك في كل كلمة قلتها وما عندي ليك الا الخير لكن زعلت منك في حاجة واحدة ..
كان من يوم الوفاة تصارحني انا بس بالحاصل حتى لو بيناتنا ..
قلت ليهو ياعمي.. والله نفسي ماسمحت لي اكون مفتن بين الناس .. وانا ماعارف انت لمن تعرف الحصل.. ح تتصرف كيف ..
واحتمال تحصل مشكلة كبيرة .. وترتكبو جريمة في عابد بالغضب ..
وانا اكون سبب الفتنة.. وده الخلاني اكون ساكت .. قلت الحصل حصل.. وامر الله نفذ ..مافي داعي للفتن والفضايح .. وانتو ناس سمعتكم في البلد دي زي الدهب .. وانا حبيت احافظ عليها ..
المهم ياجماعة والله عمك ده انا قلت ليهو كلام ماعارفو جاني من وين .. كلام زي الدهب ..
عمك ده سكت مساااافة.. وقال لي
انا سمعت قصتك دي كلها ..وصدقتها لانها هي الحقيقة.. الانا كنت متخيلها وعرفت.. انها حصلت بي توقعاتي .. انا عايز اقول ليك كلام يامحمد ..
طبعا انا مستحيل اخلي القصة دي تمر كدا مرور الكرام .. انا زول طيب ومسكين وهادي .. لكن لمن ازعل بنتقم انتقام .. مافي زول بتخيلو ... انت انا ماعندي عليك حاجة .. والحمد لله انك هسي قلت لي الحقيقة ..
لكن انا اقسم بالله العلي العظيم ..عابد مابسيبو .. وانت بتشوف انا ح اعمل فيهو شنو؟ .. قلت ياعم انت راجل تقي وورع .. من عفى واصلح فاجره على الله ..
عابد زول طايش.. ومودة كمان الله يرحمها مشت معاهو بارادتها ..
نترحم على البت ..وخلي الامور على الله.. مافي شي بضيع عند ربنا .. قال لي لالا عابد ده زول مفسد .. وانا ما بخليه يلعب ببنات الناس..
قال لي يامحمد سألتك بالله العظيم عابد تلب في بيتي اليوم داك لشنو؟
قلت ليهو تلب لي مودة مواعداهو وفتحت ليهو الشباك ..بس قبل مايدخل لؤى صحى بيهو.. وهو قام جاري ..
قال لي صدقت دي الحقيقة .. دي الحقيقة ..
انا مشيتي للعرضة دي كشفت لي كل الحقايق دي... بس كنت محتاج لزول يأكد لي وانت اكدت لي ..
انا عابد مابسيبو وانت براك بتشوف ..
بس عايزك تعاهدني بحاجة ..
انا ما لاقيتك.. ولا اتكلمت معاك.. ولا شفتك ..ولافي زول يعرف اي تفاصيل من الاتكلمنا عنه ده اتفقنا ؟
قلت ليهو والله بعاهدك ...
قال لي وانا الشنطة والموبايل ديل بمشي محل الاوساخ ديك ..
هسي بطلق فيها النار واحرقها .. وتحترق معاها قصتنا دي ..
قلت ليهو كلام عديل والله انا لو ختو لي سكين ما افتح خشمي ..
قال لي خلاص كلامي معاك انتهى .. جزاك الله خير .. ونزلت مشيت علي عربيتي..
إلى اللقاء.
