"ကိုယ်ဝန်ဖျက်ချချင်လို့ပါ"
ဆေးခန်းအတွင်းမှာရှိကြသော ဆရာဝန်သာမက သူနာပြုနှစ်ယောက်၏လှုပ်ရှားမှုတွေပါ ရပ်တန့်သွားသည်။
ဖြူဖျော့ဖျော့မျက်နှာ ချည်ထည်ထဘီနှင့်အနည်းငယ်ဟောင်းသော ဘလောက်အင်္ကျီဝတ်ဆင်ထားသော အမျိုးသမီးငယ်လေးဟာ မကောင်းသော အသက်မွေးဝမ်းကြောင်းမှုဟုသတ်မှတ်ထားသော ခန္ဓာကိုယ်ဖြင့်ရင်းနှီးရသော အသက်မွေးမှုကိုလုပ်ဆောင်သောသူဟုလည်း မထင်ရပေ။
"ညီမလေးရဲ့ ကိုယ်ဝန်ကဘယ်နှစ်လရှိပြီလဲ"
မြတ်လေး၏ရှေ့က အမျိုးသမီးငယ်လေးရဲ့ဖြူဖျော့ဖျော့ မျက်နှာဟာ ပိုဖျော့သွားသည်။ အနည်းငယ်သွယ်သော မျက်နှာကြောင့် နှာတံလှလှဟာ ပိုထင်းနေသလို မေးရိုးဟာလည်းထင်းထွက်နေသည်။ ကပိုကရိုစည်းထားသော ဆံနွယ်တွေဟာ ဟိုတစ်စဒီတစ်စ။
အားလုံးကိုခြုံကြည့်လိုက်တော့ ဒီအမျိုးသမီးငယ်လေးဟာ ကျန်းမာရေးသိပ်ကောင်းပုံမရ။
"အသက်ကော ဘယ်လောက်ရှိပြီလဲ ညီမလေး"
"၂၂ နှစ်ပါ"
"ညီမလေးကိုကြည့်ရတာ ကျန်းမာရေးလဲသိပ်ကောင်းပုံမရဘူး ပွင့်ပွင့်လင်းလင်းပြောရရင် အစ်မတို့ဆေးခန်းက ကိုယ်ဝန်တော့မဖျက်ချပေးဘူး"
ထိုအမျိုးသမီးငယ်လေး၏မျက်ဝန်းမှာ စိတ်သက်သာရာရသွားမှုအပြင် စိတ်ပျက်မှုနှစ်ခုလုံးရောထွေးနေတာကို သေချာကြည့်လျှင်မြင်နိုင်ပေသည်။
"ဟုတ်လား ဒါဆို ဒုက္ခပေးမိပြီ ကျွန်မကိုပြန်ခွင့်ပြုပါဦး"
"ခဏလေး ညီမလေး ရောက်လက်စနဲ့ သွေးပေါင်ချိန်သွားပါလား"
လက်ထဲမှာခပ်တင်းတင်းဆုပ်ကိုင်ထားတဲ့ တစ်သောင်းတန်အရွက်လေး ပိုကျစ်သွားတာကို မြတ်လေးတွေ့လိုက်တော့ ပြုံးလိုက်ကာ
"အခမဲ့ပါ ညီမလေးရဲ့ သွေးပေါင်ချိန်ရုံနဲ့တော့ ပိုက်ဆံမယူပါဘူး နီနီရေ ဒီညီမလေးကို BP (blood pressure) လေးချိန်ပေးလိုက်ပါဦး"
ခပ်ယဲ့ယဲ့အနေအထားဖြင့် လူနာစမ်းသပ်ကုတင်ပေါ်တက်သွားသော အမျိုးသမီးလေး၏ အနေအထားမှာ အားရစရာမရှိ။ ပိန်ပါးနေသော ခန္ဓာကိုယ်နှင့် ဖြူဖျော့နေမျက်နှာက အာဟာရမပြည့်ဝမှုကိုဖော်ပြနေသည်။
YOU ARE READING
Dandelion
Romance"မင်းရဲ့လက်ထဲက Dandelion လေးတွေကို လေနဲ့မှုတ်လိုက်ပြီးဆုတောင်းရင် ဆုတောင်း ပြည့်တယ်တဲ့" "မဖြစ်နိုင်တဲ့ဆုတောင်းတွေရောလား"
