الحب المحرم

Psycho 38

______________________________________

مني سالا الحفل ما عاودت شافتو او بالأحرى مني نزل من مور ما لقى الخطاب ديالو ،قلبات عليه بعينيها حتى عيات وسط الناس و سولات جولي عليه و كل مرة كانت كتعطيها سبب جديد ،مرة عندو اتصال مهم من الخدمة و مرة خرج باش يسالي شي صفقة مع رجل أعمال من الحضور .
حتى فاش كانوا راجعين مكانش معاهم أملها الوحيد كان انها تشوفو فالقصر و لكن مكانش فيه .
بدلات حوايجها و جلسات قدام المرايا فبيتها كتشوف وجها ،الغرة لي كانت على جبهتها طوالت حتى ولات فمستوى باقي شعرها ،آثار الجروح لي تسبب ليها فيهم مبقاوش كيبانوا بزاف و لكن هي عارفا كل واحد منهم بالضبط فين كاين فوجها و السبب ديالو ..سولات راسها واش سمحات ليه بصح واش قابلة الحب ديالو مقابل اش دار فيها قبل .
دوزات يديها كتقيس فالوشم لي على جسدها كجواب على تساؤلاتها ..كتكره عقلها لي مكينساش ..هي ماشي حقودة و لكن فحال لي كان كيوصفها خوها همها لوحيد انها مكتنساش .
تنهدات بضيق و دوزات يديها على وجها ...غتنسى على قبلو على قبل بنتها غتنسى و غتعيش معاه حيت كتبغيه و مع الوقت غادي تقنعو يرجعوا لبلادهم باش ترجع عند عائلتها و من بعد غتشرح ليهم كلشي ..هادشي كلو بطبيعة لحال من مور ما تعاونو يتعالج و هادي اول خطوة ليهم لي ممتأكداش واش غتقدر طبقها معاه حيت ببساطة استبان مستحيل يقبل يمشي عند طبيب نفسي .
ناضت من بلاصتها لعند ارتي لي نعسات وسط نموسية ،غطاتها و باست وجها كتبعد شعرها لي على جبهتها ،ابتاسمات لملاكها صغير و وقفات خارجة من البيت من بعد ما سدات لباب بسوارت ،فكرات تديها للوريس حيت هي مكايناش حداها دبا، أو تعيط لوحدة من الخدم تبقا حداها على ما ترجع و لكن لقات بلي ما عندو لاش ..غترجع دغيا .
نزلات دروج بشوية حيت ضلام حتى لباب الرئيسي لي حلاتو و خرجات لبرا ،لحراس كانوا عاطيينها بضهرهم داكشي علاش رتاحت نسبيا و مشات جلسات فبلاصتها ديال ديما ،فين كانت الشجرة لي قطع ...فكرات بلي كون بقات كانت غطلب منو يقطعها باش تنسى شنو لي كان كيخليها تخبى موراها و لكن علامن كتكدب القصر كلو كيفكرها فماضي خايب ..حتى هو بنفسو كان بطل كوابيسها
:"صافي صافي مغنفكرش فهادشي ..انا غير متوترة من قرار الزواج صافي !
تمتمات و قطعات وعد مع راسها انها مغتبقاش تفكر لي داز
:"اخيرا مبقيتش لوحيد لي كيهدر مع راسو هنا
جاها صوتو من موراها ومحتاجتش ضور لعندو حيت جلس حداها فالأرض ،فيستو كانت مطوية فوق ذراعو و قميجتو محلولة من لفوق و مكمشة، و ريحة الشراب مجهدة عاد شماتها فاش قرب منها
شافت فيه لقاتو كيشوف فصور قدامهم ،عاقد حجبانو بتركيز و فحايلا كيفكر ،حتى شكات فيه واش كان داوي معاها ولا مع راسو
ماريا:"كلشي كيدوي مع راسو اجلال
ضحك بستهزاء على جوابها و تنهد مرجع يديه لور
:"انا استبان ماشي جلال
:"عارفة غير كنفضل نعيطليك جلال على استبان (و سكتات شوية و شافت فيه )حيت نتا لي كنتي ..
سكتات مخلياه يفهم كمالة جملتها ،حرك استبان راسو بمعنى فهمت و جبد من جيبو قرعة صغيرة مربعة لماركة مشهورة دلويسكي كيشرب منها،شافت فيه بقرف و هو حاضي تعابير وجها حتى تخنق بآش كيشرب و بعد القرعة من فمو كيكحب و كيضحك
:"مزيانة فيك تموت مخنوق بيه
تشفات فيه بحقد و هو كيضحك كثر مرجع راسو لور حيت مكتخليش الفرصة فين تنتاقم منو
ماريا:"فين مشيتي ؟عرفتي شحال قلبت عليك
سولاتو اخيرا بزز من كرامتها و صوت ضحك ديالو نقص حتى اختفى و شاف فيها بتركيز كفاش كتلومو بنظراتها
:"فاش نسولك جاوبني ،متبقاش تشوف فيا هاكا !عرفتي بديت كنفكر ياكما تراجعتي على شنو قلتي ليا قبل ،متبقاش دير هاكا
استبان :"مشيت نحتافل انا و (أشار لراسو )هو... بآخر ايامو ،حيت قرب يمشي ..قرب يموت
ضيقت عينيها مفاهماش اش كيقول حتى كتسمعو نفخ بقلة صبر حيت مفهماتش
:"هو .. جلال ،قرب يمشي ،خديت دوا كل نهار ،كل نهار حتى قتلتو ،غنقتلو (تكلم فحال شي حمق ،كيضحك و كيغوت معصب و يديه كيعبرو على هدرتو حتى سكت كيشوف فيها كتحاول متخافش من حالتو ..هو غير سكران هادشي باش كتحاول تقنع راسها
ماريا :"امم فهمت ،بعني نتا كتمشي عند طبيب !؟
سولاتو و دارت لعندو بجسدها كامل باش تركز معاه
:"اوهووو!شحال من طبيب مشيت عندو ،متقدريش تخايلي (سكت و شرب من قرعتو حتى نزل على عنقو و مسحو )مشيت عند بزاف حتى فاش مكنتش محتاجهم
سالا و جمع ضحكة كيتفكر طفولتو التعيسة..واش اصلا هديك كتليق انها تسمى طفولة ،باه كان كياخدو لعند أطباء نفسيين من بعد موت خوه بيومين باش يتبت بلي ولدو عندو عقدة خلاتو يدير هادشي فتوأم ديالو و كيف كان كيقول "من الأحسن نبقاو فالناس و لا نتفضحوا"،سميتو كانت بالنسبة ليه اهم من ولدو
:"فرح دبا ههه فرح ،انا مريض نفسي بصح فحال لي تمنيتي.. تماما فحال لي بغيتي
همس بينو و بين نفسو كيشوف فيديه فحضنو حتى خرجو من افكارو صوتها
:"قلتي شي حاجة ؟
حرك ليها راسو بلا و دوا بجدية كيشوف فعينيها ..كيعرف مزيان هاد نظرات الفضول و بلي باغا توصل لشي حاجة ،شحال من مرة شافت فيه بنفس الطريقة فاش كتكون كتخطط لشي حاجة
:"علاش كتسولي ؟
بلعات ماريا ريقها كارهة زهرها..تقريبا مبقاش سكران ..حتى حتاجتو يكون ماشي فوعيو عاد فاق .
قربات منو بشوية حتى ولات بين رجليه و هو ابتاسم بحب كيبعد الخصلة لي على وجها و قرب وجهو باغي يبوسها و لكن يديها لي تحطات على حنكو متبتاه منو مخلاتوش يوصل ليها و عينيه بقاو على فمها
:"تخايل حنا مكنعرفو والو على بعضياتنا واش فخبارك ماما كانت طبيبة نفسية (حرك ليها راسو بآه وخا متأكدة ألف فالمية بلي مكيسمعش ليها ولكن كملات )..و كانت كتعجبني بزاف خدمتها لدرجة بغيت مريض نفسي
ضحكات وخا مخاسهاش ضحك من توترها و شافت فيه هز فيها عينيه حابس الضحكة حيت تقريبا عايراتو ،ابتاسم ليها و ميل راسو لجنب و عينيه لي كانو على فمها ركزو موراها
:"ههه سمحليا مقصدتش !(و باستو فجبهتو بشوية )اشنو بانليك مور زواجنا تاخد موعد مع طبيب هنا و تبدا حصص معاه ،على قبلك و على قبل ارتي ،قريت على الاضطراب لي عندك ،غيحتاج شوية دالوقت ولكن غتبرا و غترجع فحال لي كنتي قبل
تسنات جوابو بفارغ الصبر ،و عينيها كيحاولوا يشدوا ديالو لي ساهيين بعيد عليها
:"شنو كنت قبل ؟انا من ديما هاكا ! و اصلا جلال قرب يموت غنبقى غير انا !
جاوبها بحدة و هي تنهدات كتمسح على حنكو بشوية موجداه هو و حتى هي لآش غيوقع ،يقدر ينفاعل و هي متوقعة لهادشي
ماريا :"استبان!نتا عارف بلي حتى (عضات على فمها كتفكر واش تكمل و لا تسكت )حتى نتا ،كنقصد شخصية استبان حتى هي خاسها تمشي ..حتى نتا طرف من المرض ديالك واش فهمتيني !
شاف فيها اخيرا و نظراتو فيهم بزاف دالمشاعر ،الصدمة من انها قدرات تقول عليه هادشي ،و الكره حيت فأعمق نقطة فعقلو عارف بلي هادي هي الحقيقة
:"انا لي كنت قبل ،انا لي خلقت جلال فعقلي و كون كنت انا هو الاضطراب كنت غنتأتر بالدوا
حسات بيه ماشي كيبرر ليها و انها كيبزز عليها الفكرة لي عندو و لي غير قابلة للنقاش .
حركات فمها بئحباط و تبعاتو حتى رجع كيشوف موراها متجاهلها ..حتى استبان مريض ..اي شخصية من فترة المرض مخسهاش تبقا هادشي لي قرات و شخصيتو الحقيقية مكتكونش باينة اصلا فهاد الفترة ..داكشي علاش هاد الاضطراب باقي معقد و لحد الآن العلماء كيدرسوه ،هو فالحقيقة بلا هوية وخا كيحس براسو فوحدة منهم هو حتى وحدة منهم ..غير كتحط راسها بلاصتو كتخنق من انها تكون عايشة بلا ما تعرف شكون هي .
غوتات بخوف منزلة راسها لصدرو مغطياه بيديها فاش لاح القرعة لي كانت فيديه عليها او هادشي لي يسحابليها حتى سمعاتو كيكلم شي واحد موراها
:"سكت ،سكت علاش كضحك !سكت !نتا هو لمرض نتا
غوت بجهد و وقف من بعد ما دفعها غادي لعند هداك لي موراها ،و هي وقفات باغا تشوف هذا لي خلاه يتعصب بهاد الطريقة
استبان :"انا غنوريك ،غنقتلك بيدي و غنتهنى منك
و جبد فرديه مصوبو جيهتو ..جهة الفراغ ،حطات ماريا يديها على فمها بصدمة حيت مكان حتى واحد ..نسات كفاش تنفس و هي كتشوف فيه فهديك الحالة كيدوي مع لهوا و كيهدد فيه و فاش وصل لأقصى درجة أعصابو تيرا مرة مور مرة فالهوا و بدا كيغوت و لاح فرديه على داكشي لي كيشوفو بوحدو .
:"استبان اشنو كدير !؟
سولاتو بخوف و قربات منو بشوية حاطة يديها على كتفو
مشافش فيها حتى دازت مدة طويلة و فاش دارها كان كيهرب من عينيها
:"استبان واش كيتخايلك شي واحد ؟
سولاتو مرة وحداخرا و حسات بدموع كيحرقوا عينيها
:"علاش باقا فايقة ،سيري تنعسي !
آمرها ببرود و حيد يديها على كتفو
ماريا :"استبان جاوبني واش كتشوف شي واحد !؟
استبان :"ماريا !مكنشوف حتى حاجة انا ماشي حمق ،طلعي لبيتك دبا !
غوت عليها و حرك ليها يديه باش تمشي
شافت فيه حتى عيات و قربات منو معنقاه ،مبادلهاش و هي بعدات منو راجعة لداخل .
حضاها حتى مشات و دور راسو بشوية لجنبو
:"مني كنا صغار ما عاودتي خرجتي ،قتليك ألف مرة مخاسش تخرج هانتا خلعتيها!
كلم لخيال لي واقف حداه ،نسخة عليه إلا لحوايج لي مبدلين ،نسخة التانية منو لابسة قميجة كحلة ،سروال كحل و بزاف دسناسل على عنقو و لكحل فعينيه ،فحال لي كيعجب جلال يلبس
جلال:"نتا لي خليتيني نخرج ..نتا لي عندك السيطرة ،كون بغيتي تحبسني لداخل كون درتيها
جاوبو الخيال بصوت عالي مسمعو غير هو و ابتاسم ليه بستهزاء
استبان:"متندمنيش !
جلال:"صراحة تخنقت فعقلك ،و شحال ما خرجت شكرا (ابتاسم ليه بجنب و تحرك جاي قدامو )عرفتي شنو درتي دبا ،رجعتي لنقطة الصفر فاش خليتيني نخرج ،شحال عانيتي باش متبقاش تشوفني و نبقا غير فعقلك مني كنا صغار و دبا رجعتينا لهدوك الأيام