جريت جري شديد .. انطلقت زي الصاروخ والله .. زي المواعي .. نعلاتي خليتك مجدعات جم صفاء .. جيت بس وقفت بين عابد والزول القاعد يضرب فيهو ده .. وقلعت يدو من قميص عابد .. لانو هو كان مقبقبو.
الزول ماكضب وقشطني كف .. وانا ما اكضب وارشو ليك بونيه .. لمن ترتح لي ورا .. الناس ديل سندوه من ضهرو عشان مايقع ..
انت بتلعب ولا شنو ؟دي بونية مكانيكيه ..
نحن بنزل المكنة والجربوكسي .. والله انزل ليك سنونك ديل رصة واحدة.. الزول مسك خشمو وبقى يتف دم ..
وجا ماشي علي وانا غمطت يدي كدا دردمتها ..
مستعد اسدد ليهو البونية دي تاني..وخليت عابد وراي..
بس الناس مسكوه. وقال لي انت منو يا... اتلفظ لفظ قبيح..
قلت ليهو انا اخوه..
وخلي عندك ادب ماتتلفظ في بنات هنا..
قال لي وانا اخوها ؟.. قلت ليهو تضربو ليه المفروض تمسك اختك..
قال اسال اخوك قول ليهو كنت قاعد كيف معاها ؟؟
زول ماعندو احترام .. هو بتكلم والناس ماسكنو .. .
واحدين قالو لي ايوة كلامو صاااح قعدة اخوك كانت شينة ..
طبعا هو زول ضخم كدا .. طول وعرض وعابد ضعيف وقصير ..
وانا حجمي متوسط لكن عضمي نصيح .. احمد الله ممكن عادي امسكو ادق بيهو الواطه..
انا قبلت علي عابد .. قلت ليهو كنت قاعد كيف انت؟؟ ..
قال لي عادي والله..
اخوها قال ليهو عادي ياود الحرام .. انت كنت راقد ليها فوق كرعيها. ياخايب.
انا قلت ليهو ما اختلفنا ..
هو كان جابرها ولا غاصبها .. انت بتخاف من اختك ولانفهم شنو؟
قال لي انت اوع تتفاصح .. والله انا الليله مابسيبك .. ولسع بتفتف دم ..
والناس يقولو ليهو استهدا بالله ياخي ..
الموضوع مابستاهل سوق اختك وامشي البيت.. والناس ولاماسكنو مسكة شديدة .. هو بتحجز ساي لكن تاني مابجي علي بعد البونية دي ..
وعفراء واقفة هناك ترجف وتبكي.. اخوها عاين ليها وقال اصبري انت يا رمة لمن تصلي البيت والله الليله الموت الاحمر..
وعابد وراي وشو مورم من الضرب والكفيت ..سوقتو قلت ليهو ارح خليهو يجي ورانا .. عشان اوريهو الطفا النور منو.
مشينا وهو ساق اختو ومشى والناس مسيرنهم.
واحد بتكلم معاهو.. وبهدي فيهو .. لكن هو اساسا البونية دي وزنت ليهو التايم ..
والله اداني كف كمان.. والكف جاني بالغفلة ..
ماكنت متوقعو يضربني..
وانا سايق عابد وماشين علي صفاء.. عاينت مالقيتها ولقيت نعلاتي مجدعات في الحتة الكنا قاعدين فيها والبت مافيشة .. لبست نعلاتي وبقيت اتلفت يمين شمال شرق غرب بالله التقول الواطة انشقت وبلعتها..
قلت ليهو صفاء مافيشة .. انا خليتها قاعدة هنا .. دي مشت وين كمان؟ .. يا الله تلفونها ماشلتو..
وعابد ولامركز معاي يهبش في وشو المورم ..
قلت ليهو يا زفت.. راقد فوق كرعين البت في الحتة العامة دي .. والناس ماشين وجايين فوقك..
والله انا كان شفتك كنت براي لطشتك .. تستاهل..
قال ياخ عادي الزول ده براهو مفتري وعاجبو حجمو.. ماشايفو ضربك وانت اساسا جيت تحجز ..
قلت ليهو انا ماجيت احجز ..انا جيت اقيف معاك وانقذك منو كان ماسكك وانت عامل زي العصفورة . .. لقيت نفسي بدون ما اشعر مستلم الموضوع .. هسي عليك عان ..بسبب الحركة العبيطة دي ..طيرت مني البت.. تاني انا القاها وين دي؟ ..
قال لي متين هو انت .. قبيل ماقلت ما عندي ليها شي .. لكن اقول ليك بسيطة انا بتصل علي عفراء بعد تهدا المشكلة دي ..
واجيب لك رقمها ..
انا طبعا قعدت اضحك من البليه. قالو شر البليه مايضحك ..
قلت تااااني عفراء هسي انت عفراء دي عارف المشكلة الوقعت فيها بسببك ولاغبيان؟.
قال يعني اخوها ح يعمل ليها شنو .. والله الحبة مايسويها .. هوكان بقدر يهبشها كان ضربها هنا قدامنا ..
قلت ليهو عليك الله ياعابد .. اقعد هنا خليني الف شوية افتش للبت دي .. اشوفها مشت علي وين ..
قال لي امشي .. وقعد الكلب.. الليله اخد علقة زي العلقة .. ان شاء الله بس يطير من التعصر علي بنات الناس ..
انا بقيت لافي في الساحة وبتلفت زي المجنون ..
كايس لصفاء والله غربلت الساحة دي غربله .. مالقيتها ..لمن قنعت جيت راجع قلت ليهو ارح نمشي البيت.. وتاني عليك لو ماشي ليك لبت ماتسوقني معاك ولاتضرب لي ..
قال لي جدا مابضرب ليك الا اجيب ليك تلفون صفاء..
قلت ليهو حركتها العملتها دي غريبة.. وعليها ستين علامة استفهام .. كيف تزوغ كدا بالطريقه دي .. ياربي تكون شافت الشكلة وخافت هربت مافي غير كدا ..
المهم سوقت عابد ومشينا ركبنا عربيتنا ورجعنا البيت .. وانا الطريق كله بفكر في صفاء وبتخيل في وشها وحاسي بحسرة .
وصلت البيت ونزلت عابد وقفلت معاي منو ..
باكر الصباح مشيت الورشة عادي .. انا في الورشة الساعة 11 صباحا جاني تلفون من عابد .. قال لي اسمع يا محمد .. والله في مشكلة كبيرة وشكلنا ورطانين فيها انا وانت ..
قلت ليهو يازول قول بسم الله مشكلة شنو؟
قال اتصلو علي ناس .. قالو لي نحن من طرف عفراء .. الكانت معاكم في الساحة ..
بنسأل من صفاء نحن اخوان صفاء .. الزولة دي من امبارح ماجات البيت ونحن عرفنا انها طلعت مع عفراء .. ولمن سألنا عفراء قالت اخر مرة كانت مع واحد اسمو محمد صاحب عابد ..
ونحن اتصلنا عليك ..
انا حكيت ليهم يامحمد .. انو حصلت مشكلة معاي اخو عفراء ضاربني ومحمد خلا صفاء قاعدة .. وجاء دخل معاي في المشكلة وخلاها .. لمن رجعنا لصفاء مالقيناها في مكانها ..
انا والله ياجماعة عابد ده بتكلم معاي كدا حسيت بي كرعي سااااااااحن .. ياخوانا دي مشاكل شنو البقع فيها كل مرة دي؟ ..
اها ياعابد وفي النهاية قلت ليهم شنو؟
عابد قال لي كلمتهم بالحاصل .. بس الناس ديل شكلهم ماصدقوني .. اخوها البتكلم معاي ده قال لي كدي خلينا من كلامك ده ..وصف لينا بيت ناس محمد بتاعك ده .. وبيتكم انتو .. نحن في الفتيحاب وح نجيكم هسي ..
انا قلت ليهم هسي محمد في الشغل.. وانا بره البيت . لكن بنجي العصر ..
قالو لي الساعة 4 ونص نحن معاكم ..
وصف لينا .. وصفت ليهم ورجعت ليك طوالي الكلام ده هسسسي .
قلت ليهو والله دي مشكلة يا عابد .. يعني هسي صفاء دي تكون مشت وين يعني? ..
والله دي مصايب تجيك في صمة خشمك .. والمشكلة الحقيقية .. فعلا اخر زول كان مع الزول المختفي هو المسؤل الأول اما القانون ..
انا بقيت مامركز في الشغل نهائي .. وخشمي ده بقى مسيخ .. موية ماقدرت اشربها .. ومشيت قعدت في الضل وبقيت متمحن في الحكاية دي ..
في واحد من المكنيكية المعاي جا قعد في الضل .. محتار حيرة اكعب من حيرتي ..
قلت ليهو اها انت مالك برضو في واحدة مالقوها؟ .. قال لي شنو يامحمد .. انت بتتريق ولا شنو؟
قلت ليهو مالك محتار كدا يا عصعص؟ .. اسمو عصام .. قال لي والله المراة دي مكرهاني حياتي ذاتو قلت ليهو مراتك؟
قال لي ايوة ياخي ..
قلت ليهو احكي لي مالها؟ ..
قال لي تتخيل امبارح بالليل جاتني مكالمة من واحدة اسمها ريان .. عندها عربية صلحتها ليها قبل كم يوم .. وشكلها العربية خستكت تاني .. مارديت على المكالمة .. لاني عارف مرتي شكاكة وموسوسة ..
جدعت التلفون في السرير وخشيت الحمام ..
اها قامت ريان رسلت لي رسالة في الموبايل قالت لي (شغلك مانضيف ياعصومي) ..
وتلفوني بجيب الرسايل اشعارات في اعلى الشاشة .. قامت المراة شافت الرسالة .. جيت من الحمام لقيتها ليك وشها يلعن قفاها !!
وبقت تنبذ فيني .. ياتافه ياحقير يابتاع البنات .. اتقي الله .. انت عندك بت المفروض تخاف عليها .. وشنو وشنو كلام كتير ..
قلت ليها في شنو يابت الناس؟ .. قالت لي البت الاتصلت وابيت ترد عليها ..
عايزة توريك انو شغلك مانضيف ..(ياتو شغل ده ياعصام ) دايرة افهم ..
وقت انت شغلك مانضيف .. عايزة بيك شنو ؟؟
الشارع ما ملان رجال يسدو عين الشمس انت عايزة بيك شنو؟
انا بس فتحت الرسالة .. وقريت الرسالة وطوالي اتصلت علي البت .. قلت ليها خير في شنو؟ والرسالة دي بتحكي عن شنو؟
قالت لي العربية تاني بقت مابتدور ..
فتحت الاسبيكر .. وقلت ليها كرري الكلام ده تاني .. قالت لي يعني ماسمعتني؟ قلت ليك شغلك مانضيف ..
قلت ليها شغل شنو؟
قالت لي انت نسيتني يا عصام؟ .. قلت ليها ايوة نسيتك.. وريني شغلي مانضيف في شنو؟
قالت لي في العربية الاشتغلتها لي تاني ابت تدور..
طق قفلت ليها الخط في وشها.. وقبلت على مرتي قلت ليها عرفتي الشغل ده مقصود بيهو شنو؟
قالت لالا .. انا ماهبلة انا بفهم .. والزول المتصل بعرف لمن تفتح الاسبيكر الصوت بتغير والكلام بتغير ..
قدر ماحاولت افهمها انها غلطانة وفهمت غلط مادايرة تفهم..
والله دمي فار ومديت يدي عليها .. هسي اللية الصباح قامت لمت هدومها وشالت بتها ومشت اهلها ..
والله ياجماعة لمن سمعت قصة عصام نسيت همي .. وقلت ليهو طيب هسي انت ح تتصرف كيف ؟
قال لي بمشي افهم اهلها بحركاتها دي.. لو ما اقتنعت بطلقها والله ..قلت ليهو لالا الطلاق ده ماخيار انا بديك المشورة ..
امشي ليها في بيت وماتتكلم عن المشكلة .. قول ليها انا عندي معاك مشوار
وسوقها معاك..
وامشو لبيت البت ست العربية .. خليها تشوف الحاصل بي عينها .. لانو ياعصام .. المراة الغيورة بتفسر اي كلام على خيالها ..
قال لي ياخي والله دي بتتخيل خيال .. بتاع البنقو مابتخيلو ..
والغريبة انو بتصدق خيالها وتبني عليهو قصص وبرامج وتتصرف كأنه الخيال حقيقة ..
اها عصام قال لي انت الحاصل عليك شنو .. وشك مسود كدا ومحتار برضك .. حكيت ليهو القصة ..
قال لي قصتك ماعندها حل ياخوي .. بس البت دي اختطفوها وبتكون اتعرضت للاغتصاب وقتلوها ورموها في خور ..
وانت المتهم الاساسي في القضية نصيحتي ليك ..قوم خلي الضل ده واركب عربيتك وامشي باري الخيران ..
امكن تلقاها مجدوعة في حتة ..
او اقولك حاجة بس اهرب .. واهل البت دي اوعك تلاقيهم بقتلوك ..
طبعا عصام زول متشائم جدا واصلو مابطمنك بحاجة ..
ولابديك حلول ايجابية .. والله زاد علي الخوف الفي قلبي ..
والله انا اليوم داك ماقدرت احل لي مسمار ولا اربط لي صامولة ..
وبعد كلام عصام ده بقيت لافي في المنطقة زي المجنون وماعارف اعمل شنو؟ وكل مرة اتصل على عابد واقول ليهو اها الجماعة ما اتصلو عليك تاني قالو لقوها ولالا؟
يقول لي ابدا والله والله يامحمد انا خايف خوف ماطبيعي ياخي فعلا مشكلة يعني البت دي فاتت وين؟
قلت ليهو والله بس بقت لي ندامة ياريتني لو مامشيت معاك .. ياخ انا قلت ليك البنات ديل مشاكلهم اكتر منهم عشان كدا من زمان انا بعيد كل البعد عن عالم البنات ..
المهم جات الساعة تلاتة ونص وانا ركبت عربتي ومشيت البيت وقفتها وضربت لعابد .. وقعدنا في الشارع برة في ضل شجرة جم سبيل .. منتظرين الناس ديل يتصلو علينا عشان ماندخل اهلنا في المشكلة ..
اها ما كتير كدا واتصل اخوها على عابد .. قال ليهو نحن وصلنا ننزل بياتو شارع ؟
الزول الاسمو محمد معاك؟؟
عابد قال ليهم ايوه قاعد معاي .. ونحن منتظرنكم في الشارع .. انزلو بالشارع الفلاني ..
اها ماكتير كدا واشوف ليك بوكسي دبل قبين.. ملان رجال جوة وبره .. والله جاتني خوفة لمن قلبي ده داير يطلع بي حلقي ..
الى اللقاء ..
