يضحكن مع امهن بالحوش في الليل والهواء كان فيه نسيم بارد...
"يمه ولله انا اعترف اني ضعيفه بس رغد تشهد ضربتها وانا بنت هند!"
كانت وحده منهن متربعه وتسولف بحماس والثانيه تتقهوى ومتكيه قدام امها...
"اقول رغد"
"لبيه يمه"
كانت رغد الي تتقهوى٫ نادتها امها ولفت لمها
"انتي ماتفكرين تتزوجين؟"
"ليه تتكلمين يمه وكأنه عند الباب"
ضحكت رغد وكملت فنجالها...
"حنان قومي شوفي العشاء!"
قومت امها بنتها حنان تشوف العشاء وفهمت حنان وقامت وهي تتحلطم تبي تسمعهم٫ استغربت رغد وحست ان الموضوع فيه إنَ...
"شوفي يارغد انا بقول حاجه بس ياليت ماتزعلين علي"
"يمه تكلمي توترت ترا!"
"طيب انتي تعرفين حالة ابوك وان الديون كثرانه عليه والكل يبي حلق ابوك ولو نصبر راح نبيع بيتنا حتى اخوانه ماساعدوه وانتي ياكثر الخطبه الي يجونك بس تعرفين ان المهر قليل مايجي خمسين الف وهذا ليته يكفيك في هذا الوقت عشان كذا لو جاء واحد معه مبلغ قوي ترا ابوك بيزوجك وماراح ياخذ رايك بس انا اعلمك عشان يكون عندك خبر"
اسكتت رغد مو عارفه هي ترفض وتدهور حالة ابوها او انها توافق وتتحمل ماجاها عشان اهلها...
"الله يحلها"
"ايه ياامي الله الي يحلها زين انك فهمتي وضعنا والله يعينك على الي بيجيك والله يسخره لك"
ردت عليها امها تمسح على ضهره...
تعشوا وغسلت رغد المواعين لانها عليها وطلعت الزباله ورجعت تجلس على درجة باب بيتهم وفتحت جوالها وشافت الساعه وكانت وحده وعليها بالليل وطفته مره وحده وكتفت يدينها...
("حالة ابوك وان الديون كثرانه عليه والكل يبي حلق ابوك"
"لو جاء واحد معه مبلغ قوي ترا ابوك بيزوجك وماراح ياخذ رايك")
تذكرت كلام امها وكيف كان شوي قوي لانها ما تمنت انهم يوصلون لهالحاله وكيف ان كل صديقاتها يحاولون مايفكرون بزواج والي تزوجت تزوجت عن حب او راضيه عنه...
لكنها قامت ودخلت وتوضت وفرشت سجادتها وصلت اخر الليل ورفعت يدينها لربها تدعي ان الله يسخر لها الرجل الرحوم والحنون والي يحترمها ويقدرها ولا يقلل من شأنها لانها تزوجته عشان ديون ابوها الا ان ابوها مو مديون مرره بس امها كبرت الموضوع تحسبها ماتدري عن ديون ابوها...
