Hy
بارتي جديدة نتمنى تعجبكم🤍 بغيت نقوليكم شكرا بزاف على تفاعلكم والله كتخليوني نكتب وسط امتحاناتي و وخا نكون مريضة 😩❤
هاد الأغنية ميمكنش كفاش كتفكرني فإستبان وليت مدمنة عليها، خاس تسمعوها 🤌🏻
⛔مهم !⛔مقاطع الطبيبة النفسية مع جلال هوما نبذة من المستقبل
Love u🤍
____________________________________
ابتاسمات واقفة من بلاصتها بزربة باش تسلم عليه و هو سد الباب ديال مكتبها مقرب لعندها ،حيد باش كان مغطي راسو و جلس من بعد ما سلم عليها و هي دارت نفس الحاجة.
قادات طابليتها البيضة كتشوف فيه من تحت نضاضرها دشوف كفاش حتى رجع ضهرو على الكرسي جالس بغرور و تقاد جالس عادي فحال اي شخص جامع رجليه و يديه عليهم
الطبيبة :"اش خبارك؟
:"ههه باقي معرفتش
جاوبها مبتاسم بغموض و شابك صباعو كيتسناها تكلم
:"نكملوا فين حبسنا آخر مرة و لا باغي تكلم على شي حاجة معينة ؟
حرك ليها راسو بلا و هي تفهمات حالتو مخلياليه وقت فين يوجد راسو
طبيبة:"حبسنا فبداية المرض !
تنهد بضيق و سكت لمدة طويلة ..حتى حاجة فحياة لي قدامها مكانت زوينة او بسيطة...حتى ذكرياتو كانو أبشع من بعضياتهم .
شافت فيه بحزن كتحاول تفكر راسها بلي هي طبيبة نفسية و اول حاجة تعلماتها فسنوات دراستها هي عدم أخد مشاعر المريض معاك و متدخلش فحالتو او تتعاطف معاه بدرجة كبيرة ...ولكن كفاش تقدر تحافض على هادشي قدام شخص محطم لهاد الدرجة ....لا مكانش شخص محطم كنعتاذر ..لي قدامها بقايا انسان .
:"من نهار مات قدامي..و انا كنسمع كلمة نتا سباب (سكت مبتاسم بحزن )عاودهاليا بابا فكل لحظة فكل فرصة جاتو ،طيحت كاس ..نتا سباب موت علاء ،جبت نقطة خيبة ..نتا موت علاء ...لعبت بزاف و نسيت واجباتي ...نتا سباب موت علاء كون مخرجتيهش فهداك الليل مكانش غيموت ...عاودها بزاف حتى تيقتها آه تيقتها (و حرك راسو بطريقة كتوافق كلامو )..وخا كنت صغير عرفت بلي كلماتو مغيدوزوش على ودني بهاد السهولة و لا لي كنعيشو غنساه (شافيها و عينيه حمرين ساكت شوية )فعمر صغير بزاف كنت واعي بالمريض النفسي لي كيصنع بابا فيا لداخل
سكت مشير لناحية صدرو و ضور راسو لجهة التانية ساكت مرة وحداخرا حتى ضناتو مغيكملش
:"بديت كنعاقب راسي ،مكنلعبش حيت خويا مبقاش يقدر يلعب و هو تحت التراب ،مبقيتش كنخرج او حتى الا فرحت كنلوم راسي حيت منستاهلش و عرفتي شنو لي قتلني هو انه بصح بابا رتاح فهاد الحالة لي وصلت ليها ،فاش شاف تعاستي رتاح ،فاش نجح فأنه يلبسني التهمة حتى هو تيقها و يمكن هادشي كامل باش يريح ضميرو .
ضورات الطبيبة راسها لجهة التانية كتمسح عينيها بتخبية عليه و صدرها كيتهز بشهقاتها المكتومة
:"فوقاش بدا المرض بالضبط
سولاتو بصوت مهزوز و وقفات من بلاصتها غادية موراه هازا جهاز التسجيل لي شعلات فاش دخل من فوق المكتب .
:"كنت كنلعب بوحدي فالبيت ،يمكن فعمر ست سنين و حيت علاء كان صديقي الوحيد و حيت مات مبقاش عندي الحق فأنه يكونوا عندي أصدقاء جداد و الا غنكون فهاد الحالة نسيتو فحال لي كان كيقول بابا (و ابتاسم بسخرية ) كنت كنلعب بوحدي و قلت علاش منخلقوش فراسي ،و معرفتش بلي غادي نخلق جحيم لنفسي ..نهار مور نهار و مع الوقت حتى بديت كنتخايل نسخة مني كتلعب معايا، و مع كان أغلى ما عندي و توأمي قررت نعطيه سميتي التانية
و سكت شوية هاز راسو بفخر برغم من انه مقادرش ينطق هداك الإسم من بعد هاد السنوات كاملة لي دازت
:"إستبان !سميتو استبان ..خويا عمرو ما مات ،بقا ديما حي هنا (قاس فراسو بصبعو )هنا بقا ديما كاين و بغيتو من كل قلبي ،حتى الدوا عمري كليتو باش ميموتش و يبقا صوتو كاين .
الطبيبة :"و الشخصيات التانية ؟
هز كتافو بلامبالاة مجاوبها بزربة
:"كانوا عابرين ،منهم لي كيمشي و منهم لي كيبقى ،الا هو كان من ديما حاضر .
الطبيبة :"على ما فهمت ،فحصصنا الأولى قلتي بلي خوك التوأم كان عقلاني كثر منك ونتا الطفل المتهور ،علاش شخصيتو لي خلقتيها كانت
و سكتات كتحاول تلقا الكلمات المناسبة و لكن هو كمليها كلامها بلاصتها
:"كانت الشريرة
قال مبتاسم و هي حركات راسها بئحراج
:"فاش خلقتو فراسي ،حاولت نخليه هو لي (سكت كيفكر كفاش يشرح ليها )مثلا فاش كنكون لاعب معاه كنخليه هو لي ديما يربحني ،وخا يربح بالغش ،حاولت نعاقب نفسي منو ،قدما دمر حياتي كنت كنحس بالإمتنان ليه حيت كياخد حقو مني و قدما كبرنا افعالوا كان ليهم تأثير كبر
الطبيبة :"كفاش تصلحات علاقتك مع الأب ديالك من بعد ،حتى وليتي كتشبه ليه فكلشي و عائلتك كاملة كتشهد بحبك ليه ؟
سولاتو بلا ما تفكر كتقرى من كتابها الصغير لي جبدات من جيبها و دوزات ليل كامل كتكتب عليه ملاحظاتها و اش باغا تسولو
هز فيها صبعو بتحذير و وجهو تبدل تماما من الهدوء للعصبية
:"معمري بغيتو (تكلم من بين سنانو و زير على يد الكرسي حداه )عمري فحياتي بغيتو ،كون كانو كيبدلو الدم كنت بدلت الدم لي بيني و بينو ،و لكن فاش كبرت و عرف بالمرض ديالي ،ضميرو فاق و تعاملو تبدل(سكت كيضحك بصوت عالي )و لكن مشا الحال، مشا الحال و بزاف ،قلبي شعلات فيه العافية و خمدات بوحدها ،مبقا فيه والو ،و كان خاسني نقرب ليه بشوية باش
و سكت مبتاسم بشر مزير على يديه مخليها تفهم بوحدها
الطبيبة :"واش ندمتي؟
شافيها بطريقة غريبة و كأنها أغبى انسانة فهاد الكون و رجع كيشوف قدامو
:"ندمت على كولشي (ابتاسم كيشوف فيها )و ندمت حيت صيفطت لي يقتلو و ممشيتش قتلتو بيديا و حرقتو قدامي
تكلم بحقد و ناض وقف خارج من المكتب واضع حد لحصة اليوم حتى وقفاتو يتردد كبير حيت غالبا فاش كيخرج بهاد الطريقة كيكون بسباب نفس الموضوع لي تكلم فيه دبا
:"مستر الفارسي بغيت نقتارح عليك شي حاجة
ضار لعندها منزل نضاضر الشمس لي لبس قبل بثواني و هي كملات كلامها مقربة منو
:"من نهار بدينا الحصص و انا كنقيد كلامك كلو فعقلي ،فأقرب ورقة و حتى فهاد الجهاز(و هزاتو كتوريه ليه )،قصتك عمري سمعت بيها ولا كنضن غنسمع بيها ..كنضن بلي كولشي كيستحق يعرف حقيقة أصغر أغنى رجل أعمال يوناني
ضيق عينيه فيها كيحاول يفهم رسالة تحت تمهيدها
:"الصراحة كان خاس نطلب رأيك قبل و لكن مذكراتي ولاو كلهم عليك و على قصتك مكرهتش نخلي منها كتاب الا بغيتي؟
سولاتو بئحراج و شافت فيه كفاش نزل راسو كيفكر و هز راسو فيها بنظرات فارغة ...مغيبغيش !
:".....
___________
أنت تقرأ
الحب المحرم
Romanceالسلاسل مكسورة ... لكن هل أنت حقاً حر؟ _____________________________________ قصة بالدارجة المغربية 🇲🇦 الجزء الأول الابطال :استبان &ماريا ⛔للتعرف على قصص الشخصيات الثانوية هي فالأجزاء لي موراها .
