بقلم طارق اللبيب ..
(حلقة خالية من نفاخ النار ) ههه
فكرت كتير في كلام صفاء .. وقلت اي انا بحبها .. لكن لازم ارسيها على بر.. من الصباح كدا ابوي وامي.. بقعدو قعدة جميلة كدا .. بعد صلاة .. ابوي بشرب شاي الصباح وبعد ساعة كدا ولا شوية .. امي بتجيب عدة القهوة .. وبي مزااااج بتعمل ليهو القهوة. .. من طقطق للسلام عليكم .. تقلى ليهو البن وتدقو .. وتغليهو في نفس القعدة .. والقعدة دي ليها سنين .. انا قلت الليلة انا لازم اقعد في قعدة القهوة .. واطرح الموضوع .. عشان الوقت ده المزاج بكون عالي ..
اها جيت جريت لي بنبر .. وجيت قعد قصاد امي .. وابوي قاعد في السرير على يميني .. وقلت ليهم اسمعوني يا امي وابوي ..
انا طبعا اصلا ماحصل اتصرفت تصرف .. من دون علمكم .. ولا بخطو خطوة من غير ماتعرفو .. واي موضوع انتو ماتدو فيهو الشورة والموافقة.. انا بعتبرو مافيهو بركة.. ابوي قال لي عليك الله يامحمد.. قول الحاصل شنو باختصار .. وخلي المقدمات الطويلة دي .. وترتنا ياخ ..
قلت ليهو والله يا ابوي .. بختصار كدااا انا داير اعرس .. داير اتزوج ياجماعة خلاص ..
امي قال لي حمدنا .. (ياجودو الخضضر عودو) .. قلت ليها شنو يعني يا امي الكلام ده؟ .. قالت لي يعني انا فرحانة ..عشان اخيرا فكرت في مصلحتك .. قلت ليها يعني انتي رضيانة ؟
قالت رضيااااانة.. مارضيانة شنو ؟؟ نحن امبارح انا وابوك ده .. كنا بنتشاور في قصة عرسك دي.. ومستغربين كنا بنقول ليه انت لغاية الان .. ماجبت لينا سيرة انك عايز تعرس..
مادام الليلة براك قلت .. نحمد الله .. اها قول الخبر شنو؟ والبت من وين؟
ابوي قال لي عندك مراة ولا نشوف ليك البت المناسبة؟
قلت ليهو اي يا ابوي عندي .. اسمها صفاء .. ساكنين في الفتيحاب .. وابوها كذا .. قال لي اهم حاجة اهلها كيف؟ .. قلت ليها تمااااااااام .. زولتي دي ابوها صديقها .. واقرب من امها ليها .. وبعاملها معامله انا ماحصل شفت ابو بعامل بتو كدا .. قمة التفاهم والثقة والله ..
ابوي قال لي ده المهم .. ونحن من جانبنا موافق على اختيارك .. مادام طلعت لي من بنات خالك .. كفاية ضحيت ليهو بولدي الكبير .. امي قالت ليهو .. مالهن يا اخوي بنات خالو .. خايبات ولاعايبات ..
قال ليها المشكلة مافي البنات .. المشكلة في ابوهن ..
انا قلت ليهم ياجماعة .. ده ماموضوعنا .. ماتفتحو لي الاسطوانة بتاعة خالي دي .. انا هسي عندي مشكلتين .. عندكم لي حل يا ابوي؟؟ ..
قال لي المشكلتين شنو ؟
قلت ليهو البت مستعجلة والله .. وانا ماجاهز .. والمشكلة التانية .. كيف اتزوج قبال الصادق؟؟ ..
ابوي قال لي اولا المشكلة الاولى محلولة .. والتانية محلولة عارف كيف ؟
اولا انت راهن حياتك بينا نحن .. ومامقصر معانا .. في اي شي واخوك عمر .. مجبور يرسل ليك الشيلة.. ومستلزمات الزواج .. وانا علي الكرامة .. تاني الناقص ليك شنو؟
غالبك تعيشها؟
قلت ليهو السكن يا ابوي السكن ..
امي قالت لي البيت ده كبير.. شايلا وشايلنا ... انا ماعندي بت .. دايره لي بنية بت حلال تكون لي زي بتي ..
قلت ليهو يا ابوي .. هسي انت تجيب حق المناسبة من وين ؟ ابوي قبل على امي وابتسم .. وقال ليها كلميهو .. قالت لي انتو يامحمد من كنتو صغار .. حقكم محفوظ دهب .. ابوك عمرو كلو .. كل ما تتوفر عنده قروش .. يشتري لي دهب .. ويقول لي ده خليهو لليوم الابيض .. البسيهو واتمتعي .. يوم بنحتاج ليهو .. عمر اخوك سفرتو بي دهبي ..
وحق عرسك ح يكون من دهبي .. وعرس اخوك الصادق من دهبي ... سنين نحن بنشتري وبنخت بالجرام بالجرام..
الحمد لله لليوم الزي ده اصلك ماتشيل هم ..
طيرت عيني .. وبقلبي قلت يا والله طلعتو ماهينين يا مفتحين انتو ..
والله فاجأتوني ..
قلت ليها ود داسينو وين ان شاء الله؟؟ .. امي قالت لي موكر في حتة لو بقيت حاوي مابتعرفها ؟؟
طلعو دافننو قدام بابا الحمام تحت السراميك .. في برطمانية بتاعة بدرة تانك الزمان ديك .. لو في زول متذكرها ..
المهم انا مشكلتي الاولى اتحلت .. ومشكلتي التانية الصادق اخوي .
لكن قبل ما اقول ليهم المشكلة التانية .. ابوي قال لي تعرس انت.. وتخلي الزول القاعد زي كوم الزبالة ده.. لمن يعرف يكسب القرش . ونتأكد انو زول مسؤلية وبمسك المراة .. انا مابعرسلو لو طق راسو بالحيطة .. لو ماقام وخلا خمالتو دي .. وطلع شاف ليهو شغلة ..وكسب القرش ..
مالو مكسر ولا اعمي ؟
قلت ليهو طيب يا ابوي .. اديني فرصة اتكلم معاهو .. احتمال اقدر اقنعو .. ابوي قال انت كل مرة بتتكلم معاهو .. وهو بقول ليك فتشت شغل ومالقيت.. انت قايل انا ماعارف ؟
قلت ليهو النجربو للمرة الاخيرة .. لو سمع كلامي وقام بدا اي شغل نحن نعرس الاتنين .. مع بعض ولا رايك شنو؟
قال لي يهداك امش شوفو .. وامي تدق في البن وتعاين لينا ..
انا طوالي مشيت عليهو في غرفتو الطرفانية ديك .. واقعة في الركن الشمالي الغربي للبيت ..
مشيت ليهو .. لقيتو نايم ومنكفي كدي على بطنو .. ويشخر والساعة ماشة على سبعة صباحا ..
قلت ليهو الصادق الصادق قوم .. عندي معاك كلمتين .. قال لي عليك الله يامحمد .. اختاني جاي ولاجاي .. ما اكشك بحاجة .. زاعجني من الصباح ..
قلت ليهو كلمتين بس وبعداك نوم ..
قال لي اها قول انا سامعك .. وما قام على حيلو .. راقد ومغمض عينيهو .. قلت ليهو .. نحن قررنا نعرس ليك .. رايك شنو؟
قال لي انتو منو القررتو تعرسو لي ؟ قلت ليهو انا وابوي وامي ؟
قال لي والقال ليكم انا داير اعرس منو ؟
انتو بتقررو على كيفكم ؟ قلت ليهو ياخي بصراحة .. انا عندي رغبة اعرس وعايزك تعرس معاي .. شوف ليك مراة وحاول قوم بدري اشتغل عشان تأسس ليك اسرة ..
قام علي حيلو .. وقال لي اقوم بدري اشتغل .. عشان اعرس موش كدي ؟
انت قايلني عاجبني الناس البعرسو .. ويشتغلو زي الحمير عشان يعيشو الحريم الملاعين .. ياكلن حقك وينبزنك .. انا ما داير اعرس يابشر .. ولا داير لي مراة ولا داير اشتغل ..
لو كترتو معاي الكلام ده .. بطفش اخلي ليكم البيت ده .. قول لابوي الكلام ده .. ما تسببو لي ورم راس ياخ .. امشي شوف شغلتك عرس ولا انتحر اختاني بس ..
ودخل ايدو تحت المخدة .. طلع الكيس وختا ليهو سفة .. قدر بعرة الحمارة ..
ورقد راجع ..
لالا لا .. الليلة الصادق زهجان زهجة.. ماطبيعية.. اجتمال عشان قطعت ليهو نومتو .. اصلو نومة الصباح دي حلوة .. للزول البتعلم عليها ..
انا اتضايقت من كلامو .. بس مابقدر اقول ليهو كلمة تزعلو .. لانو في النهاية اخوي الكبير .. نحن متربيين على احترام الكبير مهما كان ..
طلعت مشيت على ابوي .. قلت ليهو يا ابوي كلامك صاح .. الزول ده ماعنده استعداد لاي مسؤولية .. ولاعندو رغبة في عرس .. حتى انا مابنتظره ..
طلعت من البيت ماشي على المنطقة اتصلت بصفاء ..
صباح الخير يا ست الناس ..
قالت لي صباح النور .. يا سيدهم انت والله ..
قلت ليها في بشارة كبيرة
قالت لي بشر .. اها ..
قلت ليها والله .. ان شاء الله في الاسبوع ده .. انا ح اجي اتقدم ليك ..
قالت لي شنو شنو؟ قول تاني ؟
انت يامحمد .. امبارح القريبة دي ماقلت لي داير ابدا من الصفر ؟
قلت ليها انتي مالك؟ الامور اتسخرت تسخير الهي ..
وحكيت ليها الحاصل كلو .. والكلام الدار بيني وبين ابوي وامي ..
قالت لي والله دي فعلا بشارة يامحمد .. بس والله في مشكلة صغيرة .. ماعارفها تقيف لينا ولالا ..
قلت ليها اللهي شنو؟
قالت قصة السكن في بيتكم دي .. احتمال ابوي مايوافق عليها .. قلت ليها انا بقنعه .. قالت لي والله هو دايما بقول انا ماعندي بت بتسكن في بيت نسابتها .. من كترة المشاكل في اسرتنا الحصلت بسبب الحاجة دي ..
عماتي اتنين اتطلقو بالسبب ده .. حتى امي .. لمن ابوي سكنها في بيت اهلو .. من اول ايام كرهوها العيشة .. لغاية ماعمل بيت براهو .. عشان كدا بطنو طامة من قصة المراة تسكن مع نسابتها .. وقال بناتي لازم الواحدة يكون عندها بيتها الخاص .. بعيد من نسابتها ..
قلت ليها المهم .. انا بجي بتقدم ليك ومعاي ابوي واعمامي واخوالي .. وبحاول بقنعه. انا ياصفاء امي مازي الحريم .. والله انا امي تعاملك احسن معاملة .. وتعتبرك بنتها .. لانها اصلا مشتاقة للبت .. بتديك الحنان الكان مفروض تديهو لبنتها ..
قالت لي خير نجرب .. وانا بساعدك في الموضوع ده .. انا ابوي زي صاحبي يامحمد .. لكن مرات لمن يكون عنده منطق مابقدر اقنعه ..
قلت ليها هو رايو فيني انا شنو ؟ خلي الحاجات التانية ..
قالت لي بتتذكر اليوم الجيتني في المستشفى .. وانا قلت لابوي اديني اضانك .. ووسوست ليهو .. عارف قلت ليهو شنو؟
قلت ليها اها قلتي ليهو شنو؟؟
قالت لي قلتليهو رايك في الزول ده؟؟ شنو انا عايزاهو الزول ده .. ابوي قعد يضحك .. وقال لي هسي انتي في تعبك ده وتقولي كدا .. يعني .. الناس في شنو .. وانتي في شنو؟ .. اها لمن رجعنا البيت قلت ليهو اها يا ابوي .. رايك في الزول شنو ؟؟
قال لي والله ممتاز لابعد الحدود .. وراجل شهم وظاهر عليهو ود حلال ..
وده راي ابوي فيك يامحمد ..
قلت ليها خلاص .. ده المهم .. والباقي مقدور عليه .. انا ياصفاء بعد اسبوع من الليلة نحن معاكم ..
واتفقنا وقفلنا .. جيت تاني اتناقشت مع امي وابوي .. في قصة السكن دي ..
امي قالت لي .. اجي يابنات امي .. بيتك كبير زي ده .. تمشي تشتري بيت بمبلغ وقدرة ونحن ماعندنا ليهو قدرة .. ولا تأجر بالشي الفلاني .. البيت ده نحن اشتريناهو كبير كدي .. عشان يسكنكم التلاتة .. هي لو ما دايرة معانا مخلط .. ابني ليها في الطرف الشرقي ده ..
ولا افصل ليها الغرفة الشمالية دي .. واعمل ليك هول وحمام وافصل ليها عيشتها .. لكن انت سندنا تمشي تسكن بعيد مننا .. ونحن محتاجين ليك .. لا والف لا ..
انت ياكا الباقي في راسنا .. عمر اخوك بعيد .. والصادق وجودو زي عدمه ..
انا سمعت كلام امي .. وعاينت لابوي اشوف رايه .. قال لي بتعاين لي مالك .؟
كلامي نفس كلام امك .. ولا انت رايك شنو؟ .. قلت ليهو وده راي انا برضو ..
كدي نحن اول نمشي نتقدم ليهم ..
قال لي لالا .. اسمع كلامي .. امشي ليهم زيارة انت اول .. واقعد مع ابوها واتونس معاهو .. واشرب معاهو الشاي .. وحاول اتكلم معاهو في النقطة دي .. لو اتفقتو تجي نمشي معاك .. واحتمال ماتتفقو نحن نجرجر .. ونجرجر اهلك في فارغة؟ نمشي لشنو ياخوي ..
قلت ليهو جدا يا ابوي على العين والراس كلامك برضو كلام عقل ..
تاني يوم اتصلت على صفاء .. قلت ليها اسمعي ياصفاء انا جاي اشرب معاكم شاي المغرب .. واتونس مع ابوك شوية .. ونتكلم في ترتيب جية اهلي ليكم ..
قالت لي حبابك .. جاي متين؟؟ .. قلت ليها بجي بكرة .. بعد المغرب حضري الشاي .. عايز اشرب الشاي من يد مراتي فاهمة؟ قالت لي حاضر ياعزيزي ..
ومر اليوم تقيل .. و المغرب جاء .. وانا ركبت عربيتي وماشي على الفتيحاب .. وخايف زي الزول الماشي ليهو لامتحان مصيري .. خايف من ابوها يعصلج في قصة السكن دي .. ويركب راس .. ربنا يهون القواسي..
الى اللقاء ..
