لقد جمعهما القدر

الفصل ٢٠

ضغطت عايده على عيونها بتعب وهى بتاخد نفس عميق : يعنى رامز اتجوزك لأنك كنتى حامل منه

ابتلعت سيرين ريقها بخوف وهى مركزه نظرها على الأرض

رفعت عايده نظرها ليها بغضب وهى بتصرخ بعصبية : إيه القط بلع لسانك ردى عليا

غمضت سيرين عيونها بخوف وهى بتهمس بصوت متقطع : أيوا أنا كنت حامل قبل الجواز

ضحكت عايده بعدم تصديق وهى بتضغط على شفايفها : وأنا كنت بقول أزاى وقعتيه وهو مش طايقك كده وعماله أقول شكله زهق منك ولا تلاقى واحده تانى بتلف عليه

ضيقت عيونها وهى بتركز نظرها على سيرين بحده : بس لأ طلع يا عين أمه مغصوب

حاولت سيرين تتمالك توترها وهى بتحاول تتحكم فى تنفسها السريع بتوتر : دى كانت الطريقه الوحيده علشان اخليه يحبنى مش أنتى كنتى بتقوليلى اعلقه بيا واقرب منه علشان

قاطعتها عايده بصراخ غاضب وهى بتقف بعصبيه : أنا عمرى ما قولتلك كده

فتحت سيرين عيونها بدهشة وهى بتبتسم بعدم تصديق : أيوا مش أنتى الكنتى بتقوليلى أزاى اعلقه بيا وانى لازم اغريه علشان يتجوزنى

حركت عايده رأسها بالموافقه وهى بتبتسم بقهر : اديكى قولتى تعلقيه وتغريه بيكى بس من غير ما يلمسك ياهانم

بدأت عايده تمشى بعشوائية وهى بتضغط على أيديها : أنا مش متخيله أزاى كنتى بالغباء ده عقلك كان فين لما عملتى كده

وقفت فجأة وهى بتركز نظرها على سيرين بحده : أفرضى مكنتيش حملتى تعرفى ايه الكان هيحصل

ابتسمت بقهر وهى بتفرك أيديها ببعض بغضب : معلهش نسيت أن بنتى غبيه أقولك أنا كان هيرميكى ذى أى لعبه ذهق منها و نعيش إحنا بقى فى المصيبه دى

ضغطت سيرين على شفايفها بقهر وهى بتبعد نظرها عنها : كلها شهرين وخلاص كل حاجه هتخلص

ضيقت عايده عيونها بعدم فهم : شهرين على إيه

نزلت سيرين رأسها بخجل : شهرين على موعد الولاده

فتحت عايده عيونها بصدمه وهى بتبتسم بعدم تصديق : أنتى فى السابع طبعاً أزاى نسيت أنتى كنتى حامل من قبل جوازك

ضغطت سيرين على شفايفها وهى بتغمض عيونها ولسه منزله رأسها

قربت منها عايده وهى بترفع رأسها بغضب : ارفعى رأسك كده وكلمينى عدل

ركزت سيرين نظرها عليها بخوف وهى بتبتلع ريقها بتوتر : عايزه تعرفى إيه

زفرت عايده بضيق وهى مركزه نظرها على عيونها بحده : إيه تفاصيل عقد التنازل عن الحضانه ده

حاولت سيرين تتحكم فى تنفسها المضطرب : بعد الولاده الولد هياخده رامز وهتنازل عن أى حقوق ليا نحيته فى مقابل هاخد مليون جنيه