الحب المحرم

Psycho35

_______________________________________

:"ششش غتفيقي ماماك
كان هذا اول صوت تسمعو و هي كتحل عينيها بزز و شعر ارتي كيهرها فوجها
:"شحال نعست ؟
:"ربعة دالسوايع
غير جاوبها لوريس بهديك الضحكة على وجهو و ناضت قافزة ..مزيان فيها نيت هي لي سهرانة على قبل هداك المتخلف لي معندوش لقلب.
هادشي لي لامت بيه راسها و خدات ارتي من بين يديه
:"عفاك قوليا بلي وجدتي لحفلة ،علاش مفيقتنيش؟!
تكلمات بحزن و ضربات كتفو بشوية
لوريس:"وجدت كلشي ،زعما لخدم تكلفوا و حتى جولي وقفات عليهم ..مفيقتكش حيت عارفك مكتنعسيش وسط نهار و الا نعستي كتكوني بصح ماشي مزيان
ابتاسمات بحب لاهتمامو و حمدات الله ألف مرة حيت خرجو فطريقها ،باقا معرفات كفاش تكونات صداقتهم ،شحال كانت كتكرهو فالأول !
ماريا:"غنمشي نوجد راسي و نوجد ارتي ،غنديرو لحفلة قبل ما يرجع استبان و نساليوها مبغيتش اول عيد ميلاد دبنتي يخسر بسبابو
علمات لوريس بآش ناوية و بصح عنات كلامها ،قبل مكانتش قادرة تخايل اول عيد ميلاد د آرتي يدوز بلا بيه و حتى انها كانت غطلبو باش يحضر و لكن كل نهار كيخليها تفقد شوية من الأمل لي عندها فيه

من بعد نص ساعة ،تحنات سدات طالونها من جنب عاد وقفات كتشوف فشكلها، كسوة طويلة فزرق فاتح غطات جسدها كامل الا كتافها لي نزل من عليهم الثوب ،شعرها مجموع لور باش تقدر تحرك براحة كبر
شافت فإنتاجها معاه و ضحكات فاش بانت ليها كتحاول تحيد الفراشة لي دارت ليها فشعرها .
فالأصل معرفات كفاش قدرات توجد راسها و تلبس بنتها فهاد الوقت لقصير
تحل لباب من بعد ما دق لي موراه و طل عليها براسو مبتاسم حتى اختفاو عينيه لي فالأصل مجبدين
:"جو!توحشتك
غوتات بفرح و جرات لعندو بشوية باش مطيحش ،عنقاتو و هو بادلها كيدوز يديه على ضهرها
:"كنت خايفة متجيش ليوم
جو:"منقدرش ،ساليت لخدمة دسيمانة فتلت أيام على قبل هاد الزوينة
كلمها بلطف و تخطاها غادي لعند ارتي لي هزها فوق كتافو و بدات كضحك فحال ديما
:"خاس نزلوا ،جولي غتقتل شي واحد لتحت
ديقات ماريا عينيها بستفهام و تبعاتو سادا لباب موراها
:"علاش ؟متعطلتش لبست دغيا
جو:"غتنزلي و تعرفي علاش
همس تحت انفاسو بنزعاج و هوما فدروج يلاه بغات تطلب منو يوضحليها كثر و سكتات فاهمة كولشي
حفلة عيد ميلاد بنتها لبسيطة لي خططات ليها مع لوريس كلها تضربت عرض لحيط ،لقصر لي كان غيتزوق بعشرة دنفاخات كان مجهز فحال شي مهرجان
نزلات اخر درجات بزربة كدور عينيها بصدمة فهاد لحالة ،واش غيتنضم شي عرس ليوم و مفخبارهاش !؟
:"اش واقع هنا ؟
سولات جولي لي كانت واقفة حدا واحد لحيط و كاس دشراب بين يديها ،شربات ما بقا فيه دفعة وحدة عاد ضارت لعنها مزيرة على فكها بعصبية
جولي:"والو!ما واقع وااااالو(و حركات يديها )غير الزعيم خلاني حتى كملت تجهيزات لي ليل كامل كنخطط ليهم و قاليك هادشي ملايقش بيه ،دون مستوى و عيط لمنظم حفلاتو هو لي جا دار هادشي فنص ساعة ..صراحة الا غير تحطيم لمعنويات انا راه شتتهم ليا
تكلمات بغيض و هزات طرف كسوتها بيديها خارجة كتخبط بطالونها فالأرض مراضياش بالوضع
ماريا:"مفهمتش انا علاش كيدخل ديما مفهمتش
وجهات كلامها لنفسها معصبة و شافت فجو لي تعابيرو قطعة من الثلج
جو:"عادي ،هدي بنت دون استبان لفارسي اش كنتي كتوقعي منو
:"انا غنوريك
توعدات ليه و خرجات لجردة كتقلب عليه وسط الخدم لي كيتحركوا فجميع الإتجاهات ،شي كيعلق لورد ،شي كيحط لماكلة ،برا مزوق كثر من لداخل و ضواو ديال لقصر كلهم شاعلين
اخيرا جات عينيها عليه ،واقف وسط الحديقة لخلفية حاط سيكار ففمو و دخان خارج من نيفو
زربات لمشية حتى وصلات ليه ،ناسية كفاش كيمشيو لعيالاة بطالون
ماريا:"اجي نتا بغيت غير نفهم علاش كدخل راسك فلي مكيعنيكش
غوتات قبل ما توصل ليه و هو حل عينيه من بعد ما كان مركز فدخان لي كيدخل لريتو
شافيها بنص عين و ابتاسم بجنب على شكلها و هي معصبة ،نزل عينيه عليها و تمنى كون ما دارهاش، كل مرة كتخطف عقلو بلا مجهود ،كيراهن بلي فأرخس كسوة فهاد لعالم غتجي زوينة
:"فخبارك كتغوتي بزاف
كلمها بنبرة ديال الضحك و بزربة عرفاتو ماشي لي كان معاها فصباح ..هذا جلال ،شافت فعينيه باش تأكد و لقاتهم ماشي فحال ديما ،فيهم نظرات لحب و لكن فحايلا معصب ولا مخبي شي حاجة
:"علاش بدلتي اش كنت دايرا لعيد ميلاد بنتي !
لامتو و حطات يديها على جنبها كتسناه يبرر ليها
شاف فيها بحقد و خدا آخر نفس من سيكار عاد لاحو فالأرض قبل ما يجاوبها
جلال:"بغيتي تقولي بنتنا
صحح ليها بحدة و هي غير كتشوف فيه ..فحايلا يلاه عرفها بنتو ولا مالو
ماريا :"بنتي أنا هاد الساعة محدها مقيدة تحت سميتي وخا!
نطقات بضيق و هو شاف فيها حتى تخلعات ،شوية و تهرب من قدامو
:"على استبان معتارفش بيها من نهار تزادت ..،من هادي عام!؟
فكر بصوت مرتافع و ماريا بعدات عينيها من عليه باش ميشوفش الألم لي فيهم على حالتو
تدارك نفسو فآخر لحظة و رجع للبرود ديالو كيشوف فيها من لفوق
:"بنت جلال لفارسي مكيدوزش عيد ميلادها الأول بهديك البساطة
تكلم بغرور مبالغ فيه و هي شافت فيه بقرف
:"كنتي تقدر تعلمنا قبل ،كيفما شفتي انا و جولي و لوريس خدمنا بزاف على قبل عيد ميلادها
كلماتو بستهزاء و هو ضحك فحايلا سمع شي نكتة ،ضحكة لي كتكره تسمعها منو
:"جولي و لوريس قلتي ليا ياك؟!..مكنضنش بلي وحدين كبروا فالخيرية كيعرفوا اشنو هو عيد ميلاد
خرجات فيه ماريا عينيها مصدومة من انه قدر يقول فحال هاد الهدرة و حمدات الله حيت مكينينش هنا باش يسمعوا اش كيقول ..نرجسيتو يمكن هو لمرض لي عمرو غيبرا منو حيت ببساطة موروثة فالعائلة ،تعريف تاني للفارسي هو النرجسية.
ماريا :"فاش كنشوفك كنفضل اش خرجات لخيرية على اش ربات أغني عائلة فالمغرب
كلماتو بقرف و بعدات باغا تمشي حتى لقاتو شادها من ذراعها ،كمشات وجها موعتة كتحاول تفلت منو
جلال:"عرفي راسك كفاش كتهدري معايا ،انا بغيتك كثر منو ،عمري قدرت نقيس شعرة منك و متخلينيش نديرها
همس حدا وجها بتهديد و هي شافت فعينيه مباشرة كتحاول تفهم اش كيدور فراسو ،علاش معصب لهاد الدرجة
جلال:"كنبغيك ،كنبغيك كثر من لي كتصوري متنسايش ،جلال بغاك قبل منو هو
تبدلات نبرة صوتو معاها و قرب منها طابع بوسة طويلة على حنكها عاد طلق منها
شافت فيه و فاش حلات فمها باش تهدر بعد عليها راجع لفين كاين التجهيزات ،حطات يديها على عنقها مخنوقة و حتى بغات تبكي و تفكرات بلي ماشي وقتو..يلاه عندها ليل كامل باش تبكي فيه قبل ما تنعس .
:"دبا عيد ميلاد بنتك ،ضحكي
و صرفقات راسها بشوية تابعة خطواتو .