قاعده في أمان الله فجأة سمعت صوت أمي و هي بتتناقش مع أبوي ، ركبّت سماعتي عشان ما أسمع صراخهم و كواريكهم مع اني اتعودت على الحاجه دي بس بضايق شديد في كل مره بسمعهم فيها بتناقشوا مع بعض ، بعد شويه أبوي بقى ينادي علي بنهره و ضيق ، مشيت ليهو و انا متوتره ، قال لي زفتين الأكل دا لسه ما جِهز؟ يعنى الزول إلا يقول ليكم جيبوا ليهو أكل؟ قلت ليهو لسه ما جهز ، قال لي و هو بكورك طيب من قبيل بتعملوا في شنو انتوا؟ ! غير النوم و الكسل ما عندكن حاجه ، كلكن ما نافعات بـ أُمكُم ما نافعه.....شويه كدا و عمر أخوي جا داخل ، أبوي ناداهو و قال ليهو وين الأمانه القلت ليك جيبها لي من حاج عيسى؟ عمر قال ليهو لا حولاااا نسيت والله ...أبوي اتعصب زياده و بقى يشاكل فينا الإتنين ، قال لينا خساره فيكم قروشي الصرفتها عليكم من لما كنتوا صغار و لحدي اللحظه دي ، ياخ انا مستفيد منكم شنو عليكم الله ! غير وجع الراس ما لاقي منكم شي ، عمر قال ليهو بضيق نسيت ياخ نسيت ، أبوي قال ليهو كمان بترفع صوتك علي! و من هنا بدا النقاش و أصواتهم اتعالت ، خليتهم في وقفتهم ديك و دخلت جوا لقيت أمي بتعمل في الغدا ، قلت ليها ماف سلطه ولا أي حاجه خفيفه كدا عشان أجهزها لأبوي؟ قالت لي بزعل كدا ماف شي إلا يستنى الغدا عديل ، قلت ليها هسي حيجوط فينا ، قالت لي ياخ اعمل ليهو شنو! خليهو يجوط كدا لمن يفتر اصلاً جوطتو دي نحنا متعودين عليها الجديد شنو؟.....المهم سريع سريع جهزنا الغدا و وديناهو ليهو ، أمي نادت عمر عشان يتغدا مع أبوي لكن هو رفض و قال ما عايز ياكل ، أمي قالت ليهو مالك ما جعان؟ قال ليها ايوه ما جعان ...
بعد شويه مرام أختي جات داخله أبوي أول ما شافها ناداها و قال ليها كنتي وين؟ قالت ليهو في الجامعه يا أبوي ، رفع أصبعو و قال ليها فتحي عينك دي كويس الحركات دي ما علي انا ، جامعة شنو البجوا منها الساعه 7 مساء؟ ذاتو الغلط غلطي انا جامعة شنو البخليكن تقرنها من بكرا ماف حاجه إسمها جامعه سامعه ولا لا؟ قالت ليهو بس يا أبوي.....قاطعها و قال ليها بنهره كدا ولا كلمه و يلا طيري من قدامي ، جاتنا داخله و هي بتبكي ، اصلاً دا الإتعودنا عليهو ، سبحان الله أبوي دا ما كان كدا بس فجأه اتغير 180 درجه من اليوم الجا فيهو عمي آدم علاقتنا بيهو بقت زي الزفت ، لمن يكون موجود البيت بكون جايط و متوتر و كلنا بنكون خايفين و عاملين ألف حساب عشان ما يعصب فينا ، طبعاً عمر أخوي دا نهاي ما بتفق مع أبوي و نهاي ما بقعد معاهو في صينيه واحده ، لمن أبوي يكون في الديوان هو بطلع منو و العكس ، أما حذيفه أخوي الكبير فـ دا لينا قريب الإسبوع ما شفناهو و دا بسبب أبوي و كلامو....
نحنا أسره مكونه من 8 أنفار بـ أمي و أبوي ، أخوي الكبير اسمو حذيفه و بعديهو عمر و بعديهو مرام حتاً انا حتى مشتهى ، أخواني الإتنين متخرجين من الجامعه بس حالهم حال كل شباب السودان بعد ما يتخرجوا ما لاقين ليهم شغل حتى بشهاداتهم ، مرام بتدرس مختبرات في جامعة الرباط و هي في سنتها الأخيره و اصلاً المفروض تكون متخرجه قبل سنه بس هي بسبب الظروف و اعتراض ابوي المفاجئ على قرايتنا اضطرت تجمد السنه و في الفترة ديك أمي كانت عيانه و ما قدرت تمشي المدرسه عشان تدرس طبعاً هي استاذه ، أما انا بقرا it السنه التالته في جامعة كرري و آخر وحده مشتهى ممتحنه السنه دي شهادة سودانيه ، نحنا ساكنين في أمدرمان الحنينه في حي ود نوباوي 💜
في اليوم البعديهو صحيت على صوت جوطه و سامعه أصوات أمي و أبوي و أخواني و معاهم عمي آدم ، ما أديت الموضوع أهميه لأني و بالحرف الواحد دا فترت عديل من المشاكل البقت شبه يوميه دي ، مشيت اتسوكت و صليت و دخلت المطبخ عشان أعمل الشاي ، شويه كدا جات أمي داخله مع مرام أختي و هي بتقول ليها ما تشتغلي بكلام أبوك دا ، امشي ألبسي سريع عشان تحصلي محاضرتك و لو على قروش المواصلات انا بديك ليها ، مرام قالت ليها لكن أبوي ما حيخليني سمعتيهو هسي قال شنو ، أمي قالت ليها امشي أجهزي و خليهو علي انا نشوف حيمنعك كيف ، فعلاً دا الحصل مرام جهزت نفسها لمن جات طالعه أبوي شاكلها و منعها تطلع بس أمي ادخلت و وقفت ليهو بالمرصاد و بالشده طلّعت مرام من البيت و خلتها تمشي الجامعه ، بعد ما مرام طلعت بيتنا ولع عديل من شدة النقاشات و الأصوات العاليه ، دخلت جوه و ركبت سماعتي زي ما بعمل و بقيت احضر في فيديوهات عشان أشغل نفسي قعدت قريب الساعتين بالحاله دي بعدها اتصلت علي أبرار محسن صحبتي قالت لي اها جاهزه للإمتحانات؟ قلت ليها امتحانات شنو...؟قالت لي مها بسم الله كيف يعنى امتحانات شنو ، اول امبارح مش نزلوا لينا الجدول في القروب ! ما شفتيهو انتي؟ قلت ليها متين دا ما شفتو والله ، قالت لي كمان كانوا معلقنوا جنب القاعه غريبه كيف ما شفتيهو ولا حتى سمعتي زول بتكلم عنو؟ قلت ليها لا شفت لا سمعتي شي لأني بطلع طوالي بعد ما المحاضره تخلص ، قالت لي أي ملاحظه ليك انتي بتستعحلي كدا ليه بيتكم دا طاير؟ ضحكت و قلت ليها لا ما كدا بس عشان ألحق المواصلات و اتجنب الزحمه ، قالت لي المهم خشي قروب الدفعه و شوفي الجدول ، قلت ليها طيب بعدين بنشط و بشوفو ، قالت لي نعم نعم؟! بعدين شنو و هسي مالك يعنى؟ مها خليك جاده شويه مالك انتي ياخ! الإمتحان بعد 6أيام و انتي لسه الجدول بعينك ما شفتيهو؟ بطلي كسل و إهمال ولا اقول ليك جيبي ورقه و قلم و انا بمليك الجدول ، قلت ليها ما قادره والله ، القلم و الورقه بعيدين مني ، قالت لي حيييا انا منك ياخ اقول ليك حاجه ذاتو الجدول ما تشوفيهو و ما تمتحني عديل و طق! قفلت الخط ، طلعت من الغرفه شفت عمر اخوي من بعيد قاعد في المطبخ مشيت لقيتو معاهو أمي و هي بتعمل في الفطور قال ليها يا حجه اسرعي ياخ انا طالع ، قالت ليهو صبراً ببل الآبرى ما عندك ، دخلت و قلت ليهو عمر حوّل لي رصيد ، قال لي ليه؟ قلت ليهو بضيق : متمنيه يوم واحد بس أقول ليك عايزا الحاجه الفلانيه تديني ليها من غير أي اسئله و استفسارات ، يعنى الرصيد دا الناس بتعمل بيهو شنو؟ قال لي خلاص ما تجوطي هسي انتي منفعله كدا مالك يعنى؟ قلت ليهو المهم حوّل لي رصيد لو معاك ، طلع تلفونو و حول لي الرصيد ، بعد ما حولو لي قال لي اسمعي عندي ملابس عايزك تغسليها لي ، قلت ليهو طوالي برجع ليك رصيدك ، قال لي لو رجعتيهو ولا لا حتغسليهم يعنى حتغسليهم ، قلت ليهو ياخ ما تكرهني انا أمبارح مش غسلتهم ليك؟ بتغير كم مره انت! ياخ اصلو ما معقوله معاكم في البيت دا الواحد مستحيل يرتاح ، قال لـ أمي سامعه بتك ؟ وقف على حيلو و قال لي كلمتك انا ، امشي و أجي ألقى الملابس دي مغسله و كمان مكويه
قال كلامو دا بصيغة الأمر و التهديد ، قلت ليهو ما بغسلهم خلي مرام ولا مشتهى يغسلوهم ليك ، قال لي ما عايز زول غيرك يغسلهم ، كسر رقبه تغسليهم ، قلت ليها بزهج و نبره عاليه ياخ ما بغسلهم يعنى ما بغسلهم ، كان جاي علي و هو معصب بس أمي مسكتو و قالت ليهو انا بغسلهم ليك ، قال ليها لا ماف زول غيرها يهبشهم نشوف قلة أدبها دي حدها وين ...
قلت ليهو قلة أدب؟ عشان تعبت من الشغل و من الغسيل و المكوه معناها دي قلة أدب مني ؟ عشان رفضت حاجه انا فترت منها معناها قليللة أدب؟ ....انت شايفني شنو قدامك آله انا بشتغل بكهربه؟ أصلو ما عندكم رحمه لزول كرهتوني و قرفتوني حياتي دي ....طلعت منهم و دخلت الديوان لميت ليهو ملابسو كلها الوسخانه و النضيفه و معاهم ملابس حذيفه ، ختيت سرير تحت الشمس الحاره و في نص الحوش و جبت الطشت ، مسافة أمشي اجيب الصابون و أجي لقيت أبوي لمى ملابسو كلهم و ختاهم لي في السرير ، في لحظات زعل بس مشيت جبت ملابس أمي و مشتهى و مرام يعنى ببساطه لميت ملابس ناس البيت كلهم و قعدت أغسل فيهم مره أبكي و مره امسح دموعي و انا عايزا أطق من الزعل مرات كتيره بقول ديل ما أهلي و عمر دا بحسو ما أخوي ، أمي جات و قالت لي ووووبعلي دا شنو البتعملي فيهو دا؟ عايني الملابس دي كتيره كيف و بعدين ليه قاعده في الشمس؟
سكته و ما رديت عليها ، قالت لي الملابس دي كتيره و ذاتو ماف زول قال ليك غسليها ، عمر جا عاين لي كدا و مشى ، أمي شالت مني الملابس و رجعتها خلت لي بس جزو من حقات عمر و أبوي ، جاتني تاني راجعه و قالت لي الغساله شغاله امشي غسليهم في الحمام ، قلت ليها لا الغسيل كدا احسن قالت لي سمح لكن خشي الضُل عايزا تموتي بالشمس دي؟ في سري قلت ليها ياريت لو أموت و ارتاح من الحياة الزفته دي ، قالت لي طرشه ما سامعاني يا مها؟ قلت ليها يمه عليك الله خليني انا كدا مرتاحه ، قالت لي على كيفك اصلكم ما نافعين و ما فيكم حسنه لا راجل نافع لا أولاد نافعين ....قالت كدا و مشت خلتني في مكاني داك و انا حالفه كان أدخل جوه من الشمس ، غسلت فيها كدا لمن صدعت ، انتهيت قريب للساعه 12 ، فترت فتره و صدعت من الشمس و على العلي جُعت شديد دخلت المطبخ ، لقيت في شاي لبن و اصلاً انا قبيل ما شربت شاي الصباح ، ناس بيتنا ديل حتى الجوع و العطش بطيروهم ليك ، كبيت لنفسي شاي و شربت و طوالي ختيت لي أكل و أكلت ، طبعاً في بيتنا أي زول بياكل براهو لو قعدنا كلنا سوا القيامه قامت ، يوم واحد ما قعدنا زينا زي أي أُسره و أكلنا في صينيه واحده لو حصل كدا معناها حيحصل نقاش و شكله طويله عريضه فـ تجنباً لـ دا كلو كل واحد فينا بجي داخل المطبخ بياكل براهو و بطلع ، بعد ما فطرت غسلت الصحن و الكبايه كنت ح أطلع بس عمي آدم جا داخل ، قال لي جهزي لي الفطور و اعملي معاك الجبنه ، قلت ليهو طيب ، مع انو راسي كان حينفجر من الصداع بس مع ذلك ضغطت نفسي و ختيت ليهو الفطور لما مشيت أودي ليهو الفطور في الديوان و قبل ما أدخل سمعتو قال لأبو كيف يعنى ما سمعت كلامك؟ الراجل انت ولا هي؟ اقسم بالله لو انا مكانك أوقف البيت دا كلو على رجل واحده ، مرة شنو كمان البتغلبك يا " حولي " و بتكسر راسك؟ خليك منها بناتك ديل كمان ما بتقدر عليهن؟ اقعد ساكت ليهن كدا لحدي ما يركبن في راسك بكرا القريبه دي يتعلمن ليهن قلة أدب و كلام فارغ من الجامعه البمشن ليها دي ....رجعت ورا و عملت صوت عشان يعرف انو في زول جاي مع انو اصلاً ما حيفرق معاهو لو عرف إني سمعت كلامو أو لا ، دخلت ختيت ليهو صينية الأكل قال لي جيبي لينا موية شراب و موية عشان نغسل بيها يدينا ، قلت ليهو كويس ، مشيت جبت ليهم المويه و جيت قبل ما أطلع قال لي ما تنسي الجبنه ، اوعك تعملي فيها زنجبيل كتير ، قلت ليهو حاضر ، جيت أطلع كدا قال لي نسيت ما بلعت حبوبي كدي شوفيها لي وين ، رجعت فتشتها ليهو بس ما لقيتها ، في الآخر كانت واقعه تحت السرير طلعتها و أديتها ليهو ، مشيت عملت ليهم الجبنه و جبتها ليهم ، قال لي ما تطلعي دقيقه ، وقفت عشان اسمعو عايز يقول شنو ، شال الكبايه شرب منها و رجعها مكانها قال لي البن دا تقيل شديد ياخ امشي خففيهو لي و تعالي ، عاين لـ أبوي و قال ليهو يخففوها ليك ولا تشربها كدا؟ أبوي قال ليهو آيي خليها تخففها ، شلت الكبابي و رجعت المطبخ تاني لقيت أمي هناك قالت لي عملتي الجبنه عمك جا ولا شنو؟
قلت ليها آيي جا ، عاينت للصينيه و قالت لي مرجعاها ليه ؟ قلت ليها و انا مخنوقه : قالوا اخففها ليهم لأنها تقيله ، قالت لي أكيد دا عمك أب راس دا يجينا هنا و يقعد يتأمر فينا و هو في بيتو " لا "دي ما بقدر يقولا لـ مرتو يشهدالله ممشياهو على كيفها زي المسطره و هنا ساي نافخ لينا ريشو.....عاينت لي و قالت لي مالك انتِ ؟ قلت ليها مصدعه بس ، قالت لي و كيف ما تصدعي و انتي من قبيل قاعده في الشمس ، مش كلمتك انا؟ هسي خلي الجبنه و امشي دولابي شوفي ليك حبه بندول ابلعيها و نومي ، عملت زي ما قالت لي بس قبل ما أنوم شلت تلفوني و نشطت عشان أشوف الجدول ، بعد ما شفتو طلعت ورقه و قلم و عملت لنفسي جدول عشان اقرا بيهو مع إني نهااااي نهاي ما بعرف اقرا بجدول أو بطريقه منظمه ، بقرا بالمزاج بس ، المهم أخدت لي نومه عميقه كدا ما صحيت إلا على صوت زول بجرجر فيني و بنده علي ، لمن فتحت عيوني و صحصحت ، عرفت انو دي أبرار الزفته هي الكانت بتجرجر فيني ، قلت ليها اعوذ بالله منك ، هسي دي طريقه يصحوا بيها زول من النوم؟ قالت لي اعمل ليك شنو اذا انتي بتنومي نوم زي نوم السكارى ؟ قلت ليها ياخ عشان كنت مصدعه ، قالت لي وااااي سلامتك يا قلبي ، قلت ليها الله يسلمك و اهاااا خير في شنو؟ قالت لي اشتقت ليك يا مهويه و سؤالك زعلني شديد ، أديتها نظره كدا بتعرفها براها ضحكت و قالت لي ما عايزا تضيفيني يا زفته! بس ما مشكله براي بضيف نفسي ، مشت شربت ليها مويه و جاتني و هي شايله كبايتين شاي ، قلت ليها عاد ماخده راحتك على الأخير ، قالت لي و كيف ما أخدها و انا في بيت زوجي قرة عيني المستقبلي؟! قلت ليها احلمي ساي هو شغله ما شغال بيك ، قالت لي و منو القال ليك كدا؟ قلت ليها أخوي و انا بعرفو ، قالت لي أصلك ما بطمني ، قعدت أضحك عليها قالت لي اها شفتي الجدول ولا كسرتي حنكو يا نيوتن؟ قلت ليها شفتو شفتو ياخ ، قالت لي مناسب شديد و الماده الأولى دي ساهله ، قلت ليهو ايوه صح ساهله .....انا حمشي اصلي و أجي راجعه ، قالت لي الشاي حيبرد قلت ليها ما مشكله اصلاً ما عندي نفس فيهو ، قالت لي على فكره عملتو انا و طبعاً ما محتاجه اوصف ليك طعم الشاي البعملو صح؟ قلت ليها ما فارقه 👊😂المهم مشيت اتوضيت و صليت و لما جيت راجعه اتفاجأت لما شفت عمر بشرب في الشاي حقي و أبرار بتتونس معاهو ساي و هو مره يرد عليها و مره يسفها ، قلت ليهو عمرررر الشاي دا لي انا ما ليك انت ! قال لي جد؟ بس ام راس دي ما قالت لي كدا! عاينت ليها و قلت ليها أبرار انتِ الشاي دا كنتي جايباهو لمنو؟ قالت لي شفت عمر جاي داخل و شكلو فتران عشان كدا كبيت ليهو معاي شاي ، عمر قال لي شفتي دي الناس البتعرف الذوق و بتعرف كيف تتعامل مع الزول الجاي فتران ما زي ناس إلا يقولوا ليها افعلي و اتركي ، بعد ما طلع قلت لـ ابرار انتي حيوانه خلاص ، الشاي دا اصلاً انتي جايباهو لي و قدام عمر قلتي انك جايباهو ليهو !! قالت لي هو جا داخل و قال مصدع ما قدرت امنع نفسي فقلت ليهو اشرب الشاي دا يفك ليك الصداع دا شويه ، قلت ليها يااااخي و ليه ما قدرتي تمنعي نفسك يا استاذه ؟
قالت لي براااك عارفه شوفة أخوك دي براها بتجهجهني و بتلبشني ، عيونو النعسانه و بحة صوتو و هيبتو بتشتت افكاري 🙈
قلت عمر ...!هي طوالي اتخلعت و اتلفتت على الباب بس ما كان في زول واقف قالت لي يا زفته طيرتي لي قلبي مسكت المخده و جدعتني بيها و انا ميته من الضحك ..
المهم اتونسنا كووويس و قرينا سوا مسافه كدا بعدها أبرار قالت لي انا ماشه بعد دا ، قلت ليها ما بتمشي إلا تتغدي معانا قالت لي بري غداكم بعيد ما عرفاكم بتتغدوا مع المغرب ليه ما بتجعوا انتوا؟ قلت ليها اصلاً متعودين على كدا و تقريباً نص السودان بقى يتغدا بعد المغرب ، قالت لي يا حليل زمان لمن الغدا كان بطلع بعد صلاة العصر بشويه 😭
قدر ما حنستها عشان تقعد هي أبت ، في الآخر لبست توبي و طلعت معاها عشان أقدمها ، أول ما وصلت الباب عمي آدم ناداني ، أبرار قالت لي أبوك قاعد ؟لكن دا ما صوتو! قلت ليها قاعد لكن دا عمي آدم ، قالت لي دا الفقر الحكيتي لي عنو داك! لسه قاعد معاكم؟ قلت ليها اتخيلي بس....قبل ما اقول أي كلمه تاني عمي ناداني بصوت عالي المره دي ، ابرار قالت لي امشي للبركان دا قبل ما ينفجر ، قلت ليها بس....قالت لي ما محتاجه تقديمه انا بمشي براي ، ودعتها و مشيت لـ عمي ، قال لي من قبيل بنادي عليك ما سامعه ولا مطنشاني ؟ قلت ليهو سمعتك بس كنت بقدم في صحبتي ، قال لي صحبة شنو عليك الله و ذاتو البقعدها للزمن دا شنو ما عندها أهل هي عشان يلموها ؟ سكته و ما اتكلمت ، قال لي الشنطه ديك فيها ملابس غسليهم و أكويهم ، مشيت فتحت الشنطه و اتفاجأت لمن شفت الملابس نضيفه و مكوتها ظاهره ، قلت ليهو لكن الملابس دي نضيفه و مكويه! قال لي لكن مغبره عشان الشنطه دي طولت تحت السرير ، بس اعملي القلتو ليك ، زعلت زعله لمن قربت اطرشق ، كلهن أديتهن شطفه وحده بس و شريتهم ليهو ، انتهيت مع المغرب كدا ، شويه كدا سمعت صوت الباب و عشان انا قريبه منو كنت ماشه افتحو بس عمر قال لي خليك بفتحو انا ، خليتو مشى يفتحو و انا دخلت جوه أمي قالت لي منو الفي الباب؟ قلت ليها ما عارفه ، عمر مشى يفتحو ، شويه كدا سمعنا صوت رجال بسلموا ، أمي قالت لي معناها ديل ضيوف ، بعد شويه عمر جا عشان يشيل ليهم مويه ، أمي قالت ليهو ديل منو؟ قال ليها دا عمي نصر الدين و معاهو ولدو توفيق و ناس حامد ، بعد ما عمر مشى أمي لبست توبها و قالت لي ارح نسلم عليهم عشان ما يقولوا علينا كعبات ، اصلاً انا كنت لابسه توب فطوالي مشيت معاها و سلمنا عليهم ، لمن جينا راجعين أمي قالت لي ان شاء الله ما يكونوا عايزين يقعدوا معانا والله حيجننوني ، شويه كدا جا عمي آدم داخل قال لينا العصير و الشاي وين؟ و غداكم ان شاء الله جاهز ما عايزين حاجه تكون ناقصه ، لو في شي ماف قولوا عشان نجيبوا ، أمي قالت ليهو لا لا والله ماف حاجه ناقصه قال ليها ، اعملي طيب ليهم عصيده أو كسره أكلكم و عيشكم دا ماف زول بياكلوا ليكم ، أمي قالت ليهو سمح ، قلت لـ أمي كسرة شنو البتتعاس زي الوقت دا؟ قالت لي هو ذاتو ماف ليها عجين إلا اعمل ليهم عصيده ، المهم انا و امي اتعاونا انا عملت الملاح و هي عملت العصيده ، أمي قالت لي عشان ما تبقى ليهم شويه ح أخت ليهم مع العصيده دي ملاح باميه و عيش قلت ليها بس هو قال ليك ما عايزين عيش! قالت لي بختو ليهم للزياده عجبهم ياكلوهو ما عجبهم يرجّعوا في صينيتو دي و هدي عصيدتهم قاعده ، المهم جهزنا الصينيه و نادينا عمر عشان يوديها ليهم ، بعد شويه مشتهى جات داخله ، طبعاً عشان هي ممتحنه تالته ثانوي عاملين ليهم معسكر عشان كدا بترجع متأخره من المدرسه ، قالت لينا في شنو يا جماعه سامعه لي أصوات رجال ديل خُطاب ولا شنو؟ قلت ليها آيي و جوا عشانك انتي ، قالت لي احلفي ، أمي ضربتها في راسها و قالت ليها لقيتك جاده ....خلي الكلام الكتير امشي غيري و تعالي اتغدي معانا ، قالت لينا لكن ما عرفت الجوا ديل منو؟ أمي قالت ليها دا عمك نصر الدين و معاهو ولدو و أولاد من البلد ، قالت لينا غيتو جيتهم دي ما ساي و الله يكضب الشينه....
كان يؤلمني الكتمان , أما الآن أشعر أن شيئاً دآخلي يبتلع كل شيء دون أن أشعر , وكأن روحي أعتادت على الإحتراق..🖤
يتبع.......
