الحب المحرم

Psycho 11

___________________________
____

وقفات بزز كتحاول تقنع راسها بلي دموع منافعين لوالو ،ترجات روحها لي حسات بيها ماتت فداخل ديالها باش تفيق و ترجع ليها .
غطات وجها بيديها بحيرة كبيرة كتهمس لنفسها بصوتها لي مصدقاتش راسها رجعاتو وخا كان باح و ضعيف
:"عفاك عفاك متخافيش متخافيش كولشي غيدوز
واسات راسها بقوة مصطنعة كتبتاسم بسخرية على القدر لي عاود راسو ،بنفس الطريقة و الكلمات واسات راسها هديك الليلة
Flash back
كأي اخ مع ختو رجعو لدارهم فوقيتة دلغدا ،هدفهم واحد يشوفو وجه ملاكهم و روح الدار كفما كيسميها باباهم ، الأم ديالهم كريمة، مرأة كيشكوا بلي كاين فحالها ،قمة الطيبة و اهم حاجة فحياتها كانت عائلتها لي بناتها عن علاقة حب من الصغر مع الأب ديالهم لي كان ولد جيرانهم ،معمرها اتنسى كفاش كان حلمها و هوسها تكبر و تزوج باش تشوف نفس نظرات هيام الأب ديالها لماماها و تعيش هديك السعادة نفسها لآخر لحظة فحياتها.
حل يوسف الباب بشوية متفاجأ بأنه ممسدودش بسوارت، رجعها موراه بحركة من ذراعو برغم من انه كان يلاه عندو تسعطاش العام و مبيناتهمش فارق سن كبير كان كيحس براسو لازم عليه يحميها
:"بقاي هنا وخا ؟حتى نعيطليك
تكلم معاها و هي حركات راسها بموافقة ،الطفلة الهادئة و الرزينة لي كتسمع لهضرة فحال لي كانت من ديما فعمر سبعطاش العام .
دخل بشوية بخطوات صغيرة وخا كان خايف و اول فكرة جات فبالو هي انه شي شفار دخل لدار و ماماهم بوحدها
شهق بخوف ملي ضار لحيط لي فاصل بين الكوزينة و الكولوار ،كيشوف فجسد ماماه لي مليوح بهديك الطريقة على الأرض و الدم خارج من نيفها ،لونها شاحب ،شعرها متناتر على الأرض ،فلحظة حس بقلبو لي طايح ماشي هي .
هز فيه الأب ديالو كمال عينيه ملي استشعر حضورو و وقف من بعد ما كان على ركابيه حدا جسدها ،تمشا جيهتو بزربة جرو عندو فعناق مزير عليه
:"لباراكا فراسك اولدي
تكلم بضعف بين دموعو بينما يوسف عينيه لي ولاو حمرين باقيين معلقين على الأم ديالو فلأرض بلا ميرمش و لا يبادل الأب ديالو العناق
نزلو دموعو تزامنا مع سمع صوت الغوتة ديال ماريا لي فيقاتو مرجعاه للواقع ،بكا بحرقة مبعد من باه كيشوف فيها كفاش جلسات فلأرض حداها كتحرك يديها صغيرة على حنكها
:"ماما ماما صافي نوضي مكنحملش هاد اللعب
قالت وسط دموعها و شهقاتها لي خلات وجها يتلون بلحمر و هما كيشوفو فيها بعجز كبير ،حرفيا عمرها طلبات شي حاجة و مقدروش يلبيوها ليها و لا خلاو دمعة تنزل من عينيها ،لكن هاد المرة كان الأمر خارج نطاق طاقتهم .
:"بابا فيقها بابا
غوتات بغضب كتشوف فيهم باش يتحركو ،قرب منها كمال بشوية شدها من كتافها وقفها بزز
:"ماريا ماماك ماتت الله يرحمها
دوا معاها و حزن قطع قلبو كيشوفيها كفاش نفرات منو و مشات عند يوسف عنقاتو من خصرو دافنة وجها فصدرو
:"يوسف قوليه ميبقاش يقول هدشي و لا غنكعا منو
قالت بحزن كتحاول تهرب من الواقع بضعف كبير منها و جبن انها تتقبل الحقيقة
:"ماريا ماما ماتت
علمها هو هاد المرة بطريقة اكتر حدة كيركز على كل حرف منو و كأنه كيأكد لراسو حتى هو الفكرة باش يخرج من صدمتو
حس بيها بعدات منو كتشوف فيه بكره و دفعاتو من قدامها بقوة عمرها تخايلاتها فيها و خرجات كتجري من الدار فحال شي حمقة .
ثواني خداوها شافو فيها فبعضياتهم هو وباباه كيحاولو يستوعبو الأمر
:"جري تبعها عمرها خرجات بوحدها
غوت فوجهو كمال بصرامة و رعب
:"حتا تقوليا كفاش ماتت و علاش
غوت عليه يوسف بدورو ناسي بلي قدامو باه من بعد ما فقد اعصابو
:"خرج تبعها الا مباغيش تفقدها حتى هي ليوم
غوت عليه مرة وحداخرا كيشير ليه جيهت لباب و دفعو من كتفو ،عاد استوعب يوسف بلي ختو لي عمرها رجعات من مدراستها بوحدها خرجات من الدار فهديك الحالة .
تنهد بألم حدا باب الدار كيمسح دموعو ،حتى رفاهية للإنهيار على موت مو مكانتش عندو و خاسو يقلب على ختو
بألم كبير فقلبو جرا بسرعة كيضور عينيه فدرب باش يشوفها .