المهم لمن ودونا لوكيل النيابة .. واتحرى معانا الاتنين .. كل واحد براهو .. وكلامي القلتو لناس المكافحة .. نفس الكلام القلتو لوكيل النيابة بالنص ..
وكيل النيابة لمن لقى اقوالي متطابقة مع اقوال المتهم الاول .. اللهو عمار .. عمل لي امر افراج ..
وسلموني تلفوني ومفاتيح عربيتي.. المهم بصراحة ياجماعة ناس المكافحة ديل اتعاملو معاي معاملة راقية جدا .. والله مالقيت منهم الا الخير اي وقت صلاة اقول داير اصلي بجهزو لي
وهسي لمن اخلو سبيلي .. وصلوني لغاية مكاتبهم وسقت عربيتي عزيزا مكرما .. الزول الماسك في الله مابتجيهو عوجة بس الزول يمشي صاح وانا والله مشيت مع عمار بنية صافية .. مستحيل ربنا يضيعني ..
انا جيت على البيت ..وخشيت الصالون وقفلت الصالون علي.. لاغاية قريب المغرب ..ما دخلت على ناس البيت.. والله على حالة نفسية ما تتخيلوها ..
وجواي احاسس مختلفة .. غضبان من عمار غضب لايوصف .. ومبسوط منه انو كان موقفه معاي صادق .. في اقواله قدام ناس المكافحة و النيابة .. وندمه واسفو على الحصل مأثرني .. ومتأثر انو ح يخش في ستين وادي مظلم .. لانو ورطان بالجد ..
وفي اثناء رقدتي دي الباب دقه ..طلعت فتحت الباب لقيتو ده عبد الله ابو عمار فتحت ليهو الباب الكلام ده يوم الاحد زي الساعة 5 تقريبا ..وشو اسود وهم الدنيا ده ماليهو سلم علي بي طمام بطن .. وقال لي الحاصل شنو يامحمد؟ ..
طلعت ليهو برة ..وقلت ليهو ..بحكي ليك تعال .. ناس البيت ديل مايعرفو الحاصل ..
انا ماكلمتهم .. عليك الله مافي زول منهم يعرف حاجة .. انا ما كلمت اي بشر من الحلة دي ..
قال مافي شي بندسه ياولدي .. السويتوها كبيرة ..
المهم حكيت ليهو الحاصل .. قال فعلا ياهو الكلام القالوهو .. عمار اتصل على اخوانه ومشو ليهو .. لكن انا لا ماشي ليهو .. ولا داير اشوف وشو ان شاء الله يعدموه الكلب الوسخ ..
لكن بصراحة ياجماعة الراجل ده بقول في الكلام ده ..وعيونو ملانة بالدموع .. مما يدل على انو الكلام ما من جواهو.. شكله فعلا خايف على ولده بالجد .. في النهاية هو اب ..
بعد عرف الحقيقة مني قال لي الحمد لله انك طلعت براءة .. وانتا راجل ماتستاهل انا بعرفك وبعرف اخلاقك .. انا يامحمد عمار طلع من يدي بسبب امه .. انا والله حاولت كل المجهود اربيهو وابعدو من طريق الشر .. من كان صغير امه مدلعاهو وفاتله ليهو فوق حبلو وانا لو نهرتو ساي امه تصر وشها وتعمل زعلانة .. وتقول لي الولد بتجيب ليهو نفسيات .. قول ليها خمي وصري .. وقعد يتكلم معاي ويهضرب بي كلام انا ماعندي بيهو اي علاقة .. الراجل شكله حلج ..المهم اتكلم كتير وانا مارديت ليهو بس بقول ليهو ان شاء اللامور تجي على خير ياعمي .. وفات علي كدا
بعد صليت المغرب طلعت من البيت زي عادة بمشي على الشارع كدا لقيت الخبر انتشر في الحلة انتشار النار في الهشيم ..
انا لمن لقيت الموضوع انتشر .. قلت الحق اكلم ناس البيت بالحاصل .. قبل مايجيهم الخبر من الناس ..اني انا مشترك في الجريمة دي .. جيت راجع البيت .. والحمد لله لقيت امي وابوي قاعدين مع بعض ..
قلت ليهو الصادق اخوي كلمكم اني سافرت مدني صاح .. الوالدة قالت لي اي كلمنا وقال جاي انك يوم التلاتاء ماعارفة مالك جيت سريع كدي الميت حيا ولاشنو؟
قلت ليها والله يا امي انا لامشيت مدني ولاشي ..
وحكيت ليهم الحصل من وقت التلفون الجاني يوم الجمعة من الصباح والحصل بالتفصيل ابوي ده بعد ماكان مكوع قعد على حيلو وحسيت بيهو ارتبك ارتباك اول مرة اشوفو في وشو..
وبرضو اداني نفس المحاضرة السمعتها من المحقق بتاع المكافحة والسمعتو من وكيل النيابة .. في انو استاهل عشان ده صاحبي ..
باختصار شديد .. انا حاسي نفسي ماطبيعي نهائي .. وشخصيتي ذاتها اليوم داك بقت ماياها ..
المهم حاولت رجعت لحياتي الطبيعية.. ومشيت على شغلي .. الصباح بطلع الشغل بجي المساء بقعد في الصالون بنخس في تلفووني لمن انوم وباكر بمشي الشغل وقطعت علاقتي مع اي بشر ..
مرات مرات بكون عندي تواصلات مع صاحبي اسمو عابد وصاحبي ياسين .. ديل ناس بالجد وقفوا معاي وقفة رجال بجوني مرة مرة في الصالون وبتونسو معاي وهم الطلعوني من الحالة السيئة دي ..وكلنا اتفقنا على انو عمار ماييستاهل الحصل ليهو .. لاانه كان فردتنا الرابع .. لكن دقس وكتمت فيهو ..
بعد كم يوم سمعت منهم انو عمار اتحاكم بتلاتة سنة سجن .. والله اتاثرت لمن عيوني ملن مع اني كرهتو بس برضو اتاثرت ..
ويس وعابد قاعدين يمشو ليهو .. وانا مامشيت ليهو نهائي .. ماقادر اشوف وشو ..
لانو ضراني ضرر بالغ كل الحلة بقو ينظرو لي كمروج مخدرات .. وانو طلعت من المشكلة بواسطة خالي.. لانو فعلا عندي خالي عقيد ساكن الجريف بس والله خالي شكله ماعندو خبر اساسا بالموضوع ..
انا طلعت ببراءتي لانو المحققين ووكيل النيابة اخلو طرفي قانونيا .. لكن السمعة ووصمة العار الوصمني ليها عمار قعدت معاي فترة لايستهان بها الحمد لله ..
ومرت الايام والناس بدت تنسى .. والامور الحمد لله ماشة وانا مشتت بعربيتي .. ماشي الشغل وجاي من الشغل .. ومتواصل مع عابد وياسين بس
هم الاتنين العارفين براءتي وقاعدين يدافعو عني بوراي .. ووضحو لناس الحلة كلها اني انا ماعندي علاقة بالموضوع ده نهائيا ..
ومابقبلو فيني اي كلمة .. اصحاب والله مواقفهم مابنساها ليهم ابدا ..
وعلاقتنا زادت واتوطدت اكتر وياسين خلا البنقو .. وعابد قال لي والله بس مرة مرة .. لكن ماشي اخليهو ان شاء الله ..
في يوم من ذات الايام عابد قال لي يامحمد ياخي طالب منك خدمة .. قلت ليهو من عيوني ..
قال لي ياخي عفراء ح تلاقيني في مول عفراء .. ههه انا طبعا ضحكت قلت ليهو دي غلوتية ولاشنو؟ عفراء في مول عفراء؟
قال لي ياخي سيب السخافة .. عايزك تمشي معاي.. لانه جاية معاها صاحبتها .. وما دايرين نخليها براها .. انا بتونس مع زولتي.. وانت اقعد مع صاحبتها ..
لو نفعت معاك ثبتها .. اصلك هامل .. ولو مانفعت معاك كسر معاها الدقايق ونسة وضحك وخلاص .. قلت ليهو ياخي انت عارف انا ماعندي حاجة للبنات .. قال لي ياخ عشان خاطري.. اعتبرها اختك واتونس معاها ونسة اخوان ..
قلت ليهو بشرط انو يكون مكان عام ..
قال لي ياخي اصلا نحن ح نخش المول..
ونجي ناخد لينا قعدة في الساحة الخضراء.. وبعد داك نوصلهم اهلهم اصلا هم في الفتيحاب..
يعني في شارعنا ما ح يودونا مشوار كدا ولا كدا..
انا حسيت انو الناس ديل بدو يستغلوني.. عشان العربية.. لكن بس انا ماعايز اكون جبان ..
طبعا زي ماحكيت ليكم عابد عندو زي اربعة او خمسة حبيبات .. دي واحدة منهم .. وفي واحدة انا بعرفها شديد ساكنة في حلتنا اسمها نهى .. زولة ممتازة ومهذبة وبت اصول ومنقبة .. ووفية ليهو جدا ..
لكن عفراء دي عندها حبيب تاني.. انا مرة لقيتها خالطاهو في شارع النيل.. لكن طبعا ما كلمت عابد مالي ومال الفتنة ..
المهم يازول مشينا زي الساعة 4 كدا ونزلنا في عفراء وقفلنا االعربية وهو ضرب للبنات .. واتلاقينا .. عفراء ياهودي انا بعرفها طبعا .. لكن صاحبتها الجات معاها دي منووو يالطيف يالطيف ..
اول مرة اشوفها.. جميلة جميلة جدا ..
عابد لمن شافها قال ابو الزفت.. عاين دي كيفنها ..والله حقو الزول يرخي الوهم دي .. ويخش في القنبلة دي بي كلو ..
قلت ليهو ياخي عليك الله خلي عندك دم .. ذرة من الوفاء ماعندك ..
ضحك وعاين لي .. قال وفاء يا ثعلبان .. قول عجبتك ونمرت فيها ..
وانا في الحقيقة فعلا البت عجبتني جدا .. وقلبي قعد يدقدق زي الاهبل ..
المهم جو وقفو وسلمو علينا وقال لي دي صفاء يا محمد .. قلت ليهو اتشرفت بيها والله .. ياهلا ..
زولك طوالي ساق عفراء من يدها .. وخلا لي البت النجاضة الاسمها صفاء ..
لكن سبحان الله البت دي مهذبة شديد..
والله على الاقل في اللقاء الاول ده اخدت عنها انطباع انها زولة مؤدبة وعندها حياء .. يعني من نوع البنات البتتكلم براحة ومابتعاين ليك في وشك .. وبتضحك براحة كدا .. وعندها حضور عظيم والله..
المهم زوله رهيبة والله عجبتني شديد..
و انا بقيت سارح فيها لمن عترت مرتين .. ويادوب فكرت في العرس .. اول مرة قلبي يضرب عشان بت .. البنات ديل ماشغال بيهم اصلا انا ..
عابد بقى لافي في المول مع عفراء .. وانا بقيت لافي مع صفاء .. وبدت تتونس معاي شوية شوية ..
قلت ليها ياصفاء انتي قريتي وين؟ قالت لي انا اتخرجت من هندسة السودان .. السنة الفاتت ..
عندي تلاتة اخوات وماعندنا اخو .. قلت ليها سبحان شنو المصادفات دي؟ انا عندي تلات اخوان وماعندنا اخت ..
قالت لي خلاص الحمد لله انا لقيت لي اخو وانت لقيت ليك اخت ..
طبعا الكلام ده ما ريحني.. لكن اكلتها في حناني .. يعني البت لمن تقول ليك انت اخوي.. او انا اختك معناها الموضوع فيهو (ان) كبيرة..
انا بقيت ساكت بعد الكلمة دي.. تاني ما اتكلمت معاها ..
اخدنا لفتنا ولاقونا ناس عابد.. قالو يلا نمشي الساحة .. خلينا عربيتنا واقفة في محلها ومشينا الساحة .. واتمشينا كتير جوة الساحة وجينا قعدنا .. عابد قعد هناك مع عفراء .. وانا قعدت مع صفاء يعني نحن بنشوفهم وهم شايفناا.. لكن كل اتنين قاعدين مع بعض .. لمن قعدنا قلت ليها يا صفاء انا عايز اسألك سؤال ...
انتي مخطوبة؟ قالت لي ابدا والله عايزني ود عمتي.. وانا ماعايزاهو ..وامي رافضة الموضوع .. بس ابوي هو المتمسك بالحكاية دي.. شكلو عايز يبر اختو بي انا ..
قلت ليها طيب يعني مابتحبيه .. صح؟ قالت لالا مابحبو نهائي مامهضوم .. ومابتعاشر .. بعرفو انا من شافعة مرة اداني كف عشان عطست ليهو جمب اضانو ..
قلت ليها فعلا ده زول وهم اها .. ماقلتي لي ماعندك علاقة عاطفية مع اي زول يعني ..
قالت لي والله الحقيقة يامحمد اليومين دي العلاقات العاطفية بقى فيها خداع وغش وكضب.. وفقدنا الثقة في الناس .. بس قلنا الواحدة تلقى ليها زول بخاف الله.. وودناس ومتربي وتعرس وبعدين الحب يجي بالعشرة ..
قلت ليها والله انتي كل مرة بتثبتي لي انك زولة واعية وفاهمة ياخي في الزمن ده مافي بت بتقول كلامك ده ..
قالت لي طيب احكي لي عنك انت خليتني احكي انا وانت ماقلت اي حاجة
قلت ليها انا ياستي زول بسيط وشغال مكانيكي .. وبداقش الحمد لله بالحلال
ووضعي الحمد لله كويس مستور احسن من ناس كتار .. امي وابوي موجودين الحمد لله وعندي تلاتة اخوان اتنين اكبر مني واحد اصغر مني يادوب بقرا في الثانوي ..
ساكنين جيران ناس عابد وزول صاحبي شديد .. قالت لي غايتو عابد ده ..عفراء بتحبو حب هوس عديل .. يعني الزول ده لو ماعرسها ..ممكن تنتحر او تجن ..
قلت ليها ان شاء الله ربنا يتم ليهم على خير.. ويسهل ليهم امورهم ..
وانا طبعا جواي متأكد انو عابد مازول عرس ولاشي.. زول وهم وداير يقضي وقت وبس ..
وعفراء ماعارفة انو عابد بحب ليهو كمية زيها كدا ومامعروف ست النصيب ياتها ده لو بقى في نصيب ...
انا بتونس معاها.. فجأة التفت اعاين لي ناس عابد .. القى ليك شكلة قايمة هناك .. قلت ليها ده شنو عابد ده مالو؟؟!!! .. في زول ماسك عابد ويلطش فيهو .. وعفراء وواقفة بعيد وتبكي .. كمية من الناس بدو يتلملمو قمت جاري عليهم عشان انقذ صاحبي ..
الى اللقاء ..
