مشيت علي البيت .. وانا ما مصدق اني طلعت من الورطة دي ..
لكن بقى عندي هم تاني .. ياربي الزول عايزده يعمل شنو لي عابد بالجد شلت هم ..
اصلا عابد زول ضعيفوني وقصير .. يعني مابقدر يقاوم اي مشكلة .. بس قدرته علي البنات . والزول الاسمو عز الدين ده والله زعلان زعلة ماطبيعية مامعروف غايتو البحصل في الايام الجاية شنو..
الصباح بدري وانا وانا طالع على الشغل .. اتصل علي عابد .. ابيت ارد ليهو
دقه لمن زهج .. ابيت ارد ليهو كلو كلو .. انا الزول ده بصراحة بطني طمت منو.. لو زعل او مازعل ماعندي ليهو شي تاني انا ..
والنهار دقه لي... والعصر وانا جاي على البيت دقه لي .. اصلا وكت يتصل كتير كدا .. معناها جاته كارثة ..وشكلي المرة دي الكارثة انا مخمنها تكون شنو؟ لكن تجيهو كارثة ولا يخمو قطر .. ماااابهمني ..
يتصل وانا عاين في رقمو واقول ليهو .. بس مااااابرد عليك الليلة لو نططت ..
وصلت البيت العصرية كدا .. واتغديت وصليت .. ودخلت الصالون اخد لي انطراحة .. بس الباب دقه ..
مشيت فتحت الباب لقيتو عابد .. الله لا غزا فيك بركه ..
قال لي مالك مابترد ؟ قلت ليهو ماعايز ارد .. ماعلى كيفي مالك؟
في شنو؟
قال دقيقة دقيقة انت مالك ياخوي؟ في زول جايب ليك مني كلام؟
قلت ليهو مافي زول جايب لي كلام.. ومامحتاج زول يجيب لي كلام ..
بس انت زول شر وقبيح وقاتل روح .. البت دي ماتت بي سببك .. انت زول شوم ما داير اشوف وشك ده ..
بس فقعها ضحكة طويلة .. الفي اخر الشارع بكون سمعو ..
قال لي لو دي جريمة.. انت مشترك في الجريمة ياحبيبي .. وانا جايب ليك الشمار .. وانا طبعا شمارو عارفو ومخمنو .. بكون حافظ اتصل عليهو وكلمو انو عز الدين كشف الموضوع ..
قلت ليهو اها قول لي الشمار شنو؟ والكلام ده كلو جنب الباب.. اصلا ابيت اقول ليهو ادخل .. قال لي ح نتكلم كدا في الشارع؟
قلت ليهو ايوة.. يا اما اتكلم ولا امشي عليك الله.. انا مشغول مافاضي ليك ..
قال لي انت اكيد بتهظر .. شنو الغيرك مني فجأة كدا ؟ قلت ليهو غيرتني انت بأفعالك المقززة..
قال لي اسمع المهم .. عز الدين ابو المرحومة .. عرف القصة . قلت ليهو القصة ياتها ؟..
قال لي عرف انو مودة كانت في بيت ناس حافظ.. وعرف انو انا كنت معاها .. وعرفك انك انت جيتنا بالعربية .. بس ماعرف انها ماتت وين ؟
قلت ليهو طيب عرف كيف؟؟ يعني علم الغيب؟
قالي لي طيب النحكي ليك .. طبعا مودة بت الحرام اظنها رمت شنطتها هناك .. واهل حافظ لقوها.. واتصلو علي ابوها من موبايلا .. والمشكلة ماعارف كيف فتحو الموبايل.. وابوها ح يقرا رسايلي معاها .. والرسايل كلام صعب شديد ..
قلت ليهو .. طيب حافظ قال ليهو اسمك عديل .. قال لي ايوة قاليهو عااااابد..
لكن انت طبعا حافظ لابعرفك ولاشافك ..بس في زول من الجيران وصف عربيتك وعز الدين بكون عرفها ..
قلت ليهو يازول انا لامشيت معاك ولابعرفك .. لو جو سألوني بنكر ..
انت بس اختاني عليك الله جاي ولا جاي .. امشي امشي .. مايشوفوك معاي انت زول شبهة والله ..
قال لي انت جادي يامحمد في الكلام البتقول فيهو ده؟؟ انت بتطردني يامحمد؟؟
قلت ليهو اي والله جادي شديد.. والله تاني تجيني هنا.. انا بغلط معاك ورفعت صوتي .. ياخي زهجت منه ..لايوق الله ياخدك ..
قال لي والله تاني سلام الله ما اديك ليهو.. انت قايل نفسك منو؟ طلعت زول جبان ياخسارة .. ونبذني ومشى ..
قلت امشي عليك الله .. بلا زفت معاك .. وفات .. قفلها معاي والله كان ما مشى كنت لطشتو ..
لمن مشى انا اتنفست الصعداء .. وقفلت الباب وراهو بس.. عملت ليهو فيها ماعارف اي حاجة من القصة ..
هو طلع وانا بقيت افكر في الامور الحصلت علي مع المخلوقات دي ..
وقررت اغير حياتي .. وابدل كل اصدقائي.. اصلا هم تلاتة ماعندي غيرهم .. بس ياسين زول في حالة ومشغول.. زمان كان بضرب السجارة ..لكن قال خلاها ومامعروف ..
انا لو اتخلصت من عابد ده اموري كلها بتظبط ..
لكن والله ان شاء الله.. اوريك ليهو وش من الله خلقو ماشافو مني ..
هو موش هسي قال لي تاني ماعندي معاك شي .. وسلام الله مابديني ليهو .. لكن اصبر شوفو يومين ..بحتاج لي ويجيني جاري ..ماعندو اي زول غيري انا...
ومرت الايام .. وماظهر لي تاني نهائي ..
والايام مرت فيها احداث كتير .. من ضمنها اتصالاتي مع صفاء ماشة على قدم وساق.. اي ما قاعدين نتلاقى الا نادرا .. لقاءت خاطفة كدا .. لكن بالتلفون بالساعات بنتكلم .. ومرات نتكلم فيديو ..
اها يوم كدا قالت لي .. كلام جدي جد جد .. أكل معاي في اللحم الحي ..
قالت لي انت يا محمد علاقتنا دي ماشة على وين؟
نحن اصلا ما اتكلمنا عن مستقبلنا .. شوف الكلام ده قالته لي بعد كم من علاقتنا .. فترة ماهينة المهم .. قلت ليها انتي شايفة شنو؟
قالت لي انا بسألك انت ..
قلت ليها والله ياصفاء .. انا يوم حبيتك اخترتك بعقلي وقلبي.. عشان تكوني ست بيتي .. وام اولادي ماعندي اي تفكير غير كدا ..
ولا أنا من نوع الاولاد البلعبو على البنات.. الواحد يكون عنده خمسطاشر بت في تلفونو..
لدرجة انو في شباب بعرفهم .. الواحد في تلفونو بتكون في رسايل بتاعة غرام واشواق ..
بنسخ الرسالة لي تسعة اوعشرة بنات من حبيباته ..
وكل واحدة فيهن مفتكرة انو الزول ده بحبها براها..
قلت ليها يا صفاء انا بقول ليك كلام .. انتي ماعارفاهو وماحصل قلتو ليك.. انتي اول زولة انا ادخل معاها في علاقة ..
موش عشان انا مابحب البنات .. لكن لاني عارف البنات مشاكلن كتيرة .. واي خطوة معاهن المفروض الواحد يحسب ليها الف حساب ..
وزي ماكنتي اول واحدة .. ان شاء الله انتي حبي الاخير .. وتاني مابقدر احب غيرك.. المفروض الكلام ده تحفظيهو حفظ .. انتي حبي الاول والاخير ..
وانا عايزك لي زوجة .. بس هسي زي ماشايفة انا اوضاعي ما مرتبة ..
يعني لاعندي بيت ولاعندي عفش ولاجاهز .. بتصبري معاي يبقى نحن نقوم بكل حاجاتنا مع بعض .. ولو مستعجلة .. قولي لي ..
قالت لي والله يامحمد طبعا انت عارف.. انا بت والزمن محسوب علي كل اسبوع يمر من عمري.. بتخسم علي .. لكن انت ولد .. مهما طال بيك الزمن واتقدمت في العمر.. يومك التدور تتزوج بتتزوج ..
قلت ليها اسمعي يا صفاء ..لو قعدتي لمن طال بيك الزمن.. انا مابتزوج غيرك الا ترفضيني براك ..
وانا من بكرة ببدأ في الخطوة الاولى في خطوات حياتي ..
قالت والله يا محمد انت قدامك كتير .. بس ما تفهمني غلط ..وتقول مستعجلة لاني كبرت.. ولاخايفة من البورة .. ابد والله ..
لكن غايتو ماعارفة.. لانو ابوي وامي ديل بدو ينقنقو فيني .. وكل مرة ابوي يلاوز لي بي زياد ود اخته ..
قلت ليها ان شاء الله يصير خير ياصفاء .. واديني يومين وانا برد ليك ممكن؟
قالت لي ممكن.. اخد راحتك وانا راجية قرارك ..
اليوم ده مر علي وانا متوتر توتر شديد جدا..
وكلام صفاء ده طلع عيني من جوة .. اول حاجة انا مابقدر في الفترة القصيرة دي اكون نفسي..
لاني البلمها كلها رايحة في مصاريف البيت ..
ومابقدر اقول لي عمر اخوي عرس لي ..
لانو في اخو اكبر مني اللهو الصادق .. قاعد ومحتاج للعرس اكتر مني..
المفروض يعرس هو قبلي .. عشان علي الاقل يحس بالمسؤلية قاعد كدا زي التور .. لابشتغل ولا عندو هم ..
فعلى كل حال ماممكن اعرس واخليهو .. يعني الناس يقولو علينا شنو؟ عرس الاخو الكبير ..والصغير.. وخلو اخوهم الفي النص قاعد عزابي .. وصفاء هنا مشغلاها لي ..غايتو النشوف البحصل في الايام الجاية ..
بعد يومين كدا من كلام صفاء ده معاي.. لاقاني ياسين في شارع الله .. قال لي تعال يا محمد عايز اسألك.. انت ما بتسأل من عابد ؟ يازول انت مالك مع عابد ده؟؟
.. قلت ليهو عابد منو؟
قال لي عابد منو كمان؟ الليلة بقيت مابتعرف عابد؟ . قلت ليهو دي صفحة انا طويتا من حياتي .. وأسال منه ليه ؟
قال اسمع يامحمد عابد ده ليهو خمسة ايام مفقود .. واهلو بفتشو فيهو ماخلو حتة .. يعني انت ماسمعت بالكلام ده؟ ..
قلت ليهو ابدا والله الا في خشمك ده . طار وين يعني ؟ قال لي والله ده السؤال الجاي أسالك منه انت ..
لانو مافي زول كان اقرب منك ليهو ..
قلت ليهو ابد والله انا لي فترة قطعت علاقتي معاهو نهائيا وماعارف عنه اي حاجة ولا قاعد الاقيهو في الشارع.. لاني بقيت مابطلع من البيت اصلا ..
يعني اهلو ما عارفين مشى وين؟.. قال ياخي بقول ليك فاتحين بلاغ فقدان الفيس كله ملان بصوره .. انو مفقود .. قلت ليهو ديل ناس مواهيم .. بعلنو عنه مالو هو مجنون ولا طفل؟ ..
قال لي والله طبعا قبل فترة عابد قال لي انو في مشكلة بينك وبينو ؟
وموش انا هو كلم الناس كلها انك متشاكل معاهو في شنو ماعارف ..
واهلو ماجو سألوك منه .. عشان عارفين انتو متقطعين .. لكن هسي في كلام ظهر احتمال يكون عندك يد في اختفاء الزول ده انا مااابتهمك لكن بعكس ليك كلام الناس ..
قلت ليهو اسمع ياياسين .. انا بحترمك شديد وما داير اغلط معاك انت بس خلي زول يكون قلبو محدثو .. ويجي يسألني من عابد عشان اوريهم الماسمعو بيهو ..
وحقيقة ياجماعة انا طق ضرب في راسي كلام عز الدين ابو مودة .. وتهديدو ووعيده وقال انو ماح يسيب عابد .. بس مايكون الراجل ده غطس حجر عابد الله يستر ..
وكلام ياسين ده معاي تقريبا بعد عشرين يوم من نقاشي معاهو جنب الباب .. اها طبعا في النهاية قلت لي ياسين .انا بالمناسبة مافاضي والله اليومين ديل بقيت اتأخر وعندي مشاغل ,, ومافاضي للكلامات وحركات عابد دي يتلقى هسي شارد من اهلو كلها كم يوم ويجي مقلع ويضحك يقول ليهم كميرا خفية ماتشتغل بالموضوع ده كتير انت عابد مابتعرفو؟
ياسين مشى وانا مشيت .. انا فعلا ايام طويلة مالاقيت عابد ..
ولاسمعت حتى بانه مفقود .. لاني صراحة بقيت بجي من المنطقة متأخر وبطلع الصباح بدري .. داير اندرش في الشغل عشان اقدر اوفر لي قرشين تلاتة اعمل بيهم حاجة في حياتي ..
المهم رجعت البيت وسألت امي .. قلت ليها انتي صحي .. عابد رايح؟ قالت لي والله قالن .. انت ماعارف يعني؟ .. الحلة كلها بتنضم .. والله انا قايلاك عندك خبر .. لانو الزول صاحبك .. قلت ليها كان صاحبي.. هسي ماعندو معاهو شريعة ..
مشيت رقدت في الصالون .. على قفاي وبقيت افكر .. ياربي هسي عز الدين ..ده يكون لاقى عابد في مكان سيح .. وضربو كتلو ..ورماهو في البحر.. ولا يكون سلط ليهو عصابة خطفوه رموه في حتة ..دفنوه في خلا ..
بس انا شبه متأكد انو عز الدين عنده يد . في غياب عابد ده .. انا مالازم اسكت .. في النهاية دي روح والزول مايسكت .. والصامت على الحق شيطان اخرس .. انا لازم اتكلم ..
المهم ضميري معذبني.. عذاب شديد خلاص .. مرات قلبي يقول لي امشي اسأل عز الدين من الموضوع ده .. وخايف من العواقب .. مرات قلبي يقول لي اتصل من رقم مجهول على ناس المباحث .. وقول ليهم ده عز الدين .. خليه يحققو معاهو احتمال يعترف .. وتاني قلبي يقول لي مالك ومالو انت عملت حاجة غلط ؟مخير عز الدين مع ربه بعدين ..
والله فكرت لمن راسي ده صدع ..
في تفكيري داك دق تلفوني رفعتو لقيتها دي صفاء .. الو سلام عليكم ..
قلت ليها وين ليك يومين غايبة مني؟ ..
قالت لي قلت اديك فرصة تاخد راحتك.. وترجع لي بالنجيض ..
انا يا محمد قصص البنات البعدن سنين في الحب والكلام الفاضي ..
وفي النهاية الواحد يقول ليها .. ابوي جبرني على بت عمي .. وقال لي ماعافي منك.. لو عرست غريبة .. القصص دي كتيرة سامعاها ..
عشان كدا انا قلت ليك في اول لقاء لينا في الساحة.. انا ما من انصار الحب قبل الزواج .. ابرك انواع الحب . هو الحب البجي بعد الزواج .. لكن اهو ربنا قسم وحبيتك انت .. لكن ماعايزة اسمح لي قلبي يضيع مع تيار الحب لمن الزمن يسرقني ..
انا عايزة اتزوج يامحمد واحب زوجي .. انت يامحمد بتقدر تجي تطلبني من ابوي .. عشان علاقتنا تكون في النور .. ولا مابتقدر؟ ..
قلت ليها طيب.. انا اصلا ماعندي مانع اجي اطلبك لكن كدا بقيدك .. وبضايق نفسي وبكون عندي عهد في رقبتي ..
قالت لي تقيدني كيف؟ هسي انت موش مقيدني .. لو اتقدم لي زول اخليك واتزوجه ولا لا؟؟ .. لو اتزوجته معناها انا ماباقية عليك .. ولو رفضته عشانك معناها انا مقيدة.. صاح ولالا؟؟
قلت ليها والله فعلا كلامك صاح ..
قالت لي ياخ تعال اتقدم .ان شاء الله على الاقل انا يكون عندي سبب ارفض بيهو زياد ..
صراحة ياجماعة انا جاتني خوفة ماطبيعية .. وحسيت انو صفاء دي دايرة تدرع لي حبل في رقبتي .. لاني مابقدر اخطو خطوة زي دي غير محسوبة ..
قلت ليها طيب برضو اديني يومين بس افكر واشاور ناس البيت امي وابوي وعمر اخوي .. وارجع ليك ..
المهم قفلت منها التلفون ورجعت لي تفكيري في عابد لانو بصراحة انا قلبي ماكلني ومامرتاح نهائيا .. ياربي الزول ده يكون حصل ليهو شنو؟ وهسي صفاء جابت لي كثافتي ..
الى اللقاء
