قرن حواجبينو و قال لي قلتي شنو؟
كان جادي شديد و واضح إنو ما كان عارفني تابعاهو ، لمن استوعبت الورطه الوقعت نفسي فيها من غير ما أتردد جريييت جوه دخلت الغرفه و قفلتها علي و هو كان وراي و جا يخبت في الباب و عشان الدنيا ليل ما قدر يكورك و يعلي صوتو أكتر ، قال لي احسن ليك تفتحي الزفت دا ، ما رديت ليهو بقى يضرب و يضرب لغاية ما تعب ، قال لي كويس إلا ما تطلعي من الغرفه دي....
المهم في اليوم البعديهو صحيت بدري بس كنت خايفه أطلع برا ، فتحت الباب براحه و ما شايفاهو ، اصلاً هو بكون رجع و نام برا ، هسي ما عارفاهو طلع ولا لا ، قعدت ربع ساعه في الغرفه بعدها لبست توبي و طلعت لقيت سريرو فاضي قلت الحمدلله معناها فات ، اتسوقت و اتوضيت و دخلت جوه عشان أصلي ، قفلت الباب قلت عشان ما يجيني داخل ، أول ما خلصت صلاة و سلمت أحس ليك بزول واقف وراي ، قمت مخلوعه و عاينت وراي لقيت راشد في وشي لمن شهقت ، بقيت خايفه و مقلقه و متوقعه كف في أي لحظه ، قال لي بنبره حادة أنا قلت ليك شنو؟
غمضت عيوني شديد و قلت ليهو و انا بتمتم قـ قـلتي لي ما أطلع من البيت مـ من غير ما أكلمك ، قال لي بنبره عاليه و ما سمعتي الكلام ليه؟ بتفهمي بوين انتي يا بت الناس؟
ولا كذبت طوالي بكيت ، ياخ انا ما صدقت انو الأوضاع بيناتنا بقت مستقره ، ما صدقت إنو أيام الإكتئاب و الضرب و الهرش ولت ، بس شكلو تاني حنرجع لنقطة الصفر 💔
اتوقعتو ينفجر فيني و يضربني عديل بس بمجرد ما دموعي نزلت هو سكت اتنهد و قال لي هسي بتبكي مالك ؟ كلامي دا ببكي؟
قلت ليهو و انا لسه ببكي: بس كنت عايزا اعرف انت ماشي تقابل منو بعد ما فهمت الرسايل البينك و بين الراجل داك ، قال لي المهم تاني إياك تتبعيني و إياك تطلعي من البيت دا من غير ما تديني خبر ، فاهمه ولا لا؟
قلت ليهو حاضر ، أول ما اتحرك من جنبي قلت ليهو انت كنت عارف اني فتحت تلفونك و قدرت افك شفرة الرسايل لأني في نفس اليوم داك جبت ليك سيرة خوارزمية يوليوس قيصر ، قصداً أديتني تلفونك عشان أختو ليك في الشاحن كنت عارف إني حـ افتحو و بعد ما حصل الفي بالك و اتيقنت اني صدقتك و نسيت الموضوع غيرت نمط تلفونك طوالي ، إتلفت علي ، ابتسم و قال لي ايوه صح كنت عارف! بس ما شلت هم خالص لأنو استحاله تفهمي انا شغال شنو من كلام الرسايل ، قلت ليهو بس في الآخر عرفت 😌
قال لي بالصدفه و إلا عمرك كلو ما كنتي حتعرفي ، قلت ليهو كذاب والله كنت حـ اعرف ، قال لي بالمناسبه انتي فتحتي تلفوني كيف؟
قلت ليهو دا سر المهنه 😌 قال لي يا شيخه! 😂 يا إما شفتيني فتحت التلفون يا إما ختيتي التلفون في الشمس و شفتي النمط ما حتطلعي من الإحتمالين ديل ، قلت ليهو ختيت التلفون في الشمس ، شفتني ذكيه كيف!؟قال لي آيي آيي ، قلت ليهو سؤال ممكن؟
قال لي اها بدينا؟ ....قلت ليهو ليه قفلت المستشفى ديك؟ عشان لخبطوا في تحاليل عمي ولا في سبب تاني؟
قال لي خلينا من المواضيع دي ، قلت ليهو خايفني أكلم زول؟ ما واثق فيني صح؟ ....ماشي يا زول ما مشكله ، عملت نفسي زعلانه و كنت حـ أمشي من قدامو بس هو اخد نفس و قال لي بالمختصر معظم دكاترة المستشفى تجار أعضاء ، إتلفت عليهو و قلت ليهو شنو؟
قال لي و نصابين كمان ، عارفه إنو لمن يجيبوا ليهم زول تعبان أو عمل حادث و هو في الحقيقه مات قبل ما يصل المستشفى رغم معرفتهم انو مات ما بقولوا لأهل الميت عشان يشيلوا منهم قروش و تقاريرهم كلها كذب في كذب ، بخدعوا أهل المريض و بقولوا ليهم زولكم دا عايز ليهو كليه ، شوفوا ليكم زول يتبرع ليهو و لمن يجي زول و يتبرع الكليه دي بشيلوها هم و ببعوها بأسعار عاليه ، و المرضى البجوا براهم و ما بكون معاهم زول ديل ولا بترددوا فيهم بشيلوا منهم كليه و بخلوا ليهم وحده مرات ما بكلموهم و مرات بقولوا ليهم كلام كلو كذب و انو الكليه كانت تالفه و لو خليناها حتتلف التانيه و كلام بالشكل دا و طبعاً كلو كذب ، و في حاجات كتيره شديد بتحصل جوه المستشفى دي ماف زول جايب ليها خبر ، كتير من الناس اكتشفت الحاصل و الكلام حول المستشفى دي و البحصل فيها كتر و في ناس فتحت بلاغات عديل و الحمدلله قدرنا نتحقق من الموضوع و عرفنا الحاصل كلو و جمعنا أدله لغاية ما سجناهم و قفلنا ليهم المستشفى ، قلت ليهو لا حول ولا قوة إلا بالله ، حسبي الله و نعم الوكيل فيهم ، ما قادره اصدق والله ، قال لي و لسه في حاجات بشعه و قذره شديد ما في المستشفيات بس ، السودان دا ملان بتجار الأعضاء و المخدرات ، ملان بالمغتصبين و بالمجرمين و بالحراميه و حاجات كتيره ما بتخطر على بال زول ، السودان ما الصوره الشايفنها قدامنا في حاجات ورا الستار بتنطبخ ، ماف غير جهاز الأمن و المخابرات و اتباعها عارفين البحصل في السودان ، قلت ليهو سبحان الله نهاي ما خطر على بالي انك ممكن تكون تابع لناس الجهاز ، قال لي دا المطلوب ، ما مفروض اننا نكشف هويتنا و لازم نعمل حسابنا عشان ماف زول يقدر يكشفنا بس انتي الله يخليك للشمارات و روح المحقق كونان الجواك دي ما عملت فيني خير ، ضحكت و قلت ليهو بس الشغل دا مناسب معاك و بشبه شخصيتك الغامضه!....ابتسم لي بس ، قلت ليهو معناها انت ما عندك شركة إيراد و تصدير زي ما قلت لي صح؟ قال لي لا عندي و شغال فيها! قلت ليهو امممم معناها قدام الناس انت راشد العندو شركة إيراد و تصدير و وراهم انت راشد الشغال في جهاز الأمن و المخابرات يعني كأنو بتغطي هويتك بالشركه دي ، قال لي بالظبط كدا ، لازم نخفي هويتنا، هسي عادي يكون سيد الدكان أو الخضار عميل تابع للأمن و المخابرات، عادي سيد المطعم أو الفرن أو....أو ....و برضو العكس ممكن جاسوس يكون حلاق أو سايق ركشه ، قدام الناس هم عادين و في الحقيقه هم عكس كدا ، إخفاء الهويه حاجه مهمه شديد عشان تحفظ بيها سلامة أسرتك و الحوليك ، قلت ليهو واو الشغل دا عجبني ، عايزا اخش في جهاز الأمن و المخابرات دا أنا، بحب اعمال الهكرز و التجسس و جمع المعلومات ، ضحك و قال لي آيي آيي واضح انك بتحبي التجسس ، سكت مسافه بعدها قال لي ما عايز السر دا يطلع من بيناتنا أعملي حسابك و ما تجيبي سيره لـ زول ، لو الموضوع دا إنكشف حـ تجيبي لينا الهوى ، قلت ليهو إطمن ما حـ اقول لـ زول و انا محترمه سرية المهنه بس ممكن تحكي لي شويه عن شغلك و المهام الأنجزتها!؟
قال لي لا والله و بعد دا انا ذاتي ماشي لأني لو قعدت معاك أكتر حـ تخليني اكشف ليك أسامي المعاي كلهم نفر نفر ، قلت ليهو آيي زي مبارك محجوب ، عاين لي بخلعه بس خلعتو دا اتلاشت لمن اتذكر إني سمعت كلامو كلو و هو ذكر الإسم دا ، قال لي والله انتي!
بعد ما هو مشى بقيت أفكر بيني و بين نفسي ، يمكن شغلو و البيئه الإتربى فيها كان ليهم دور كبير في تشكيل الشخصيه القويه و الغامضه و العندها هيبه دي! راشد كان دايماً بمنعني و بمنع باقي بنات أعمامو نطلع برانا أو من غير ما نقول لزول نحنا ماشين وين ، هو كان شايف الشي النحنا ما قادرين نشوفو ، الزول العادي بالنسبه لينا لـ راشد ما عادي و يمكن وراهو شي ، هو عالم أكتر مننا بالشي البحصل في الشوارع و الشقق و المستشفيات ، عارف قدر شنو العالم البرا البيت دا قذر و وسخ ، يمكن هو بنظره وحده بقدر يعرف اذا الزول دا كويس ولا لا ....ما عارفه ليه حاسه نفسي بديت احترمو بعد العرفتو عنو و كبر في نظري ، فجأه كدا اتكون إحساس جواي تجاهو ما قادره أوصفو بس أنا خلاص فهمت الإحساس دا و بعترف بيني و بين نفسي إني وقعت في حبو ، أبداً ما اتوقعت اني أحبو في يوم ، خالص ما كنت شايفه لي مستقبل معاهو و ما متوقعه البينا يتصلح مع الأيام ، سبحان الله راشد دا أكتر بني آدم أنا كنت بكرهو و ما بطيقو بس حالياً حاسه بتغير شديد ، فجأه كدا بقيت اشوفو زول كويس و قادره اشوف جوهرو 💜
يمكن هو من زمان كدا بس أنا النظري اتغير و بقيت أعاين ليهو من زاويه تانيه ، ياداب انتبهت قدر شنو هو شخصيه هيبه و حلو و جذاب و ما فيهو ولا كلمه ، شويه كدا اتذكرت لمن كان يرفع صوتو علي و لمن كان يضربني كف قلت حرفياً "الكلب بريد خانقو " بس والله الحاجه دي ما بيدي ، حتى بعد ما اتذكرت العملو معاي و الخوف و الإكتئاب العيشني ليهم ما حاسه إني بكرهو و كل ذرة حقد و كراهيه جواي ليهو إتلاشت....
يوم ناس إسراء جوني بالعصريه كدا ، طلعنا سريرين و ختيناهم في الحوش و عملنا شاي و جبنا لينا مكسرات و دقيناها ونسه حتى فاطمه الشماره معانا ، برغم اني ما كنت حابه قعدتها معانا بس الإكتشفتو إنها كويسه و القواله دي طبع فيها كدا صعب يتغير بس هي وناسه رغم انو ونستها كلها كذب و من راسها بس ضحكتنا ضحك ، شويه كدا راشد جا من بيت هديل أول ما لويت خشمي لقيت إسراء بتعاين لي ساي و بتضحك ، قال ليهم السلام عليكم و دخل الهول ، قلت ليهم خليكم قاعدين هسي برجع ، مشيت لقيتو بحضر ساي سألتو اذا عايز حاجه قال لي لا ما عايز شي ، طلعت لناس إسراء و كملنا ونستنا، أنا و إسراء اتغالطنا في حاجه فـ هي بقت تحلف و انا منفعله معاها بحلف بصوت عالي و هي مغيووظه عشان بغالطها في حاجه هي متأكده منها 😂جنبها في مخده قامت جدعتني بيها فـ بقيت أغيظها و لسه بكاوي فيها، جاتني و بقت تقرص فيني و انا بضحك عليها و لسه مصره على موقفي ، قرصتها الآخيره دي وجعتني شديد لمن صرخت ، هي ذاتا انخلعت ، راشد جا طالع و قال لـ لي بـ لهفه مالك في شنو؟
أول حاجه عملتها قرصت إسراء شديد و قمت جاريه على راشد و هي وراي ، وقفت وراهو و قلت ليهو راشد أمسكها مني و هي شغاله لي والله ما أخليك ، و بقت تجيني بيجاي و انا ألف منها بيجاي و دا كلو حاصل حولين راشد ، بنلف فيهو زي عصارة الزيت و هو متحير فينا في الآخر إسراء قدرت تمسكني و كان حتقرصني في يدي بس راشد قال ليها بنهره إسراء!
طبعاً كلنا بقينا بنعاين ليهو بخلعه ، ما عارفه بس حسيت إسراء زعلت ، قالت ليهو نحنا بنهظر مع بعض و هي ذاتا قرصتني شوف يدي ، طوالي خلتني و رجعت قعدت في السرير ، مشيت ليها و مديت ليها يدي قلت ليها اتسديها طيب ، أبت تتكلم معاي ، قلت ليها إسراء انتي زعلتي؟
طبعاً كنت لسه ماده ليها يدي ، فجأه كدا مسكتها و قرصتني و قعدت تضحك و انا اصرخ ساي ، راشد قال لي أسكتي ساي مش براك مديتي ليها يدك؟
فاطمه قالت ليهو مالك زعلان كدا التقول قرصوك انت 😂
طبعاً كلنا ضحكنا على كلامها و هو طوالي دخل جوه ، خجلتو طبعاً ، و من هنا بدت التشغيلات ، شويه كدا شفت هديل لسه بتعاين لينا من بعيد ساي ، أصلاً من قبيل شايفاها بتعاين لينا عشان كدا قصداً جريت من إسراء لـ راشد و وقفت وراهو و قعدت اعمل حركات قدامها 😏
