طبعاً سفهني سفهة العدو ، عاين لي بغيظ كدا و ساق العربيه بأقصى سرعه ، و تاني ما اتكلمت معاهو لأنو الحاله الكان فيها متأكده لو فتحت خشمي معاهو كان حـ يكشطني كف .....
لمن مشينا مسافه كويسه كدا الساعه 11 جات و دا زمن الفطور ، طول المسافه دي انا كنت نايمه ما عارفه كيف جاتني غفوه فجأه كدا ، بس لمن صحيت كنت جعانه شديد و عطشانه بس ما قدرت اقول ليهو اني عطشانه أو جعانه بزهجتو دي متأكده ما حيشتغل بكلامي ما عندي خيار غير أصبر لحدي ما نصل أمدرمان ، فجأه وقّف العربيه في سوق كدا لمن ركزت عرفت إنو دا سوق الجبل! يعني نحنا في الخرطوم ، اخيراً ياخ ، نزل من العربيه دخل مطعم صغير كدا و جا راجع شايل معاهو أكياس و مويه مداهم لي عن سكات و ركب ولا اترددت طوالي شلتهم و قعدت أكل السندوتش ياخ كنت حـ أموت من الجوع! بعد ما خلصت شربت مويه و بكدا حسيت براحه و انتعاش ، قال لي يعني لو ما كنت نزلت و جبتهم ليك ما كنتي حتقولي لي انك جعانه؟
قلت ليهو اصلو ما مفروض أنبهك مش عارف دا زمن الفطور؟
سكت ما رد علي و واصل في سواقتو ، بعد مسافه مديت ليهو سندوتش و قلت ليهو ما عايز؟
قال لي انا سايق حـ آكل كيف؟ ...ما عايز اقيف احسن اواصل لحدي ما نصل.....تاني ما قلت ليهو حاجه ، عاين لي و قال لي بس ممكن تأكليني صح؟
اتوترت شديد لمن قال لي كدا ، لمن سكاتي طال قال لي ما مشكله خليهو و رجع ركز مع سواقتو تاني ، بيني و بين نفسي قلت دا آخر موقف بيناتنا و آخر يوم حنكون فيهو مع بعض رغم انو انسان سيء و كريه بس وافق يطلقني و يديني حريتي ، طلعت السندوتش من الكيس و مديتو لـ خشمو من غير ما اعاين ليهو ، كنت حاسه بنظراتو لي بعد ما عملت كدا في بقى مره يعاين لي و مره يركز مع السواقه لحدي ما خلص السندوتش كلو ، حسيت نفسي خجلانه شديد و توتري زاد فبقيت اعاين بالشباك بس و اتمنيت لو اختفي من قدامو ، في الزمن داك نحنا كنا في نقطة التفتيش ، كان في كميه من الباصات و الناس البتبيع تسالي و فول و حاجات بالشكل دا ، فلمن راشد نزل عشان يشوف محرك العربيه مالو ، أشرت لـ واحد من البياعين ديل ، في شنطتي ما كان عندي قروش كتيره ، اصلاً من جيت الأبيض كان معاي ألف و نص بس في شنطتي و دي الكنت ماشه بيها الجامعه بس أبوي منعني يومتها ، قاعده معاي لحدي الآن ، اصلاً من جيت الأبيض ما حصل اشتريت حاجه و ما حصل شلت من راشد دا قرش واحد ، لمن الراجل جاني اشتريت منو تسالي و فول مدمس و ترمس و حاسبتو ، قبل ما يتحرك من جنبي راشد جا واقف جنبو و قال ليهو رجع ليها القروش و دفع ليهو هو ، الراجل مشى ، راشد عاين لي و قال لي ما تنادي أي راجل تاني لو عايزا حاجه قول لي ، هزيت ليهو راسي بس و انا بسأل نفسي ليه هو لغاية اللحظه دي مضايق كدا؟ رجع يصلح في عربيتو ، بعد مسافه جا ركب و اتحرك و تاني طول الطريق ما اتكلمنا مع بعض و كان في صمت حاصل ، قلت ليهو شارع الجبل دا كعب و كلو حفر كان نجي بشارع بارا ، قال لي شارع بارا مقفول....قال كدا و سكت !!! المهم لمن وصلنا الكلاكله اللفه ، وقف جنب طرمبة قادره الجنب بنك فيصل الإسلامي ، كب ليهو جاز و اتحرك على جنب كدا و تاني وقّف العربيه و قال لي أنزلي ، نزلت و انا مستغربه ، هو ذاتو نزل و قال لي تعالي معاي ، قلت ليهو حنمشي وين؟
قال لي أكيد ما حنمشي لـ أهلك فاضين كدا صح؟ قلت ليهو خلاص انا حـ ارجع انتظرك في العربيه انت امشي و تعال لأنو زحمه مبالغه ياخ ، قال لي لا حتجي معاي و مسكني من يدي بس لمن مشينا لـ جوه شويه و الناس بقت بتعاين لينا طوالي فك يدي ، نهاي ما اتفاجأت اصلاً مستحيل يمسك يدي قدام زول ، بقيت ماشه وراهو بس و هو بمشي سريع سريع و انا ما قادره امشي كويس بالشبشب اللابساهو دا و الناس ذاتها كتيره شديد ياخ محل ما تتلفت تلقى زول قدامك ، قلت ليهو راشد امشي براحه انا ما بقدر امشي زيك كدا و بعدين نحنا ماشين وين؟
قال لي انتِ بس اتبعيني ، المهم بقيت ماشه وراهو و انا مضايقه شديد من نظرات الرجال لي بالذات الفارشين على الأرض لمن اجي ماره بجنبهم بعاينوا لي كأني عارضة أزياء و نظراتهم كلها مقرفه وصلتني لحد الضيق ، جريت راشد من قميصو و قلت ليهو انا راجعه ...حـ انتظرك في العربيه ، إتلفت علي و قال لي قلت ليك لا معناها لا ، قالت ليهو خايف اني اجيب زول ادخلو معاي في العربيه مثلاً؟ مسح وشو بيدينو و قال لي انتي ما عندك غير الجمله دي؟ قلت ليهو لأنو دي أكتر جمله مسيطره على عقلك ، اتنهد و قال لي مشكلتك شنو انتي ليه عايز ترجعي؟
قلت ليهو انت بتمشي سريع و انا اصلاً ما مرتاحه و مضايقه من نظرات الناس دي ....تقريباً هو فهم علي ، قال لي تعالي طيب ، مشينا على جنب كدا طلع تلفونو و عمل مكالمه ، سلم على وحده كدا في التلفون و سألها اذا في شغلها ولا لا؟ ما عارفه قالت ليهو شنو بس قال ليها تعاليني برا انا جنب اليونسكو ، بعد ما قفل ما سألتو ، شويه كدا جات بت سلمت عليهو سلام معرفه كدا ، قال ليها سجى عليك الله خليها معاك لحدي ما ارجع تمام؟
قالت ليهو دي العروس؟ قال ليها ايوه ، قالت ليهو ما عندك مشكله حـ اشيلها جوه عيوني ، طبعاً انا مستغربه دي منو و هو بعرفها من وين و حالياً سايقاني معاها وين و هو ماشي وين؟
قال لينا تعالوا اقطعكم الزلط ، المهم قطعنا الزلط و وقف معانا جنب صيدليه كدا ، قال للبت ما حـ اتأخر قالت ليهو اخد راحتك هي في أمان معاي ، أول ما هو اتحرك كدا قلت ليهو راشد! ....إتلفت و قال لي راجع يا مها ما تخافي ...طبعاً دي أول مره يقول فيها اسمي ، بقيت زي الهبله هبله كدا و الكلام غلبني ، ركزت و قلت ليهو ماشي وين انت و عملت ليهو حركه بعيوني معناها دي منو؟ قال لي دي سجى بعرفها من أيام الجامعه و هي شغاله في الصيدليه دي حتقعدي معاها لحدي ما أجيك راجع ....قلت ليهو بس انت ماشي وين قول لي ، قال لي ماشي مجمع الرشيد عندي ناس بعرفهم هناك ، قلت ليهو ، ماشه معاك ، خت يدو بين جبينة و قال هسي مش قلتي مضايقه و ما مرتاحه؟ طبعاً قالها لي بزهج كدا لمن زعلت ، سكته خليتو و البت دخلتني معاها الصيدليه و هو مشى ، كانوا في بتين سلمت عليهم و قعدت جنبها ، قالت لي هسي بجيك راجعه ، طلعت و جات شايله ليها بارد و أكل ، ضيفتني بيهم مع إني ما كنت عايزا بس ما حبيت احرجها بعد ما هي طلعت جابتهم لي ، بس في اسئله كتيره على بالي! ليه راشد محتفظ برقمها مدام معرفتو بيها كانت حدودها الجامعه!؟... كان عامل فيها راجل قلبو حار و ما عندو حاجه للبنات و في الآخر بعرف البت دي و الله أعلم بعرف كم بت غيرها و عامل نفسو حجر ما بحب البنات و ما بعرف يتعامل معاهم ، البت قالت لي انتي مرتو؟ قربت اقول ليها طليقتو بس هزيت ليها راسي بـ معنى ايوه ، قالت لي ما شاء الله حلوين شديد مع بعض ، قالت لي سبحان الله راشد دا نهاي ما اتوقعتو يعرس والله لمن سمعت من واحد صاحبنا انو عرس استغربت شديد ، قلت ليها الإنسان مع الزمن تفكيرو بتغير و معظم الحاجات الكان رافضها حـ. يتقبلها ، قالت لي فعلاً.....انتوا اتعرفتوا على بعض كيف؟
قلت ليها هو ولد عمي ، قالت لي بالجد؟ قلت ليها ايوه ، قالت لي معناها عرسكم ما كان عن حب و كان عرس عن طريق الأهل صح ولا انا غلطانخ ؟ هزيت ليها راسي بس ، المهم البت اسئلتها بدت تكتر و كلها عن راشد و انا مليت من كلامها الكتير دا و المسيخ ، بس من خلال كلامها عرفت انو راشد قرا معاها في جامعة السودان للعلوم و التكنولوجيا بس ما قروا نفس المجال ، هي كانت صحبة اصحابوا و عرفها عن طريقهم ، استغربت شديد كنت قايلاهو قرا في وحده من جامعات الأُبيض لا و كمان طلع قاري It زيي! دا كلو و غيرو من التفاصيل عرفتها من البت دي!
قعدت معاها زي ساعه و حاجه بعديها راشد جا اتكلم مع البت شويه و سألها عن احوالها و كدا و في الآخر شكرها و قال لي خلينا نمشي بعد دا ، بعد ما طلعنا انتبهت انو راشد ما كان شايل معاهو حاجه و هو قبيل قال لي أكيد ما حنمشي لـ أهلك فاضين ...كنت عايزا اسألو بس في حاجه منعتني ، ما عارفه ليه فجأه كدا حسيت نفسي مضايقه و ما عندي نفس اتكلم معاهو ، مشينا مسافه طويله بعديها قطعنا الزلط و استمرينا كدا لحدي ما وصلنا محطة قادره الفيها العربيه بتاعتو ، لمن ركبت اتفاجأت بكميه من الحاجات موجوده ورا في العربيه بس برضو ما اتكلمت معاهو و عملت نفسي ما شايفه حاجه ، بعد ما اتحركنا لاحظ إني مضايقه من حاجه ، قال لي في زول زعلك؟ قلت ليهو لا ، قال لي طيب مالك؟ قلت ليهو بضيق مالي هسي ؟
عاين لي و سكت و تاني خالص ما اتكلمنا لحدي ما وصلنا امدرمان و منها وصلنا البيت الزمن داك الساعه كانت بين 4 و 5 ، طبعاً ناس أمي ما كانوا عارفين إني جايه اليوم ، عشان كدا لمن شافوني اتفاجؤا ، ياخ بكيت جنس بكى في أمي و مرام لمن هم ذاتم بقوا يبكوا معاي ، طبعاً أبوي و اخواني سلمت عليهم عادي كأنهم غرباء عني و مشيت منهم للحوش التاني مع ناس أمي ، بعد موال طويل عريض من البكى دخلنا جوه بعد ما قعدت شويه كدا جات البت ديك ، قصدي مرة أبوي ، كانت متردده تخش تسلم علي ولا لا ، لمن شفتها خايفه و متوتره كدا مشيت ليها سلمت عليها و قلت ليها كيفك؟
ابتسمت و قالت لي كويسه الحمدلله ، قلت ليها تعالي خشي جوه اقعدي معاي ، دخلنا جوه و بقيت اتكلم معاها عادي لمن لمحت أمي جايه علينا سكت منها بس اتفاجأت لمن أمي جات و قالت لـ زينب ، مرام بتناديك امشي ليها ، امي كانت بتتكلم معاها بنبره حنينه كدا ما عرفت هل هي فرحانه عشان انا جيت ولا أصلاً بقت تتعامل بـ لطافه مع البت دي؟
المهم اليوم كلو نصو عديناهو بكى و نصو ضحك و حكاوي ، اقدر اقول إني كدا ياداب حسيت نفسي حره ياداب حسيت بالأمان و الطمأنينه ، جوه بيتنا و جنب أمي و أختي بسمتي و ضحكتي رجعوا لي ، كان ناقصنا وجود مشتهى ، بس تلفونها كالعاده مقفول أمي قالت لي ما مشكله بعدين نتصل على راجلها لأنو هسي حيكون في السوق و جاري مع شغلو ، المهم بعد ما صليت الصلوات الفاتو و المغرب نمت قلت ليهم ما عايزا أي اكل بس خلوني أنوم ، دخلت غرفتنا أنا و مرام و نمت هناك أحلى نومه ما صحيت إلا الساعه 10 قمت صليت العشا و لقيتهم خاتين حاجات جنبهم و بشوفوا فيها لمن ركزت شديد لقيتهم ديل الحاجات الجابهم راشد ، أمي قالت لي ، عاد ما قصر والله ، كان جايب ليهم تياب و فساتين بـ طقمهم و اشترى لـ مرام سلسل دهب و غبيشات و حاجات كتيره شديد انا لمن استغربت دا الحاصل عليهو شنو! بقدر ما انبسطت بقدر ما اتأكدت انو هو عندو مشكله معاي انا و بس عشان كدا ما حصل فكر يجيب لي حاجه و هسي جاب ليهم كلهم ما عدا انا ، أمي قالت لي التياب ديل اخترتيهم انتي ولا راشد ؟.... اكيد انتي عاد ما شاء الله عرفتي تختاري والله ، ابتسمت ليها بس و قعدت اشوف معاهم في الحاجات الجابهم ، قلت يمكن عشان حـ نطلق ما عايز يخسر فيني قرش ، بس كويس ذاتي ما عايزا منو حاجه ، قلت ليهم انا ماشه أنوم لسه ما كملت نومي أمي قالت لي خشي المطبخ اكلي ما تنومي جعانه ، قلت ليها والله ما جعانه يا أمي قمت بس عشان أصلي ، رقدت في السرير و النوم طار من عيوني بقيت اتقلب يمين و شمال بس كلو كلو ما حسيت نفسي نعسانه لحدي ما ناس أمي ديل قفلوا ابواب الغرف و المطبخ و طفوا الأنوار و انا لسه صاحيه ، بقيت أحنس في النوم تحنيس لحدي ما جاني بعد ساعات ، الصباح قمت متأخره شديد بعد ما الشمس دي بقت فوق.....صحيت مخلوعه قلت لـ ناس أمي ليه ما صحيتوني! قالوا لي شايفنك تعبانه عشان كدا خليناك تنومي ، المهم صليت و دخلت شربت الشاي ، بعديها نضفنا البيت و رتبناهو ، مرام دي اشتغلت معانا شويه بعديها خشت جوه اتمسحت بكريماتها و قعدت قبلها و خلتنا أنا و مرة أبو قصدي زينب نشتغل برانا ، سبحان الله البت دي مسكينه شديد و حلاتا ، شويه كدا أمي جات لقتنا واقفين في المطبخ ، قالت لـ زينت انا قلت ليك شنو؟
هنا انا اتخلعت و حنيت على البت دي والله ، قلت ليها ما عملت حاجه غلط يا أمي بس حبت تساعدني ، قالت لي ما دي المشكله هنا ، في وضعها دا ما مفروض تشتغل كتير و تجهد نفسها ، انا مانعاها من الشغل الكتير بس هي ما بتسمع كلامي ....استغرابي زاد ، يعني ما كنت قايله أمي حتتقبلها للدرجه دي و تقدر تتعايش معاها و بعدين هي قصدها شنو لمن قالت : "في وضعها دا ما مفروض تشتغل" ! قلت لـ أمي بس ما تكون عيانه؟ قالت لي لا هي حامل! ؟
والله يا جماعه بقيت زي الكشحوا فيني مويه بارده ، الأفكار اضاربت في مخي و غلبني التعبير ، ختيت يدي على خشمي و بعد مسافه قلت ليها بالجد؟ هزت لي راسها بس .....قلت ليها اااا ألف مبروك و الله ، ابتسمت لي بس ، والله قلبي وجعني على الشافعه دي فوق ما عرسوها صغيره حيكون عندها ولد قريباً يعني حتكون أم و في الوقت الهي ذاتا محتاجه فيهو لـ أم !....أمي قالت ليها أمشي ارتاحي ، بعد ما هي طلعت قلت لأمي بالجد أبوي دا ببالغ ، قالت لي عاد نسوي ليهو شنو؟والله انا قلبي ما واجعني إلا على بت الناس الصغيره دي! والله قدر ما حاولت أكرها و اعاملها زي الضره ما قدرت و حسيت نفسي ما عندي ضمير كوني أعادي لي شافعه قدر أصغر بت عندي ، هسي انا معتبراها بتي ما مرة راجلي ، ضميت أمي و قلت ليها انتي أطيب و أحن انسانه في العالم دا كلو ، باستني و قالت لي خليك من دا احكي لي عنك و عن تعامل نسابتك و راجلك معاك ، سكته ساي و ما اتكلمت ، قالت لي بتعاملوا معاك كعب؟ قلت ليها لا لا ماف حاجه بالشكل دا ....ما رضيت اقول لـ أمي حاجه عن راشد و أمو لأني على كل الأحوال حـ أطلق منو فماف داعي للكلام دا ، عاينت لي جوه عيوني ضحكت و قلت ليها بالجد ماف حاجه و تاني رجعت ضميتها عشان ما تعاين لي شديد جوه عيوني و بالتالي حـ انكشف و يمكن أبكي ليها......
شويه كدا مرام نادتني لمن مشيت ليها قالت لي تلفونك دا من قبيل برن ساي و انا ناديتك كم مره ما سمعتيني؟ ....لمن شلت التلفون لقيت دي ابرار المتصله علي اتكلمت معاها مسافه و في الآخر قلت ليها على فكره انا رجعت لـ أهلي! صرخت و قالت لي ما بصدق بالجد جيتي راجعه؟ قلت ليها آيي والله ، قالت لي يا حيوااانه ليه ما كلمتيني! لو كنت عارفه انك حتجي ما كان مشيت الجامعه و الغريبه اني امبارح كنت في بيتكم بس ماف زول قال لي انك راجعه! قلت ليها لأنهم ما عارفين نظام مفاجأه و كدا ، قالت لي و أحلى مفاجأه ، خلاص بجيك بعدين ، قلت ليها تمام ، قالت لي ان شاء الله راشد جا معاك؟! ضحكت و قلت ليها ايوه جا ، قالت لي اذاً بعد شووويه كدا حأكون في بيتكم ، مسافة الطريق بس ، قلت ليها اصلك كلبه ساي ، المهم بعد ما قفلت منها قعدت اتونس مع مرام منها مشيت لـ أمي في المطبخ و جهزت معاها الفطور ، قالت لي نادي أخوك دا يجي يشيل الصينيه ، قلت ليها بري ما بمشي ليهم بهناك ، قالت لي ما معاهم زول غريب! قلت ليها برضو ما ماشه يا أمي ، قالت لي غيتو انتي! ....في الآخر هي مشت ليهم و نادت عمر أخوي لمن جا داخل المطبخ عملت نفسي مشغوله و نهاي ما عاينت ليهو في وشو ، قال لي خلاص بقينا واعين؟
عاينت ليهو و قلت ليهو واعين شديد ، و إتلفت منو ، فهو فهم اني ما عايزا اتكلم معاهو ، شال صينية الفطور و مشى ، و نحنا جهزنا صينية و مشينا بيها لـ مرام جوه و نادينا زينب و قعدنا نفطر سوا و نتونس و نضحك بمزاج ، قلت لأمي نسيت ما سألتك أمبارح اتصلتي على توفيق؟ طيب اتكلمتي مع مشتهى؟
قالت لي اتصلت عليهو لكن قال مشتهى دي نايمه بس قلبي ماكلني شديد عليها و حاساها ما كويسه ، مرام قالت ليها بس هو يا أمي قال ليك نايمه ماف داعي تقلقي ساي و تتشائمي!
انا ذاتي قلقت لمن شفت أمي خايفه و مقلقه للدرجه دي لأني متأكده إنو إحساسها ما بخيب و لو فعلاً مشتهى كانت كويسه امي ما كانت حتقلق كدا ، قلت لـ أمي تلفونك وينو عايزا اشيل منو رقم توفيق ، قالت لي هداك ليهو لكن تمي أكلك أول ، قلت ليها انا شبعت ، غسلت يديني و شلت من تلفونها رقم توفيق ، طلعت منهم برا و إتصلت عليهو مره و تلاته لحدي خمس مرات في الآخر رد علي و قال في شنو ياخ ما تكرهونا حياتنا! و....قلت ليهو توفيق دي انا مها اخت مشتهى ، قال لي اااامها بت العم يااااخ كيفك و معليش على الكلام السمعتيهو بس رقمك ما كان معاي ، قلت ليهة عادي ولا يهمك انت كيف و اخبارك شنو؟ قال لي تمام الحمدلله انتوا كيفكم؟ قلت ليهو في نعمه الحمدلله ....مشتهى جنبك؟ قال لي لا والله انا هسي في السوق بس لمن ارجع بتصل عليك عشان تتكلمي معاها ، قلت ليهو هي تلفونها مالو؟ قال لي تلفونها متعطل ، قلت ليهو ما بتصلح ولا شنو؟ قال لي شكلو كدا ....المهم لمن ارجع البيت حـ اتصل عليك ، قلت ليهو تمام يا زول .....بس قبل ما اقفل سمعت صوت مره قالت ليهو ، تعال اتكلم مع الزفته دي والله لو ما.....طوالي قفل الخط ، اتصلت عليهو تاني بس ما رد ، هنا شكي زاد و قلت اكيد في حاجه و مشتهى يمكن بالجد ما كويسه ، بقيت ماسكه التلفون و في ألف فكره سيئه على بالي ، فجأه جا راشد شايل الصينيه و انا ما جايبه ليهو خبر لحدي ما جا وقف قصادي حتى انتبهت ليهو ، قال لي بإستغراب مالك في شنو؟
هزيت ليهو راسي نظام ماف حاجه و شلت منو الصينيه دخلتها جوه ، شويه كدا زينب جات داخله المطبخ كانت عايزا تعمل الجبنه ، قلت ليها خليها بعملها انا ، قالت لي لا والله ، خلوني اشتغل معاكم شويه ، قلت ليها طيب و كان واضح اني ما طبيعيه فعشان كدا هي سألتني في شنو و ليه انا مقلقه كدا؟
طوالي كلمتها بس قلت ليها ما تجيبي سيره لأمي ، قالت لي بس لو ما كلمتيها حتحلي حتطمنوا على اختك كيف ؟
قلت ليها ما عارفه والله بس لو اضطريت حـ امشي ليها هناك ، قالت لي الأحسن انك تكلمي اهلك مثلاً ابوك أو اخوانك أو.....قاطعتها و قلت ليها مستحيل اصلاً هم السبب و هم الرمونا في الجحيم دا ، آخر ناس ممكن انا افكر ألجأ ليهم ، بسبب الرجال الزي ابوي و أخواني بنات كتار زيي و زيك و زي مشتهى انظلموا و حقوقهم انهضمت ، قالت لي قولي الحمدلله ، على الأقل انتي ما عرسوك لـ راجل أكبر منك بمراحل و ما بتعرفيهو ، احمدي الله انك لسه بتشوفي أمك و بتجي عشان تزوريها ، يا مها انا أهلي الرحمه ما انكتب في قلوبهم ، أهلي ناس بتاجروا ببناتهم ما بهمهم البت عمرها كم أو العريس عمرو كم و جاي من وين ، البهمهم منو البدفع أكتر ، مش اغلب الناس بزعلوا لمن الله يرزقهم بنات؟ ! بس اهلي و قبيلتي عكس تماماً البتجيهو بت معناها جاتو ثروة كبيره من الأبقار و البهائم و غيرها نحنا سلع بالنسبه لأهلنا و عمرهم ما حسسونا بالحنيه البقولوا عليها دي ، الواحده فينا من يلدوها بتشتغل ليهم خدامه و في الآخر بتتباع زيها و زي أي بهيمه .....
بالجد كلامها وجعني شديد و زعلت عليها و قدرت اتخيل المعاناة الحتكون عاشتها وسط أهلها ، بس معقوله ابوي دفع مبلغ كبير عشان يعرسها؟ جاب القروش دي من وين و اساساً البت دي لقاها وين؟
سألتها نفس الأسئله دي ، قالت لي التجار بعرفوا بعضهم ، اصلاً ابوي دا بعرف ناس القرى الجنبنا و البعيده عننا كلهم خاصة الناس العندها اراضي زراعيه و مواشي ، قلت ليها يعني انتي من قريه قريبه من قريتنا؟ قالت لي آيي ، قلت ليها لمن ابوي عقد عليك كنتي عارفه؟ و الما قادره استوعبو انا كيف من أمدرمان مشى لحدي القرى البعيده ديك و جا قبل ما الشمس تغيب؟
قالت لي ما كنت عارفه و اصلاً ما بكلمونا إلا يوم العقد ، أبوك عقد علي قبل فتره من جيتي هنا بس ما ساقني قال لـ ابوي بجي قريب عشان اسوقها لأنو هسي عندنا بكى ......المهم لمن خلاص قال جاي يسوقني اهلي ودوني لـ خالتي في الأبيض عشان يقربوا ليهو المسافه ، جانا من الصباح ساقني و جابني هنا و اخواتي جوا معاي ....
المهم في وقفتنا ديك حكت لي تفاصيل كتيره لمن بكتني ، في الآخر هي واصلت في عمل الجبنه و انا طلعت برا لمن سمعت صوت أبرا ، لمن شافتني قالت لي اصلو ما بصدق جات جاريه حضنتني شديد و قالت لي عروستنا نورتينا والله ، قلت ليها مشتااااقين شديد والله ، قالت لي تحدي اقسم بالله ، بعد موال السلام دا قلت ليها ارح نخش جوه قالت لي ابداً والله ، الليله كما شفت راشد دا ما بتحرك من هنا ، قلت ليها خلاص خليك واقفه كدا لحدي ما يجيك ، قالت لي ما تبقي بخيله ياخ عليك الله اتصلي عليهو أو رسلي ليهو رساله خليهو يجي عشان اشوفو ، قلت ليها مجنونه انتي؟
قالت لي عشان بتغيري عليهو صح؟ قلت ليها حنكك بايخ ما حتستفذيني تاني 😏
قالت لي لا بالجد كدا ياداب اتأكدت انك بتغيري عليهو ، بالجد يا مها ما كنت قايلاك بتحبيهو للدرجه دي و بتغيري عليهو من البنات! بس انا ما أي بت انا أبرار صحبتك ، بري يختي غيرتك صعبه والله ، يعني سلام ساي ما عايزا تخليني اسلم عليهو! بالجد انتي بتغيري شديد ، ما معقوله.....قاطعتها و قلت ليها ابراااار قفلي يااااخ!! قالت لي بتغيري صح؟
قلت ليها بحراق روح : عيانه انتي ولا شنو؟ ....راشد شنو البغير عليهو! هو انا ما مصدقه متين اتخلص منو تجي انتي تقول لي بتحبيهو و بتغيري عليهو!؟ حب شنو و بطيخ شنو و انا ذاتي لمن اجي أحب احب لي كائن المتعجرف و كريه و فقر و غياظ و عندو انفصام في الشخصيه ! ...بري شنو البخليني احب لي واحد مريض نفسي ! هو انا من ارضو ما شايلاهو و هو ولا في حساباتي و ما عندي ليهو أي حاجه و تاني إياك تقولي لي ...سكته لمن شفت أبرار منططه لي عيونها ، اصلاً ليها زمن بتنطط لي في عيونها ما عرفتها مالا ، قلت ليها مالك انتِ ؟
بصوت واطي قالت لي عايني وراك .....
يتبع.....
