الحب المحرم

Psycho 41

______________________________________
.عودة للحاضر .

سدات لباب دالبيت سالتة منهم بزز من بعد ما قاتليهم غتجيب ليهم شي حاجة ياكلوها و نزلات دروج بزربة كدور هدوك سورات فصباعها حتى جمعات الضحكة فاش بانليها جاي قدامها كيدوي فتيليفون ،غير جاو عينيه عليها ابتاسم بشر و قطع ،اتجاهلاتو دايزة من حداه كدعي باش ميجبدهاش عاوتاني
:"باقا هنا!؟مغتمشيش فحالك .
استفزها بطريقة عجيبة و هي اصلا وجهو كيعصبها ،قنعات راسها بلي مغتجاوبوش حيت مخاسهم مشاكل و لكن ملقات غير رجليها مرجعينها بلور حتى وقفات قدامو
:"ياكما هذا قصر باك؟
ضور ميكيلي لسانو ففمو بعصبية و قرب شدها من ذراعها من بعد ما شاف فجنابو بلي ما كاين حتى واحد
:"ماريا!سيري فحالك ،مبقاتش بلاصتك هنا ،هداك لي كان حاميك مات غير نساي
شافت فيه بكره كتحاول تحيد يديها منو
:"طلق مني ،لحيوان انا مرات الزعيم ديالك متهضرش معايا هاكا
طلق منها كيضحك بستهزاء و هي زيرات على لخاتم لي فصبعها حابسة لبكية
:"راه مات ،واش نتي حمقة ،انا نوع من بنادم ،ياربي غير لحمقين فهاد لقصر (و قرب منها بشوية )شوفي فيا يا غتهزي حوايجك و تمشي فحالك و تدي معاك لكلب دالحراسة ديالك لوريس ولا غنقول للزعماء كاملين ارتي هي بنت الزعيم لي زيفتو الموت ديالها باش ميقتلوهاش و نتي ازوينة عارفة الا حسو بمرا غتاخد بلاصة باها اش غيديرو ليها
قال كلامو الأخير بهمس خبيث و شدها مرة وحداخرا ،شاف بنتصار فعينيها لي تزيرو بالدموع و يلاه غيزيد يدوي ضرباتو براسها لنيفو حتى رعف ،طلق منها كيمسح الدم لي نزل منو و هي رجعات لور كتشوف فيه بكره
:"الا قدرتي ديرها و غادي تشوف لحماق شنو هو
و هربات من قدامو ،غير خرجات لبرا جرات حتى للقبو و كل مرة كتشوف موراها بخوف ليكون تبعها ...يمكن يلاه كانت واقفة قدامو فحايلا عندها قوة لعالم كامل و لكن فالحقيقة ماشي بصح ،كتحس بضعف غريب بلا استبان من نهار مات و شعور بلي تقدر تموت فأي لحظة او يقتلها اي واحد من هادو لي فالقصر ولا ساكن فعقلها ..وخا لوريس ،جولي و جو ،استبان كان فحال شي درع شفاف حاميها من هاد لوحوش و دبا عاد حسات بيه فاش مبقاش .

فالقبو ،كان فاصلها عليه غير خمسة درجات و باب ،حلاتو و سداتو حاطة راسها عليه من بعد ما دخلات كتوجد نفسها لآش كاين موراها .
ضارت اخيرا و قلبها اختارقو ألم زوين و خايب فنفس لوقت ...الكم لهائل من التصاور ديالو خلا نفسها يتقطع .
تماثيل ،جرائد ،لوحات مرسومة ...كلهم عليهم وجهو ،بتعابير مختالفة ،مرة كيضحك ،مرة مبتاسم ببرود و عاد حوايجو لي مكيتعاودوش من صورة لوحداخرا ..شيئ كان كيخليها تحس بيه باقي عايش فهاد الغرفة .
قربات من وحدة من الصور لي باينة مصوراها الصحافة ، كان لابس فيها حوايج غراب فحال لي شافتو مرات قلال بيهم و عينيه مكحلين...يديه فيها سيكار و كيضحك مرجع راسو لور ...كلشي فالصورة كيقوليها بلي لي فيها جلال ماشي استبان.
حطاتها بشوية و دوزات يديها على لوحة كبيرة محطوطة فالأرض ...كانت معلقة فالمكتب لقديم ديالو ،لابس فيها لباس رسمي كحل و خاشي يديه فجيابو ،نظراتو باردة جهة الرسام لي غالبا كان قدامو و هو كيرسمها ،كتافو ،عينيه ،ضهرو لي مستقيم ،النرجسية و التفاخر لي فلوحة كان لإستبان .
شهقات بضعف جالسة فالأرض فاش مبقاتش قادرة تستحمل كثر كتبكي فحايلا يلاه مات لبارح .
:"علاش مقادراش نساك علاش!ياك لوقت كينسي كلشي علاش مقادراش نساك
غوتات بحرقة و ضربات لوحة برجليها حتى تهرسات و دفنات وجها فيديها كتبكي
:"اشنو انا اشنو ؟واش مريضة حيت كنبغيك لهاد الدرجة ..مكانش خاسك تموت ماشي عدل ،انا لي كان خاس نمشي و نتا لي كان خاسو يكون هنا كيبكي حيت باغي تشوفني ،حيت مقادرش تعيش بلا بيا ماشي لعكس .
و شهقات بألم كتمسح فدموعها ،مشاعرها مخلطة بين الغضب و الحب ...مكرهاتش تشوفو مرة أخيرة باش تحاسبو ...بأي حق يدخل لحياتها بهديك الطريقة و يمشي منها فحايلا ما وقع والو .
:"عرفتي شنو لي معصبني كثر (و سكتات كتشوف فلوحة ،جهة وجهو فحايلا كتدوي معاه )انه كنت كنتوقع منك كلشي الا هادشي ...الا تنتاحر، نتا استبان لعضيم تقتل راسك لا مستحيل (و ضحكات بعصبية )،و شنو وقع؟قتلتي راسك قدامي ..غنحماق الا فكرت فيك كثر ..غنحماق.
تمتمات كلماتها الأخيرة و ناضت بشوية من الأرض شادا فطبلة لي تما ،حتى جات يديها على صورة صغيرة دوجهو ،قرباتها من وجها كتفكر فالموضوع لي شغل بالها هاد السنوات كاملة ،حطاتها فجيبها متنهدة بضيق مقررة انها تفكر فالموضوع من بعد و خرجات من لغرفة .