في اليوم البعديهو صحيت بدري ، استحميت و اتساوكت و صليت كنت عايزا اليوم دا يمر بأقصى سرعه ، بعد ما شربنا الشاي أمي قالت لي بعدين اتصلي على اخواتك عشان ينضفوا البيت ، امبارح كنت بتكلم مع مرام و كلمتها لكن هي مطرطشه ساي هسي بتكون نست كلامي القلتو ليها ، قلت ليها طيب بكلمها بعدين ، المهم أمي و عماتي قعدوا يتونسوا مع حبوبه و انا مشيت منهم بعيد ، قعدت في سرير على ركن الحوش تحت شجره كبيره ، فتحت تلفوني لقيت رسايل كتيره من ابرار صحبتي مع انو امبارح الصباح كنا بنتكلم في الواتس ، رديت عليها و هي دايماً خاشه 24 ساعه فطوالي ردت علي و قالت لي يا حيوانه يا كلبه من سافرتي بقيتي تسفهيني مش؟ قلت ليها ما كدا والله انتي عارفه نحنا سافرنا ليه و عارفه بيت البكى بكون كيف و الضيوف و...و...تلفوني دا ذاتو بقيت ما بمسكوا كتير ، قالت لي اهاا راجعين متين؟
اتنهدت و قلت ليها بكرا حنكون في أمدرمان و انا لو علي في اللحظه دي نكون هناك ، قالت لي ليه مالك؟
اتنهدت و قلت ليها لمن اجي ح أحكي ليك ، طبعاً هي شماره و ما بتحب الشحتفه عشان كدا اتصلت علي فتحت الخط و قلت ليها صبراً ببل الآبرى ما عندك؟! قالت لي الشحتفه ما حبابها أحكي لي مالك؟
اتنهدت و حكيت ليها الحصل كلو ، قالت وووبعلي دا كلو فاتني! قلت ليها الواجعني انو ضربني كف اتخيلي ، قالت لي عشان انتي كمان بالغتي في الكلام القلتيهو لسيد الدكان 😂متوقعاهو يعمل ليك شنو يعني ! يقيف و يصفق ليك مثلاً ؟
قلت ليها يعمل أي شي بس ما يضربني كف ما ليهو أي حق أو سلطه علي ، قالت لي كدي وريني صورة راشد دا عايزا اشوفو ، قلت ليها راشد في عينك يا حيوانه يا متخلفه انا في شنو و انتي في شنو ، اصلك كما عملتي فايده بتضري ، غلطانه انا الحكيت ليك ، ضحكت و قالت لي خلاص خلاص ما تنفعلي كدا هسي انا طلبت شنو غير أشوف صورتو ولا بتغيري عليهو؟
قلت ليها اغير عليهو شنو انت متخلفه يا أبرار ولا شنو ؟ ! اقول ليك من اول يوم انا و هو ما طقنت بعض و هو ضربني كف و هسي عايزين يغصبوني عليهو تقولي لي بتغيري عليهو؟ !! قالت لي طيب رسلي لي صورتو! قلت ليها انتي متخلفه أجيب ليك صورتو من وين يعني؟ عليك الله أختيني يا بت الناس و ما تفوري لي دمي أكتر ، قالت لي صوريهو لي طيب قلت ليها أبرار انا حـ اقفل الخط ، قالت لي معناها بتغيري عليهو.....قلت ليها أبرار انتي ....قاطعتني و قالت لي بتغييييري ، بتغييييري ، بتغييري عليهو ، و بقت تردد لي في الكلمه دي و انا اتغظت شديد ، قفلت الخط في وشها ، عاينت بفتحة الباب شايفاهو واقف جنب الصيوان ، فتحت الباب فتحه صغيره كدا و طلعت بيها التلفون و صورتو ، الصوره ما كانت واضحه شديد لأنو كان واقف بعيد ، فتحت الواتس و رسلت الصوره لأبرار ، قالت لي ما واضحه ياخ صوريهو كويس و لو بتغيري عليهو مني ما مشكله خلي الصوره ، حييييا انا منها ، عاينت تاني بفتحت الباب لقيتو اتحرك من جنب الصيوان و جا قريب شويه ، طلعت التلفون و فتحت الباب و صورتو و رسلت الصوره لـ أبرار ، قالت لي شوفي يا مها من الآخر كدا قولي لي يا أبرار انا و هو قريباً حنكون لبعض و انا بغير عليهو و ما بقدر ارسل ليك صورتو و انا حـ احترم الحتة دي لأنو ما معقوله تصوريهو لي من بعيد ، قلت ليها بزهج اخر مره و تاني ما تكرهيني ياخ ، تاني فتحت جزو صغير من الباب و طلّعت التلفون عشان اصورو بس ما شفتو ، شويه دا احس ليك بزول خطف مني التلفون ، طوالي فتحت الباب بخلعه كدا و قلت حرامـ.....سكته لمن شفت راشد واقف قدامي و تلفوني معاهو ، قال لي ممكن اعرف كنتي بتصوري فيني ليه؟ ما رديت عليهو و انا حاسه نفسي قدر حبة الرمال شدة ما الموقف كان بايخ و محرج ، قال لي مدام انا عاجبك للدرجه دي عادي كان ممكن تقولي لي عايزا صورتك بدون خجل بنفس أسلوبك مع سيد الدكان ، قلت ليهو شنو شنو! انت تعجبني انا؟
قال لي ايوه مش انتي بتنبرشي و بتقلي أدبك مع الأولاد المزز زي ما عملتي مع سيد الدكان !؟
قلت ليهو فعلاً لكن مع السمحين بس ، بالله انت شايف نفسك سمح؟
قال لي و مكمل السماحه كمان و انتي ذاتك شايفه كدا و إلا ما كنتي واقفه هنا و بتصوري فيني مع انو امبارح القريبه دي كنتي بتبكي و بتقولي راشد دا لو بقى آخر راجل انا ما عايزاهو ....بس شكلك ما قدرتي تقاومني و تتحكمي في نفسك يعنى زي موقف امبارح الكان مع سيد الدكان ، قلت ليهو خلاص خلاص عليك الله ما تقعد تعلق لي في جملة "سيد الدكان " دي و تذكرني بيها كل مره ، عندي مواقف كتيره زي دي رايك شنو أحكيها ليك! ؟
قال لي و انا عندي كفوف كتيره مجهزها ليك ، ما تقوليها لي هسي ، قدامنا العمر كلو عشان تحكيها لي ، صور نفسو كذا صوره و مدى لي التلفون ، قال لي اتأملي في الصوره دي كدا لحدي ما تنومي ، قلت ليهو تنوم فيك حيطه ان شاء الله ، اضايق شديد و كان حيشاكلني بس عاين للناس الفي الصيوان و الفي الشارع ، قال لي ما مشكله بأدبك على راحتي و لسانك دا انا بقطعو ليك ، كنت حـ امسك منو التلفون لمن مداهو لي بس تاني زحاهو مني و مسكو و قعد يفتش فيهو و انا الحرقه كتلتني دي اكتر حركه بتغيظني و بكرها ، قلت ليهو ما تفتش لي تلفوني و حاولت اخطفو منو بس ما سمح لي ، قلت ليهو بضيق ما ليك أي حق تفتش لي تلفوني اذا انا اخواني ما حصل فتشوا تلفوني انت منو عشان تفتشو لي؟ قال لي و هو لسه منزل راسو في التلفون: لو اخوانك شايفين شغلهم معاك ما كان وصلتي للدرجة دي من التفاهه و قلة الأدب ، كلامو وجعني شديد و كرهتو أكتر في اللحظه دي ، تاني حاولت اخطفو منو بس منعني ، فتش فيهو مسافه و رجعو لي ، قلت ليهو ان شاء الله لقيت حاجه! قال لي متأكد فيهو حاجه بس انا ما فتشت كويس ، بس خلينا نتلم في بيت واحد و أفضى ليك ، قلت ليهو في أحلامك ، لمن اتحرك من جنبي شفت ناس كتيره مركزه معانا أو ياداب انتبهوا إني كنت واقفه معاهو لأنو هو كان واقف قصادي و مغطيني فلا هم كانوا شايفني ولا انا شايفاهم ، رجع تاني و قال لي ما تنسي تكتبي على الصوره "زوجي المستقبلي " و طاخ قفل الباب من برا و مشى ، زعلت جنس زعله في الدنيا دي و كلامو خوفني شديد ، معناها هم خلاص اتفقوا على موضوع العرس دا ، دخلت جوه و انا مضايقه شديد جاتني رساله من أبرار كاتبه لي فيها : خلاص اتأكدت انك بتغيري عليهو اذاً وافقي على العرس دا و خلي الإستهبال الإنتي فيهو دا 😞
طبعاً رسلت ليها صورة راشد و قفلت الشبكه و انا قلبي واجعني شديد ، دخلت لناس حبوبه جوه قعدت معاهم لحدي ما جابوا الفطور ، فطرنا و مشيت مع ناس عبير و إسراء عشان نغسل العده و نعمل ليهم الشاي و الجبنه بعد ما انتهينا مشينا قعدنا نحنا البنات في غرفه برانا ، طبعاً كلهم بقوا يعاينوا لي ، عبير جات داخله و قالت لـ إسراء دا مكاني عايزا اقعد هنا ، إسراء قالت ليها اهااا عايزا تقعدي جنب مرة أخوك صح؟
طبعاً انا لمن انهجمت ، ديل عرفوا متين! ، قلت ليها نعم نعم مرة أخو منو و قصدك منو؟
قالت لي يا غتيته ليه ما قلتي لينا! هديل قالت لي راشد دا نحنا لينا سنوات معاهو و في الآخر انتي خطفتيهو مننا ، قلت ليهم كدي قولوا بسم الله و ماف أي كلام بالشكل دا و راشد دا كان بقى آخر راجل في الدنيا دي انا ما بعرسو ، إيلاف قالت لي ما على كيفك يا عسل في أسرتنا دي البت مسيره ما مخيره و على فكره القدامك ديل معظمهن حاجزنهن من بدري و ماف وحده فيهن أخدوا رايها ، هديل قالت ليهم حييييا انا من حظي النحس دا كنت خاطه عيني على راشد ، ريم قالت ليها ما براك كلنا عاجبنا لكن نقول شنو ، خلاص اختاروا ليهو و حيرونا ، هديل قالت ليهم و اشمعنى هي يختاروا ليها راشد؟!
قلت ليها هييي هييي انتي قايلاني فرحانه براشد بتاعك دا؟ اقسم بالله من ارضو ما رافعاهو و ذاتو نوعو دا ما بنفع معاي ، هديل قالت لي آيي آيي اعملي نفسك تقيله ، قلت ليها والله لا تقيله لا حاجه راشدكم دا بالجد لا عاجبني لا هاميني ، إسراء قالت لي كمان ما تبالغي يا مها ما شايفه القوام ولا ما شايفه اللحيه و الحواجب غيتو بس استغفر الله 😭😭
المهم القعده كلها ماسكات سيرة راشد لمن زهجوني ، شويه كدا جاني اتصال من أبرار لمن رديت عليها قالت لي بالجد انتي حيوانه و عويره و ما عارفه مصلحتك وين هسي دا راجل يرفضوهو يرفضوك من الجامعه ان شاء الله ، متخلفه انتي يا مها ولا عقلك دا ما تمام ، هسي دا راجل يترفض ما شاء الله وجاهه و قيافه ، اقسم بالله سماحه لمن غلط 😭😭لو ما عايزاهو أديني ليهو انا ، قلت ليها ياريت ، المهم اتكلمنا مسافه و قفلنا على كدا قبل ما أخش للبنات جاني اتصال من مرام أختي ، قلت كويس إنها إتصلت عشان اقول ليها نضفي البيت لأنو نحنا حنرجع ، اول ما فتحت الخط قالت لي يا العروس ، قلت ليها في عينك ان شاء الله ، اعوذ بالله من الشمارات دي ، قالت لي ابرار قبيل حكت لي و رسلت لي الصوره غيتو ما استخرتي يا مها هسي دا بترفض! انا كما كنت مخطوبه ما كنت ح أمانع والله 🙊 الولد سمح سماحه لمن غلط ، دا راشد ولد عمي صلاح الدين صح؟
قلت ليها ايوه بس انتي ما عارفه حاجه ، اقسم بالله في التلات أيام دي ، الفقر دا نضف لي راسي يشهد الله كعب كعب و كريه و هتلر و زول فقر خلاص و منفسن و اخلاق ما عندو و زول زي دا ما بنفع معاي والله ، قالت لي الخِلقه أهم من الأخلاق يا غبيه ، الأخلاق دي مع الزمن بتجي براها و كما جات ما ضروري ، قلت ليها ما عندك موضوع و انا كلامي واحد المهم أمي قالت ليك نضفي لينا البيت مع مشتهى بكرا بإذن الله حنكون معاكم ، قعدت تضحك و قالت لي ما تتهربي من الموضوع ، شفتي القدر دا كيف! براك اتشالقتي و قلت ماشه مع ناس أمي ، مشيتي لـ بكى و جيتي بـ عريس و .... طوالي قفلت الخط في وشها ، بعدها رجعت اتونست مع البنات لحدي العصر كدا و كل وحده مشت بيتهم إلا عبير ، قالت لي ارح معاي بيتنا عشان اقفلوا و نرجع سوا لأنو أمي و راشد و رامي ما موجودين فيهو ، في البدايه اترددت بس بعد ما أصرت علي كلمت أمي و مشيت معاها ، قبل ما نصل بيتهم لقينا رامي في الشارع لمن شافني قعد يضحك لمن مسك بطنو ، قلت ليهو انت جنيت ولا شنو ....قال لي و هو بضحك لا بس اتذكرت امبارح لمن قلتي الله يعين الحتعرس راشد و اساساً ماف وحده حتقبل بيهو و في الآخر الفاس وقع في راسك انتي ، اها هسي نحذرك منو و نحكي ليك عن المشاكل البعاني منها ولا عرفتيهو خلاص؟ 🤣🤣قلا ليهو اطمنك ماف أي فاس وقع في راسي و أخوكم دا من ارضو انا ما شايلاهو و مستحيل مستحيل اقبل بيهو بس خلوني اطلع من الأبيض دي و تاني في الأحلام ما حتشوفوني ، قال لي لا ياخ ما للدرجه دي كمان 🤣🤣 المهم اتكلمنا معاهو شويه كدا و مشينا بيتهم ، عبير قالت لي انتي اقفلي الغرف ديك و انا بقفل الغرف دي طبعاً هي الوحيده الما اتكلمت معاي في الموضوع دا براها عارفه اخوها و طباعو و عارفه إنو لي حق ارفضو ، قلت ليها طيب مشيت قفلتهم كلهم مع اني سمعت صوت حركه جاي من وحده من الغرف بس طنشتها و قلت يمكن دا الهوا وقع حاجه أو الصوت جاي من برا ، المهم انتهينا سوا ، طلعنا و قفلنا باب الشارع ، كنا حنمشي بس عبير تلفونها رن ، قالت لي دا راشد ، ردت عليهو و قفلت الخط سريع ، قالت لي الليله ووووب علينا ، طلعت المفتاح من جيب العبايه و فتحت باب الشارع و انا ما فاهمه شي ، لمن دخلت قامت جاريه و انا جاريه وراها ، بقت جاريه كدا لحدي ما وقفت جنب غرفه و فتحتها و على طول طلع راشد الفقر في وشنا ، قال لـ عبير بزهج كدا انتي القفلتي الزفت دا ؟ هي سكتت و عاينت لي بخلعه ، هو طوالي فهم اني القفلت باب الغرفه ، قال لي بضيق حيوانه انتي؟ ما سامعاني لمن كنت بضرب ليك في الباب ، قلت ليهو كنت تتكلم بدل ما تضرب الباب ، قال لي سمعتي صوت ولا لا؟ ما رديت عليهو ، قرب علي و هو عيونو زي الشرار قال لي طرشه انتي؟..... ااااهاااا عملتي كدا قاصده مش؟ زعلانه عشان قالوا ليك حـ نعرسك لـ راشد صح؟......يلاااا طرشقي من الزعل و العرس دا قاااائم كان زعلتي كان كسرتي رقبتك ، قلت ليهو في أحلامك واحد زيك اساساً ما بفكر فيهو ، قال لي ما بلومك اساساً البتفكري فيهم معروفين و شبهك ، كلامو وجعني وجعه ، قلت ليهو ذاتا كما قساوه منك جدك يومين ما تماهم في قبرو بتفكر ليك في عرس؟ ما بتخجل هسي؟
قال لي المهم انا كلمتك العرس دا قائم ، قلت ليهو بس عايزا اعرف انتي مشكلتك معاي شنو؟ عميان من باقي بنات اعمامك و عماتك ديل كلهن؟
قال لي انا وظيفتي شنو في الدنيا دي غير أصلح الفاسدات و أكسر الرسين؟ بنات اعمامي ديل كلهن شايفه وحده فيهم قليلة أدب زيك؟
قلت ليهو اهاااا يعنى مفتكر نفسك حتأدبني بالعرس دا و تنتقم مني؟
قال لي انتي آخر اهتماماتي بس الما بعجبك بعجبني و الما برضيك برضيني ، قلت ليهو انت قلت انا آخر اهتماماتك صح !يلااا انت ولا في اهتماماتي ذاتو و اساساً ما في بالي و بعدين مدام انا ما بهمك جاري وراي لشنو عشان تعرسني و انا كلك على بعضك كدا ما هاميني!
كلامي حرقو شدييييد ، عبير جرتني من يدي و قالت لي خلينا نمشي من هنا ، لمن طلعنا الشارع قالت لي وووبعلي انا منك يا مها سخنتيها مع راشد ، كـ نصيحه مني يا مها راشد دا ما تحاولي تتلائمي معاهو ، اخلاقو ضيقه و كلامو جارح شديد و ما عندو إحترام لـ مشاعر الزول الواقف قدامو ، ما شفتيهو غضب كيف؟ شويه كدا كان حـ يكشطك كف لو ما انا جريتك ، طوالي اتذكرت الكف الضربني ليهو امبارح و ختيت يدي على خدي ، قلت ليها اخوك الفقر دا قايل نفسو فرعون زمانو لكن ما علي انا والله ✋
المهم رجعنا لـ ناس أمي ، لقيتا في الحوش ، خاته ملابس أبوي و عمر و اظن معاهم ملابس عمي آدم عشان تغسلهم مشينا عليها و قلت ليها خليهم انا بغسلهم ، عبير قالت ليها آيي بنغسلهم نحنا و بعدين هنا في غساله دقيقه أشوفها ليك ، أمي قالت ليها لا خليها لأنو مرة عمك قالت غسالتها اتعطلت ، ما مشكله بنغسل في الطشت ، قلت لـ أمي خليني بغسلهم انا ، قالت لي كويس ، هي مشت و انا بديت اغسل فيهم معاي عبير مع إني قلت ليها بغسلهم براي و اساساً هم ما كتار بس هي أبت ، فجأه أمها جات داخله لمن لمحتنا من بعيد جات علينا عاينت لـ عبير مسافه و قالت ليها مش قلت ليك امشي اقفلي البيت؟
عبير قالت ليها قفلتو يا أمي و دي دخلتنا ، أمها حمرت ليها و مشت مننا ، اتحسست من حركتها دي و فهمت قصدها بس ما قدرت اقول لـ عبير قومي بعد ما بدت تغسل معاي و الملابس ذاتها ما كانت كتيره بس عبيره حلفت إلا تغسل معاي ، المهم غسلنا الملابس و شريناها، مسافة ينشفوا مشينا صلينا العصر و اتغدينا ، قلت لـ إسراء جيبي لي مكوتكم عشان عايزا أكوي قالت لي طيب ، مشت جابتها لي و جات ، فرشت و جبت الملابس و عبير برضو أصرت تكويهم معاي ، أول ما بدت تكوي أمها جات و قالت ليها امشي البيت اعملي الغدا لحدي ما انا ألحقك هناك ، عبير قالت ليها دقيقه أكوي ديل ، أمها قالت ليها عارفه أخوك هسي لو جا و ما لقى الغدا جاهز حـ يطين عيشتنا عشان كدا اسمعي الكلام و امشي ...
كان واضح انها ما راضيه بتها تكوي معاي الملابس و انا اساساً ما جبرتها ، شلت من عبير المكوه و قلت ليها اسمعي كلام أمك و الملابس دي ذاتا شويه بكويها براي ، المهم عبير في الآخر سمعت كلام أمها و مشت ، إسراء قالت لي المره دي فقر خلاص ، في سري قلت ليها كلكم ما هينين ، المهم تميت مكوتي لمن انتهيت جات أم إسراء و قالت غيتو المكوه دي الله يكون في عونها ان شاء الله تتم بينا السنه دي ، عملت نفسي ما سامعه حاجه شلت الملابس و مشيت دخلتهم في شنطة ناس أبوي......المهم اليوم دا عدا و في اليوم التالي من الصباح مشينا موقف الباصات وصلنا الفقر داك ، لمن جينا نركب الباص عاينت ليهو بنظرة انتصار كدا نظام انا ماشه و انسى الكلام الإنقال و شيل فكرة العرس دي من بالك ، بس ما هبب لي و لا حاول يعاين لي مرتين ، المهم ركبنا الباص و اتحركنا و للآسف عمي آدم راجع معانا عشان عندو مقابله مع الدكتور ، لمن اتحركنا الساعه كانت 7 صباحاً و لمن وصلنا المينا البري الساعه كانت 12 إلا ، من المينا البري أجرنا لينا عربيه وصلتنا لحدي البيت ، لمن دخلنا لقينا مرام و مشتهى جنب الباب ، طول الطريق كانوا بتصلوا علينا و بسألوا اذا قربنا ولا لا ، سلمنا عليهم و دخلنا جوه ، مشتهى قالت لأمي جبتي لي شنو؟
قلت ليها حنجيب ليك شنو ! ناسيه اننا مشينا لـ بكى؟ مرام ضحكت و قالت ليها يجيبوا ليك عريس مثلاً ؟ طوالي مشتهى عاينت لي و قالت ليها ذكرتيني! و انا عرفتها عايزا تقول شنو ، قالت لي صح السمعناهو ، وقفت على حيلي ، ختيت يديني على أضنيني و مشيت منهم بعيد ، دخلت استحميت و صليت الضهر ، كنا تعبانين شديد انا و أمي عشان كدا نمنا طوالي......
" يخطئ القلب مرة فيعاقبه العقل ألف "💜🥀
يتبع......
