الحب المحرم

Psycho32

:"نصف الأرباح ليا الا وصلت ليك الشحنة من هنا حتى لمكسيك
علمو بلا مبالاة و هز كتافو كيشوف فوجه الزبون ديالو الرفض و حتى انه تعصب و قرب يديه كيحل ربطة عنقو مخنوق
:"دون ،سمحليا ولكن منقدرش ..انا غير مرسول من الأسرة الروسية و الزعيم مستحيل يقبل بنصف الأرباح ضيع منو
:"مزيان !طلب من الزعيم ديالك يوصلها بنفسو الا قدر
جاوبو ببرود و جبد شي وراق دصفقات وحداخرا كيراجع فيها بينما الراجل لي قدامو وقف ما عندو ما يدير ،سد فيستو و حدر راسو بحترام راجع بلور ،حتى بعد عاد عطاه بضهرو باش يخرج و فاش حط يديه على لباب وقفو صوتو من لور بنبرة غير لي كانت فيه قبل
:"عشرين فلمية كافية
ضار عندو الزبون عينيه غيطيحوا للأرض من الصدمة ..ممتيقش اش كيسمع ولا ياكما كيضحك معاه ..لا دون مكيضحكش باينا بغا يستخف بيه
:"سيدي انا غنهدر مع الزعيم ديالي و نرجع
قال بحترام و بغا يخرج مرا وحداخرا حتى لقاه كيقرب منو ببتسامة كبيرة
:"علاش ؟...و حنا وصلنا لاتفاق فحال لي بغا ،عشرين فالمية ليا و لباقي ليكم
تكلم بتبات و وجهو مباينش عليه الضحك ،حرك لي قدامو راسو موافق بزربة و مد يديه لي عليها وشم نسر كبير فالوسط، لوشم لمشترك للأسرة الروسية فحال وشم تنين لي عندو هو مع الفريق ديالو ،سلم عليه فرحان و رجع مشا معاه حتى لطبلة فين سنا الزبون الروسي لتحت دالورقة و جلال حل لخاتم ديالو حاط الختم ديالو فالورقة من جيهتو
:"شكرا بزاف دون استبان
شكرو للمرة الثالثة و هو عند لباب ممتيقش بلي نجح فعقد اتفاق مع أكبر دون كاين و بهاد السهولة ..الزعيم ديالو غيفرح بزاف و يمكن يعلي من مرتبتو بين باقي الرجال

:"واش مرضتي!علاش دخلتي وسط لخدمة اش كتفهم فيها
غوت استبان بصوت عالي مع سد لباب كيكلم راسو و عينيه على لحيط قدامو معصب
جلال:"بغيت ،رشقات ليا ندخل
جاوب نفسو بمكر و مشا جلس حاط رجل على رجل لشوية دالوقت قبل ما ينزل رجليه بزربة و تعابير الغضب رجعو على وجهو
استبان:"واش عرفتي اش درتي ،واش باغي لينا الإفلاس (غوت مرة وحداخرا و سكت شوية هاز يديه قدامو فحايلا كيتناقش مع شي واحد حاضر معاه فالمكتب )شوف ،هاد لمرة غندوزها و لكن مباقيش دخل فالخدمة ..نتا مكتعرف فيها والو .
حاول يسوي للأمور بيناتهم بشوية و ضور عينيه فراسو فحال شي حمق كيتسناه يجاوبو
جلال:"من ليوم غندخل فاش نبغي فحالك تماما فاش دخلتي و طلبتي منها تمشي
جاوب نفسو بحقد و ميل راسو لجنب بحزن
استبان:"لي كيبغيك عمرو غيمشي و يخليك (تكلم من بين سنانو )جلال !مغنبقاوش نعاودوا نفس الهدرة، عندك ثلاثة وتلاتين عام ماشي خمسطاش
تكلم بنفعال و يلاه غيجاوبو جلال سمع دقان فالباب دالمكتب ،عدل من وضعية جلوسو بزربة مبتاسم بثقة لسكرتيرة لي دخلات معنقة ملفاتها و ستيلو بين صباعها
:"مستر استبان سمحليا الا قاطعت اجتماع...
تكلمات قبل ما تهز راسها و فاش دارتها و بانليها غير بوحدو سكتات بصدمة حيت متأكدة بلي سمعاتو كيهدر مع شي واحد من بعد ما خرج واحد من رجال خوليو الزعيم الروسي
حرك ليها راسو بمعنى نساي و هي بلعات ريقها بصعوبة كتشوف فيه بخوف و من حالتو لي غير مكتكفس نهار على نهار ،ولا متوحش و حماقو لي تكلم عليه واحد لمرة لوريس و هو سكران معاها مبقاش كيتخبى
:"احم..دون دوفيل غيجي فلعشية بغاك فأمر مهم هادشي لي قال
كملات كلامها برسمية كتشوف فيه كفاش خنزر فيها
استبان: وعلاش؟
:"معرفتش اسيدي
جاوباتو بصدق و بصح غريب انه دون كبير فالعمر يزور واحد آخر ،فالحالة العادية كيتلقاو فالإجتماع لكبير لي كيتنضم كل شهر مع باقي رؤساء المافيا و بما انه دون كبير فحالو طلب يشوفو فهادشي كيعني بلي لموضوع خطير
حرك ليها يديه بمعنى تقدري تمشي و وقف غادي جيهة لبار صغير فقنت المكتب كاب لراسو كاس دلفودكا ،هزو كيشرب منو و عينيه جاو عليها عاطياه بظهرها باغا تحل لباب ...جلال باغي يلعب ،وخا!
:"لايلين
وقفها و نزل كاسو من حدا فمو ، ضارت بشوية لعندو و الرعب لبسها فاش شافتو كيضحك ليها حتى بانو نيابو..حسات بالدم جمد فعروقها
:"نعام اسيدي
تكلمات بزربة منزلة راسها و هو قرب منها بشوية كيلعب بكاسو بين يديه
:"بغيت نسولك (وقف قدامها حاط يديه لحرة فجيبو كيشوف فيها من لفوق للتحت)مطلبتش منك شي حاجة ..امم معرفتش ،مقتليكش شي حاجة غير بيناتنا و نسيت مثلا
سالا كلامو بهمس و هي شافت فيه بزربة بخوف ،معارفاش واش هادي الإشارة لي هدر عليها و لا كيختابرها ..مفهمات والو و عارفا بلي أي كلمة غتخرج من فمها تقدر تسالي حياتها و لا تعفي عليها
:"لا اسيدي
:"متأكدة!؟
سولها مرة وحداخرا و قرب منها كثر ضاغط على لكأس بين يديه حتى تهرس و هي قفزات بخوف شوية و تبكي بالخلعة
:"لا اسيدي مطلبتي مني والو
جاوبات بثقة و شافت مباشرة فعينيه حتى بانليها اقتانع و رجع ضهرو لور من بعد ما كان محني لطولها
:"خرجي
محتاجش يعاودها جوج مرات لقاها طارت من قدامو
ضيق عينيه كيشوف فمنين خرجات بشك ..حاس بشي حاجة كتوقع من مور ضهرو و طوال زمان ولا قصار غيعرفها
هز فيستو بيد وحدة خارج من لمكتب و فطريقو خنزر فلايلين مور مكتبها فالإستقبال لي مقدراتش تهز فيه عينيها ..الا كيسحابليها غضحك عليه فهي غالطة
:"لقصر
آمر شيفور ديالو بحدة مع طلع لطونوبيل و تفكر لوريس لي مكانش كيحتاج يهدر و كيفهمو اش باغي ماشي فحال هادا لي خاسو يعلمو بكل خطوة ليه .
رجع راسو لور بتعب كبير مغمض عينيه لنص ساعة ديال طريق خاصة انه مبقاش كيقدر يسوك بوحدو هاد سيمانة لخرة بسباب استبان و جلال لي ولاو على صراع مكيوقفش ،يقدر فأي لحظة يقلب طونوبيل فشي بلاصة بسبابهم
رجع ليه همس جلال فودنيه فحال شي شيطان كيوسوس ليه فراسو و عينيه تحلو بفزع مخنوق من بعد ما صبر ليهم بزاف ..خشا يديه فجيبو كترعد جبد قرعة ديال دوا صغيرة باغي ياخد منها حبة حتى طاحوا ليه فالأرض كاملين بسباب الرجفة لي فيه
:"سيدي نعاونك
تكلم بزربة شيفور كيضور عينيه عندو لور و حاضي طريق فنفس لوقت
:"ديها فطريقك
غوت فوجهو و لآخر مرجعش شاف فيه ،ساكت فمرة فاش شاف فعينيه بلي غيقتلو فأي لحظة .