زي الساعة تمانية ونص كدا .. جاني التصال من صفاء .. وحسيت التلفون برقص .. وبغني راب .. والله قربت انطط قبل ما ارد عليها ههه .. وسلمت علي سلام بارد .. قلت ليها وين انتي ياصفاء؟
وليه مابتردي علي؟ ولا بترجعي لي؟ ورسلت ليك رسايل كمية ولارسالة ما رديتيها ..
قالت لا لا مافي حاجة ؟ انا سكت مسااافة قلت ليها اسمعي ياصفاء انا مابعرفك؟ انا بعرفك شديد ..
هي فعلا علاقتنا كانت فترتها بسيطة .. لكن انا بفهمك شديد ..
خليك زولة شجاعة .. وقولي لي الحصل .. دخلتي في علاقة مع زول تاني .؟
قالت لي ابدا والله ..
قلت ليها خلاص وافقتي بزياد وماعايزة تقولي لي؟؟ ..
قالت لي مستحيل اقبل بيهو ..
قلت ليها طيب ياخي .. احكي لي الحاصل .. صفاء عليك الله الخلقك تقولي لي الحقيقة انتي مالك .. ؟
سكتت مسافة وسمعتها تبكي .. قالت لي والله في كلام كدا .. بس انا حلفت للزول الكلمني .. ومابقدر اقول ليك ..
قلت ليها خلاص قولي لي الكلام .. وما تقولي لي الزول القال ليك منو ..
قالت لي صح يا محمد انت قاعد تتاجر في المخدرات ؟
طبعا انا لمن قالت لي كدا حسيت بموية صاااقطة انكبت فوق راسي ..
قلت ليها طيب حلو .. انتي بتصدقيني لو حلفت ليك بالله .. ولا محتاجة لدليل تصدقيني بيهو .. قالت لي بس انت جاوبني ..
قلت ليها والله يا صفاء .. انا من الله خلقني .. ماهبشت المخدرات بيدي . ولاحصل سجرت .. ولا سفيت ولاسكرت الحمد لله .. فكيف اتاجر في المخدرات .. بس حصلت معاي مشكلة قبل فترة .. والمفروض احكيها ليك عشان ماتسمعي الكلام معكوس ..
قالت لي مشكلة شنو ؟
حكيت ليها قصة عمار .. والحصل من طقطق للسلام عليكم ..
قالت لي صدقتك والله .. لكن في حاجة تانية ..
انتي قبل كدا حكيت لي عن حرامي جاكم في البيت .. وناس الحلة كانو مطاردنو .. انت طارتهم معاهو ..
قلت ليها صاح حكيت ليك .. بس ماحكيت ليك الحقيقة .. وممكن احكيها ليك هسي .. ومن حقك تصدقي او لا ..
قالت لي والله انا بثق فيك .. وما متخيلة في يوم من الايام تكذب علي ..
قلت ليها اصبري خليني احكي ليك .. اليوم داك وانتي بتتكلمي معاي وانا ماعندي خبر باي حاجة .. حصل حصل حصل ..
بس انا معترف اني غلطان ..
لكن والله الكلام الوصلك كلو وصلك مغلوط ..
قالت لي والله بس انت هسي في كلامك ده كذبت علي .. واليوم داك ماحكيت لي الحصل ده .. قلت ليها والله بس كنت عايز استر صاحبي .. ومافي داعي افضحه ليك ..
قالت لي يامحمد انت ما دام مصاحب ناس زي ديل .. منو الح يصدقك انك مازيهم .. انا سمعت من نفرين انك انت كبيرهم الذي علمهم الاجرام ..
قلت ليها بس حسبي الله ونعم الوكيل .. وانا مابهموني الناس التانين بتهميني انتي ..
قلت ليها والله انا اكبر غلط في حياتي .. اصحابي ديل .. وقدر ماحاولت اتخلص منهم متشربكين فيني زي السرطان ..
قالت لي خصوصا عابد ده .. زول مامريح نهائي .. تتخيل جاني في البيت ودقا الباب لابوي .. وابوي عرفه طبعا .. لانه شافو يوم كنتو جايين المستشفى ..قال ليهو انا عايز صفاء ..
عندي مشكلة .. ومافي زول بحلها لي غيرها .. ابوي الله يديهو العافية ..
جا ناداني وقال لي عابد صاحب محمد الفي صالحة جاك بره .. عايز يتكلم معاك ..
وجيت قعدت معاهو .. قال لي اول حاجة عايز منك توصليني بي عفراء لانها بقت ما بترد علي ..
والحاجة التانية محمد قاعد فوق الجمر .. عايزك تتصلي عليهو .. قلت ليهو بكلم ليك عفراء .. وبتصل علي محمد .. قال لي اوعديني انك تتصلي عليهو ..
قلت ليهو بوعدك .. حتى مشى فعلا زول لايوق لياقة غريبة ..
قلت ليها هسي صدقتيني ولا لا ياصفاء ..
.. قالت لي صدقتك لكن زعلتانة منك .. لانك كذبت علي .. الحب يامحمد بتبني على الثقة .. والثقة بتنهار بكذبة واحدة ..
وانا اتجاوزت الكذبة دي .. بس تاني لو سمحت .. ما تكذب علي ولاتخفي عني حاجة .. وانا مابكذب عليك عمري ..
قلت ليها والله بعاهدك .. تاني ما اكذب عليك لو خاتين لي سكين فوق رقبتي ..
بس اهم حاجة انتي هسي رضيتي مني؟؟ وخلاص ح نرجع لبعض زي ما كنا ؟
والله انا من دونك انت عايش زي الميت ..
قالت لي كويس .. بس يامحمد عايزة منك طلب .. لو بتعزني انا اصحابك ديل ماينفعو معاي .. يا اما تفارقهم او تفارقني ..
قلت ليها تاني لو شفتيني .. معاهم او سمعتي بي باري واحد فيهم .. ماتتكلمي معاي ..
بس يا صفاء لو ماكلمتيني بالزول القالك الكلام ده منو .. انا مابكون مرتاح لانو مخي بقى يودي ويجيب ..
قالت لي بكلمك لكن في وقتو ..
المهم انا وصفاء رجعنا سمن على عسل .. وبقينا متواصلين .. وانا فارقت عابد .. وبقيت مابتصل عليهو .. ولو اتصل علي مابرد ليهو .. اصلا ياسين علاقتي معاهو بقت خفيفة .. وهو ذاتو علاقتو بي عمار اقوى .. من علاقتو بي انا وبي عابد .. يعني انا لو اتخلصت من عابد ده .. تاني ماعندي مشكلة.. لكن هو لايوق ومشاكلو كتيرة ..
مرة مشيت الفرن جبت عيش .. لمن جيت راجع على البيت .. اشوف ليك عابد من هناك جاي ماشي علي في الشارع .. اقسم بالله رجعت .. عشان ما الاقيهو .. ماعارفو هو شافني ولالا .. باختصار بقيت بتجنبو شديد ..
في الفترة دي عمر اخوي اتصل من السعودية اتصل لابوي .. قال عايزكم تخطبو لي سماح بت خالي عبد العظيم .. في الجريف .. خالي عبد العظيم ضابط في الشرطة برتبة عقيد .. وبنتو الاسمها سماح دي .. قرت طب بس ما متأكد في ياتو جامعة ..
ابوي الله يمد في ايامه .. ما بحب عبد العظيم ده من زمان .. وماكان عايز ليهو مخلط معاهو .. لكن عشان خاطر عمر وامي .. وافق على مضض .. يعني انا حاسي بيهو .. الموضوع ماعاجبو لكن مغلوب على امره ^_^
خالي عبد العظيم ايوة زول ضابط .. واي شي لكن عنده حركات كدا انا ذاتي ماعجباني .. وفي الفترة دي مثل معاي موقف . جبان انا مابنساهو ليهو كلو كلو ..
في اثناء ما كان ايام الخطوبة دي ..
جاء داخل في بيتو .. لقى سماح بتتكلم مع عمر اخوي بالتلفون .. قال ليها بتتكلمي مع منو ياسماح ؟ قالت ليهو مع عمر ود عمتي يابابا .. قال ليها بس لو سمحتي عايز اتكلم معاهو كلمتين وارجع ليك التلفون ..
مسك منها التلفون .. ودخل الصالون بتاعه جوة .. قال ليهو يا عمر ياولدي انا عايز اقول ليك كلام مهم ..
انا عرفت من سماح انو العربية السايقها محمد اخوك دي حقتك صاح؟ ..
قال ليهو نعم حاصل ..
قال ليهو طيب. محمد ولا ناس البيت حكو ليك بالمشكلة الوقع فيها محمد بعربيتك دي؟
قال ليهو مشكلة شنو ياخالي ؟
قال ليهو.. محمد اخوك كان مرحل ليهو واحد من اصحابو بعربيتك .. من صالحة للكلاكلة .. وكانو شايلين بنقو .. وناس المكافحة قبضو عليهو بس محمد طلع منها ..
لكن صاحبو اتسجن .. المهم محمد ده لو ما التزم وفتح عينو .. بقع في مشكلة كبيرة .. وعربيتك دي بتتصادر او تفقدها بطريقة ما او باخرى .. فهمت ياابني؟
عمر قال ليهو فهمت ياخالي وانا ح اتصرف ..
عمراخوي طوالي اتصل علي زعلان .. والله صوتو زي العايز يبكي .. قال ده شنو يامحمد؟؟ .. ده انا الوثقت فيك وخليت ليك امي وابوي وعربيتي .. وقاعد بي جاي قلبي مطمن .. تشيل البنقو بي عربتي يامحمد؟؟
اناقلت انا لله وانا اليه راجعون .. والله ياجماعة.. ح تجيني نفسيات من البلاوي البتقع فوق راسي ..
المهم بقيت احلف ليهو واتجزم .. اني برئ وماعارف اي حاجة .. عن البنقو وكنا ماشين لصاحبو فقط .. قال لي بس يامحمد .. انا من زمان قلت ليك شلة ناس عمار دي .. فارقها .. لكن انت مابتسمع كلامي ..
قلت ليهو والله ياعمر من دخلوني في المشكلة دي فارقتهم .. وتاني ماعندي معاهم صحبة ياها بس .. الحلة الجامعانا دي .. لكن لا قاعد الاقيهم لافاضي ليهم .. وعمار ياهو مسجون .. وياسين مشغول في حالو .. وعابد مقدور عليه .. اطمنك ياعمر ماتشيل هم ..
اها ياجماعة باختصار .. مرت الايام وعمر اخوي قال يعقدو لي على البت .. ويرسلوها لي في السعودية .. ونحن عملنا كرامتنا في صالحة .. فطور والعقد مع الغدا في الجريف ..
الحاجة الداير اركز عليها هنا .. يوم المناسبة دي .. عابد وياسين كانو هم الاتنين بس .. واقفين معاي من قبل الشمس تشرق .. والله خدمو خدمة الناس الببقو لي ماخدموها ... والصادق اخوي خالف كراعه في كرسي .. ويتفرج وهم قايمين على الضيوف .. والله وقفو معاي وقفة .. خلتني انا خجلان من نفسي .. واصلا ماقدرت اقول ليهم حاجة .. يعني زول جاك في مناسبة اخوك ووقف معاك .. وبقى متصدر الموضوع .. وشغال معاك بضميره .. لانك انت صاحبه.. ح تقول ليهو شنو؟ تطردو مثلا؟ ..
بعدين بالذات عابد ده .. انا فعلا خجلان من وجوده في مناسبتنا وخدمته معاي .. عشان سمعتو البقت زي الطين في الحلة .. لكن برضو خجلان منه اقول ليهو شنو يعني؟..
وهو ولا هماهو شغال حفيان .. بي كل همة وتفاني .. ويضحك ويتونس مع الناس .. والله الزول ده كويس شديد.. لو خلا خمالتو ومباراتو للبنات..
المهم المناسبة انتهت بي كل مافيها .. وسماح سفرناها لي عمر في السعودية ..
مرت الايام .. ويوم صفاء اتصلت علي بالعصرية كدا .. قالت لي انت وين يا محمد؟
قلت ليها انا في السلاح الطبي ..
قالت لي نحن في السوق .. معاي صحبتي ممكن تجي تمر علينا نمشي معاك .. توصلنا في طريقك؟ .. قلت ليها يا يوم السعد والله ..
اها يازول مشيت ليهم .. صحبتها المعاها دي اسمها لينا ولا دينا ماعارف .. مامتذكر كويس ..عندها حول في عيونها كدا .. لكن زولة طيبانة لدرجة بعيدة .. ركبو معاي ..
صاحبتها قالت لي يامحمد .. ياخي صفاء عليك الله حذرها من البت الاسمها عفراء دي .. انا اتلكمت معاها ومابتسمع كلامي ..
امس عملت معاها حركة جبانة .. وبرضو هي ماعايزة تبعد منها .. قلت ليها والله يا اختي .. انا اصلا شايف عفراء وصفاء مامناسبين لبعض .. لاشكلا ولا مضمونا ..
انا حسيت انو صفاء زعلانة من عفراء .. لكن في شنو ماعايز اسأل .. ده شي مابخصني .. الا يحكو لي براهم ..
في نص الكلام والزعل ده .. قامت البت قالت لي صفاء .. ياصفاء انتي وعدتيني تحكي ليهو الموضوع داك ..
صفاء قالت ليها كويس هسي بحكي ليهو .. وصفاء طوالي قبلت علي بجسمها كلو .. هي كانت راكبة قدام معاي .. وقالت لي اسمع يامحمد .. انت قبل كدا سألتني القال لي الكلام الفيك ده منو .. وانا ابيت اقول ليك..صح؟
انا فعلا حلفت .. لكن ح اقول ليك .. وامشي اصوم تلاتة يوم .. لانها مابتستاهل استرها .. قلت ليها هي منو يا صفاء ..
قامت حكت لي الكلام القالتو عفراء .. والقالتو نسرين من طق طق للسلام عليكم .. ياهو الكلام الحكيتو ليكم كلو ..
انا قعدت اتبسم .. وقلت ليها غايتو نسرين .. ماخافت الله فيني .. لكن عفراء ماعندها ذنب .. ياها سمعت الكلام زيك .. واقول ليك حاجة .. نسرين ذاتها سامعه الاشاعة كدا ومصدقاها ..
لكن قالو ياصفاء ..
اوعك تظلم انسان بي كلام ناقلنو ..
اطرد شك فؤادك ولا اكّد ظنو ..
يبقى تقربو ويأذاكا قربك منه..
ويمكن تنظلم بي ابتعادك عنه ..
واحسن من كدا واصدق واجل واعلا .. كلام الله العظيم .. (يا ايها الذين امنوا ان جاءكم فاسق بنبأ فتبينوا ان تصيبوا قوما بجهالة فتصبحوا على مافعلتم نادمين) .. صدق الله العظيم ..
قالت لي بس انا حكيت ليك .. لاني وعدتك ما اكذب عليك .. ولا ادس عليك حاجة..
قلت ليها وانا كمان .. عايز اقول ليك حاجة .. بس ماتزعلي مني .. انا وعدتك انو ابعد من ناس عابد .. لكن والله جو في العرس .. واشتغلو معاي ووقفوا معاي وقفة .. وماقدرت اقول ليهم حاجه .. فشنو سامحيني ..
قالت لي مسامحاك يا محمد .. دي ما حاجة واجبة .. وهم جو للواجب من ضمن الناس .. وفي النهاية ديل اولاد الحلة ..
اها طبعا .. وصلتهم البيت ومشيت علي صالحتي .. وانا قلبي قابضني وعندي خوفة كدا غريبة ..المفروض اكون مبسوط.. اني لاقيت صفصف واتونست معاها ..لكن مامرتاح نهائي .. زي الحاسي في حاجة ح تحصل .. واحتمال اكون بتوهم ..
المهم انتو تابعو معاي وشوفو ..وصلت البيت مع صلاة المغرب .. صليت وقعدت مع امي وابوي ..
وعمر اخوي اتصل من السعودية واتونس معانا .. وادانا سماح سلمت علينا ومبسوطين ..
بعد شوية قمت مشيت على الصالون .. واتصلت علي صفاء .. اسألها وصلتي كيف .. واخبارك شنو اصلا بقينا نتكلم كتير بالتلفون ..
يعني حياتنا بااااااااسطة .. وعايشين قصة حب ولا في الاحلام .. ورقدت اتفنقلت على قفاي .. وخلفت رجل على رجل .. وبقيت اتونس معاها .. انا بتكلم مع صفاء .. اسمع ليك طنين زول بتصل في الانتظار .. عاينت للتفلون لقيتو عابد ..
عملت فيها اطرش .. تاني الطنين اشتغل .. بتصل وانا بتكلم ..
ويتصل .. ويتصل .. ويتصل ..اظنو اتصل عشرين مرة .. اصلا لمن يتصل كتير كدا بكون واقع في ورطة .. هسي انا اعمل شنو؟ ارجع ليهو ؟ بس ياجماعة .. عشان تكونو في الصورة .. احكي ليك الورطة الواقع فيها عابد ..
الى اللقاء .
