قلت ليهو طبعا ياعابد انت انتقمت فيني انتقام ماتتخيلو.. عارف موضوعي مع صفاء انتهى بسببك .. لانو ابوها سأل في الحلة.. وكلموهو اني انا صاحب عابد .. وحكو ليهو قصة يوم نطيت في بيت ناس مودة وانا دسيتك ..
عشان كدا يا خينا ربنا يشفيك لكن ماتتوقع مني مساعدة ..
والحصل ليك ده كله انت تستحقو وزيادة ..وانا لو كنت في محل اهل مودة او اهل عفراء ..بطبق فيك نفس النظرية خصوصا اهل مودة ..
عارف انت في القانون بتعتبر قاتل من الدرجة التالتة ..
القتل ياحبيبي دررجات .. في قتل العمد من الدرجة الاولى .. وفي قتل شبه العمد من الدرجة التانية .. والتالتة وهلم جرا ..
مودة دي لو كانت قاعدة في بيتها وماسوقتها وديتها لبيت الناس ديل .. انت ماكنت ح تكون في الموقف ده ..
ياخي انت البت لمن خافت .. وانت عارف الخوف بالنسبة ليها خطر .. كان على الاقل تطمنها ..وتقول ليها مابقرب منك ..وتطلعها طوالي عشان ما تحصل ليها حاجة .. لكن نقول قدرك كدا..
قال لي ياخي انا كنت ناسي مرضها ذاته .. وما اتوقعت اصلا انها تموت تقول لي الدرجة الاولى والتانية ..؟
قلت ليهو اصلا القتل الخطأ بحصل كدا .. اصلا القتل الخطأ انت مابتكون قاصد تقتل الزول لكن بموت بسببك .. بتكون فعلت فعل ..سبب له الموت ..
المهم انت المفروض تتعاقب اقل حاجة المفروض تدفع دية ..
وامشي اسأل العلماء من الكلام ده ..
يعني هسي انت ماعرفت الناس ديل الرسلهم ليك منو؟ يعني عندك احتمالين احتمال ابو مودة واحتمال اخو عفراء ..
قال لي اي ماعارف ياتو فيهم .. قلت ليهو لقد تفرق دمك بين القبايل ياابو العبد ..المهم يا خوي فتك بي عافية ... وداير امشي ..قال لي يعني فايتني ماشي وين؟ ما ح تسوقني معاك؟
قلت ليهو والله ياخينا انا تاني مابركبك في عربيتي دي ..ولابمشي معاك في شارع الله ده .. قال لي طيب انت هسي موش وعدتني .. قلت ليهو ما وعدتك انا قلت ليك ان شاء الله .. لكن وعدت ربنا قبلك.. انت وعمار ويس تاني ماعندي معاكم خوة .. بقى يقول لي والله كلامك ده ما من قلبك يامحمد .. انا عارف قلبك بحن .. ومشيت منه واصلت سيري كاني ماسمعت شي..
اليوم داك كلو انا بس بفكر للحصل للزول ده .. وماعارف العمل ليهو الحكاية دي منو؟ .. لكن زي ما قالو المصريين ياخبر النهار ده بفلوس بكرة يبقى ببلاش..
والايام مرت وانا تاني ماسألت من عابد ولا اشتغلت بيهو الشغلة وقلت في قلبي (حمار خنقو حبلو) .. سبحان الله حتى مع وليد ماقاعد اتكلم عن عابد ..والقصة السمعتها منو ديك دفنتها في شارع حي العرب داك ماقلتها لاي زول ..
يوم تقريبا بعد اسبوع ولاشي.. اتصل علي زول من رقم غريب .. قلت ليهو الو .. قال لي كيفك يامحمد .. انا عابد .. قلت ليهو اتفضل.. انت رقمك ماطلعتو قال لي ولاعايز اطلعو ده ..رقم جديد لو حبيبت سجله معاك .. قلت ليهو هسي انت ضارب لي داير بي شنو؟
قال لي انا مافي .. انا سافرت النهود .. قلت ليهو مشيت لشنو؟
قال لي والله يامحمد للاسف الدكتور قال مافي امل للعلاج.. وانا كرهت البلد .. وما ادس عليك خايف برضو اتعرض لاذي تاني .. لانو لو العملو فيني كدا اهل مودة اهل عفراء بكونو راصدين لي .. والعكس ..
بس سافرت ومافي زول عارفني مشيت وين الا انت وناس البيت .. اكتم عني وماتكلم زول ..
انا ي محمد تاني البلد دي ماجاييها عندي خالي ودخالة امي وزول صاحبي شديد في النهود شغال ترزي .. مشيت ليهو وربك يسهل .. مع السلامة .. قلت ليهو مع السلامة .. واتلاشى عابد من القصه..
كما اتلاشى عمار..
انا في الفترة دي ..كل مرة تعاودني ذكريات صفاء .. بس الفترات اتباعدت والشي الفي قلبي قلا شديد .. وماعارف لوهي اتزوجت زياد ولا لسع قاعدة ساي .. وطبعا مستحيل اتصل عليها ..
اها طال الزمن ومرت الايام. يوم جاتنا خالتي فردوس .. فردوس دي ساكنة في الثورة الحارة العاشرة قريب من شارع شيكان ..
جاتنا وجاء معاها مؤيد اخوي الصغير.. طبعا دي ماحكيتها ليكم .. مؤيد اخوي من عمره 7 سنة قاعد مع فردوس في العاشرة زي ولدها لانها هي ما عندها جنا .. فامي بتريدها شديد .. طلبت من ابوي انو مؤيد يدفعوهو لي فردوس .. ومن الوقت داك قاعد معاها هسي عمره قريب ال17 سنة ..
ومابجينا الانادرا .. في الاجازات بجي .. او زيارات خاطفة كدا ..
لمن يجينا بقول انا ماشي بيتنا ههه .. وبقول لي فردوس يا امي .. وبقول لامي ياسعاد باسمها..
المهم فردوس دي شافتني كدا مدبرس .. وقالت لامي انتي يادي .. انتي مالو محمد ده كدا هم الدنيا فوق راسه ؟.. ولامن وشوو سود .. نعل ماعندو عوجة .. امي قالت ليها اسكتي ساي .. وحكت ليها قصة صفاء .. والحصل فيها ..
فردوس سكتت مسافه وسرحت هناك. وقالت لامي عارفة ياسعاد .طبعا نحن .مشينا لناس عبد العظيم اخوي يوم الجمعة.. قالو جاتو كومة سكري قرب يموت .. الحمد لله .. ربنا نجاهو .. امي قالت ليها والله ماسمعت بيهو.. وانتي ليه ما اتصلتي علي كلمتيني .. قالت ليها والله ياسعاد انا عرفت بالصدفة.. اتصلت اسلم عليهم كلموني .. اها دايره اقولك .والله عندو بتو الاسمها تنزيل دي ..وحات الله مابتقدري تملي عينك فيها مرتين.. ماشاء الله تبارك الله .. وطيبة طيبة .. امي قالت ليها تنزيل منو ؟ قالت ليها تنزيل بت عبد العظيم اخوي .. الاصغر من سماح مرة عمر .ياسعاد..
امي قالت ليها السريرة؟.. قالت ليها اسمها تنزيل.. امها بتقول ليها السريرة عشان مسمياها على امها السرة .. لكن نحن مافينا زول بقول ليها السريرة ..
عبد العظيم اخوي ذاتو هو السماها تنزيل .. فهمتي؟
قالت ليها اها مالا؟
قالت ليها رايك شنو نشوفها لي محمد .. نتكتك الموضوع ده ..
امي قالت ليها .. او ل حاجة محمد ابوهو مابدور عبد العظيم ده.. بشوف العمى مايشوفو .. ومحمد ذاتو هو خالو مابتداورو نهائي .. الموضوع ده مابتم .. انا والله بنات عبد العظيم بريدن زي عويناتي لكن .. نسوي شنو عاد ..
فردوس قالت لامي .. اسمعي ياسعاد .. انا بظبط الموضوع ده لو انتي قلتي خير .. قالت ليها دايرة تسوي يافردوس يعني؟ ..
قالت ليها بس انتي تقولي عندي وجع ضهر.. والدكتور قال عندك قضروف ..
امي قالت ليها اها وبعدين يا المسلطة؟ انتي افكارك الشيطانية اصلك مابتخليها؟ .. قالت ليها افكاري بستخدمها في الخير يابت امي ..
اها بعد داك انا بكلم عبد العظيم اخوي.. اقول ليهو دايرين تنزيل تقعد اسبوع عشرة يوم مع سعاد ..عندها وجع ضهر تساعدها شوية لمن تبقى كويسة ..
امي قاعدة تسمع فيها ومتمتحنة .. وبتقول ليها .. اها ...
قالت ليها اها لمن تنزيل تجي هنا ..ومحمد يشوفها قدام عينيهو .. ويشوف جمالا الطبيعي وطيبتها وادبها .. صدقيني ح يصلح علاقتو مع خالو ويريدو من جديد ..
وانا بوصيها على احمد راجلك .. تقوم بخدمتو لمن يريدوها ويقولو دايرنها ..
امي قالت ليها هوي ها .. فكرتك وحات الله مابتنجح .. قالت ليها نحن ماخسرانين حاجة . لو نجحت الحمد لله ولو مانجحت كل شي بيد الله..
المهم باختصار اتنفذت الخطة من انتاج واخراج فردوس عبدالرحيم ..
يوم العصرية انا جاي من المنطقة .. لقيت ليك البت في بيتنا .. صراحة البت جميلة فوق حد الوصف .. انا طولت ماشفتها حتى في عرس عمر اخوي ماوقعت في عيني .. بتذكرها صغيرة خيال خيال .. لاني اساسا ماقاعد امشي لبيت عبد العظيم خالي راجل مستكبر ومغرور حبتين ..
المهم لقيت البت في بيتنا وشغالة تكنس وتنضف وتضاير في العدة ..
سلمت عليها ودخلت لامي . قلت ليها دي منو يا امي .؟
قالت لي اجي يا اخواني مابتعرفها يعني ؟ قلت ليها يا امي لو بعرفها بسألك؟ دي منو ؟
قالت لي دي تنزيل بت خالك عبد العظيم .. قلت ليها ماشاء الله تبارك الله الزول اصلو مابقول دي اخت سماح ام قدوم؟
قالت قدومك بالواطة .. مالا سماح يا خوي ؟؟ سمحة وزينة وست بيت وسماحتها عينة ... قلت ليها كويس كويس ..
وهسي خبارها يعني متحزمة وشغالة بهدوم البيت .. وعاملة الحالة واحدة ؟.. قالت لي يامحمد انت نسيت انو انا عمتها اخت ابوها؟
انت هسي مالك بتسأل كتير كدي.. مالك ومالا؟ عجبتك نخطبها ليك..
قلت ليها والله لو كان ابوها ماعبد العظيم ..كنت وافقت ليك هسي .. لكن عظمة ده حد الله بيني وبينو .. وبتو ذاتها علي اساس انو ابوها عقيد .. ح تكون شايفة نفسها الاميرة ديانا ..
المهم اخدت كلمتي مع امي ومشيت الصالون .. بعد شوية تنزيل لبست توب امي وجاتني شايلة صينية الغدا .. وباسمة بسمة جميلة خلاص ..
ووقفت برة الصالون وقالت قوم تعال اغسل ليك .. شايلة الابريق .. كبت لي اغسل يدي عشان اكل ..قلت ليها ليه التعب ده .. ماياهديك الماسورة بغسل وبجي .. قالت معليش انت جاي من برة فتران ..
اخدت ليها مسافة كدا وجاتني شايلة الشاي .. ودايرة تشيل صينية الاكل.. قلت ليها ده ما أكل امي انتي عملتي .. قالت لي ايوة عملته انا لانو عمتو ضهرها واجعها؟ انا طبعا نططا عيوني كدا .. قلت ليها ضهرها واجعها من متين؟
قالت لي انت مابتكون عارف لانك اليوم كلو في الشغل .. اي ضهرها واجعها والدكتور قال ليها عندك قضروف ..
انا طبعا اتمليت بالدهشة الغليدة ..قلت معقول امي يكون عندها وجع ضهر وماتكلمني .. وعرفت انو امي بتكضب لكن ياربي هدفها شنو ماعارف؟ .. ..
المهم باختصار كم يوم كدا و تنزيل بادبها وحشمتها ونشاطها وطيبتها وخدمتها المتفانية لي ولابوي ولامي .. خطفت قلوبنا كلنا والله .. وخصوصا انا بقيت اجي البيت من الساعة 3 هههه
بس عشان اشوفها ..اها لمن خلاص انا اتعودت عليها وقلبي ده بقى يضرب كل ما اسمع صوتها او اشوفها مارة بقدامي .. عرفت اني سقطت في فخ عظيم ..
لكن حتى لو انا اتجاوزت عبد العظينم اللديح ده .. البخليهم يتفقو هو واوبي شنو؟
غير كدا عبد العظيم رايو فيني سئ جدا.. بتتذكرو لمن فتاني لي عمر اخوي بسبب قصة عمار؟ يعني الموضوع ماجايب حقو .. وانا لسع ما اتاكدت هي مشاعرها تجاهي شكلها شنو؟
لكن والله ياجماعة البت دي لو الله قسمها لي.. دي الزولة الوحيدة الممكن تمسح لي صفاء من ملفات الذاكرة الى الابد ..
يوم كدا فجأة قالت لامي ياعمتو انتي شكلك بقيتي كويسة والالم راح منك ..
لاني امبارح شفتك وانتي بتزحي في السراير ..
امي طبعا اتخلعت لانها كانت داسة منها الحكاية دي ..
قالت اي يا تنزيل الحمد لله اليومين ديل بقيت كويسة ..عشان انتي ريحتيني الله يريحك .. قالت ليها خلاص ياعمتو .. انا اشتقت لناس البيت .. ممكن بعد كدا تسمحي لي امشي بيتنا؟
قالت ليها مافي اي مشكلة وربنا يبارك في ايامك يابتي .. باكر محمد يوصلك لغاية بيتكم في الجريف .. اصلا بكرة الجمعة وهو مابمشي الشغل ..
قالت ليها حاضر يا عمتو .. اها امي نادتني قالت لي يامحمد ..لو ابوك وافق علي البت دي .. بتاخدا؟
قلت ليها اي والله باخدا ..لكن هي رأيها شنو؟ امي قالت لي انا بعرف ليك رأيها قبل ماتمشي أهلها..
اها بكرة من الصباح الجمعه. وهي بتلملم في هدومها .. خلاص ماشه أهلها امي نادتها جوة في الاوضه..
قالت ليها عندي ليك كلام سر لو بتسكتي عليهو بقول ليك..
قالت ليها سرك في بير ياعمتو قولي بس..
قالت ليها محمد ولدي ده قايل عايزك انتي رايك شنو؟
إلى اللقاء
