الحب المحرم

Psycho24

______________________________________

...:"متوقعتكش ترجع
قالت مباشرة فاش بانليها داخل لمكتبها و وقفات سلمات عليه كتشوف فتعابير وجهو الهادئين والابتسامة الصغيرة لي بانت فيه
:"مضنيتش طبيبة النفسية ديالي حتى هي تحكم عليا من شكلي و الماضي ديالي
تكلم ببرود مغطي الحزن ديالو و جلس قدامها مشابك يديه قدامو لمدة طويلة بقا ساكت و حتى هي محكراتش عليه مخليا ليه الوقت الكافي فين يجمع أفكارو بكون الأمر صعيب عليه .
ضور عينيه على المكتب ديالها و كأنه كيقلب على شي حاجة و دغيا لقاها ،هداك الجهاز الصغير لي تحت يديها
:"تقدري تسجلي كلامي و انا عارف ..كون سولتيني قبل مكنتش غنرفض
تكلم ببتسامة جانبية و هي تزنكات حيت عاق بيها ..كفاش فكرات ولو للحظة انها تقدر تخدعو
:"كنعتاذر ..قلت مغيعجبكش الحال و حيت حالتك صعيبة كنحتاج نسمع حوارنا بزاف دالمرات
شرحات ليه بئحراج معتاذرة منو و هو حرك راسو بتفهم و أشار ليها باش تخدم الجهاز و هي ابتاسمات من حركاتو ..كاين شي حوايج مكيتبدلوش فحال حركات يديه المتحكمة فالناس
:"تفضل مستر الفارسي
طلبات منو يبدا و هو حرك راسو كيشوف بعيد عليها فالفراغ
:"معرفتش علاش الإنسان عطا لبزاف ديال الأفعال مفهوم واحد ...ولا انا لي كنت ديما الحالة الخاصة من كولشي (حرك راسو لجنب بحركة عصبية و رجعو بلاصتو بزربة )كنت انا ديما التعريف التاني لأي حاجة كتآمنوا بيها نتوما الأشخاص العاديين .
و سكت كيشوف فيها كفاش تقادات بلاصتها موقفاه
:"حتى نتا شخص عادي ،أو بالأحرى حتى واحد فينا ما عادي مية فالمية
صححات ليه و كلامها مأترش فيه بتاتا مقتانع بفكرة انه مختالف و من ديما ماشي طبيعي فحال غيرو
:"حتى الغدر لي كيتعرض ليه الإنسان من بعيد ،من غيرو يعني ..و كنقولوا خاس نتيقو غير فنفسنا انا تعرضت ليه من راسي !فاش كنتفكر بلي انا نفس الشخص و فنفس الوقت ماشي نفس الشخص ،بلي قدرت نخبي على راسي بزاف دالحوايج فحايلا انا عدوي
و سكت منزل راسو بين يديه مقادرش يشرح ليها .. كلمات العالم كامل مغيقدروش يوصفو الخدلان لي حاس بيه ،الصراع لي عندو مع نفسو ..اي واحد كيقول فلحظة غضب بلي مقادرش يسامح راسو حيت دار شي حاجة خايبة و مكيعنيهاش و لا كيحس بيها فحال... هو بصح مكانش قادر حتى يتعايش مع عقلو كتر من هاكا بسبب اش دار .

_____________________
بعد عليها حال عينيه و تكا بلاصتو جايب راسها على صدرو و هي كتحاول تغطي جسدها العاري حداه .
شمات ريحت الدخان و هزات راسها فيه ،كانو عينيه على السقف و سيكار بين فمو كيفكر فشي حاجة معرفاهاش و لكن متأكدة بلي هاد الحاجة مهمة بزاف بالنسبة ليه من الطريقة باش تشنج فكو لدرجة خافت تخرجو من سهوتو و يدير فيها شي حاجة .
مدات يديها قاست حنكو بشوية واستبان نزل عينيه لعندها بحدة و كأنها دارت شي حاجة غلط ،فتانية شافت فعينيه بلي باغي يقتلها و فالتانية لي موراها كان كيشوف فيها بحب بايس يديها ..واش بدات كتوهم ؟
ايرينا :"فاش كتفكر هاكا!
استبان:"فعلاش باقي محملتيش مني ؟
جاوبها ببرود و ابتاسم ابتسامة كانت كولشي الا زوينة كيشوف فعينيها غيختارق روحها و هي جمدات بلاصتها ،متحكمة فراسها بزز
استبان:"باقي الحال بيبي على الولاد ..مدازش بزاف على العرس و انا باغا ندوز معاك الوقت كثر عاد نشوف موضوع لولاد
تكلمات بتوتر و قربات منو مغمضة عينيها بايساه ،دارت كل ما فجهدها باش ينساجم معاها و لكن متحرك فيه والو حتى انه مبادلهاش وتسناها حتى بعدات حالا عينيها .
حيد يديه لي تحت راسها نايض من بلاصتو بشوية كيلبس حوايجو و هي جلسات كتشوف فيه بستغراب حتى ضار عندها كيشوف فيها من الفوق لتحت
ايرينا:"فين غادي فهاد الليل ؟
مجاوبهاش و مشا لحمام ساد لباب موراه ،بغات تعيط ليه مرة وحداخرا ولكن سمعات لما تحل .
تنفست براحة و دوزات يديها وسط شعرها ،بقات بلاصتها شوية كتفكر واش يكون عاق بيها كتدير إحتياطها باش متحملش منو دبا ..حتى هي معرفاتش علاش كانت خايفة من موضوع الحمل منو لهاد الدرجة ،مني كانت صغيرة و هي كتحلم تكون ام و تكون أسرة مع الراجل لي كتبغي و دبا لقات راسها خايفة من خطوة أكبر معاه .
تفكرات كلام باها و شرطو باش يقبل العرس و هو انها متولدش معاه ...باينة هدرتو هي لي لعباتليها فعقلها و خلاتها تخاف لهاد الدرجة ..علاش ديما خاسو يدخل فأي حاجة متعلقة بيها و يعطيها رأيو و هو عارفها كتأتر بالهضرة دغيا و اي حاجة كتلعب بعقلها .
تنهدات بضيق كتشوف فيه خرج من غرفة التبديل لابس كوستوم كحل و قميجة كحلة تحت منو ..من نهار رجع يعني من نهار هروب ماريا مبقاتش شافتو كيف كان ،مبقاش استبان لي كل نهار بلبسة مكتشبهش لي سبقاتها. ولا كيلبس نفس الألوان و نفس الطقم عندو منو كم هائل لداخل ،ديما بنفس اللون لكحل .
ايرينا:"فين غتمشي فهاد الليل ؟
سولاتو مرة وحداخرا و هو تجاهلها بطريقة خلات دموع يطلعو لعينيها و يتحبسوا تما
:"استبان عفاك متعاملش معايا هاكا اشنو درت ليك ؟
تكلمات واقفة من بلاصتها و مشات قدامو حاطة يديها على حنكو و هو ضور راسو لجيهة التانية كيشوف فمجموعة العطور ديالو ،هز واحد منها راشو و كأنها مكيناش و عينيه على إنعكاسو فالمراية .
نزلوا دموعها بزز منها من تعاملوا معاها و حسات بمشاعرها تخلطوا بين الغضب و الحزن كتحاول تقنع عقلها و قلبها المراهق بلي لمضاربة كتوقع بين اي جوج دالناس و مكيعنيش هادشي بلي غيتخلى عليها و لكن مقدراتش .
حطات يديها على جبهتها كتجاهد باش تعرف اشنو دارت غالط حتى كيعاقبها بهاد الطريقة
:"استبان ،بيبي عفاك شوف فيا اش واقع ؟واش على موضوع الولاد!بيبي انا باقا صغيرة فهمني عفاك مقادراش نتحمل مسؤولية الولاد من دبا ..صافي كنعتاذر شنو ما درت كنعتاذر وخا؟