انا وقفت في نص الحوش .. بقيت اسمع في الضرب والجوطة.. وصراحة عملت فيها اطرش ودخلت الصالون ..
ضميري انبني .. وكانت جواي افكار متعاكسة ..
قلبي يقول لي كيف تتخلى عن صاحبك.. وانت تسمع في الناس بضربو فيهو .. تان قلبي يقول لي يستحق الدق ..
هسي لو دي اختك انت بتخليهو .. في النهاية دي اعراض ناس .. واعراض الناس مالعبة ولا حاجة ساهلة؟
خليهو يهبدوهو .. بس الضرب ده ما استمر كتير .. الزول ده شكلو جرى منهم .. وتاني سكوهو .. الشارع هدأ زي دقيقتين كدا ..وانا مشيت على الصالون .. فجأة كدا اسمع ليك دق في الباب .. ونفس الدق القبيل بي عنف يعني وقوة..
شكلهم رجعو لي تاني يسألوني .. ويعملو معاي سين وجيم .. ابيت امشي افتح الباب .. وعملت ميت .. يلا بلا لمة ..
قدر مادقو الباب ده ابيت اطلع .. والصادق ذاتو ماصحى تاني ..
دقو .. ودقو .. وكت مالقو نتيجة فاتو .. انا رفعت تلفوني لقيت صفاء متصلة علي تلاتة مرات ..
لاني قبيل بالخلعة قفلت منها التلفون ..من دون ما اقول ليها الحاصل ..
قلت ما مشكلة .. صباحات الله بي خيرا ..باكر بتصل عليها واعتذر ليها من الحركة دي .. وانا اصلا معذور ..
واليوم داك غلبني انوم كلو كلو .. والله مع انو عابد يستاهل الضرب .. لكن كنت متأثر عليهو ..
لمتين تصبح لي الواطة ..عشان امشي اشوف الحصل عليهو شنو ..
او على الاقل اتصل عليهو .. وتاني قلبي يقول لي .. ولاتشتغل بيهو ماتفتح ليهو فرصة يدخل حياتك ..
المهم اي زول بكون عندو اصحاب وهميين كدا .. بقدر يتفهم القصة الحاصلة علي ..
والله ماعارف اعمل شنو.؟
غايتو بكترة التفكير .. وانا مغمض عيوني.. ومقبل على الحيطة ..نومت .. وقمت الصباح بدري اتجهزت واتخارجت على شغلي ..
وفي الشارع كل مرة اشيل التلفون ادور اتصل عليهو ..
تاني اغير راي .. اظن كررت العملية اكتر من تلات مرات .. في اللحظة دي جاني اتصال .. من صفاء ..
ياصباح الخيرات .. ياصفاء القلوب .. حبابك انتي ..
المهم سلمنا واتطايبنا .. وسألتني :
قالت لي انت يامحمد.. امبارح قفلت مني الخط بدون ماتقول اي شي .. بس انا سمعت جوطة وكركبة .. وفجأة كدا الخط قفل.. وتاني قدر ما اتصلت عليك .. مارديت لي ان شاء الله خير ..
قلت ليها ده حرامي ..كانو ساكنو ناس الحلة .. وجا تلب في بيتنا .. انا قفلت الخط باللخمة .. وقمت سكيتو مع ناس الحلة ..
طبعا مستحيل احكي ليها حقيقة الحاصل .. ربنا امر بالستر .. وبعدين دي سمعة في حقي انا ذاتو ماكويسة ..
قالت لي تتخيل عفراء لغاية الآن تلفونها مقفول .. والله ماعارفة الحاصل عليها شنو؟ اها اعمل شنو يامحمد امشي اشوفها ولالا؟؟؟..
قلت ليها والله الحقيقة .. المفروض هي التتصل عليك.. وتسأل منك لانه اهلك ضربوا ليها .. وسالوها منك .. وقالو ليها صفاء ضايعة .. ماجات البيت .. اها علي الاقل .. حتى لو قلنا قلعوا منها تلفونها ..تفتش تلفون وتشوفك انتي حية ولاميته.. دي خوة شنو دي؟؟ ..
لو دايرة راي؟ ... ماتمشي ليها ولا تتصلي عليها ..
شوفي آخرها شنو؟ انا طبعا صراحة .. انا ماعايز صفاء يكون عندها علاقة مع عفراء .. لانها مابتشبها لا شكل ولامضمون..
صفاء قالت لي بس انا ماعارفه الحاصل عليها هي شنو..
اخوها المجنون ده .. مايكون ارتكب فيها جريمة .. عليك الله يامحمد اسمح لي امشي اشوفها لو لقيتها كويسه وماعندها عذر ..
عندي معاها تصرف تاني .. قلت ليها خير يازولة.. امشي ليها انتي اصلك زوله طيبة وبت حلال.. وقلبك ده ابيض من اللبن..
المهم صفاء مشت لعفراء في البيت ..ولقتها في كامل الصحة والعافية وماعندها اي عوجه .. وتلفونها قاعد في يدها .. ولقتها غيرت شريحتها..
لانها قالت ماعايزة عابد تاني يتصل عليها ..
صفاء طبعا استغربت ..وقالت ليها البشوف الحب الكان عندك لعابد يقول مستحيل تتخلي عنه..
قالت ليها انا عابد تاني ماينفع معاي وبحكي ليك ليه؟ اولا انا عرفت .. من صحبتي انو عابد ماجادي معاي .. . وعايز يقضي وقت معاي .. انا عندي صاحبتي ساكنة صالحة حكت لي عنه كل شي ..
دي الحاجه الاولى .. بعدين عابد ده زول جبان وخواف .. يومداك اخوي بضرب فيهو وهو ماقدر دافع عن نفسه .. والمقاومة ساي ماقاوم ..
لو ما الولد المعاهو الاسمو محمد جا انقذو.. اظنه كان الا يجري .. انا مابحب الراجل المسكين الضعيف .. انا ياصفاء كنت بتمنى انه عابد .. يدق اخوي ويقعده في علبو .. لكن خيب ظني ..
قالت ليها مامشكلة لكن انا عايزة اسالك ..ان شاء الله اليوم داك اخوك ماعمل ليك حاجة؟
عفراء قالتليها .. يعمل لي شنو ياصفاء عليك الله .؟ انا اصلا ماكنت خايفة منه انو يمد يدو علي.. لانو ابوي محذره.. قال ليهو لو عفراء ساطت الموية بالعود ..
ماتمد يدك عليها .. عشان كدا فشش غبينتو في عابد ..
وانا بس كنت اتالمت شديد لمن هو كان بضرب في عابد .. بس اتبسطت من محمد لمن اداهو بونية في وشو ..
مع محمد صاحبو ده قالو عنه كلام خطيرر.. بس برضو لاهسي متكيفة منه ..
قالت ليها كلام خطير؟ .. كلام خطير زي شنو يا عفراء ؟
قالت ليها محمد ده ياستي تاجر مخدرات .. ومجرم خطير شديد ..
صفاء بانزعاج وغضب ؟ .. قالت ليها كذب وافتراء .. محمد لابسف لابسجر كيف يكون تاجر مخدرات؟؟ .. قالت ليها يابت دي حكاية معروفة .. حتى قبضوه معاهو صاحبو .. شايلين بنقو ..
وصاحبو اتسجن .. بس هو عنده خالو قالو عقيد .. طلعو منها زي السبيبة من العجين.. انتي لو مامصدقة كلامي ده تعالي لي مرة تانية .. وبسأل ليك نسرين صحبتي قدامك.. تحكي ليك القصة ..
نسرين دي ساكنة في صالحة .. جارتهم .. وعفراء بعد خلصت قوالتها .عاينت لصفاء في وشها شديد .. وقالت ليها .انتي اوعة ياصفاء تكوني خشيتي معاهو في علاقة؟؟
الزول ده فعلا شكلو وحركاته خادعة ..
لكن قالو يا ما تحت السواهي دواهي .. قالت ليها صراحة ياعفراء انا بقيت بحبو عديل والله.. لكن الكلام ده لازم انا اعرف حقيقتو شنو؟
قالت ليها بس عايزاك توعديني بحاجة .. عليك الله ماتمشي تٍسأليهو تدخليني في مشكلة مع نسرين ..
صفاء قالت ليها والله ما بسأله.. لكن بسأل براي وبتأكد .. انتي بس اديني تلفون نسرين صحبتك دي ..
انا بتصل عليها براي .. وبسألها وبتحقق من الموضوع ده .. قالت ليها اكتبي معاك .. وملتها الرقم وقالت ليها بس انتي قولي ليها انا صفاء صحبة عفراء هي بتعرفك .. من كلامي انا عنك ..
صفاء كتبت الرقم .. وحست انو قلبها تقطع من جوة .. وخايفة شديد انو يكون الكلام ده حقيقة .. لانها صراحة بنت امالها كلها علي انا ... وماعارفة انو الكلام ده ماااااااكدا .. وانا متهم .. لكن برئ...
اها صفاء لمن دايرة خلاص تمشي من عفراء الشوم دي.. قالت ليها انتي يا عفراء .. عايزة اسألك ..
موش اهلي اتصلو عليك .. وقالو ليك صفاء ضايعه ؟؟ مارجعتي سألتي مني ليه؟..
قالت ليها والله انا الزعلانة منك.. يعني تفوتي من الساحة وتخليني براي .. بعدين يعني ضايعة وين؟؟ اهلك براهم شفقانين .. ماهودي انتي قاعدة انتي صحي اليوم داك مشيتي وين ياصفاء ؟
قالت ليها لو سألتي مني.. كان عرفتي مشيت وين .. انا حصل لي حادث ورقدوني مستشفى في غيبوبة .. نفس اليوم داك لكن الفيك اتعرفت ..
قالت ليها اسفة ياصفاء .. معليش سامحيني .. اصلا اللوم بجي بالغفلات .. وصفاء طلعت .. من بيت ناس عفراء .. زعلانة ومحبطة وخايفة ..
ومافي هم في قلبها غير تتصل على البت الاسمها نسرين وتسألها مني .. هل انا فعلا تاجر مخدرات؟؟
وابت ترجع لي بتلفون توريني الحصل عليها شنو في بيت ناس عفراء .. وقدر مابتصل عليها مابترد لي .. شكلها عايزة تعرف انا شنو .. قبل ما تاخد ليها خطوة لقدام ..
قامت اتصلت علي نسرين .. مالمت فيها ..لمدة يومين وتلفون نسرين مقفول ..
وطيلة اليومين ديل انا مالامي في صفاء.. وماعارف الحاصل عليها شنو .. بتصل عليها مااااابترد .. ولابترجع لي ..
ياربي دي مالا الحصل عليها شنو؟
المهم قامت اتصلت نسرين يوم بالليل .. نسرين تلفونها دخل .. قالت ليها زيك يانسرين .. انا صفاء صاحبة عفراء ..
نسرين قالت ليها ياهلا ياهلا والله ياصفاء .. والله والله ياصفاء نفسي الاقيك .. طبعا حكت لي عفراء عنك كتير .. عمرك طويل اتصلتي علي براك ..
صفاء قالت ليها وين انتي تلفونك .. مقفول يومين .؟ والله انا اظن اتصلت عليك خمسين مرة ..
قالت ليها اسكتي ساي .. انا تلفوني خطفوهو مني في الشارع .. نفرين راكبين موتر .. والشارع كلو يتفرج فيني .. وانا بصرخ زول ساي قال لي عينك في راسك مافي ..
المهم لمن اشتريت لي ربيكا ..وطلعت شريحتي .. يادوب فتحتو المغربية دي .. اها انت مالك؟ ان شاء الله مافي عوجة .. قالت ليها والله يانسرين انا عايزة اسألك سؤال مصيري .. حياتي كلها بتدور عليهو .. انتي ساكنة صالحة موش كدا ؟ قالت ليها نعم ..
قالت ليها بتعرفي ناس عابد ومحمد احمد عبدالرحمن والشلة دي؟ ..
قالت ليها كيف؟ ديل اولاد حلتي ..ونحن متربين في شارع واحد ..ديل بتعرفيهم من وين؟ اعوذ بالله منهم ديل ياخ .. قبل يومين تلاتة عاملين ليهم كارثة في الحلة .. ومطاردة وتليب في بيوت الناس ..
قالت ليها انا بسألك سؤال محدد .. هل فعلا محمد ده قبضوهو في تجارة بنقو ؟
قالت ليها اي والله العظيم .. والدنيا كلها عارفة .. بس عليك الله ماتدخليني معاهو في مشكلة .. محمد ده كبيرهم .. بأويهم في بيتو .. والبسرق بجي بتدسو في بيتو.. والبنقو بنقلو بعربيتو للتجار ..
الى اللقاء ..
