الحب المحرم

Psycho 27

____________________________________
:"آآآآآآه لوريس ..لوريس فينك ،اجي حدايا
غوتات بنبرة ديال لبكا كتحاول توقف و رجليها مخدرين مقادراش حتى تجمعهم و لما لي نازل منهم خلعها .
ضرب الباب بجهد كيغوت على الحراس و كيعاير فالحارس لي مشا ما رجع ،تحرك فالضلام لي فعينيه و باقي مولفش على انه من اليوم عمى ...استبان مكانش غير رجل مافيا عادي ...لا!كان سادي مريض خلا طبيب يدير ليه عملية لبارح فليل و يعمي عينيه و الجملة الوحيدة لي خسر عليه هي :"هذا جزاءك حيت شفتي فشي حاجة ديالي "بكل برود ،ناسي لخدمة لي دوزا مع بعضياتهم و السنوات كاملة و كونو الشخص الوحيد لي كيفهمو بلا ما يهضر و قريب ليه ...توقع منو بزاف دلحوايج و منهم يقتلو و لكن استبان كان أكثر واحد عارف بلي الموت هي أرحم حاجة فهاد الدنيا ،هو براسو كان كيتمناها فكل مرة كتجيه نوبة من نوبات الاضطراب..شحال من مرا سمعو كيغوت من ألم راسو كيطلب لموت ولا صوت همسات الأصوات فراسو لي مكيحبسش .
:"متخافيش ،انا معاك ...ماريا
قال لوريس بزربة كيمد يديه جيهتها و هي شدات فيه مزيرة عليه كتنفس من فمها و العرق غطا جسدها كامل ،يلاه دخلات تسع شهور مكانتش متوقعة تولد دبا .. اي حاجة من جلال لمريض مختلة فحالو حتى ولدو .
غوتات بجهد كتحس بشي حاجة اتخرج منها و رجليها بداو كيترعدوا
ماريا:"لوريس منقدرش نولد بوحدي ..لوريس عفاك ماشي هنا ..انا خايفة بزاف عفاك
بكات بحرقة مزيرة على يديه و هو ولا حمر بالاعصاب ..مقادر لا يشوفها لا يعاونها
لوريس:"انا معاك ..مغيوقع ليك والو
هدنها بشوية و هو براسو خاسو لي يطمنوا حيت تايه وسط الضلام و كيحاول يركز مع حاسة السمع لي بقات ليه
:"انا خايفة ..خايفة بزاف عفاك ..منقدرش ..مبغيتش توقعليه شي حاجة ..انا خايفة نموت عفاك
تكلمات بصعوبة هاد المرة و صوتها بدا كيضعاف لهمس و بين كل كلمة كتخرجها بزز كتنهد مخنوقة ...صبرها كان كبير و لكن هاد الأحداث كاملة تخطاتها بزاف ..مقدراتش تجاريها ...توقعات كولشي ..تولد و معاها لوريس اولا تولد و هي شادا فيديه و لكن عمرها توقعات تولد فقبو القصر ديالو وسط الفيران .
بكات بقهر عاضا على فمها و الإحباط كلا روحها ...ميمكنش حياة شي انسان تكون تعيسة لهاد الدرجة ..ياك كل واحد فينا عندو حقو من السعادة علاش هي فاتها هادشي !
حطات يديها بشوية على فخدها كتحسس هداك السائل لي تقيل بيناتهم و غمضات عينيها مقادراش تشوف فيه ..الدم!
بكات بصوت عالي و هي كترعد
لوريس:"ماريا اش واقع !هضري معايا متخلينيش هكا راه مقادرش نشوفك
تكلم بحزن و عصبية فنفس الوقت اما يديه مشاو لوجها بصعوبة شاد فحناكها و هي ابتاسمات حابسة غواتها
ماريا:"والو مواقع والو متخافش
زيفات ردة فعلها و دموعها كينزلوا ..الجنين وقعات ليه شي حاجة و عمرها غتسامح استبان على هادشي
لوريس:"واش مبقاش لوجع ؟
سولها بلهفة فاش حسها تقطع و غير صوت أنفاسها الضعيفة لي باقي كيتسمع فالقبو
ماريا:"أهمم
هادا كل ما قدرات تخرج من فمها و عينيها بداو كيتسدوا بشوية ...جاها نعاس .
لوريس:"ماريا !
عيط بسميتها بخوف و هي حركات يديها على كتفو بشوية باش تقوليه بلي هي كاينة و قبل ما يتسدوا عينيها شافت وجه جلال فوق راسها و بزاف دالغوات و الأصوات و الخطوات ديال الرجال فالغرفة .