قلت ليها اها ياصفاء .. ما عندك اي محاولة في الموضوع ده؟ ولا انا اقنع؟ ..
قالت لي والله ابوي يامحمد الشايفاهو ده .. مافيهو طريقة محاولة ..
وخايفة اتكلم معاهو زيادة واخسره .. ابوي ده يامحمد صاحبي الوحيد في الدنيا دي .. والله ماعارفة اعمل شنو؟؟ ..
والله يامحمد انا فعلا حاولت معاهو .. و قدر ماحاولت اعكس ليهو وجة نظري .. بس ماسك لي في كلمتين .. ما دام ديل اصحابه .. ماينفع معاي .. لو كان بقى ملاك ..
مادام دي سمعتو ياصفاء .. ماينفع معاي .. حتي لو كلامك عنه صاح ..وانا صراحه يا محمد ماقدرت ارد عليه في النقطتين ديل .. بصراحة يامحمد بصراحة .. اصحابك هم الضروك وضروني .. محمد انت كنت مصاحب ناس دمروك من كل ناحية ..
بتتذكر يا محمد انت لمن حكيت لي عنهم .. انا قلت ليك شنو؟
قلت ليك يامحمد .. انت ما دام مصاحب ناس زي ديل .. منو الح يصدقك انك مازيهم .. انا سمعت من نفرين انك انت كبيرهم الذي علمهم الاجرام ..
وانت قلت لي .. بس حسبي الله ونعم الوكيل .. وانا مابهموني الناس التانين بتهميني انتي ..
شفت يامحمد هسي الموضوع وصل وين ؟..
انا ماعارفة هسي يامحمد .. افقدك ولا افقد ابوي . الموضوع ده ما ح يمشي لي قدام.. ودي قسمتي .. الحمد لله على كل حال .. انا من زمان كان مبدأي اني ما احب لي زول الا بعد الزواج .. خايفة من الكوارث الزي دي .. لكن نقول الخير فيما يختاره الله ..
صفاء بتتكلم وانا مبنج .. زي الكاني مبكم .. ماقاددر انطق بي كلمة ..
قلت ليها يا صفاء .. اديني فرصة اشيل نفسي .. وبرجع ليك .. قالت لي لالا يا محمد .. ماترجع لي تاني .. البيناتنا ينتهي الان ..
انا ابوي مابقدر اجبرو على انسان هو ماعايزو .. وهو كمان ماح يجبرني على انسان ماعايزاهو ..
قلت ليها كيف يعني ؟ تاني ماح نتكلم مع بعض ؟
قالت لي لالا معليش والله مابقدر تاني اتكلم معاك .. الموضوع ده ماح ينفع .. وانا مامستعدة افقد ابوي عشان سعادتي .. خليني يامحمد .. قسمتي كدا الحمد لله..
والخير فيما يختاره الله .. انا استخرت ربنا .. واكيد .. لو في خير في زواجي منك .. كان الموضوع تم على خير ..
في اللحظة ال صفاء قفلت مني التلفون .. انا غمضت عيوني مساااافة قلت يارب لطفك ..وشلت نفسك حسيت بيهو اخر نفس لي في الدنيا .. لكن فعلا حسيت بانو ربنا ثبتني .. ونزلت على قلبي سكينة كدا غريبة .. فوضت امري لله ورضيت بقدر الله .. وقلت في نفسي دي مانهاية الدنيا ..
واحتمال ربنا كاتب لي قدر افضل من صفاء .. وطويت صفحة صفاء من اليوم داك ..
بس لكن بصراحة .. ماقدرت انساها يعني بتذكرها .. بدون ما اجيب سيرتها والتواصل طبعا انتهى .. وكم يوم كدا نفسياتي كانت تعبانة .. وفاقد صوتها وكلامها معاي في التلفون .. وطريقة كلامها .. وعباراتها الجادة .. اتذكر وتجيني عبرة تقفل لي حلقي ..
وطبعا حكيت لامي وابوي .. الكلام الحصل ده .. وانو الحصل ده كلو بسبب اصحابي .. وابوي قال لي بالمناسبة يامحمد .. الراجل ابو صفاء ده راجل عاقل .. وانا لو كنت في مكانه .. بكون ده نفس موقفي .. وامي كان عندها نفس الراي ..
انا بقيت منزوي من علي نفسي .. وقافل على روحي زي الاهبل .. وكم يوم ماقدرت امشي الشغل .. بطني طامة ومستاء استياء غريب ..
وكل مايرن تلفوني ..اتخيل انها دي صفاء ويطلع غلط .. لكن الموضوع بمرور الايام بدا يتلاشى ..او بالاصح بدت حدتو تخف .. وقالو الزمان كفيل بمداواة الجروح ..
مرت الايام وانا بديت اتأقلم .. وصفاء بقت بالنسبة لي ذكريات جميلة .. من الماضي ..
وماعارف الحاصل عليها شنو نهائيا .. مرت شهرين من يوم افترقنا .. وانا حياتي ماشة كويس.. وبقيت مواطب على صلاتي في الجماعة .. المغرب والعشاء والفجر ديل ..بقدر المستطاع بمشي المسجد .. وحاولت اتعايش مع الناس.. واكسب سمعتي علي الاقل .. .
فكرت اكون صداقات مع ناس مختلفين .. ناس يكونو رجال واصحاب مواقف.. والتزام ومخافة من الله .. لكن للاسف العنصر ده نادر في المجتمع . .. يعني ممكن تلقى زول ملتزم بظواهر الدين.. لكن ماعندو مواقف بتعريفة .. وتلقى راجل يسدها ويقدها .. لكن ماعنده مخافة من الله ..
المهم تعبت وانا بفكر .. ياتو زول البلقى فيهو الصفات دي .. مع اني ماطالب حاجة مستحيلة ..ماشرط تكون صداقة شديدة يعني .. لكن علاقات جيدة مع اشخاص .. على قدر كبير من الاحترام والتقدير والالتزام ..
يوم انا راقد في الصالون .. جاني واحد من شباب الحلة .. اسمو وليد النور .. قاعد الاقيهو في المسجد طوالي .. دقة لي الباب .. ودخل قال لي يامحمد ياخ انا جاييك في خدمة .. وان شاء الله ماتردني .. قلت ليهو ان شاء الله اقدر .. قال لي ياخي انا والله .. اتخرجت من الجامعة بدرجة الشرف .. لكن للاسف مافي وظيفة هسي بتعيش ليها زول .. والشهادة يهديك قاعدة كمنظر وبرستيج اجتماعي لاغير ..
وانا عايز اشتغل لي شغل زي الناس.. ومن زمان فكرت في المكنكة .. وفكرت اجيك .. بس الناس الله يهديهم .. دايما بحذروني منك.. وقالو لي محمد ده انسان مفسد.. وبتاع مخدرات .ووو ..
لكن انا شايفك غير كدا خالص ..
حتى ناس البنقو ذاتهم هنا قالو انت ماعندك علاقة بالموضوع ده ..
انا عندي ودخالتي سطلجي كبير .. اسمو منتصر .. بقولو ليهو مونتي بتكون بتعرفو.. قال لي ياخ ماتسمع كلام الناس ديل.. محمد ده ماعندو علاقة بالشي الاخضر ده نهائي .. انا بعرف كل الركابين .. الزول ده ماحصل ركب الموجة دي ابدا .. اسألني انا ..
انا قلت ليهو والله ياوليد نقول سبحان الله .. الناس البصلو .. يتهموني بالكذب .. ومنتصر الساطل يبرئني .. غايتو الدنيا ماشة بقانون غريب خلاص ..
المهم انت يا وليد طلبك شنو؟ .. قال لي انا عايز اشتغل معاك .. تعلمني الصنعة ..
قلت ليهو .. ومن بكرة .. جاهز انت؟ والله في فترة وجيزة اخليك معلم تعمر المكنه براك. .. واتفقنا على كل شي ومشى ..
وبقينا نطلع الصباح مع بعض من الحلة .. ونمشي المنطقة ونشتغل ونجي سوا .. ونمشي المسجد ونتونس .. ونقعد بالساحدعات في حلقات القرآن .. والحمد لله سمعتي .. في الحلة الان بدت تسترد .. اي زول يتكلم عني كلام جميل .. انا ووليد .ونستنا مختلفة خالص من ونسة ناس عابد وعمار وياسين والوهم ديل ..
وبمرور الايام بقينا اصدقاء من الدرجة الاولي .. وربنا بدلني صديق من خير الاصدقاء.. لغاية كتابة الحروف دي هو زي اخوي ود امي وابوي ..
ـــــــــــــــــــــــــــــ بعد اسبوعين ــــــــــ
.. سمعت خبر في الحلة .. قالو عابد جاء .. سالت امي .. قلت ليها انتي عابد بصح لقوهو؟؟ .. قالت لي والله سمعت .. ولاهسع مامشيت لامه عشان اقولها الحمدلله على سلامتو .. انت يا محمد ماتمشي من ضمن الناس .. وقول ليهو الحمدلله على السلامة ..
قلت ليها والله يا امي الزول ده شدة ما انا ممغوض عليهو ومتضايق منه لو شفتو احتمال اضربو بمصيبة اجيب اجله .. تقولي لي امشي اقول ليهو الحمدلله على السلامة .؟..
قالت لي لالا انت ابدا ماطبيعي .. علي كيفك يازول ..
الصباح طالعين انا ووليد .. على الشغل سألته .. قلت ليهو انت صحيح عابد لقوهو؟ .. قال لي اي ياخ .. لقوه بس لقوه عيان شديد والله الزول ده .. لقاهو عباس يوسف .. حايم في شوارع المسالمة .. حفيان وهدومو مشرطة .. وبتكلم براهو .. وشكله اسابيع مامستحمي .. الزول يامحمد بكون فوتت بيهو سجارة .. قلت ليهو في علمي .. عابد من زمان بطل البنقو .. لكن بتاع بنات وطلس ..
قال والله بس الزول ده بقى مجنون .. وهسي قالو ودوهو المستشفى العصبية ..
لكن ماعندي فكرة كاملة .. قلت ليهو انا بلاقي ياسين وأساله من الحاصل.. قال لي ياخ مالك ومالو .. خليك في حالك ياخ .. قلت ليهو والله صدقت .. مالي ومالو؟
بعد يومين من كلامي ده لاقاني ياسين .. قال لي وين يازول انت؟؟
قلت ليهو الشغل البيت .. البيت الشغل .. و المسجد ..
قال مابتسأل من عابد؟ .. قلت ليهو انا قلت ليك عابد ده .. ما عندي ليهو حاجة .. قال ياخي الزول ده عيان ومحتاج لينا نقيف معاهو .. قلت ليهو عيان مالو؟
قال ياخ الزول ده عندو اضظرابات نفسية .. واهله لغاية الان ماعارفين كان وين الفترة الفاتت دي كلها .. بس جا مجنون عديل .. يتكلم براهو ويضحك براهو .. ومرات يجيب كلام لافي السماء ولافي الارض .. ومرات يضحك ومرات يبكي .. ودوهو المستشفى والدكتور قال عنده اضطرابات نفسية عنيفة .. وادوهو حبوب ورفض يستعملا .. ولو في زول ضغطو عشان يسأله كان وين ؟؟ بضارب ويصارع ومابعرف اي زول من ناس بيتهم .. وهسي هم ماقادرين عليهو .. وكل مرة يطلع من البيت ويمشو يجيبوهو ..
قلت ربنا يشفيهو .. قال لي دايرين نقيف معاهو .. ونشوف ليهو علاج انا وانت .. في النهاية الزول في يوم من الايام كان اكتر من اخوك .. قلت ليهو اقيف معاهو انت ياخوي .. انا مافاضي .. ولو سمحت تاني ماتجيب لي سيرة عابد ولا سجم ..
عاين لي كدا قال لي والله يامحمد انت اتغيرت شديد .. وبقيت مغرور .. عاينت ليهو كدا ومشيت ..
يوم انا ماري بشارع حي العرب القصاد زرايب العيش بهناك .. الشارع البطلعك على شارع العرضة .. قريب من حتة ناس حافظ ..
في الشارع الماشي جنوب شمال ده .. زي الساعة 9 صباحا كدا .. اعاين القى ليك عابد قاعد في الضل .. في الارض ياكل ليهو في سندويش ..
وقفت العربية ونزلت .. كان قاعد قدام دكان مقفول متجه جيهة الغرب .. قدامو حجر بتاع اسمنت .. قعدت جنبو فوق الحجر ده .. وقلت ليهو زيك ياعابد .. عاين لي كدا وقال لي اهلا يامحمد .. وقبل راجع ..
وقال لي مالك داير شنو؟ قلت ليهو بتعرفني ؟ قال لي مابعرفك كيف؟؟
انت الزول الجبان .. الخوتك زي وشك .. الفيك اتعرفت انت ..
عليك الله قوم اختاني .. قلت ليهو طيب انت لمن كويس كدا .. مالك بتستهبل على الناس .. وبتدعي الجنون ؟
قال لي والله انا لاعيان ولامجنون .. لكن مضطر .. قلت ليهو مضطر لي شنو يعني البخليك تدعي انك مجنون .. ؟..
قال لي ما شغلك قوم قوم اتفكفك ..
قلت ليهو طيب .. وريني كنت وين .. والحصل عليك شنو؟ موش انا صحبك .. (طبعا الشمار حارقني لمن مطلع عيني) ..
لمن سمع كلمة انا موش صحبك دي .. اتصلح في قعدته واتفرجخ في الواطة وقبل علي قال لي خلاص يعني؟؟ ح نرجع اخوان زي اول ؟
قلت ليهو ان شاء الله .. بس انت قول لي .. قال لي بتحفظ السر ؟ قلت ليهو بحفظه ..
قال لي والله انا لاعيان ولا حاجة .. لكن ماعايز اقول لزول انا كنت وين .. ؟.. لكن انت بقول ليك ..
الى اللقاء ..
