ابوي طبعا اول ماسمع الكلمة دي من الصادق .. فقعها ضحكة عالية .. وقال ليهو والله يا الصادق انت .. الراحات والخمالة تكون سببت ليك حالة نفسية وعدم اتزان في المخ..
ياخي تنزيل شنو البطلبها ليك؟؟ والله انت غنماية من سوق الله اكبر ما اطلبها ليك . .. بعدين ياخوي تنزيل دي جلابية بشتروها من السوق.. ولا كيف؟ انت اتكلمت معاها؟ .. امكن بتكرهك .. اصلا زولة جاتنا في البيت وشافت خمالتك ورقادك ده .. باقي لك بتتمناك ؟ تنزيل ياخوي امرها منتهي .. ودايره ليها زول غيرك ..
وتاني لو سمحت لو ما بقيت زول .. وقمت اشتغلت وشفت مصلحتك .. ماتقول لي داير ليك عرس .
الصادق قال ليهو دايره منو تنزيل ؟ ..
ابوي قال ليهو متفقين من زمان هي ومحمد اخوك .. والعرس على الابواب ..
قال ليهو يعني لازم اشتغل عشان اعرس؟
قال ليهو امال ؟ المراة داير تعيشها بي قملك ؟
قال ليهو المراة البعرسها .. تقعد في البيت ده زي ماكانت قاعدة تنزيل .. هههه
قال ليهو انت مفتكر اني اعيش لي مراة واحد فيكم؟ .. بعدين ياخوي انت صارف عليك اخوك .. بعد تعرس يصرف عليك وعلى مرتك يا الفالح؟؟ ..
الصادق قفلت معاهو .. وقال ليهو خلاص يا بوي .. انا لاداير تنزيل ولاغيرها ماداير اعرس .. في زول جابرني ؟
والله ياجماعة .. الصادق اخوي ده شخصية غريبة خلاص .. يعني عايز يعرس تنزيل .. عشان بتقعد في البيت .. وتاكل مع ناس البيت .. ماداير يشتغل ويصرف علي مراته .. والله انا من الله شق نظري .. ماشفت لي زول كسلان زي الزول ده ..
ابوي لمن حكى لي الكلام ده ..
قلت ليهو والله .. الزول ده تاني يجيب سيرة تنزيل فوق خشمو الملان صعوط ده .. الا انسى انو اخوي الكبير ..
قال لي اهدا يازول .. هو اساسا ماعندو رغبة في عرس .. لانو بحب الرقاد اكتر من الحريم .. لكن نحن لازم نشوف ليهو حل الزول ده .. قلت ليهو انا عندي ليك حل يا ابوي لو بتقدر عليهو .. قال لي قول ..
قلت ليهو الحل تطردو من البيت .. تخليهو يمشي يعيش نفسه .. غير كدا ماشايف لي حل ..عشان يضطر يشتغل .. ان شاء الله يبع دوم .
ابوي الفكرة عجيتو .. وطوالي نفذها .. جاهو ليك يوم من الصباح .. وصحاهو من النوم .. وقال ليهو يا الصادق انا محتاج للغرفة دي .. داير افتحها دكان في الشارع ..
قال ليهو وانا اقعد وين يا ابوي ؟
قال ليهو والقال ليك منو ح تقعد معاي تاني؟ . شيل هدومك ديل .. وامش شوف ليك حتة اسكن فيها .. ده بيتي وانا ماعايزك هنا ..
شال هدومو ومشى ناس فردوس خالتي في العاشرة .. مؤيد اخوي اتصل كلمنا .. قال الصادق جا يسكن معانا .. وفردوس متضايقة منه ..ابوي قال ليها اسمعي يافردوس اطرديهو الزول ده ...
فردوس قال ليهو يا الصادق .. انا راجلي مابقبل قعدتك دي .. شوف لك حتة ..
اها بعد يومن ضرب لينا عمر اخوي من السعودية .. وقال انو الصادق اتصل عليهو .. يشوف ليهو طريقة سفر يشتغل في السعودية ..
ابوي قال ليهو اوعك ترسل ليهو .. يمشي هناك يعمل ليك مشكلة مع ناس الشغل .. الزول ده مابشتغل ..
انا فكرت اسوقو معاي المنطقة لكن حقار .. ومابسمع كلامي .. وبمشي يقعد لي الضللة .. خليهو يدق القيف براهو..
اها يازول بعدمافات من ناس فردوس ..ماعرفناهو مشى وين تاني .. اطن قريب العشرين يوم .. اهاااا
فييوم كدا اتصل علينا واحد صاحب ابوي .. وقال لقى الصادق شغال في محل اقمشة في سوق ليبيا ..
والله اليوم داك فرحنا فرحة .. انا وابوي ركبنا مشينا ليهو في سوق ليبيا ..
ولقيناهو شغال شغل عجيب .. وييبع ويشتري ..
اول ماشفتو قعدت اضحك .. قال لي بتضحك مالك يا اهبل انت ؟
قلت منظر غريب .. مايحصل الا في دنيا الخيال .. وقعدنا معاهو وسألناهو ساكن وين ؟ قال ساكن ليهو مع عزابة في دار السلام ..
ابوي قال ليهو بعد كدا ابشر سفريتك للسعودية قربت .. واتصل ابوي على عمر اخوي .. وقال ليهو رسل لينا العقد .. الزول جاهز للسفر هه
ونحن من هنا بنسفرو ليك ..
هو بجهز لي سفرو .. وانا بجهز لي عرسي .. انا زواجي ماباقي ليهو اكتر من اسبوعين .. الصادق مافاضل ليهو الا يقطع التذكرة .. لقو ليهو عقد عمل في شركة مزايكو في جدة ..
قدر ماحنسناهو يحضر العرس قال مستعجل وداير يكسب زمنه هههه .
المهم الصادق سافر السعودية . ودي اكبر مشكلة في حياتنا اتحلت ..
وانا مدروش في تجهيزاتي .. وزمني مضايق ..
يوم انا شغال في البيت في امان الله .. وعرسي باقي ليهو اقلا من اسبوع .. كنا شغالين في بيتنا صيانة بوهية وبوماستيك .. والحاجات المعروفة دي .. الباب دق .. الكلام ده عصرية كدا .. مشيت فتحت الباب ولابس لبس الشغل .. وهدومي مليانة بالبوهية والبوماستيك .. حتى شعري ملون .. المهم القى ليك منو في الباب اتخيل ..
نسرين وعفراء .. عليكم السلام مرحبا ..
كيفك يامحمد ان شاء الله طيب .. قلت ليهن اتفضلوو اتفضلو ..
وكوركت لامي يا امي جونا ضيوف .. دخلن سلمن على امي .. وجوني راجعين في الصالون ..
عفراء قالت لي انا مستعجلة والله دايرة اصل البيت قبل المغرب .. عايزة اسألك من عابد وين .؟ والحصل ليهو شنو؟ صاح عابد جاتو نفسيات وبقو يعالجوه في مسنتشفى المجانين ؟
قلت ليها فعلا عابد كان عيان .. لكن اتعالج وسافر .. بس بالضبط ماعارف سافر وين .. نسرين قالت لي اهلو قالو مشى بورتسودان صح؟
قلت ليها والله طبعا اهلو هم ادرى بالكلام ده .. لانو هو ماحكى لي ماشي وين ..بس قال لي انا مسافر وماجاي تاني .. حتى انا اتفاجأت انو فعلا سافر .. حتى ماودعني ..
وانتو لو لقيتو منو خبر ورورني ..
عفراء قالت لي مابتسأل من صفاء يامحمد ؟ قلت ليها وين الشخصية دي ؟
قالت لي صفاء اتزوجت واحد من اولاد الحلفايا .. وهسي حامل في الشهر التالت .. قلت ليها مبروك عليها ربنا يهنيها .. انا ذاتي عايز اتزوج الاسبوع الجاي وانتو مدعوين .. قالت لي فعلا كلمتني نسرين .. انو عرسك قرب ..
اها قلت ليها انتي ياعفراء .؟ عابد ده ياخ حصل ليهو كم مشكلة بي سببك .. واخوك ضربو وهددو .. يعني مستحيل يكون بينكم عرس ؟ اهلك واخوانك ماح يقبلو بيهو ..
ياخي شوفي حياتك وفكري في زول غير عابد .. الشي العرفتو زي ماحكيت ليك .. تاني عابد مابجي البلد دي.. ولاعندو نية .. والله نصيحة ليك شوفي غير عابد ماعندك معاهو مستقبل ..
قالت لي والله يامحمد انا قدر ماحاولت اتخلص من عابد ماقدرت .. انا مههوسة بيهو .. قلت ليها على كيفك انا نصحتك ..
طلعن مني بجاي .. وانا بقيت اتبسم براي .. قلت والله ياصفاء قصتك قصة؟
قوليها ربنا كريم يا صفصف .. ربنا قسم اجمل واطيب منك.. والله بقيت احس بي تجاها باحاسيس مسيخة مساخة .. العسل العندي ده .. يمسخ اي حاجة .. ربنا يكف العوارض ويجمعني بيها بالخير ..
اها مرت الايام والعرس جا ياجماعة .. واليوم الموعود يوم عيدي .. وليلة عمري ..
يوم العرس الصباح .. نحن عملنا الكرامة في بيتنا .. وناس خالي مناسبتهم في صالة في شارع المطار .. المفروض نحن بعد العقد نمشي ليهم في الصالة .. وانا والله اليوم داك شغال زي الدربكين .. مرة في صالحة ومرة في الجريف ومرة في الصالون بتاع الحلاقة .. ومرة في محل تجهيز العرايس .. وصرف صرف .. قروش قروش حكاية ماتتخيلوها .. غايتو لو الصادق اخوي اتهرب من العرس ماغلطان .. هه
وعملنا الكرامة .. وومشيت اجيب العروس .. وطبعا ماعندي اصحاب .. بس وليد الحبيب. و اولاد اهلي .اولاد اعمامي واولاد خيلاني وناس الاسرة بس .. هم الواقفين معاي .. وليد ومعاهو ود عمي اسمو محمد فيصل .. جابو العربية المزينة .. ومشينا نجبن العروس .. كانت ولا اجمل ملاك هابط من السماء .. شايلة من البدر نورو .. وشايلة من الزهرة لونا .. وجملة من عبق الأريج..
وانا راكب معاها في العربية كدا .. وماشين علي الصالة .. حسيت اني انا السلطان سليمان القانوني .. وكل مرة بعاين ليها بطرف عيني .. فرحان فرحة وهي ذاته تتبسم .. مامصدقه .. وبقيت بتونس معاها بالوسوسة .. ومحمد فيصل سايق العربية .. ووليد راكب معاهو قدام .. وبتونسو براهم .. وعربيتي ورانا سايقا ابراهيم جارنا .. معاهو بنات . صاحبات تنزيل واختها ..
وصلنا الصالة .. والاضواء والكميرات .. والناس منتظريننا .. في الشارع يازول تعال شوف الحال .. ابوي واعمامي وخالي عبد العظيم واقفين في باب الصالة ..
وكانت ليلة ماقادر انساها في حياتي .. واهم حاجة في الموضوع ..
العرس لافيهو عابد ولاياسين ولا عمار ..
اسعد زواج يكون نضيف من نافخ الكير .. عمار لسع في السجن .. وياسين اصلا انا ما دعيتو .. كلمو ابوي وجا قبيل في الكرامة الصباح .. وحضر العقد من ضمن الناس ومشى .. وعابد في خبر كان ..
وانا ربنا اداني على قدر نيتي .. واصلا ربنا ماقصر معاي ودايما بحمد ربنا اني عايش في كنف امي وابوي .. ومافارقتهم لحظة وماحوجتهم لحاجة ..
وانا هسي الان في اللحظة دي .. بتكلم معاكم .. وساكن مع امي ابوي وعندي اجمل واطيب انسانة .. تنزيل اسم على مسمى .. رحمة نازلة من السماء ربنا يحفظها ..
وكل يوم سماح ام قدوم معانا بالفيديو .. وعمر اخوي .. متواصل معانا .. .. عمر قال الصادق شغال مدروش .. لمن كرشو راحت.. ورقبتو انسلت . بعد ماكانت غاطسة ..
ومؤيد اخوي قدر ماحنسناهو يرجع لينا .. قال مابخلي امي فردوس براها ..
وتنزيل .. الله يبارك في ايامها .. ماسكة البيت .. وبقت لي امي ابرك من البت .. والله من كترة ماخادمة امي ابوي .. مرات بشتاق ليها ما القاها ..
والله بي رغم الأضرار السببوها لي اصحابي .. لكن برضو ربنا وقف معاي .. وفي اخر المطاف .. بوصي الناس .. واقول ليهم ابعدو من صحبة السوء .. واختاره اصحاب تفخرو بيهم ..
وربنا يضع طريقكم اولاد الحلال .. ويصرف منكم اولاد الحرام ..
ويرزقكم رزقا مباركا ..
كتبها محبكم طارق اللبيب ..
وكتب ابني (اللبيب طارق اللبيب) تعليقا علي الرواية اعجبني فقال :_
عاشق البنقــو ،.. والعربادي والسكّير
بسوّولك بلاوي ،،،،،،..، تعطّل التفكير
رسُولنا الكان بحِب ،، النّصح والتذكير
ورانا الصديق الصّاح ،،،، و(نافخ الكِير)
ـــــــــــــ
واخيرا لكم مني محيطات من المحبة والتقدير ..
اكتوبر 2021
