الحب المحرم

Psycho25

______________________________________

دازو أيام من بعد ما عرفوا بوجود إستبان حداهم ،و لي خلعهم كثر انه مادار حتى ردة فعل ولا جا مرة وحداخرا بمعنى عرفهم فهموا بلي عارف الكوخ.
قطع لوريس تيليفون و هي كتشوف فيه من أول ما بدا المكالمة مع زوربا وخا مكتفهمش روسية دوزات نص ساعة بلا ما تحرك مراقبة تعابير وجهو باش تفهم منهم الوضع
:"صافي الطيارة غتكون هنا غدا
قال لوريس اخيرا مبتاسم و هي عاد رجعات فيها الروح حاطا يديها على موضع قلبها متنفسة براحة
لوريس:"الا ولينا تحت حماية زوربا حتى استبان ميقدرش يوصليك
كمل كلامو حاط يديه على كتفها و هي شافت فيه بمتنان كبير لمجهوداتو معاها ..كفاش قادر انسان يتخلى على حياتو كاملة و يعيش بلا استقرار على قبلها و ما يتسنى منها حتى مقابل
ماريا :"وخا نمشيو عند كارلوس ليوم!بغيت نودعو
سولاتو بلطف و غير من وجهو عرفات بلي الفكرة غالطة ...و لكن احتمالية انها تعاود تشوفو من بعد هروبهم غدا كانت منعدمة
لوريس:"وخا وجدي راسك
قال مبتاسم ببرود و هي مشات من قدامو لبيتها و هو لديالو
من بعد نص ساعة تقلبات الآية و لقات راسها كتسناه يسالي و يخرج ..لوريس مكانش كيتعطل بتاتا فلباس ..حتى انها كانت كتشك فيه عندو قوى خارقة باش يوجد راسو فخمسة الدقايق
وقف قدامها بلباسو القديم فحال فقصر استبان ،غير شافتو حسات بالزمن رجع بيها لور و جرح روحها تحل من جديد ،للحظة عينيها جمدوا على سمطة خصرو لي هازا ربعة دلفرادا بلعمارة ديالهم
هز فيستو لفوق كيلبسها و ضار لعندها كيشوف فعينيها لي ولاو حمرين ناسية انها ترمش
ماريا :"لوريس الا منقدروش نمشيو صافي بلاش
همسات بخوف و قلبها نبض بجهد حتى حط يديه على كتافها
:"متخافيش هادا غير احتياط حيت من هادي جوج سيمانات ما خرجتي
طمنها كيشوف فوجها باش يفهم منو واش اقتانعات او لا
ماريا :"مبقيتش باغا نمشي صافي
قالت بصعوبة مبعدة يديه من عليها و حطات يديها على عنقها من الإحساس لي سكنها على غفلة و كأنه شي حاجة خايبة غتوقع ..او غير لباس لوريس هو السبب
لوريس:"ماريا سمعيني (و شد فيها مضورها لعندو يديه على حنكها )ميمكنش تبقاي سجينة عندو وخا بعيدة عليه ..اشنو الفرق بين انك تبقاي محبوسة فالكوخ او فالقصر ديالو
شافت فيه بخوف لمدة طويلة و بلعات بصعوبة محركة راسها بآه عاد ابتاسمات ببرود غادية من قدامو
من بعد ساعة كانو فالمطعم و كارل تحت طلبها قرر يجلس معاهم و يخلي لي خدامين عندو يتكلفوا بالباقي .
هز يديه لواحد منهم غامزو بينما كانت مشغولة فالهضرة مع لوريس كضحك على نكتو البايخة و هي حلات فمها بصدمة فاش تحطات قدامها طبسيل دحلوتها المفضلة ،علاقتها بشكلاط ففترة الحمل ولات قصة حب كبر من استبان بنفسو يمكن .
لعنات راسها داخليا حيت ذكراتو حتى فحوارها مع نفسها و ضارت لعند كارلوس مبتاسمة ليه
كارلوس :"آخر مرة جيتو معطلين ..فاش طلبتيها كانت سالات
قال بلطف و هي شافت فوجهو لي زينوه تجاعيد و عينيه بلون لبحر عاد نقزات معنقاه و هو حاوطها بيديه كيضرب على ضهرها و شاف فلوريس لي مبتاسم بحب .
كارلوس :"نتا غبي وبزاف ياك عارف هادشي
كلمو باليونانية باش كتفهمش و لوريس استوعب معنى هضرتو لي معنى فيها على الحب لي مغرق عينيه فكل مرة كيشوف فيها ..كان مفضوح !
كارلوس :"يالاه كولي دغيا باش تمشي ،لبرد بزاف فليل غتمرضي و هاد الطويل مغيعرف ميدير ليك
تكلم بجدية مبعدها عليه و هي ضحكات لايحة ليه بوسة فسما و هو غمزها
لوريس :"انا مناكلش ياك ..اجي مالك حاقد عليا هاكا كتعرفني قبل منها
سولوا لوريس بحقد و غيرة من بعد ما تسنا طبسيلو حتى هو و ماجاه والو و فحال ديما كارلوس مخسرش عليه حتى شوفة وحدة قالب عينيه بملل
:"حل فمك
جاه صوتها كضحك و المعلقة قدام وجهو..سها فوجها مبتاسم بغباء كيشوف فضحكتها و عينيها لي كيبريو فرحانة ،حاجة مكانش كيشوفها ديما
:"لوريس حل فمك دغيا غيطيح
فيقاتو من سهوتو كضحك بجهد على تعابير وجهو و كارل قلب عينيه بملل عاد حل فمو مخليها توكلو
كارلوس:"عاودي دوقيه متبقايش عزيزة عليا
هددها هاز صبعو قدامها بتحذير و هي حركات راسها بمعنى مفهوم و لوريس خنزر فيه كيهضر معاه باليونانية وبلا ما تحتاج تفهم عرفات كارل كيعاير فيه من الطريقة باش كان لوريس كيدير راسو مصدوم و كيحط يديه على قلبو بدرامية .
كولشي كان مزيان ،مزيان لدرجة نسات راسها وسط حوراهم و طبقها المفضل لي كتاكل ...قدرات تخلي آخر ليلة ليها فاليونان حسن من اول وحدة ..يمكن هاد البلاد معاشتش فيها احسن فترة فحياتها ونهايتها على الأقل غتكون سعيدة .
هزات معلقة ديالها فحال هديك البنت الصغيرة لي كانت فطبلة قدامهم ،جالسة على ركابيها كتشوف فيها كتعطيها نخب الحلى لي كانت نفسو عندهم بجوجات .
ضار لوريس عند البنت الصغيرة مبتاسم فاش بانت ليه ماريا كتشوف موراه و شير ليها حتى تلونوا حنيكاتها بلحمر و سمعها كتهمس لماماها بلي كيشبه لأمير لي مع حورية البحر .
ضار عند ماريا مبتاسم بفخر كيدوز يديه بين خصلات شعرو و فاللحظة لي بغات تعلق بغيرة حيت قدر يجدب لبنيتة الصغيرة ليه كثر منها تسمع صوت انفجار كبير قريب من المطعم و لي خلا الأرض تهز تحت منهم .
كولشي غوت و الناس ناضو من بلايصهم كيتسابقوا للباب لي شعلات فيه العافية .
الطوابل لي قراب تقلبوا ،و كارلوس ناض مخلوع كيشوف فجنابو فحالهم تماما مفهموا والو و هي حطات يديها على كرشها مخبيا تحت الطبلة كتشوف فلوريس لي دار نفس الحاجة كيشوف فيها بخوف عليها
:"متحركوش انشوف شنو واقع
همسليهم هي و كارل لي بزز عليه يتخبا تحت الطبلة معاها باش يحميو راسهم و ناض من بلاصتو جابد فرديه من خصرو كيشوف فجنابو ،شي زبائن كانو فالأرض مجروحين خاصة لي قراب من الباب و الشراجم .
قرب من واحد الراجل لي فالأرض حاط يديه على عنقو ..كان بلفعل ميت و لمرا لي حداه كتحرك يديها بصعوبة .
ضار لجيهة التانية لهداك صوت الصغير كانت نفس البنت مكمشة بلاصتها حاطة يديها على فمها كترجف بين دراع ماماها .
كولشي كان خايف من انه يكون شي هجوم إرهابي و هادي كانت أول فكرة جاتو حتى هو .
مشا جيهت البنت و ماماها باش يعاونهم يخرجوا حتى كيتفاجأ بهداك الصوت موراه بنبرة خبيثة حاس بحضورو موراه ..متبدلش باقي كيتحرك بلا صوت، خطواتو كانو من ديما بلا صوت فحال الشبح
:"قاعدة رقم تلاتة و عشرين مكنعتقوش لي بقاو حيين من الهجوم ،كنقتلوهم !
رمى عليه واحد من بنود فريقهم و هو ضار لعندو بشوية كيشوف فوجهو مع هديك الإبتسامة الجانبية لي عليه
:"اش هاد الترحيب البارد من بعد خمس أشهر
كلموا بحزن مصطنع و قرب منو بشوية معنقو فلحظة و لحظة لي موراها لخنجر ديالو كان مخشي فجنبو
استبان:"مرحبا بيك فالجحيم ديالي
همس حدا ودنيه مدور الخنجر كثر فالجرح و دفعو من عليه حتى تلاح لور شاد فالحيط ،عارف الضربة مغتقتلوش ولا تأتر فيه لهديك الدرجة و لكن مكانش عندو الوقت باش يلعب معاه كثر .
استبان:"جيت ناخد شي حاجة ديالي و غنمشي كنعتاذر على الإزعاج
قال بخبث وسط المطعم حال يديه لناس لي كيطلوا عليه من تحت الطوابل مخبيين..كلهم مرعوبين من شكلو..لي يمكن مردش ليه البال ولكن ولا بوحشية كبيرة من نهار بعدات عليه ،لحيتو لي خلاها تبان كثر و حتى الوشوم لي زاد من عنقوا لمور ودنيه برزوا خطورتو .