نهار مور نهار ،حتى حاجة مكتبدل من غير انها كتقتانع كثر بلي ما عندها أمل فخروجها من الوضع لي هي فيه .
غطات وجها بيديها كتشهق بألم و حزن لايحة لفردي لي كان فيديها طايح على الأرض من بعد ما كانت كتدرب على التصويب مع جولي فحال لي قال هو ،كل يوم واحد منهم غيعلمها حاجة.
تحنات للأرض جالسة من بعد ما عيات ما تتجاهل غوات روحها و عقلها و هي كتشوف فراسها كتحول لآلة قتال و دمية لواحد عرفاتو ليوماين، فين حياتها ؟فين نفسها لي كان أكبر همها تشغل راسها فجميع الدار و تضحك على نكات خوها البايخين !؟
حسات بدراع جولي لي عنقوها حاطة راسها على كتفها
:"عفاك مديريش فراسك هكا احبيبة عفاك
همسات ليها مدوزة يديها على شعرها معاوناها توقف
:"موقع والو موقع والو غير عييت
قالت ماريا ببتسامة دابلة مبعدة يديها من على وجها لي ولا حمر كتشوف فلي قدامها كفاش ديقات عينيها بشك قبل ما تنزل تهز لفردي ديالها من الأرض حاطاه فيديها
:"الا مبقيتيش باغا دربي نقدر نهضر مع لوخرين نقولو لزعيم بلي كندربوك غير كدوب زعما و نتي رتاحي وخا !؟
اقتارحات عليها بكل لطف اقتراح عارفاه الا تكشف غيكون سبب موتهم كاملين هادشي علاش رفضات محركة رأسه بلا
:"لا غير عييت ليوما شوية و صافي ،غنطلع لبيت نرتاح شوية
رمات عليها كلامها و تمشات من قدامها متخطياها مدوزة يديها على كتفها فطريقها
طلعات فدروج فحال شي ميت حتى وصلات لبيت لي ولا رسميا ديالها فين تكات كتشوف فسقف موقفة عقلها على التفكير واخدة قرار انها تنسى عائلتها و حياتها لقديمة على قبل مصلحتها مقتنعة بلي نساوها او عتابروها ماتت ،آه كان هدا احسن قرار و الا غتحماق ،مكانتش قادرة تكمل الا بهاد الطريقة داكشي علاش غادي تحافض على ما بقا منها من عقل و غتعيش اش هي فيه حتى يتفك بوحدو .
فيقها من حوارها الداخلي مع نفسها دموعها لي نزلو على حناكها فحايلا كان ليهم رأي آخر ،علاش كتكدب مغتقدرش، كل ذرة منها غتبقى تحارب حتى لآخر لحظة و لكن ...
هزات راسها جالسة بشوية مخليا انعكاسها يبان فلمراية لكبيرة لي قدام نموسيتها كتشوف وجها لي كانو عليه جروح و اثار عمرها تمشي .
كفاش غترجع لعائلتها بهاد الحالة ،غادي تقتلهم معاها !
:"لالة لغدا واجد و الدون بغا كولشي يتجمع
قالت وحدا من الخدم من بعد ما حلات الباب بلا ما تنتابه ليها
حركات ليها راسها بآه واقفة من بلاصتها
،اذا رجع ،حبسها هنا و مشا غبر لربعة دسيمانات ،معرفاتش واش كان كيجي لقصر فاش كتكون ناعسة ولكن لي متأكدة منو انها مكانتش كتشوفو و حتى الماكلة مبقاتش كتكون فصالة لكبيرة هادشي باش استنتجت بلي مكانش.
دخلات قادات حالتها محافضة على آخر ما بقا منها ،كتحاول تعتق مظهرها و كونها بنت فأول شبابها ماشي جفاف كيفما ولات كتبان .
لبسات كسوة طويلة كحلة بفتحة حتى لفخضها حاطة على خصرها صمطة و بوط ديال طالون فرجليها .
مشات قدام المرايا و بلا ما تفكر و بحالة هستيرية حطات خافي العيوب حتى ما بقا كيبان حتى أثر على وجها من العنف لي مارسو عليها ،كحلات عينيها مخليا ملامحها يتبدلو كليا و يوليو اكثر حدة مع تعابير وجها لي بطبعهم باردين .
خلات شعرها مطلوق و وقفات كتأمل نفسها
:"موجدتيش راسك على قبلو و لا على قبل غيرو ،على قبل راسك، نتي الجديدة غادي تحاربي و تنساي الماضي و قلبك غادي تسكتيه حتى نخرجو من هنا و من بعد نقدرو نفكرو فلي جاي ،الأولوية لخروجنا من هنا اماريا !
عاودات جملتها الأخيرة مرة مور مرة فحايلا كتحفضها لراسها قبل ما تاخد نفس و تخرج بكل ثقة
تمشات واخدة كامل وقتها حتى وصلات لقاعة الكبيرة ،حلات الباب داخلة بشوية بلا متشوف فلي مترأس الطبلة و الا كانت انهارت من خوفها و حزنها.
جلسات فلكرسي لي بين جولي و مارسيل قدامهم ميكي و جو و هو لي على رأس طبلة على يمينو لوريس.
حسات بعينيه عليها ،و خا مشافتش فيه حسات بيه معصب بطريقة خلاتها توقع شي طبسيل دبا يجيها من عندو
:"جيتي زوينة !
تغزلات بيها جولي بهمس مخلياها ضحك ليها بايساها فحنكها غافلين على لي كان مراقبهم او نقولو مراقبها ناسي العالم و حتى الزعيم ديالو لي كان حداه و الا شافو مغديش يتردد يقطع راسو فلحضتها.
:"تقدرو تبداو
جاها صوتو سامح ليهم ياكلو مخليها تغمض عينيها و قلبها تزادت وثيرة دقاتو بصورة غريبة كارها انفعالها لي باقي متبدلش فكل مرة كتسمع صوتو او كتشوفو .
بداو الماكلة فهدوء ،متبتة نظرها على طبسيلها و مرة مرة كتسمعو كيسولهم على الخدمة و صفقات فهمات بلي ديال المخدرات حتى للحظة وحدة ..لحظة نسات فيها راسها بلا وعي هزات راسها جيهتو و مباشرة تلاقاو عينيها بدياولو هو لي كان اصلا كيشوف فيها .
تبلوكات مقدراش تنزل عينيها من عليه كتشوف فوجهو لي ترخاو تعابيرو كيشوفو فيها بشوق ،حب و إعجاب قبل ما يتبدلو فثانية مخليين نظرات الكره و الغضب يعوضوهم .
نزلات عينيها من بعد ما وعات على اش دارت بئحراج و ولات كتسنى غير فوقاش يساليو
و غير كلاو آخر طبق ناضت هي لولة هربانة حتى وقفها صوتو من موراها و يديها على الباب باغا دفعو :"ماريا بقاي باغي نهضر معاك نتوما تقدرو تمشيو
تكلم ببرود مخليهم كلهم يخرجو قدامها سادين الباب موراهم و هي باقا عاطياه بظهرها
:ماريا !
طريقة نطقو لسميتها وصلات ليها بزاف دالهدرة من بينها انه باغيها ضور لعندو و هادشي لي دارت كأي إنسانة قررات تخرج من هاد الحبس بوجه و جسد كاملين ماشي مشوهين.
كان جالس بلاصتو كيكمي بكل نرجسية كيشوف فدخان لي خارج من فمو باهتمام ،تصنمات بلاصتها كتسناه يقول اشنو باغي الا انه بقا ساكت ،واخد كامل وقتو حتى سالا السيكار ديالو عاد وقف جاي جيهتها مخليها تشوف فيه مزيان هاد المرة ،جمالو لي كيخلع كان باقي نفسو و لا حتى تبدل شوية ،من غير ملامحو لي ولاو اكثر حدة من آخر مرة شافتو ،بلا ما تحس لقات عينيها كيدوزو عليه من الفوق لتحت حتى فيقها صوتو بنبرة مريضة
:"هكا ،هكا بضبط شوفي فيا ،عمرك تهربي بعينيك من عليا باش منجبدهمش ليك من بلاصتهم
رمى عليها كلامو لمريض بكل جدية مخليها تجمد من خوفها كتحاول تنفس بصعوبة
:"ربعة دسيمانات ،ربعة دسيمانات كانت كافية باش ترتاحي فيها فغيابي ،تبدلي فيها ،تسترجعي نفسك القديمة و تفرحي حيت انا بعدت عليك .
أنت تقرأ
الحب المحرم
Romanceالسلاسل مكسورة ... لكن هل أنت حقاً حر؟ _____________________________________ قصة بالدارجة المغربية 🇲🇦 الجزء الأول الابطال :استبان &ماريا ⛔للتعرف على قصص الشخصيات الثانوية هي فالأجزاء لي موراها .
