الأشياء تنتهي..لكن الذكريات تدوم للأبد
..
احمد:"تخيل سعود وش شفت عند جيرانا؟"
سعود:"وش شفت؟"
احمد:"كمره!..سألت ولدهم قالي هذي كمره نصور فيها عشان اذا كبرنا نوري اعيالنا الصور"
سعود:"اي هذي يصورون ويجمعونها في ألبوم صور"
احمد:"شدراك انت؟"
سعود:"اشوف خوالي يسوونها اخر مره رحت لهم منزمانن"
احمد:"عندك انت صوره طيب"
سعود:"لا وانت؟"
احمد:"حتنى"
سكتوا شوي وضحك سعود لانه سأل احمد وهو عارف انه ماعنده..
احمد:"لا تضحك شف انا معي عشرين تتوقع نقدر نصور؟"
سعود:"اي وانا معي 15 بس نصور مو نشتري كمره"
احمد:"وين بنصور؟"
سعود:"قم تعال معي"
كانوا صغار في المتوسط وقام احمد ولحق سعود..
راحوا عند محل يصورون فيه وفي طريقهم قابلوا عمر وكان اول لقاء بينهم..
عمر:"تبون تصورون انتم!!"
سعود:"مين انت و وش تبي؟"
عمر:"تكفون بصور معكم الله يدخلكم الجنه بعطيكم فلوسي بس بصور معكم!"
احمد:"ورني كم فلوسك"
سعود:"احمد تبي نصور ولا نرجع محنا مجمعين عيال الحاره!"
احمد:"ها معه عشره..كذا صار معنا 45 خله يصور معنا ياولد ماراح يضرنا"
دخله احمد معهم رغم ان سعود مو راضي بس سكت صوروا صوره وحده بس ونسخوها ثلاث مرات رغم ان السعر كان غالي بس راعي المحل شافهم وعرف حالهم من شكلهم وخفض السعر لهم..
احمد:"جزاك الله خير ياعم"
طلعوا من المحل وكان عمر مستانس مرره هو واحمد وسعود اخذ الصوره وحطها بجيبها علطول..
عمر:"شكراً بس عادي تحفظون حقتي معكم لاني مقدر اخليها مـ.."
"هذا انت عمر!!..وش الي معك!!"
صرخ مطوع من وراهم وعلطول عمر اعطى الصور احمد وكان قد وصل لهم الرجال..
"وش ذي!!..صور!"
