في اليوم البعديهو كنت عايزا اسأل راشد انا امبارح بليل قلت ليك شنو بس اتراجعت ، ما عايزاهو يقول إني خلاص نسيت و اتأقلمت معاهو ، زعلت شديد من نفسي كوني اتكلمت معاهو و خليتو يشرح لي كمان! يعني ليييه يعاملني بمزاجو! مره يشاكلني و يجوط فيني و مره يجي و يحاول يتظارف معاي! ....بالجد انا لغاية اللحظه دي ما قادره افهمو و ما قادره استوعب التناقض الفيهو دا ....فيهو هو و بس؟ طيب و انا؟ ليه ما منعتو لمن قال عايز يشرح لي! ليه اتعاملت معاهو عادي و بقيت اتجاوب معاهو! رغم العملو معاي و اللسه بعملو انا ليه ما قادره اكرهو من جوه قلبي! "فعلاً الكلب بريد خانقو " ، المهم بعد ما رجعت من الجامعه اتصلت على ناس أمي و اتكلمت مع مرام و زينب ، طبعاً مرام كانت زعلانه و عايزا تطرشق قالا لي طوالي تطلقي منو ، قلت ليها قايله الحاجه دي سهله انا لي زمن بنبح ليهو عشان يطلقني ، بس زول جايب خبر ماف، زعلت ، اتضايقت، بكيت، اختنقت و ماف زول اهتم انا خلاص اتيقنت انو دي الحياة المفروض اعيشها و ماف منها أي مهرب ، غصبوني على أي حاجه و ما قدموا لي شي غير الألم ، يمكن الجامعه دي الحاجه الوحيده البتفرق علي و البتحسسني اني زي باقي الناس ، بعد ما قفلت منهم شلت شيتاتي و مشيت قعدت بيهم في الهول و قبل ما أبدا اقرا هديل جاتني داخله ، اتفاجأت من شوفتها، بعد مسافه قلت ليها اتفضلي ، ما دخلت وقفت جنب الباب و قالت لي راشد قاعد؟ ....قلت ليها لا ، قالت لي طيب مشى وين، ما قال ليك؟ قلت ليها ما عارفاهو ، طبعاً بتكلم معاها و انا عامله نفسي مشغوله بـ شيتاتي نهاي ما عاينت ليها ، المسا راشد جا داخل و كان بتكلم في التلفون مع زول و بقول ليهو انا الكسل و الإهمال ما بنفع معاي لو حـ تقعدوا تتهربوا لي من الشغل حـ اشوف عمال غيركم ما تقعدوا تغيبوا لي الزمن كلو!.....و بعدين هم غرفتين بس غالبكم تبنوهم! .....لا يا زول ماف كلام زي دا .....
المهم بعد ما هو خلص جا داخل ، قال لي السلام عليكم ، ما رديت عليهو لأني اتخذت قرار تاني نهاي ما حـ اتعامل معاهو و مستحيل أنسى العملو لي ، قال لي طرشه انتي؟ قلت ليهو بزهج ، اها و عليكم السلام ارتحت!؟
ما اتكلم معاي و دخل جوه شال ليهو ملابس و مشى عشان يستحمى ، قال لي مسافة اطلع من الحمام ألقى الأكل جاهز.....عشان عارفه إنو لو ما جهزت ليهو الأكل حـ يقعد يشاكل و يتناقش معاي مشيت جهزت ليهو الأكل و انا اساساً بقى ما عندي قدره أو رغبه عشان اتشاكل بيها مع زول ، اصلاً كدا كدا مصيري ما حـ يتغير و راشد دا لو حاولت أعاندو في احتمال كبير يحرمني من الجامعه و المره دي إلا الأبد ، بعد ما استحمى لقاني جهزت ليهو الأكل قعد يتحشي و انا بقرا ساي ، قال نفس دي الماده تبع أمبارح ؟
من غير ما أعاين ليهو هزيت ليهو راسي بمعنى لا ، قال لي شايفه فيهو صعوبه؟ عشان لو عندك فيها مشكله اشرحها ليك! ..
عملت نفسي ما سمعتو ، قال لي بتكلم معاك أنا ، ختيت القلم و قلت ليهو عليك الله ما تقعد تعمل لي نفسك مهتم و تعاملني على حسب مزاجك ، ما تدخل فيني و خليني على راحتك ما طلبت منك حاجه و بعدين انت ما عندك شغله غيري؟ هديل دي انت ما معرسها؟
والله فجأه كدا قلب الصينيه و قال لي أصلك ما نافعه و ما تستاهلي الزول يتعامل معاك كويس ، ياخ حريقه فيك و في الشيتات و في الجامعه و فيني انا جا اسألك و نفسي أساعدك.....والله للحظه خفت يقول ليك ماف ليك جامعه لكن طلع طوالي بعد ما قال لي كدا ، لملمت الصحاني الإتكسرت و نضفت المكان و جيت قعدت عشان اقرا و انا في حاجه مضايقاني ، ما عارفه ليه حسيت انو ما كان لازم اقول ليهو كدا ....بس يستاهل الفقر ، تاني ما جا راجع إلا الساعه 12 بليل ، جا زول نوم بس و ما اتكلم معاي خالص ، المهم في اليوم البعديهو مشيت الجامعه لقيت تسنيم و مازن و شيماء بشرحوا لبعض، طبعاً شيماء و تسنيم اتصالحوا و رجعوا زي ما كانوا ، سلمت عليهم و قعدت معاهم عشان يشرحوا لي ، مازن قال لينا طبعاً طلاب الجامعه عايزين يعملوا برنامج بتاع مواهب و الأسبوع الفات كنا بنسجل في الناس الهندهم موهبه و عايزين يشاركوا، قلت ليهو كويس والله ، لكن حتعملوا شنو بالضبط؟
قال لي حنعمل لينا صيوان كبير و نختار مجموعه من الطلاب يكونوا لجنة تحكيم و أي زول شاركنا بموهبتو حنوفر ليهو المعدات الحـ يحتاجهم و حتكون في تصفيات لغاية من نصل لـ فائز و الجائزه حتكون مبلغ مالي قيمة 25 ألف بالإضافه لـ هدايا تانيه ، قلت ليهو يا سلام العرض مغري شديد ، شيماء قالت ليهو الـ 25 ألف دي حتجمعوها من الطلبه ولا حتجيبوها من وين ما فهمت؟
تسنيم ضحكت و قالت ليها حـ يدفعهم مازن ، قلتو ليهو بالجد؟ حـ تدفعهم براك؟
تسنيم قالت لي دا زول برجوازي و ما شاء الله ابوهو عندو قروش النار ما بتاكلهم و الـ 25 دي ولا شي بالنسبه ليهو 😂 ، شيماء ضحكت و قالت ليها سبحان الله نهاي ما باين عليهو ، تسنيم قالت ليها كنت غانجه بيهو براي بس هسي انتوا عرفتوا لكن ما تكلموا زول عشان ما يشاركونا في الصراف دا 🤣🤣
مازن قال ليهو توووف عليك اصلي عارفك ماديه، قعدنا نضحك على كلامها لغاية ما فجأه كدا نشوف ليك دكتور أحمد واقف قدامنا ، قال لينا السلام عليكم و طوالي قال لـ تسنيم ألحقيني و مشى هي طوالي قامت جاريه وراهو، شيماء قالت لي سجمها ، قلت ليها دكتور أحمد خطيبها صح؟ قالت لي آيي و هسي شكلو زعل منها عشان لقاها قاعده مع مازن ، مازن ضحك و قال ليها بسبب تسنيم دكتور أحمد دا بقى شاميني شديد و خايفو يشيلني الماده 😂 ، قلت ليهو سجمك ، قال لي كلو من تسنيم دي خلاص تاني نهاي ما بباريها مستقبلي حـ يضيع بسبب خطيبها دا ، ضحكنا على كلامو و مشينا على القاعه لأنو زمن المحاضره قرب ، شويه كدا تسنيم جات داخله و هي زعلانه، قعدت جنبنا لكن ما اتكلمت ، قلت ليها شاكلك ولا شنو؟ قالت لي دا واحد منفسن ساي ، لو شافني واقفه مع واحد ساي بزعل مني و بجوط فيني ، شيماء قالت ليها والله ليهو حق مدام انتي خطيبتو و قريباً حتكوني مرتو، مازن قال ليها آيي آيي كلامهم صح ، أحمدك دا شكلو حـ يشيلني الماده لأنو بسببك شماني 😂
شويه كدا دكتور أحمد جا داخل و مازن طوالي قام مننا و مشى قعد ورانا و انا و شيماء شغلناها ليهو ، دكتور أحمد كان بعاين لـ تسنيم ساي و هي ما ناويه ترفع راسها و تعاين ليهو و طول المحاضره كان مركز معاها لدرجة انو كل الناس انتبهت للحاجه دي ، لمن خلص محاضره ما طلع بس الطلاب كلهم طلعوا حتى مازن بس و نحنا ما طلعنا لأنو تسنيم قالت ما طالعه ، دكتور أحمد جا و قال ليها هسي انا قلت ليك شنو لمن تزعلي الزعل دا كلو! تسنيم حاولي تفهميني و تختي نفسك مكاني! ....سكتت و ما ردت عليهو، قال ليها طيب يا ستي انا آسف و شديد كمان و حـ احاول ما أرفع صوتي عليك بس انتي كمان احترمي مشاعري شويه ، ماشي؟
بعد مسافه قالت ليهو طيب ، قال ليها ما عايزك تزعلي مني و صدقيني ما كان قصدي أبكيك ، هسي بطلي بكى و آسف مره تانيه ، قالت ليهو حصل خير و انا كمان آسفه شديد ، المهم اتكلم معاها مسافه و مشى و انا و شيماء بقينا نعاين لـ بعض و نتبسم ساي، شيماء قالت ليها عليك الله يا تسنيم دا راجل بزعلوا منو؟ عايزا تضيعيهو من يدك انتي ؟ وبعلييي ما شفتيهو حنين كيف و قعد يحنس فيك كيف و من جا داخل ما شال عيونو عنك ، ياخ انتي محظوظه و مفروض تشكري ربنا عليهو و حاولي يا تسنيم ما تعملي خلافات بيناتكم ، قلت ليها فعلاً كلام شيماء صاح ، شيماء و تسنيم بقوا يتكلموا مع بعض و انا سرحت بعيد ، طريقة كلام دكتور أحمد مع تسنيم كانت لطيفه شديد ، نبرة صوتو و هو بتكلم معاها بتوضح قدر شنو هي بتهمو و ما برضى يزعلها ، يعني بالجد تسنيم دي محظوظه شديد ، ماف أي مقارنه بين دكتور أحمد و راشد الفقر ، شيماء نبهتني و قالت لي سرحانه وين انتي؟ قلت ليهو ولا شي خلونا نطلع ، شيماء قالت لي حييييا انا دكتور أحمد و تسنيم عملوا لي جفاف والله ، انا و انتي ديل لينا الكريم و قعاد النيم ، طبعاً انا ما قلت ليهم إني معرسه و ما حبيت افتح الموضوع دا مع زول و أوريهم خلفيه عن حياتي ، المهم مشينا فطرنا و كنا طالعين من الجامعه فأثناء ما نحنا ماشين على البوابه مازن نده علينا ، لمن وقفنا ليهو جانا هو و معاهو بت كدا حلاتها ، شيماء و تسنيم سلموا عليها سلام معرفه كدا ، مازن قال لي يا مها عايز اعرفك على مزن أختي و يا مزن دي مها دفعتي ، سلمت علي و قالت لي اتشرفنا ، وقفنا اتكلمنا معاها مسافه كدا و طلعنا من الجامعه و بعدها كل وحده مشت على مواصلاتها ، طبعاً ما مشيت البيت لأنو العمال اليوم حـ يجوا ياخ متين ينتهوا من البُنى دا عشان تاني ما اضطر امشي لـ حبوبه في بيت ناس إسراء لأني عارفه أمهم ما بتطيقني ، بس ماف مكان أمشي ليهو ، قلت بمشي بس و اقعد مع حبوبه في الغرفه الهي فيها لا أشوف زول لا زول يشوفني لمن وصلت و ضربت الباب فتح لي رامي ، سلمت عليهو و قال لي انتي رحلتي بيجاي ولا شنو؟
قلت ليهو لا ما كدا بس عشان العمال ببنوا في بيت هديل راشد قال لي ما تقعدي في البيت لمن هم يكونوا موجودين، قال لي طيب ما احسن تقعدي مع ناس أمي بهناك ! في سري قلت ليهو انت بس ما عارف عمايل امك القعاد معاها زي القعاد في النار ، قلت ليهو والله عشان حبوبه بتزعل بتقول ما بنجيها قلت احسن الفتره دي اكون معاها، قال لي صح والله هسي عشان عتابها دا انا جيت اشوفها قالت كعبين و ماف زول شغال بيها، قلت ليهو اصلاً حبوبه جنها عتاب ، سكت مسافه بعدها قال لي والله ما عارف اقول ليك شنو، يعني العملوا راشد و هديل شي بخجل شديد والله انا من يوم القعد خجلان اقيف قدامك والله انتي الشفتيهو من راشد ما هين و هديل دي انا بالجد مصدوم فيها، قلت ليهو ماف شي يخليك تخجل مني، انا كان زعلت منهم كلهم ماف شي بزعلني منك انت ما غلطت في حقك و بعدين أخوك دا كلنا عارفين و أي حاجه تخطر على بالو بعملها من غير ما يشاور زول أو يراعي لـ مشاعر الحوليهو ، عموماً الله يهنيهم ، قال لي الله يعينك و مشى، دخلت لـ حبوبه جوه لقيت معاها إسراء بتسرح ليها في شعرها، سلمت عليهم و قعدت معاهم شويه كدا إيلاف جابت لي مويه و جات معاهم مرة اخوهم فاطمه، حبوبه قالت ليهم ختوا ليها فطور ، قبل ما أرد فاطمه قالت ليها ماف عيش ، قلت ليها اصلاً انا فطرت في الجامعه ، فاطمه قالت لي اها هديل لسه ما بنوا ليها بيتها؟
قلت ليها ما عارفه ، قالت لي شكلو حـ يبنوا ليها سمح ، شايفاهم نزلوا كمية من الطوب و الرمل ، حبوبه قالت ليها حـ يبنوا قصر يعني! ما كل بيت ببنوهو بطوب و رمل الجديد شنو يعني؟
إسراء قالت لي خليك من دا اها كيف عامله مع الجامعه؟ قلت ليها ماشي الحال ، انتي لسه ما مشيتي و سجلتي؟ قالت لي سجلت و عملت كل الإجراءات و إن شاء الله بنزل الأسبوع الجاي ، قلت ليها كويس والله ، فاطمه قالت ليها انتن تمشن تقرن و انا اشتغل ليكم شغل البيت ، إيلاف قالت ليها براك قلتي ما عايزا تقري و دا كلام فارغ، ياهن حالتين يا تقري يا تشتغلي شغل البيت و انتي اخترتي تقعدي في البيت ماف زول جبرك ، قالت ليها عايزا أخوك يطلقني؟ بكرا لو جا و عرف اني عايزا اقرا بكسر رقبتي ، إسراء قالت ليها ما تكذب انتي لو عندك نيه في حاجه بتقدري تقنعي أسامة أخوي لكن انتي ما عندك نيه عشان كدا ما تقعدي تتحججي ساي ، قالت : غيتو بنات قاعدات على الهبشه بس هسي مالكن فايرات كدا؟ شويه كدا ولدها الصغير جا و قال ليها تعالي ختي لي أكل ، قامت مننا و طلعت ، حبوبه قالت لي اها السجمانه الإسمها هديل بتتعامل معاك كيف؟ ان شاء الله بس ما بتقل أدبها عليك، قلت ليها اساساً ماف كلام بيني و بينها لا بتشوفني لا بشوفها، إيلاف ضحكت و قالت لـ حبوبه انتي ليه شامه هديل دي كدا كأنها ما بت ولدك ، قالت ليها يا ريتها ما بت ولدي ، ما نافعه و كاتله حيلها ساي هسي في زول بعمل عملتها دي؟
إسراء قالت انتي ذاتك يا مها لو ما كان بتعاندي في راشد و بتتناقشي معاهو كتير ما كان مشى و عرسها، قلت ليها ما مهم خليهو ان شاء الله يعرس ميه و هي مدام دايراهو خلوها تتهنى بيهو أصلي ما بسألها ، حبوبه قالت حيييا انا يخواني البت دي اشتروا ليها ضمير ، انتي يا بت مالك غنمايه كدا؟ بجنس حركاتك دي بكرا بطلقك و يمشي للفرحانه ديك ، قلت ليها خليهو يطلق ساي 😂
قالت لي خشمي و عندي و تاني شوفيني كان اتناقشت معاك في الموضوع دا عندك ان شاء الله يجيبهن ليك ميه قلبك الميت دا ما عارفاك جايباهو من وين، إيلاف قالت ليها جايباهو من المقابر و قعدوا يضحكوا ، حبوبه قالت لـ إسراء ما أنسى إشراقه مرة عمكم دي عندها صحاني هنا جات بيهم أول امس لمن جات تفطر معانا، رجعوهم ليها قبل ما يتكسر فيهن صحن و تقعدوا تجوط فينا ساي ، إيلاف قالت لي بـ سيرة عمتو إشراقه ما وريتك لمن جاتنا أول أمس كانت ماسكه سيرتك و قالت انتي عملت عمل "تفرقه" لـ راشد عشان ما يتهنى بعرسو التاني ، حتى هديل ذاتها قالت كدا ، حبوبه قالت ليها ديل سجمانات ساي و ما عندهن موضوع ، قلت ليها خليهن يتكلمن ساي و انا لو بالجد بتاعة عمايل زي دي من الأساس ما كنت حـ اخليهو يعرس أو يفكر في العرس ذاتو ، المهم اتكلمنا مسافه و قريب للمغرب طلعت منهم لمن وصلت البيت فاطمه كانت شايله ولدها و طالعه ، قلت بسم الله دي متين طلعت و جات هنا ، لمن دخلت عمتي إشراقه جات لاحقاني و وراها هديل ، قالت لي شوفي يا الما بتتسمي ، أوعك تعملي ليك دريبات و تمشي تتقاولي عني و تسوطي للناس ، دايره تحرشي الناس علي مش؟ و بعدين تعالي هنا مش نكرتي و قلتي انك ما عملتي عمل لـ ولدي و هناك و قدام حبوبتك تقولي: لو كنت عارفه انو حـ يعرس كنت ما خليتو يعرس أو يفكر في العرس دا ذاتو! طيب بتنكري مالك يا رسخه يا بتاعة الشيوخ؟
قلت ليها منو القال ليك كدا؟ قالت لي الجن الأحمر ، رفعت أصبعها علي و قالت لي احسن ليك أخطي ولدي و فك العملتيهو لأنو والله لو ختيتك في راسك اخليك تمشي في الشارع حفيانه ، قلت ليها دي فاطمه القواله هي القالت ليك كدا مش؟
شوفي انا ما قلت أي كلام بالشكل دا و مستحيل و اساساً ما حاقده للدرجه دي عشان اعمل لي عمل في زول، جاطت فيني و بقت تنبذني ، لمن كلامها وجعني قلت ليها بصوت عالي بطلي نفاق و تلفيق و انا عارفه مشكلتك معاي شنو بالضبط عشان كدا ما تعملي موضوع عرس ولدك حجه عشان تتفشي و تشاكليني بيهو، قال ليك انا ما عارفه يا عمتي انك كنتي عايزا أبوي ! و بعد العمر دا كلو ما خجلانه ولسه بتفكري فيهو ، على الأقل كان تحترمي أولادك ديل هسي احساسهم حيكون شنو لو عرفوا إنو أمهم لسه خاته عينها على عمهم و.....مع جملتي دي ضربتني كف و عدلتني بالتاني، قالت لي و هي منفعله يا قليلة الأدب ، يا حيوانه يا ما مربيه انا تقولي لي الكلام دا؟
مع الكفوف دي انا أعصابي خلاص باظ قلت ليهو ايوه بقول ليك انتي في زول غيرك ما محترم عمرو و أولادو؟ خلي أولادك راجلك ذاتو ما محترماهو و ما تنكري و دا السبب الخلاك تجي و تحضري عرس مرام اختي رغم انك ما بطيقيني، شكلو الحنين عاودك عشان كدا الشوق ساقك من هنا لغاية امدرمان عشان تشوفيهو ، كانت حـ تضربني تاني بس انا مسكت يدها و قلت ليها ما قلت حاجه غلط عشان كدا إياك تحاولي تضربيني و طوالي نزلت ليها يدها، هديل قالت لي انتي عدم الإحترام و قلة الأدب دي جايباها من وين؟ قلت ليها من المكان الجبتيها منو انتي ، قالت لي احترمي نفسك يا مها، قلت ليها الحمدلله محترمه نفسي و مقيماها و ما مرخصاها لزول ، الكلام انتي ، قالت لي ماف داعي للمطاعنات دي كلها اطلعي من التمثيليه دي و قوليها لي عديل انك محروقه لأنو راشد عرسني و باقي ليك قاسي ، ضحكت و قلت ليها انا اتحرق عشان عرسك؟ ليه عرسك ملاك! يا بت افهمي انتوا الإتنين انا ما شايلاكم من أرضكم و راشد الفرحانه بيهو دا انا ما شغاله بيهو رغم انو بحاول يكون لطيف معاي و كدا حتى انو قبل أيام كان بشرح لي في ماده عشان غلبتني ، يعني في الوقت السافهك فيهو كان بشرح لي و شايل همي 🙈
قالت لي كذابه ساي و اصلاً ما حـ أصدقك ، قلت ليها لو عايزا اسأليهو و شوفيني لو بكذب عليك ولا لا ، خليتهم واقفين و دخلت جوه و قفلت علي الباب ، بعد ما اتأكدت انهم مشوا طلعت صليت المغرب و عملت لي أكل ، شويه كدا عبير جاتني داخله ، قالت لي بإنفعال قلتي شنو انتي لأمي لمن ضغطها ارتفع ، قلت ليها كان تسأليها ، قالت لي صح كلام أمي فيك انتي وحده وسخه و ما عندك عشره و ما تستاهلي الزول يقيف معاك و يدافع عنك ، و اقول ليك حاجه كويس انو راشد عرس فيك ، كلهم كانوا شايفنك على حقيقتك إلا انا بس حالياً بقيت شايفه و عارفه انتي شنو ، وقفت على حيلي و قلت ليها مدام بقيتي تشوفي الناس على حقيقتهم ليه ما شفتي حقيقة أخوك؟ أمك طيب ليه ما شفتي حقيقتها ، قالت لي بصوت عالي و هي رافعه اصبعها علي : احسن ليك تحترمي نفسك و سيرة امي ما تجيبيها على لسانك و إلا والله ما يحصل خير ، قلت ليها اساساً في البيت دا و في وسطكم انتوا ماف خير ، بقت تتناقش معاي و أصواتنا بقت عاليه و كل ما تقول لي كلام حار أرد ليها بكلام أحر منو ما سكتنا إلا لمن سمعنا راشد قال لينا بنهره في شنو!؟
عبير دي لمن قربت تبكي من الكلام القلتو ليها ، قالت ليهو اسأل مرتك قالت شنو لأمي لمن ضغطها ارتفع ، قال ليها أمي؟ وينا هي هسي؟
قالت ليهو قاعده في غرفتها ، راشد طوالي مشى ليها بهناك و عبير لحقتو ، قلت عشان أمو ما تكضب فيني ساي و تقولني حاجه ما قلتها احسن امشي ألحقهم ، لبست توبي و مشيت ليهم بهناك ، لمن وصلت غرفتها سامعه راشد بتكلم معاها بضيق و بقول ليها قالت ليك شنو الزفته دي؟
و هي كانت ساكته ساي و ما اتكلمت ، لمن راشد لمحني واقفه جنب الباب جا مندفع علي ، جراني من يدي لمن قربت اقع و وقفني في نص الغرفه ، قال لي بغضب قلتي ليها شنو انتي؟
سكت ما ردت عليهو ، قرب يضربني قال لي بتكلم معاك انا ردي قبل ما اتعامل معاك بأسلوب تاني قلتي لأمي شنو ؟ على حس صوتو العالي عمي صلاح و رامي جوا داخلين اصلاً هم ما كانوا موجودين في البيت يمكن جوا داخلين هسي ، عمي صلاح قال في شنو كمان! راشد مالك يا ولدي بتجوط كدا؟
عبير قالت ليهو مها شاكلت أمي و قالت ليها كلام خلى ضغطها يرتفع و أمي هسي ما ناويه تتكلم ، رامي مشى قعد جنب أمو و قال ليها قالت ليك شنو يا أمي و اساساً سبب النقاش شنو؟
ما ردت عليهو بقت تبكي بس و هديل و عبير يهدوا فيها ، راشد قال للمره الأخيره قلتي لأمي شنو و اقسم بالله ما تردي الجن الأحمر ما يخلصك مني ، قلت ليهو هديل كانت معانا اسألها هم قالوا شنو و انا قلت شنو ، راشد طوالي عاين لـ هديل و قال ليها الحصل شنو؟ هي قالت لأمي شنو؟
هديل سكتت و عملت نفسها ما عايزا تعمل مشاكل و فتن ، أول ما راشد اتلفت علي و هو معصب عمتي إشراقه نزلت من السرير و جات فكتني منو، قالت ليهو خليها يا ولدي و الحصل بيناتنا نقاش عادي بحصل في كل البيوت ، راشد قال ليها ماف حاجه اسمها نقاش عادي هسي دي تقول لي قالت ليك شنو! قالت ليهو اسمع مني النقاش كان عادي ، و ما كنت عايزاك تعرف لأنك نبهتنا و قلت ما عايز أي نقاشات في البيت دا ...
طبعاً عرفتها خايفاني أقول الكلام القلتو ليها قدام أولادها و راجلها ، رامي طوالي ساق راشد و طلع بيهو الشارع عشان يهدى شويه و انا من مكاني داك جريت بهناك دخلت الغرفه و قفلتها علي بالترباس خوفه ساي من راشد خلتني ارجف من فوق لـ تحت، عصبيتو كانت مبالغه و انا متأكده لو ما رامي طلع بيهو برا كان حـ يكفتني كدا لمن اقول بس، بسبب الموقف دا اتكون جواي خوف فظيع منو و اتيقنت انو راشد مستحيل يتغير و مستحيل يتفاهم مع زول، دا ما بنى آدم بقدر اعيش معاهو والله، دا في أي موقف حـ يقعد يضربني و انا والله ماف شي برعبني غير الضرب و العصبيه المفرطه ، بقيت قاعده في الغرفه و قلبي في يدي، شويه كدا مسكت المصحف و قعدت في نص السرير و بديت اقرا في سري عشان اطمن قلبي و دعيت انو راشد ما يجيني داخل ، بقيت خاته يدي على قلبي و بقرا لغاية ما الساعه 12 جات ، اطمنت و خوفي شويه خف ، قمت طفيت النور و رقدت و انا بدعي إنو بكرا ما يسألني....
لا أريدُ التحدُث معك مُجددًا ومع ذلك لازلتُ أنتظرُ منكَ رسالة، أريدُ نسيانَك ولا أستطيعُ النومَ دون أن أتذكرك، أتمنى لو أنّي لم أعرفك ومع ذلك أعتبرُك أجملَ ماحدث لي في هذه الدُنيا، أحببتُك حتّى باتَ حُبّي يُؤلمني، أنا فعلاً تعبتُ من تناقُضَ الشُّعور داخلي 🖤.
يتبع.....
