لقد جمعهما القدر

الفصل السادس

قعد عبد العزيز على السرير بهدوء وهو ماسك صوره ليه هو وأخوه ابتسم بحزن وهو بيتأمل ملامح أخوه المبتسم بسعاده

زفر بهدوء وهو بيهمس بحزن : النهارده جاى عريس لسرين

قرب الصوره منه وهو بيمرر أيده على ملامح أخوه بصوت هامس باكى : البت الانت سبتها فى ثانوى كبرت وجالها عريس

ابتسم بحزن : بس ما تخفش انا موجود مكانك صح مش هقدر أملى مكانك بس هحاول اعمل الأقدر عليه

قاطعه صوت خبط رنا على الباب

مسح دموعه بسرعه : ادخلى

دخلت رنا بفستان ناعم رقيق وهى بتصفر بمرح : إيه يا زيزو كل الحلاوه دى دا أنت احلى من العريس يا راجل

حاول عبد العزيز يضحك وهو مركز نظره عليها بحنان : يابنت أقسم بالله انا ابوكى مينفعش تعاملينى كده وبعدين إيه الصفير ده فيه بنت تعمل كده ياشيخه احترمى الفستان اللبساه

زفرت رنا بضيق وهى بتقعد جنبه : متفكرنيش انا مش مستحمله الفستان ده ومش عارفه اصلا إيه لازمه أنى البسه

ضحك عبد العزيز بمرح وهو بيضربها بخفه : يعنى عايزه تحضرى الخطبه بأيه
فتح عيونه بصدمه وهو بيرفع طرف فستانها: أنتى لابسه كوتشى

ابتسمت رنا بحرج وهى بتبعد طرف الفستان من أيد ابوها : يعنى عايزنى اروح حافيه ولا البس شبشب الحمام

أبتسم عبد العزيز بسخرية وهو بيضغط على ودنها : لا يافالحه تلبسى جزمه

ضغطت رنا على أيده بألم : براحه هتخرب الطرحه

بعد أيده وهو مركز نظره عليها بضيق : قال يعنى بيهمك شكلك قوى

حضنت رنا إيده بمرح : ياحبيبى انت عارف أنى مش بحب ألبس جزم الكوتشى عملى اكتر وبعدين كفايه انى لبست فستان

ابتسم عبد العزيز بهدوء وهو بيسند رأسه على رأسها : طيب ويوم فرحك مش هتلبسى جزمه

زفر بهدوء وهو بيركز نظره عليها من طرف عينه : مع أنه مش باين انى هشوف لا الفرح ولا الجزمه

ضحكت رنا وهى بتبعد عنه وتركز نظرها عليه بمرح : طيب بما أن مفيش فايده منى ما تجرب حظك أنت

بدأت تشد خده بمشاكسه : ما تيجى ندورلك على عروسه انت لسه قمر وحليوه

رفع رأسه وهو بيضغط على عيونه : ياااااارب صبرنى على البنت دى

ضحكت رنا بمرح وهى بتحضنه بحنان : براحتك بس انا وراك وراك لحد ما دخلك القفص

عبس عبد العزيز وشه بعدم فهم وهو مركز نظره عليها : قفص ايه انتى عايزه تحبسينى

ضحكت رنا وهى بتشد خده وتغمزله بمرح : قفص الجواز يا زيزو مع أنه بينى وبينك كده هو كمان حبسه