يمكن دقيقتين و انا بحاول استوعب في الكلام القالوهو إسراء و إيلاف ، بس سبحان الله خالص ما بكيت رغم إني حسيت بوخزه في قلبي ، بعد مسافه قلت ليهم ربنا يهنيهم ، إسراء قالت لي مها انتي مستوعبه السمعتيهو؟ اقول ليك راشد حـ يعرس هديل تقولي لي ربنا يهنيهم!؟ مها انتي بالجد ما طبيعيه و برودك دا ما عادي!
قلت ليها اعمل شنو يعني؟ لا انا بنفع معاهو لا هو بنفع معاي عشان كدا احسن كل واحد يشق ليهو طريق و يلقى الزول البنفع معاهو و هديل هي أكتر واحده مناسبه ليهو و بتنفع معاهو و ياريتو عمل الخطوه دي من بدري شديد ما كنت حـ اكون هنا ولا كان المشاكل و النقاشات دي كلها حصلت ، إيلاف قالت لي هديل دي حيوانه ساي معقوله ترضى تعرس راشد و انتي بت عمها!؟ قلت ليها العرستو دا ما غريب ما برضو ولد عمها في الآخر و بعدين ليه تلوميها هي أكيد ما هي الجات ليهو و قالت ليهو عرسني ، إسراء قالت لي برودك و عنادك دا الطير منك راشد ، لو عرفتي تتصرفي صح و حاولتي تقلقي النقاشات البيناتكم ما كان فكر يعرس فيك ، قلت ليهو هو حر و انا ما حاسه اني غلطانه ، قعدوا يلوموني مسافه و مشوا مني و انا حاسه بـ نار جوه قلبي ، لبست توبي و مشيت لـ عمي ، عاين لي و سكت ، لمن قعدت قصادو قال لي براك عملتيها في نفسك و راشد دا ماف زول حـ يقدر يمنعو بعد ما فاتح عمك في الموضوع ، قلت ليهو ما جايه اتناقش معاك في الموضوع دا ، عايزا اسألك عملت شنو في موضع طلاقي؟
قال لي اعمل شنو يعني يا بتي و انا الطلاق دا ما راكب لي في راسي بس عشان إصرارك و كترة المشاكل اتكلمت ليك مع راشد بس هو حالف ما يطلقك ، قلت ليهو هو ليه اناني كدا؟ مدام هو عايز يعرس و يشوف حياتو مفروض يخليني كمان اشوف حياتي ، قال لي اعمل شنو انا انتوا الإتنين كل واحد اعند من التاني و ماف حاجه اسمها تفاهم بيناتكم....
لمن طلعت من عمي شايفه نسوان خاشات لـ عمتي إشراقه ، قويت قلبي و مسكت أعصابي و مسحت الدموع الفي عيوني و مشيت ليها سلمت عليهم كلهم و انا بجيب في البسمه بالغصب و هم طبعاً مستغربين فيني لمن وصلت عمتي إشراقه حضنتها و قلت ليها مبروك ليهو والله ، ان شاء الله بيت مال و عيال ، قالت لي الله يبارك فيك و كويس انك عرفتي لأننا ما كنا عارفين نكلمك كيف، قلت ليها لا ياخ، الموضوع عادي زول و عايز يعرس كان تكلموني عشان اعمل الواجب و ما أتلوم مع أولاد اعمامي ، قعدت معاهم و بقيت بونس فيهم و هم يعاينوا لبعض ساي و يتهامسوا و انا حاسه قلبي دا حـ يتقطع عديل بس قلت نهاي ما بظهر ليهم اني مضايقه من حاجه و اساساً اضايق ليه؟ و عشان منو؟!
لمن طلعت منهم سامعه وحده قالت ليهم بشماته كدا: خلوها بتكون مصدومه ، ما رديت عليها كملت طريقي لغاية ما وصلت الباب و مشيت بيت ناس عمي صديق ، كان فيهو ناس كتيره لكن ما كتيره شديد ياهم جاراتهم و كم نفر كدا من الأهل ، أول ما جيت داخله فاطمه مرت أخو إسراء جاتني و سلمت علي و هي بتضحك ساي ، اصلاً هي جنها شمارات و شماته يعني بتحب تشمت في الناس كدا حتى ولو كان ماف عداوه بينها و بين الزول البتشمت فيهو ، قالت لي جايه تشوفي ضرتك؟
قلت ليها ايييوه جايه اشوف بت عمي و أبارك ليها ، قالت لي ارح أوديك ليها و هي كانت متشوقه شديد عشان تعرف الحيحصل شنو بيني و بين هديل ، المهم مشينا على غرفة هديل و هي سبقتني لمن وصلنا للباب دخلت و ضحكت بصوت عالي و قالت لـ هديل ضرتك جات ، قصدي مها جات ، لمن دخلت عليها هي اتخلعت و بقت تعاين لي و هي مترقبه ردة فعلي ، اول شي زغردت ليها زغرودة طوووويله مع إني ما بعرف بس عشان خاطر عيونها جازفتها ليها ، سلمت على البنات المعاها ببشاشه كدا و هي سلمت عليها بالأحضان و قلت ليها ألف مبروك فرحت ليك والله بس زعلانه منك لأنك ما كلفتني نفسك و كلمتيني ، طبعاً هي كانت ساكته ساي و خشمها ما قدرت تفتحو ، قلت ليها خلاص خلاص ما زعلانه منك أكيد الموضوع حصل فجأه كدا و ما لحقتي تكلميني ما مشكله يا زوله في النهايه عرفت ، بقيت قاعده جنبها و بتكلم معاها عادي و هي القعاد غلبها فبقت تتلفت بس و نهاي ما بتخت عيونها في عيوني ، قلت ليها اهااا حددتو موعد العرس ولا لسه؟
لمن ما اتكلمت فاطمه قالت لي حيكون عقد بس بعد اسبوعين ، قلت ليها لا ياخ و انا كنت مخططه اجهز نفسي للحفله و كدا ، فاطمه قالت لي ما مشكله جهزي نفسك للعقد و للحفلات الحتكون قبليهو و الليله عايزين ندق دلوكه ما تفوتيها ، ضحكت و قلت ليها لا لا مستحيل افوتها، هسي حـ امشي عشان اجهز ملابسي و كدا طيب! قالت لي متأكده انك حتجي راجعه؟ قلت ليها أكيد ، لمن جيت طالعه لقيت خالتو ساره أم هديل في وشي ، استغربت شديد من جيتي ، قلت ليها خالتو ألف مبروك لـ هديل و ربنا يسعدها والله ياداب حتى عرفت يغسي عليكم اتلومتوا معاي ، بعد مسااافه قالت لي الله يبارك فيك....لمن طلعت من بيت ناس هديل ما كنت شايفه قدامي من كترة الدموع ، مسحتهم و قلت ماف زول يستاهل أبكي عشان لا أهل نافعين لا أهل الأهل نافعين ، رجعت البيت و بقيت قاعده على اعصابي و بسأل نفسي اذا حـ اقدر امشي احضر حلفتهم حقت الدلوكه ولا لا ، لو ما مشيت حيقولوا اني محروقه و ممغوسه عشان راشد حـ يعرس ، قلت لو هو قايل نفسو كعب انا اكعب منو ولا قايل نفسو مجنون انا أجن منو و حفلة الدلوكه دي حـ امشي ليها، و أي زول أي زول قايل عرس راشد حيكسرني و يبكيني حـ أوريهو العكس حتى راشد.....
المهم جبت لي طلعت ملابسي و تيابي كلها و اخترت اسمح توب ، كنت مفكره اتحنن بس لو عملت كدا الفرحانات ديلك حيقولوا ما اتحننت إلا لمن راجلها قرر يعرس فيهو و عملت كدا عشان تورني الناس إنها مجيهه و كلام بالشكل دا و انا ما حـ أديهم فرصه فيني خالص ، شويه كدا سمعت صوت رجلين ، قلت دا أكيد راشد ، ضربات قلبي زادت و ما عارفه ليه كنت خايفه و متوتره من حتة اني اشوفو أو اقيف قدامو ، ما عارفه بس جاني احساس إني حـ ابكي لو هو وقف قدامي ، وقفت على حيلي و أخدت نفس عميق و بقيت اقول في سري ، انتي قويه يا مها و ماف حاجه بتستدعي القلق و الخوف دا كلو ، انتي ما ضعيفه للدرجه دي و مستحيل تنكسري بسبب راجل و ما أي راجل إياك تظهري لـ الفقر الإسمو راشد دا انو العملو مؤثر عليك أو فارق معاك بـ شي ، في الآخر ما تنسي انك بت عمو و البرود و اللامبالاة و قوة الراس وراثه عندكم و اظن دي الحاجات المشتركه بيني و بينو ، و فعلاً زي ما بقولوا "الأقطاب المتشابهة تتنافر و المختلفه تتجاذب " و عشان نحنا شبه بعض في العناد و عدم التنازل ما حـ نتفق خالص و دايماً حـ نتنافر ، اثناء ما انا بفكر كدا هو فجأه كدا جا داخل لمن انخلعت و لساني اتربط و قلبي حسيتو وقع ، عاينا لبعض مسافه من غير ما نتكلم و انا افكاري كلها طارت مني ، ما قال لي حاجه اتحرك و مشى على الدولاب و انا الغبيه فاتحه غشمي و بعاين ليهو و اظن كنت منتظراهو يقول لي حاجه ، لمن وعيت على نفسي ، اتنهدت براحه و ابتسمت ، شلت توبين و مشيت بيهم عليهو ، قلت ليهو يا العريس! طوالي إتلفت و عاين لي بغيظ ، قلت ليهو ممكن تساعدني؟
بعدين ماشه لـ حفلة دلوكه في بيت ناس هديل بس محتاره و ما عارفه ألبس شنو ، حلو التوب دا ولا دا؟ ولا احسن ألبس فستان ....طيب اسكيرتي رايك فيهو شنو؟ ...اف راسي حـ يضرب ما عارفه ألبس شنو! ...قول لي ياخ ألبس شنو؟
عاين لي بضيق و إتلفت مني ، قلت ليهو خلاص اذا ما بتعرف تختار ، بس انا زعلانه منك شااااديد شديد و عتبانه ليك ، لمن قلت ليهو كدا إتلفت علي و عاين لي بإستغراب و رفع لي حاجبو ، قلت ليهو ما منك انت بس حتى من هديل ، معقوله انا آخر من يعلم! شينه في حقكم والله كونكم ما كلمتوني و انت قاعد معاي في البيت و غلبك تقول لي عايز اعرس غيتو خليتني اتلوم مع الناس ، بس حصل خير هسي عرفت و ماف زول غيري حـ يقيف على عرسكم في الأول و الأخير انتوا أولاد اعمامي و سعادتكم من سعادتي ...
لمن قلت ليهو كدا ملامح وشو اتغيرت و اكتر حاجه بتغيظني فيهو انو بسكت ، غياظ و كريه خلاص كأني ما كنت بتكلم معاهو ، لمن ما اتكلم معاي خليتو و عملت نفسي مشغوله بإختيار اللبسه الحـ امشي بيهو ، بعد مسافه جا وقف قصادي و قال لي جلابية العقد عليك ظبتي لي أمورها ، قلت ليهو من عيوني والله و حنتك ذاتا ماف زول غيري يجهزها ليك و انا الحـ احننك ، قال لي اساساً ماف زول غيرك حـ يعمل كدا ، عايزك تقيف على ترتيبات العرس من البداية لغاية الجرتق ، قلت ليهو ما بتوصيني بس يا ريت لو عملتوها حفله كبيره و في صاله لأنو هديل تستاهل والله ، قال لي ما مهم العرس حـ يتعمل كيف و وين ، العروس أهم من دا كلو ، و اذا هي قالت عايزا عرسها يكون في صاله انا ما عندي مانع ، بس هي ما قالت كدا ، وقع ليك؟ 😊
قلت ليهو أكيد ما حـ تقول ليك انت من عندك مفروض تفكر فيها و براك تعرف هي عايزا شنو من غير ما تطلب منك لو من هسي ما قادر تفهم عليها و تعرف احتياجاتها بعدين حتفهم كيف؟
قال لي انتي بس أطلعي منها و انا و هي بنعرف نفهم على بعض كيف و نحل مشاكلنا 😊
