الورطة الواقع فيها عابد دي ..والله دخلتني في مشكلة .. المشاكل الفاتن كوم ودي كوم براهو .. ياخي اليوم داك ..انا اتمنيت لو اني انسجنت مع عمار في البنقو ..
المهم .. قالو المقتولة مابتسمع الصيحة .. وقدرك لمن يكون جاييك .. مابتقدر تزوغ منه اصلا .. انا المفروض ما ارد لعابد .. لاني ايام كتيرة مارديت ليهو بس الخلاني اليوم داك ارد ليهو شنو؟ بس قدري وقسمتي الحمد لله ..
يازول المهم .. لمن اتصال عابد في المكالمة كتر شديد ... استأذنت من صفاء .. وقلت ليها لحظة برجع ليك .. وفتحت الخط لي عابد ..
قلت ليهو نعم ..
لقيتو ليك صوتو خايف شديد ..
ومرعوب قال لي حصلني.. يا محمد حصلني ..
قلت ليهو مالك يازول في شنو؟ ..
قال لي انا معاي مودة .. في بيت ناس حافظ في شارع العرضة .. ومودة اغمي عليها .. ومامعاي زول ..
وقرش في جيبي مافي عشان اسعفها .. حصلني بالعربية النوديها المستشفى . ومابقدر اضرب لاهلها ..عشان ماعمل ليها فضيحة ..
تعال لي سريع .. لو اتاخرت مني وحصل ليها حاجة.. مابسامحك يا محمد قلت ليهو حاضر حاضر هسي جاي .. مسافة السكة.. بس انت رشها بالموية وحاول خليها تفوق ..
قمت سريع ودورت العربية .. ومشيت بسرعة مبالغة .. والله كنت عايز اعمل حادث مرتين .. داير احصل البت اسعفها معاهو ..
والله مشيت ليهو ..بدون ما افكر في اي عواقب.. وبي كل نية سليمة ..
وصلت شارع العرضة ..ناس حافظ ساكنين في البيوت الجنوب الزلط قريب لي مسجد فيصل ..
الكلام ده كان زي الساعة تسعه ونص او عشرة الا.. بالليل .. وصلت البيت كان فاتح في ميدان كبير .. لقيت اعمامك كبار كدا .. خاتين كراسي قدام بيت جيران ناس حافظ ..
وقفت العربية ونزلت سلمت عليهم .. قالو لي الناس ديل مافيشين طلعو الصباح ..مشو لي اهلهم في السقاي .. قلت ليهم ما مشكلة انا متواصل مع حافظ .. قالو لي حافظ ذاته طلع ..
تاني ماشتغلت بيهم .. اتصلت علي عابد ..قلت ليهو انا قدام الباب .. افتح لي ..
جاء فتح لي الباب ..وقال لي خش خش أأ .. أأ نا والله ماعارف .. وبقى يقطع ..
دخلت معاهو قفل الباب ..
وقال لي اقعد في الهول ده النحكي لك ..
قلت ليهو وينا البت؟؟ حلينا نسعفها سريع ياسجم .. والله انت ح تقع في مشكلة كبيرة .. لو البت دي انشلت ..
قال لي دقيقة .. اقعد النحكي لك .. انا قمت عاينت في عرفة كدا ..لقيت في بت راقدة في سرير .. قلت ليهو ياها دي؟؟
قال لي ياخ تعال النتكلم معاك .. جيتو راجع قلت ليهو البت دي نايمة .. انت بتستهبل علي ولا شنو؟
لكن هو خايف خوف ماطبيعي ..
قعد قلت ليهو اها طيب احكي لي .. مالا البت والدوخها شنو؟
قال لي طبعا انت عارف انا لي شهر .. ساكي مودة دي ..عشان القى لي فيها طريقة .. اصلا ما اتوفقت .. واصلو ابيت استسلم .. قمت امس ضربت لي حافظ صاحبي ده .. قلت ليهو شوف لي طريقة ..
قال لي بكرة اهلي طالعين .. والبيت ح يكون تحت تصرفك..
كلمت مودة بالموضوع ..وهي من البارح قالت لي اهلها ..انها بكرة ح تمشي لي حنة صاحبتها في الثورة .. واهلها وافقو ..
وقبل المغرب كدا جينا هنا انا ومودة.. قابلنا حافظ .. ودخلنا البيت وضيفنا وطلع .. قال بجي الساعةاطناشر بالليل..
اها لمن حافظ طلع ..مودة قالت لي يا عابد .. انا والله من الله خلقني مافي زول لمسني ..
وهسي خايفة شديد .. عليك الله ياعابد ..خلينا نتونس ..ونمشي انا بحبك شديد .. ماتجبرني على حاجة انا مادايراها ..
انا قلت ليها عليك الله ماتعملي حركات ..
قالت لي ياعابد انا نفسي قايم شديد .. وقلبي بضرب .. انا خايفة ..
طبعا مودة يامحمد اصلا عندها مشكلة في القلب .. والخوف والزعل والازعاج مابنفع معاها ..
المهم قالت لي انا تعبانة يا عابد .. وحاسة جسمي هابط .. وبقت تتنفس بسرعة شديد .. قالت لي جيب لي موية .. ياعابد انا روحي عايزة تطلع .. طلعت جري اجيب ليها الموية .. جيت لقيتها نفسها وقف ..
وجسمها بقى منهار شديد
ومابتتنفس نهائ ..وهبشتها في الاوردة بتاعة الرقبة .. لقيتها مافيها نبض ..
والله يامحمد البت دي ..انا متأكد انها ماتت .. قدر ما لكزتها وكفتها ..عشان تقوم ابت تقوم .. متأكد متأكد انها ماتت ..
طبعا ياحماعة ..اقسم بالله العظيم عابد بحكي لي في الكلام .. وانا لاول مرة في حياتي احس باني ح يغمى علي .
ومواصل في كلامو ..وانا ماقادر اجمع .. قلت ليهو انت متأكد انها هسي ميتة .؟ قال لي ادخل شوفها .. لكن والله يا عابد انا بيدي ماهبشتها ..
وانا متأكد يامحمد مودة دي مافي زول لمسها .. لكن بتطلع وتتونس .. وده المبوظ سمعتها ..
قلت ليهو ياحيواااااااااااااان هسي خليني من الكلام ده .. البت دي حية ولا ميتة ؟؟ انا اعصابي تلفانة ..وحاسي باني بولت في هدومي ..
قال والله انا انا متأكد انها ماتت .. لكن انت خش اتأكد .. قلت ليهو والله يا كلب .. القاها ميتة أنا اعلقك في السقف ده .. يعني انت عايز ترمني في مشكلة ولا شنو ؟
الله ينتقم منك ..
المهم دخلت الغرفة .. وانا داخل على الغرفة كنت بتمنى .. انو البت تكون دايخة او نايمة .. وخاتي امل كبير في قلبي .. انها تكون تمام .. بس اصلا ماتكون ميتة .. لمن دخلت الغرفة . وهبشت البت في رقبتها ويدها.. لا حول ولاقوة الا بالله ..
فعلا مافي نبض .. ومافي اي نفس .. وفتحت عينها كدا ..لقيتها ميتة فعلا ..
انا لله وانا اليه راجعون ..
والله ياجماعة .. انا بقيت نص مجنون ..ونص نصيح .. وبقيت لافي زي ملدوغ الدبيب .. ماعارف اعمل شنو.؟ وخلاص دي جريمة قتل ..مكتملة الاركان ..
وهسي نقول لاهلها شنو؟
فكرت اني اهرب .. واخلي عابد براهو مع الجثة .. لكن انا برضو ح اتجرجر .. لانو اعمامك البرة ديل شافوني .. وانا داخل ..
اول مالشرطة تجي .. وتشوف مكان الحادث ..ح يقولو ليهم في واحد بتاع عربية جا هنا قبل الحادث .. ويجيبوني ويجرجوني .. وفكرت في المحاكم والاعدام وووو
والله حصلت علي حالة .. لايعلم بها الا الله .. الحمد لله على كل حال.. قعدنا انا وعابد متمحنين ..منتظرين قدر الله .. البحصل لينا .. انا قلت ليهو نضرب لحافظ ..
نحكي ليهو الحاصل .. قال لالا حافظ خواف .. طوالي بضرب لناس البوليس .. حافظ احتمال يمي القسم طوالي ولايجينا هنا ..
قلت ليهو طيب يا زفت ..نعمل شنو؟
قال لي انا لو عارف اعمل شنو.. كان ناديتك؟؟ ..
قعدت في الواطة وحاولت اهدي نفسي .. وافكر بتروي ..قلت ليهو اسمع .. نحن لو قعدنا كدا .. ناس البيت ديل بجو .. ويشوفو البت الميتة .. ويتصلو علي الشرطة والبت تتفضح .. واهلها يتفضحوا والدنيا تجوط .. وتبقى قضية راي عام وتملا السوشال ميديا .. ونحن الاتنين ح يعدمونا .. اصلا وقعنا في المشكلة وقعنا ..
بالاصح انت عملت المشكلة ورميتني فيها .. الله ينتقم منك ..
لكن انا عشان البت دي ..وعشان اهلها .. والله ما اتخاذل .. اطلع برة تاوق براحة بالباب .. شوف اعمامك القاعدين ديل لسع موجودين ؟ ..
طلع وجا ..قال لي قاعدين .. انت عايز تعمل شنو يامحمد؟؟
قلت ليهو اصبر .. انا عايز احاول انقذ سمعة البت دي لو بقدر .. ان شاء الله تجي سليمة .. ومافي زول يعرفني .. وربنا يغفر لي في العايز اعملو ده ..
شلت مفتاحي .. وطلعت قلت ليهو تعال افتح لي الباب بتاع الحوش ده ..
فتحنا الباب بتاع الحوش ..ودخلتا العربية جوة .. وانا قلبي ده عايز يقع من خشمي .. من الخوف والرعب ..
قلت ليهو ارح شيل معاي الجثة دي ..نختها في الكرسي الورا ..ونطلعها من هنا ..
قال لي كيف يعني نوديها وين ؟
قلت ليهو ارح بس بوريك نتخارج من الحاجة دي كيف.. ارح..
وشلنا الجثمان ختيناهو في الكنبة الورا بتاعة اللانسر .. حقة عمر اخوي ..
وطلعت بالعربية .. وقلت ليهو اقفل الباب سريع .. ومافي زول في الفسحة ولافي الشارع .. وركب معاي وطلعنا ..
وانا بس بفكر في المشنقة .. وشكل الحبل المعلق .. والطربيزة البطلعو فيها للشنق ..
وعابد يقول لي هسي نعمل بيها شنو يامحمد؟؟ وانا مرة اسمعو ومرة ما اسمعو ..
الى اللقاء ..
