الحب المحرم

Psycho23

____________________
حلات فمها بحركة لا إرادية بمحاولة منها انها تركز كتر فلبس هدوك العدسات الخضرين و فاش شافت شكل وجها فالمراية ضحكات على راسها و دوزات يديها على كرشها كتشوف فيها من بعد ما نجحات فلبس العدسة الأولى
:"ههه علاش تحركتي امم ،كضحك عليا حتى نتا
دوات مع جنينها بصوت طفولي و قربات من المراية كتركب العدسة التانية مكملة هضرتها بلا ما تحس
:"التنمر موروت فجيناتك واقيلا ..لمشكل الا خديتي تنمر يوسف و زدتيه دباباك غن...
سمعات راسها اش قالت اخيرا و سكتات عاضة على فمها فحايلا دارت شي حاجة خايبة و سكتات فمرة حتى سالات عاد بعدات كدوز يديها على الغرة لي مغطيا جبهتها ..عمرها ظنات بلي تفصيل صغير فالشعر كيبدل لوجه كامل .
تأكدت من شكلها فالمراية و حد نظرها عنقها متافديا تشوف الوشم و علاماتو لي على ما فهمات عمرهم غيتحيدوا ..نزلات عينيها نيشان للكسوة الزرقة لي لابسة وصلات لفوق ركابيها بسبب كرشها لي كتهز اي حوايج كتلبسهم ،كلشي ولا كيجيها يا اما صغير أو قصير او ديق .
حلات باب بيتها لي عطاها نيشان على الكوزينة لي مفتوحة على صالون ،كان عبارة عن كوخ صغير بجوج بيوت ،اثات قليل و أغلى ما فيه هديك المدفأة و برغم من كولشي كان حسن ميات مرة من قصر الجحيم لي عاشت فيه .
Flash back
قبل خمس أشهر

"راه دويت (و قرب من الكوفر رادخ عليه يديه )مغديش تقلبوا طونوبيلتي ولا نسيتوا انا شكون ها!
غوت لوريس فآخر كلامو كيشوف فميكي لي خرج من العدم واقف فوجهو
ميكي:"الأوامر لوريس الأوامر
كلموا بخبث مورك على كل حرف من كلماتو و أشار لحراس باش يقلبوا الطونوبيل ولكن متحركوش من بلاصتهم من الخوف فاش شافو لوريس كفاش برزوا عروق جبهتو و عينيه ولاو حمرين ،خطوة وحدة جيهتو كتعني يمشيو الموت برجليهم.
لوريس:"الأوامر عليك نتا ..سمعتيني عليك نتا ،انا فوق منك ولا نسيتي ..انا فوق منكم كاملين، انا اليد اليمنى ديال دون استبان
غوت بغرور كبير و الحماق دالزعيم ديالو بان عليه ..دوز معاه مدة طويلة كفيلة باش تخليه نسخة مصغرة منو ،الا كان كيسحابليهم الحماق دئستبان مكاينش منو جوج فهوما غالطين.
ميكي :"وخا
و سكت مقرب منو كيشوف فالحراس بتهديد
:"بما انكم كلكم خايفين و هادشي غنتفاهموا عليه من بعد ...انا لي غنهتم بالقضية
قال بمكر و قرب من لوريس دافعو لجنب
ميكي:"اصلا معرفتش علاش مستر لوريس غيصعب علينا الأمر ،هو اليد اليمنى ديال الدون ميمكنش نلقاو عندو شي حاجة مخالفة لقواعد القصر ياك ؟
سالا كلامو ببتسامة جانبية و شاف فالحراس لي نزلوا راسهم موافقينو الرأي حتى لقا لوريس لصقليه فجنبو كيهضر من بين سنانو باش ميسمعهم حتى واحد
لوريس:"ميكيلي (و سكت مراضيش ينطقها و هدرتو حصلات فحلقو )عفاك ،مديرش هاكا وخا!؟..عارفك عارف ولكن معندها هي حتى ذنب ،مشكلتك معايا
قال بهمس و ميكي شاف فيه بكره و حقد عمرو شافو فعينيه وهز راسو جيهت جولي ،مارسيل و ايرينا و باقي الخدم لي خرجوا من بعد ما سمعوا الصداع برا .
ضحك ميكي بستهزاء و حيد يديه من على الكوفر ضاير لعندو
:"ذنب شكون اذا؟ذنب شكون الهرس لي فكتفي و النزيف لي جا فدماغي ،الموت لي شفت و قلبي لي كيبغي وحدة كتبغيك !؟ها ذنب شكون !
و سكت حاط يديه على عينيه كيحاول يتهدن عاد كمل كلمو بشر
:"متشوفش فيا هاكا فحايلا خنتك !نتا أكبر خائن بيناتنا كتفكر غير فراسك ،و جا الوقت باش تخلص
سالا هضرتو و ضار لكوفر حالو بجهد و ابتاسم فاش شافيها مخبيا تما عينيها عامرين بالدموع و الخوف باين عليها ، اعتذر منها لوريس غير من نظراتو و هي فهمات بلي الوضع خارج سيطرتو و ميكي قرب منها كيعاونها تنزل
:"اوهو !كفاش تقدر تخبي لالة ماريا كاملة فكوفر طونوبيلتك و حنا عندنا أفخم الطونوبيلات ..مستر استبان مغيعجبوش الحال
تكلم بستهزاء و هي خرجات واقفا حداه كتشوف فجولي لي شهقات حاطة يديها على فمها و ايرينا ربعات يديها على صدرها كتشوف فيهم مفاهماش اش واقع
لوريس:"غندمك ا ميكي عقل عليا مزيان
قال من بين سنانو و حتى قرب ليه باش ياخدها من بين يديه لقا ربعة دالحراس شدوه من لور و هي لي لاحها ميكي لجوج منهم باش يشدوها
:"حيد يديك عليا قبل ما نهرسهم ليك (غوت لوريس فوجه الرجال لي شادينو كيحاول يفلت من بين يديهم و جولي قربات منهم هي و مارسيل لي كيتعامل ببرود و كأنه مواقع والو )
جولي:"حيد يديك عليه
آمرات الحارس بحدة و ماجا فين يقاطعها معتارض حتى غوت مارسيل من موراها
مارسيل:"راك سمعتيها
شاف الحارس فميكي حتى عيا و ملقا راسو غير مبعد على لوريس مشير لوخرين لي معاه باش يديرو نفس الحاجة
لوريس :"حتى هي طلقوها ،ماريا سيري لبيتك
قال بصعوبة و قرب منهم باش يبعدوا عليها و لكن مارسيل قاطعو من جديد حتى ضارت عندو جولي مصدومة
مارسيل :"لا مكنضنش بلي هادشي لي خاس يوقع ،ماريا غتبقا بين يديهم حتى يجي مستر استبان ..ماريا غتبقا تحت الحراسة
لوريس:"مفهمتش اش كتقول !؟معرفتش اش هاد النظام دزبل !.. كفاش كتسمعوا لهضرة دكولشي الا انا ..انا الزعيم هنا سمعتوني
غوت وسط منهم فاش ضوروه و كيشوف فيها هيا باش متخافش
مارسيل :"مبقيتيش اليد اليمنى من شحال هادي!
رمى عليه كلامو بحدة و أشار ليهم باش يرجعوها لور و ميكي جا وقف حداه مبتاسم للوريس بشر
:"من شحال هادي مستر استبان عطانا رتبة نفسها
و سكت مارسيل ضاير عند جولي عاد رجع شاف فلوريس لي داخت بيه الدنيا
:"و اليد اليمنى باقي معرفناهش شكون فينا
قال بجدية كبيرة و لوريس ضحك حاط يديه على راسو
:"هههه دبا ..دبا بغيتو تقولوا ليا بلي لي تربيت معاهم ..لا! سمحوليا ..لي ربيتهم خانوني !وليت انا وسط منكم فحال ..
و سكت كيضحك بعصبية
:"عقلتو على مديرة الميتم لي كانت كتاخد فلوس الدولة و ما عمرها بدلات لينا حتى النوامس علاش كنعسوا لي كانو كيضروك فضهرك امارسيل ،و حتى حارس الباب لي كان كيتحرش بيك اجولي ولا مسؤولة المطبخ لي مكانتش كتعطينا لفطور الا تعطلنا بجوج دقايق وخا كنا صغار قد هاكا (و أشار لطولهم فهداك العمر )..شفتهم كاملين و لكن ما عمري شفت أحقر منكم و من احترامكم لإستبان لي مبني على الخوف .
و قرب من ماريا مشير جيهتها و عينيه دازو عليهم كاملين حتى لإيرينا لي لور كيهضر بجهد باش تسمع حتى هي بما انه مبقا ليه ما يخسر و غيموت دبا او حتى يجي استبان على الأقل يكشف ليها وجه خطيبها .
:"كلكم شفتوها كفاش تعدبات على يديه ،علاماتوا باقيين عليها!واش تربينا على هادشي !واش قادرين تنعسوا من بعد ما شفتوا حالتها ،غتقدروا تعيشوا فاش غتموت على يديه، ميمكنش تكونوا بلا قلب لهاد الدرجة
و دفل على ميكي لي قلب عينيه بملل و كأنه مسمع لحتى كلمة منهم
ميكي :"ديوها لداخل، عيطت لدون استبان باينا فطيارة حيت تيليفونو خارج التغطية ،مبقاش بزاف ويوصل
قال ببرود و تبعهم بعينيه حتى جروها معاهم لداخل ولا قاوماتهم ولا تحركات غير تبعات خطواتهم حتى بعدو من حداهم
و ميكي قرب من لوريس حتى لصق صدرو مع ديالو
:"كنواعدك بلي غنجي كل نهار باش نحط الورد على قبرك
قال بخبث و ابتاسم فلخر كيشوف فيه كفاش قرب يديه من وجهو باغي يضربو و فلخر تراجع
لوريس:"هاحنا غنشوفو شكون لي غيحط الورد على...
و مجا فين يكمل هضرتو حتى سمع صوت القرطاس من جيهة التاينة و الحراس لي كانو شادين ماريا طاحو حدا رجليها كينزفوا من راسهم و هي حداهم حاطا الفردي على راسها و الحراس جراو جيهتها وسط غوات ايرينا برعب .
ماريا:"الا قرب مني واحد فيكم غنتيري فراسي وهديك الساعة شوفوا كفاش تشرحو لزعيمكم موتي
غوتات فحال شي مريضة نفسية وسط منهم كتشوف فيهم كفاش كلهم تخلعوا حتى من مارسيل آمر الرجال ينزلوا سلاحهم
مارسيل:"عندها الحق ،شفتي فين وصلنا انتقامك ياك كنتي باغي تفشل الخطة عليه و صافي شفتي فاش ولينا
ميكي :"وانا باش عرفتها حمقة فحال زعيمك تفو
مارسيل:"غتشوف لحماق دبصح الا وقعات ليها شي حاجة
تكلم ضاغط على سنانو كيشوف فيها و ميكي ضور راسو بعيد عليه كيعاير تحت انفاسو
جولي:"ماريا عفاك
و قربات بشوية منها حتى وقفتها ماريا كتغوت بهستيرية
:"بعدي !وقفي بلاصتك والله كنقسم ليكم بلي غنقتل راسي اصلا ما بقا عندي ما نخسر ،انا اصلا ميتة من نهار دخلت لهاد القصر ،مشكلتكم غتبقا معاه، حياتكم مقابل نهرب من هنا ختاروا
و زادت قربات الفردي من راسها حالة الزناد ديالو
و تحراكات بلور لجيهت الباب الرئيسي لي مسدود
ماريا :"حلوا الباب
غوتات فوجه الحارس لي تما و مداهاش فيها و دار فحايلا مسمعهاش
:"قتليك حل الباب
غوتات كثر حتى حسات بحلقها تجرح و ضحكات مغمضة عينيها واجدة باش طلق على راسها ،حركة عرفتها مزيان غتأتر فيهم و لي توقعاتو وقع بصح فاش بانليها حتى من لوريس تخلع و بدا كيغوت عليه باش يحل الباب ..هي تقتل راسها على قبل استبان !مستحيل ديرها او تسالي حياة ولدها لي باقي مشافش الدنيا على قبل مريض نفسي فحالو
ميكي :"حلوا الباب معندها فين تهرب ،فالغالب غتجري فاش غتخرج ،غنلحق عليها متخافش
تكلم بثقة كبيرة و شاف فمارسيل لي عطاهم إشارة باش يحلوا البوابة و نص الرجال توجهو الكراج موجدين طونوبيلات
ثواني لي خدا الباب باش يتحل كامل كانت أطول مدة دازت عليها فحياتها ومتيقات تحل حتى خرجات روحها .
قربات منو بشوية عاطيا بظهرها لبرا و تفاهمات مع لوريس من بعيد فاش بانليها غادي جيهت الطونوبيل فغفلة منهم هما لي مركزين عليها و قدرات تعرف بلي ميكي واجد باش يتبعها و غيعطي لحراس إشارة باش يديرو نفس الحاجة من الوضعية باش وقف مركز عينيه عليها فحال شي حيوان و الفريسة ديالو ..كانت متهورة ..و عارفا بلي تسعين فالمية مغتنجحش فهروبها خاصة و هي حاملة ولكن غتحاول طالما هي حية غتبقا تحاول .
شافت موراها بزربة و رجعت شافت فيهم كان ميكي بالفعل تحرك و قبل ما تحاول تفهم كثر جرات بكل جهدها وسط الطريق لي قسمات الغابة آخر ما سمعاتو هو صوت ميكي لي غوت باش يتبعوها و خطواتهم موراها .
حطات يديها على كرشها كتحس بالوجع فمنطقة الحوض ديالها و الدموع تجمعوا فعينيها الا وقعات شي حاجة لولدها غتكون بسبابها .
ضارت شافت موراها كانو موراها عشرات الرجال مسلحين و جوج طونوبيلات شاعلين ضوهم باش تقدر تبانليهم فضلمة الليل .
ضارت مرة وحداخرا برعب و غطات راسها فاش سمعات صوت القرطاس ،كان لوريس وسطهم بطونوبيلتو كيتيري فيهم و حتى هما من جيهتهم ،الشباك بيناتهم لهاهم عليها هي لي دخلت لغابة وخا عارفا راسها غتوضر فيها و يمكن متلقاش الطريق الرئيسي مرة وحداخرا و لكن خاطرت.
عدد الرجال لي تبعوها ولاو قلال و معاهم ميكي، تخبات مور كل شجرة كدوز حداها كتوقف شوية تسترجع أنفاسها و كتكمل جرى و هما تفرقوا باش يلقاوها بزربة .
:"غنعتقك متخافش ،مغديش تولد هنا مغديش تشوف هادشي عفاك تيق فيا عفاك
كلمات جنينها بضعف و دموع نزلوا من عينيها فاش الوجع تجهد ومبقاتش قادرة تحرك من ألم جنابها .
جرات حتى لأبعد نقطة قدرت توصليها و جلسات حدا واحد الشجرة عاضة على فمها باش متغوتش من ألم كرشها حتى وقفوا قدامها جوج رجلين ،غمضات عينيها بحزن عارفاه واحد من الرجال ،كانوا كيلبسوا نفس السباط !
هزات راسها جيهتو بشوية و رجعات يديها مور ضهرها بشوية باش تجبد الفردي ،الا اضطر الأمر غتولي قتالة على قبل ولدها !
:"لالة دغيا خاس نهربك
سمعات صوتو و متيقاتش ودنيها و هزات راسها فيه بزربة ،كان الراجل لكبير لي هضر معاها آخر مرة ،الحارس لي تعرفات عليه فالقصر .
رمشات مفاهما والو و عطاتو يديها باش يعاونها توقف
:"خاس نديك مور هديك التلة ،تقدري تمشاي ؟
سولها بحترام و شاف فيها كفاش شادا فجنبها و هي حركات راسها بآه و تبعات خطواتو وخا متاقتش فيه كليا ولكن مكانش عندها الإختيار
ماريا:"اش غندير تما ؟
الحارس :"غتخباي
ماريا :"و من بعد؟
مجاوبهاش و نزليها راسها بيديه مدوزها من طريق بعيد على الرجال و كانت باينة بلي حافظ الغابة فحال القصر .
وصلوا اخيرا من بعد خمسة الدقايق دالمشي و حتى بقية الرجال فقدوا أثرهم و بطريقة عجيبة كانت قادرا يبان ليها الشباك لي واقع بيناتهم من موقعها و صوت القرطاس وصلها ضعيف .
شدات فشجرةحداها واقفا بزز و فاش ضارت تشكرو ملقاتوش
:"واش كنت كنتخايل
قالت بصدمة و ضورات راسها كتقلب عليه مكانش ولا حس ديالو مشا كيفما جا ،ضيقت عينيها كتحاول تشوف اش واقع بعيد معارفاش اش خاسها دير ،حتى الدار لي هضر عليها جو معارفاش نعت ديالها ،بلا لوريس غيكون هروبها جحيم كبر من انها تبقا مع استبان .