الحب المحرم

Psycho16

غمض عينيه و رجع حلهم راجع للواقع ..رامي هديك الذكرى الملعونة فأبعد نقطة فعقلو ..كيتفكر كفاش حتى فلحظتها مبكاش و لا تكلم ..ما قال حتى كلمة و هو كيشوف البوليس جاو هزو جسد خوه الصغير بمساعدة عمال الطوارئ..و ما تكلمش فاش تغطات الحادثة بكونها غير خطأ و خوه غير زلق و طاح ..حتى من الألم ديالو كتمو فقلبو و رجع عاش على انه أمير عائلة الفارسي ..خدا كل ما بغى ..ما كانت حتى حاجة كترفض ليه ..التعامل ديال باه تبدل معاه كليا و كأنه كيحاول يسكت ضميرو عن طريقو .
شاف جيهت الشرجم فالسما..متأكد بلي علاء دبا فبلاصة حسن..يمكن لي وقع كان فصالح الجميع.. من بعد المرض ديالو مكانش عارف واش كان غادي يرحم خوه التوأم..كان غيكون غير عبئ عليه و يشوهو او يقتلو ..تقتلو وحدا من شخصياتو .
ابتاسم بشوية متنهد فاش تفكر بلي تنين و عشرين عام من حياتو ضاعت و هو كيمثل دور الولد لي كيبغي باه ..النسخة ديالو لي كيشوفو مثل أعلى ..كان غيقتل راسو قبل ما يكون هادشي حقيقة .
شرب كاسو دقة وحدة بغضب و رجع راسو لور محاسش بالوقت حتى لأول ساعات من الصباح التالي .
حل عينيه على أشعة الشمس لي ضاربين فوجهو ،شاف فجنابو كيحاول يستوعب فين هو و فاش رجع ليه اش وقع ليلة لي قبل ناض من بلاصتو كيطرطق عنقو باش يحيد عليه أثار النعاس
خدا حمام بزربة و لبس حوايج جداد لايح لباسو دقبل فالزبل باش يكون متأكد بلي مغيعاودش يلبسو مرا وحداخرا .
نزل فالدروج بشوية على هدوء القصر دليل على أنهم باقي مفاقوش ..شاف فساعتو اخيرا مستوعب بلي يلاه الستة دالصباح ..تنهد باغي يخرج من الباب الرئيسي حتى جدب انتباهو هداك الجسد لي على لفوتوي ،كانت ناعسة و اول مرة يشوف ملامحها هادئين و على طبيعتهم ،كانت مكورة على راسها معنقة رجليها لعندها و يديها فيها الجبص على جنبها
قرب ليها بشوية و جلس على ركابيه قدامها هابط لمستواها ...يديه تحركو و حتى قربو لوجها و حبسهم مرجعهم لجيابو ...حس بلي دار البارح و عرف بلي قربو منها مرا وحداخرا مكيسبب غير الأذى ليها و ليه ..كان عايش فدوامة خانقاه..،بين عقلو المريض ، حياتو لي عامرة احداث ، أعمال الشركة ، هي و شخصياتو بمشاكلهم المختالفة كان مخنوق .
ابتاسم بحب فاش تفكر بلي لبارح كانت أول قبلة ليه معاه..اه يمكن مكانتش بهديك الرومنسية لي فالأفلام و هي كتعض فيه حتى خلات أثر سنانها على فمو و لكن كلشي منها مقبول ..هادشي لي فكر فيه قبل ما يخرج عينيه مستوعب بلي هو استبان ماشي جلال ..ضحك بعصبية كيحاول يسكت افكارو و يلسقهم فجلال و بلي هداك غير تأثيرو عليه
نزل راسو كيشوف فيها و تلاقاو عينيه مع دياولها لي شبه محلولين كانت كتشوف جيهتو بهدوء
:"شكرا
نطقات بصوت باح قاطعة التواصل البصري بيناتهم و هو هز فيها حاجبو بستفهام
:"على هادي ..محفز جديد باش نزيد نكرهك و نهرب منك فأقرب فرصة
كملات كلامها شارحا ليه اش كتقصد و هو ابتاسم محرك ليها راسو بموافقة و كأنه حوار طبيعي بينو و بين لي خاطفها
رجع كيشوف فيها و حتى هي عطاتو على جوو ..الصباح هذا و حرفيا ما بقا ليها جهد ليه
ضيقت عينيها فاش لاحظات كفاش تبدل وجهو بطريقة غريبة و عينيه كيديرو حركات ديال شي واحد كيهضر مع راسو ...كانت عندها خبرة فالأمر مع دوزات اكتئابها بوحدها ..كانت عارفا مزيان اشنو هي تكون كتهضر مع راسك .
ضحكات على أفكارها و هو خنزر فيها و قبل ما ينطق قاطعاتو وسط ضحكاتها
:"ههه عفاك نتوما شحال فراسك!؟
قالت بضحك مخليا وجهو يتبدل كليا كيشوف فيها بلا ما تخرج حتى كلمة من فمو و فاش شافت فيه كفاش مضحكش عاد استوعبات اش قالت جمعات الضحكة موجدة راسها لشي تصرفيقة من حيث لا تدري و لكن عكس توقعاتها موقع والو اكتفى بأنه بعد عينيه من على وجها واقف من بلاصتو كيقاد حوايجو
و مشا فحالو بلى حتى شي كلمة
حطات يديها على وجها كتنهد من آش وقع كتحاول تعرف آش خلاه يتعصب بهديك الطريقة ..واقيلا هي لي كان خاسها تكون معصبة ..صراحة مبقاتش عارفة يمكن حماقت او ولا كيبقا فيها اولا واقيلا فهمات بلي ما عندها أمل من بعد اليوم .
جلسات بلاصتها كتنزل شعرها بيديها و طلعات لبيت قادات حالتها مغطية اثار الضرب لي على وجها بالماكياج..كان الالتهاب لي فيهم مشا و لكن جروحهم كبيرة لدرجة بقاو باينين
حاولات متديهاش فالموضوع بزاف و لبسات حوايج جداد بلونها المفضل الجديد :كحل ..اه كحل فحال زهرها و حياتها المشؤومة
بانليها راسها فالمراية و فحال شي راهبة بهديك الكسوة الكحلة لي طويلة بكمام طوال و عنق عالي شوية باش ميبان ليها حتى حاجة من جسدها لي مشوه .
نفخات معصبة فاش شعرها مبغاش يتجمع كيف بغات و استسلمات ليه مخلياه مطلوق على الكسوة لي عانقات جسدها و كأنها مصاوبة على قياسها ..هي براسها كانت كتغلط فماقاسات حوايجها فاش كتمشي تشريهم و معرفاتوش كفاش دار جابهم ضابطين بهاد الطريقة
:"اجي ياكما بديت كنحماق ؟
سولات راسها بشك و ضحكات بحزن مسكتة عقلها .
نزلات لتحت ..غادية لجيهت قاعة الماكلة . اه ولفات صافي ..كانت أول وحدة فيها ..جلسات فكرسي لي على ما فهمات مخصص ليها ...كانو الخدم كيقادو الطبلة بهدوء ..كيتحركو قدامها بلا ما يهزو فيها عينيهم
حسات بالملل و محسات حتى لقات راسها واقفة حداهم كتعاونهم .
:"لالة غير رتاحي قربنا نساليو
قالت وحدة من العاملات و هي حركات ليها عينيها بمعنى ماشي مشكل و خدات الطباسل من يديها كتستفهم و من بعدهم الكيسان..شاغلة راسها فشي حاجة لي كتعجبها حتى سمعات خطوات من الباب هزات راسها جيهتو كان لوريس و موراه مارسيل..دغيا نزلات عينيها فاش تفكرات اش وقع و هو جمد بلاصتو كيشوف فيها فحال شي مراهق حتى حس بضربة على كتفو
:"لولو حيدي احبيبة من الطريق
قال مارسيل بصوت انثوي و هو شاف فيه بقرف
:"كنت حاس بيك ماشي حتى لهيه
قال بقرف و مارسيل جاوبو شاد فدراعو بدلع
:"اه و نتا لي فيقتي هاد الغريزة فيا
قلب لوريس عينيه بملل محيد من حداه و هو كيضحك و مارسيل حتى هو موراه كيبتاسم ..منتابهش لحضورها و مشا كلس حتى دخلو البقية ..ميكي كيكمي و جو و جولي موراه شادا فيد خوها كتبتاسم ليه على شي حاجة قالها ليها
شافت فيهم و تفكرات يوسف و هادي كانت أول مرة تحسد شي واحد على شي حاجة عندو و معندهاش
حسات بالطبق ديال المقبلات لي فيديها مشى و هزات راسها بزربة لقاتو لوريس واقف حداها خداه من بين يديها و حطو بلاصتو
:"نتي يديك مهرسة غير كلسي هوما غيكملوا
قال ببرود مبالغ باش يغطي على باش كيحس قدام البقية و هي حركات راسها بئحراج و مشات حدا جولي لي بتاسمات ليها بطريقة غريبة ماشي فحال ديما
:"كيف بقات يديك شوية ؟
:"اه الحمد الله
حركات ليها جولي راسها كرد على كلامها و سكتات حتى سالاو من تجهيز الطبلة و خيم السكات على القاعة كيتسناو
:"الزعيم تعطل !
قال ميكيلي كيشوف فلوريس لي هز كتافو بمعنى معارفش
:"جلال خرج قبايلا
وجهات كلامها لميكيلي و هو حرك ليها راسو بحترام سامح ليهم باش ياكلو
كان الجو هادئ مكيتسمعو فيه غير صوت الفراشط على طباسلهم حتى قاطعو مارسيل
:"الهيبة زوينة
قال جملتو من فراغ مخليهم يشوفو فيه بستفهام و هو كمل
:"شوف الزعيم دبا مكاينش و نتوما كتصرفو فحايلا كاين مقادرينش حتى تهضرو
و ضحك فآخر كلامو مخليهم يخنزرو فيه على افكارو البايخة
:"تفو عليك نتا هو لي كيقولو خاسو يضور لسانو ففمو عشرة دالمرات قبل ما يدوي
قالت جولي وسط ضحكاتها و هو شير عليها بليمونة صغيرة تفاداتها كضحك
:"هي تهنيتي منو ..وخا فكرني نقوليه هادشي فاش يجي
قال ميكي و هو كيشرب من كاسو دالقهوة
:"ياكما يسحابليك غنتخلع بفف انقولها ليه فوجهو
جاوبو مارسيل بفخر هاز راسو لسما و هما بداو كيضحكو بيناتهم حتى وقف جو من بلاصتو مشابك يديه قدامو
:"مستر استبان
نطق حادر راسو و مارسيل وجهو صفار بالخلعة و عينيه خرجو من بلاصتهم
ضارت شافت جيهت لباب فحالهم بخوف و مكان حتى واحد ..انفاجرو بالضحك كيشوفو فجو لي رجع كلس بلاصتو كيبتاسم ببرود و مارسيل كيشوف فيه بكره
لقات راسها كضحك بيناتهم بصوت مرتافع فحالهم على حوارهم البايخ ..فكروها فخوها كان كيسحابليها هو بوحدو لي كامل هضرتو مكلخة
موعات براسها غير عليهم كيشوفو فيها كفاش كضحك معاهم شادا فكرشها ...ابتاسمات بئحراج من وضعها وسط منهم حادرة راسها غافلة على لوريس لي كان كيبتاسم لبتسامتها ساهي فيها كفاش تزنكات من نظراتهم
:"على هاد الحساب امارسيل غادي نصبرو على نكتك الحامضين باش ضحكلينا ماريا
قالت جولي بلطف معانقاها من الجنب و هو ابتاسم محرك ليها راسو كموافقة على كلامها ..شافت فيهم واحد بواحد كانو كلهم كيبتاسمو ليها بلطف كلها على طريقتو حتى من جو لي وجهو كان بارد قدرات تشوف من عينيه بلي كان شبه فرحان .
كملوا ماكلتهم فنفس الجو و هي كضحك على ابسط كلماتهم ..آه ضحكات بزاف حتى حسات بفمها تشنج كتحاول تنسى الواقع ..كانت كتبالغ و عارفا هادشي و لكن عقلها مكانش قادر يستحمل كثر من هادشي ..مكانتش قادرة تنفس كثر ..القصر ..لبيت ..الحديقة الخلفية كلهم ولاو كيخنقوها ..لهوا دهاد المدينة لي باقا معرفتهاش ولا فحال السم بالنسبة ليها ،هادشي علاش مهتماتش لصورتها بيناتهم وضحكات حتى جرحات حلقها فحايلا حياتها كتعتامد على هادشي .
سالاو و وقفات قدها قدهم
:"شكون فيكم اليوم هو المدرب ديالي ؟
قالت بحماس كدوز عينيها بيناتهم و هما شافو فبعضياتهم
:"انا و لكن ...
قال ميكيلي و شاف فيديها لي مهرسا
:"ماشي مشكل انا كنخدم بيدي ليمنية كثر ..ليصرية فحال وجودها فحال عدمها
شرحاتليه مصرة و هو مزادش معاها الهدرة
:"غنطلع نبدل و نزل عندك
و على كلماتها توجهات بزربة لدروج
مارسيل :"متأكدين مكتجيه والو ؟
لوريس :"شكون ؟
مارسيل :"الزعيم واش ماشي ختو ولا شي لعبة شفتها شوية ...فحالو
و أشار لراسو بمعنى حمقة
:"كاين لي كيبوس ختو
جاوبو لوريس بحدة و خرج من القاعة
مارسيل :"مالو هادا حتى هو اش قلت عاوتاني !؟
جو :"نتا شي نهار غادي يتقطع ليك هداك اللسان غير بقا
هضر من بين دخان السيكار ديالو و خرج و هما موراه واضعين حد لحوارهم .