مشتهى غيرت ملابسها و جات اتغدت معانا ، نادراً ما نقعد و ناكل سوا ، يمكن في بيتنا أكبر عدد اجتمعوا سوا و قعدوا ياكلوا مع بعض كانوا 3 انفار زي قعدتنا انا و أمي و مشتهى ، المهم بعد ما اتغدينا أمي قالت لـ مشتهى امشي سلمي على ناس عمك ديل ، مشت سلمت عليهم و جات تتبسم ساي ، قلت ليها بتتبسمي مالك أدوك قروش ولا شنو؟ قالت لي عشان انتي انسانه منفسنه و الزمن كلو صاره وشك فطبيعي يكون في استفهام كبير في مخك لما تشوفي زول مبسوط أو مبتسم يا عدوة السعاده ، فجأه أبوي جا داخل و قال لينا جهزوا الشاي دا سريع ، قلت ليهو طيب ، بعد ما طلع قلت لـ مشتهى سوي ليهم الشاي لأني تعبت عديل من قبيل شغاله ، قالت لي بري والله انا تعبانه ما بقدر ، قلت ليها اصلو ما منك فايده و وجودك زي عدمو ، أمي قالت لي أختك دي شايله طباع أبوها و أهلو اصلو رحمه ما عندها ، خليهو الشاي بعملو انا قلت ليها لا خليها تعملو هي و غصباً عنها ، فبقينا نتناقش هي بتقول ما بتعملو و انا بقول ما بعملو فجأه جا عمر داخل و قال لينا في شنو أصواتكم دي طالعه برا؟ قلت ليهو عمر اتكلم مع مشتهى دي قالت ما بتعمل الشاي والله انا من قبيل شغاله و تعبت عديل ، أمي قالت لي ياخ خلاص قلت ليكن بعملو انا ، عمر قال لـ مشتهى مالك ما بتعمليهو! مكسره؟ قالت ليهو لكن انا تعبانه هسي دي دخلتي من المدرسه ، قال ليها ما بتقدري و تعبانه معناها تخلي المدرسه عشان ترتاحي و بالتالي تقعدي لينا في المطبخ و تشتغلي ولا شنو؟! قالت ليهو لا لا خلاص بسويهو و حمرت لي ، أمي قالت لـ عمر عليك الله اتصل على أخوك دا و شوفو مشى وين ما معقوله أسبوع و خبرو ما جايبنوا ، قال ليها قبيل اتصلت عليهو قال قاعد في بيت صحبو ، أمي قالت ليهو صحبو دا منو كمان! الزول لو ما ارتاح في بيتو بيرتاح كيف في بيوت الناس! هسي دي اتصل عليهو و قول ليهو يرجع و لو أبى أديني اتكلم معاهو أو وصف لي بيت صحبو دا ، قال ليها هسي انا طالع و ماشي ليهو ، قالت ليهو آيي عليك الله جيبو معاك.....
طلعت مشيت صليت المغرب و فتحت تلفوني اشتغلت فيهو مسافه كدا بعديها فتحت التلفزيون و جبت ام بي سي بوليود كان شغال فيها مسلسل "من النظرة الثانية " ياخ المسلسل دي انا بموت فيها ، بحبها حب كدا ما عادي أمي صلت و جات قعدت معاي شويه كدا جات مرام داخله ، سلمت علينا و دخلت جوه ، طبعاً مشتهى بعد ما عملت الشاي و جات بقت بتحمر لي ساي و عامله نفسها زعلانه ، طبعاً عشان هي أصغر وحده مدلعه روحها براها و ما متعوده تعمل حاجه حتى ملابسها دي بنغسلها ليها نحنا هي اتكاليه شديد و جنها تعتمد على الناس و تحملهم مسؤوليتها ، أمي قالت ليها بتحمري لأختك كدا مالك؟ عندك كلام امشي قوليهو لـ عمر يا قادره ، طبعاً انا كنت بغيظ فيها و بعمل ليها في حركات من غير ما أمي تشوفني ، و مشتهى دي ماف حاجه بتحرق روحها زي المكاوه اتغاظت شديد و قربت تبكي فلما كترتها معاها شالت المخده و جدعتني بيها شويه كدا جات ناطه فيني و بدت تقرص فيني و انا بضحك و بقول لأمي ألحقيني فكيني منها ، أمي ذاتا بقت تضحك علينا ، قالت لينا شكلكن عندكن بواقي طفوله لسه ما كملتنها فقلتن نستغل الفرصه دي و نعيد الطفوله ، قلت ليها لا والله امسكيها مني اقسم بالله قريصها حار 😭😂😭😂😭😂بقينا نتصارع كدا مره نضحك و مره نبكي ما وقفنا إلا لما سمعنا عمي آدم بقول لينا طرش انتوا....قالها بنهره و نبره عاليه كدا ، وقفنا مهجومين و بقينا نعاين ليهو ، أمي وطت صوت التلفزيون و قالت ليهو ما سمعناك والله ، عاين لينا انا و مشتهى و قال لينا دي شنو العواره البتعملن فيها دي! صغار انتوا؟ القدركن ماسكات بيوت و انتن بتلعبن! اخجلن عليكن الله أخجلن ، بعد كلامو دا صلحت توبي و زحيت مشتهى مني ، أمي قالت ليهو عايز حاجه؟ قال ليها الشاي وين ما جبتوهو لينا ، أمي قالت ليهو جاهز بس عشان كنتوا بتتغدوا ما كبيناهو ليكم ، حمر لينا انا و مشتهى مسافه و مشى مننا ، مشتهى قالت لي دا مالو قال؟ حُرين في بيتنا نعمل العايزنوا ، دي شنو الناس المتطفله دي ، متين يمشي مننا عشان نقدر نتنفس ، الراجل دا حيوان خلاص و ....أمي قاطعتها و قالت ليها بنهره كدا مشتهى ، طوالي مشتهى سكتت و أمي مشت كبت ليهم الشاي و جاتني داخله بتضحك ، قالت لي مش عمك قال لينا أكلكم و عيشكم دا ما بدورهو ليكم! والله هديك ليها صينيتهم أكلوا العيش و خلو العصيده زي ما هي أظن نفر واحد بس الدخل فيها يدو ، مشتهى قالت ليها اصلاً عمي آدم دا بتاع حركات ساي و جنو يتأمر في الناس ، مرام جات طالعه و قالت لـ مشتهى ، ميمي عليك الله ختي لي الأكل تعبانه انا ، مشتهى قالت ليها ارحموني عليكم الله انا قبل شويه عملت ليهم الشاي ، أمي قالت ليها ما تقولي عملت الشاي قولي سخنت مويه حاره لأنك لا كبيتي فيهو بهارات لا كبيتو فيهو الحبشاي ما عارفاك مستعجله طايره وين والله إلا انا قبل شويه كبيتهم فيهو و طعمتو ليهم ، قلت لأمي مشتهى دي بتدلع روحها براها محسساني إنها اميره و نحنا خدمها ، مرام قالت لأمي مشتهى دي إلا تعرسيها لـ راعي غنم و يسكنها في قريه عشان تعرف البنات بشتغلن كيف و تشوف الموت الأحمر ، أمي ضحكت و قالت ليها إلا كدا ، مشتهى قالت لينا أف منكم خلاص خلاص ح أختو ليها بلا راعي غنم معاكم ، عاد جرت سريع ختتو و جات أمي قالت ليها هسي كلفك حاجه! ساي الوحده فيكن بتضايق و بتتزهج لما يقولوا ليها اعملي حاجه مع إنها لا بتكلفها حاجه لا بتاخد منها زمن كتير ، مرام قالت ليها قولي الكلام دا لـ مها و مشتهى خاصة مشتهى دي ، أمي قالت ليها صحي نسيت انتي سلمتي على الضيوف؟ مرام قالت ليها ناس عمو نصر الدين صح؟ ايوه سلمت عليهم ، مع إنهم خوفوني بنظراتهم بس اتجاوزتهم و سلمت عليهم عادي ، أمي قالت ليها هسي حيدقوا جرس و يعترضوا في حتة إنها جات داخله البيت متأخره اصلاً من يومهم عندهم اعتراض في حتة قراية البنات دي غيتو أهل أبوك ديل الله يدينا خيرهم و يكفينا شرهم ، طبعاً أمي من سنار و أبوي من قريه من قرى كردفان ، خالي كان صاحب أبوي شديد عشان كدا لمن ابوي قال ناوي يعرس قال ليهو بعرس ليك أختي و أمي ما كان عندها مانع لأنها سمعت من خالي انو زول كويس و فعلاً هو طلع كدا بس كان انسان عصبي و صارم معاها لحدي ما ولدتنا نحنا تعاملوا بقى احسن شويه و حياتنا كانت ماشه تمام لحدي ما ادخلوا اهل أبوي و بدوا يملوا ليهو في راسو و يستفزوهو على راسهم عمي آدم ما عارفه ليه بكرهنا الكره دا كلو.....
مشتهى قالت ليها انتي ذاتك يا أمي الخلاك تعرسي واحد بنتمي لـ ناس معقده زي ديل شنو 😂هسي لو كان عرستي ليك واحد من أهلك ما كان احسن غيتو انا بشوف انو الوحده احسن تعرس من أولاد أهلها و دا ذاتو فيهو تجنب للمشاكل الممكن تحصل بين قبيلتين أو اسرتين ، أمي قالت ليها كلامك دا عيب و بعدين القسمه دي لا بتعرف ولد أهل لا بتعرف غريب ، ياما ناس بنعرفهم عرسوا من قبايل مختلفه لكن ليوم الليله ما سمعنا بمشاكلك حصلت بيناتهم لا سمعنا بيهم اطلقوا ، و ياما ناس عرست القريب و كل يوم مشكله ورا مشكله ، الموضوع ما ليهو علاقه بالقبيله العرستي منها الموضوع بتعلق بالعرستيهو دا نفسو ، لأنو أفراد القبيله ما كلهم واحد و كل قبيله فيها الصالح و فيها الطالح ، يمكن تعرسي واحد كويس بس أهلو كعبين لاحظي اني قلت أهلو و ما قلت قبيلتو و برضو بحصل العكس بس بعيداً عن القبيله البينتمي ليها دي ، قلت ليها صح كلامك ماف قبيله بنقدر نقول عليها إنها مكمله الأخلاق و الصفات السمحه كلها ، السودان مليان بالقبايل و القبيله مكونه من عدة أشخاص منتشرين في جزو من السودان لو ما كلو ، فهل بتقدري تجزمي لي إنهم كلهم حيكونوا زي بعض! خليك من القبيله في البيت الواحد دا الأخوان ما بكونوا زي بعض ، عادي تلقى وحده ملتزمه و منقبه و بتخاف من ربنا و أخوها أو أبوها بسكر أو بزني أو بسرق أو تاجر مخدرات عديل أو ، أو ، أو .... يعنى حتى اصابع اليد الواحده ما متساويه فما بالكم بقبيله كامله أو شعب كامل ؟!و......قبل ما أتم كلامي قاطعتني مرام و هي بتقول لـ مشتهى والله انتي ذاتك غلطانه يا مشتهى شنو البخليك تفتحي موضوع زي دا مع الأستاذه أمي و مها؟ 😂
مشتهى قالت ليها فعلاً انا غلطانه أمي و مها ديل ينفعوا يكونوا نظار للقبايل أو سفيرات للسلام متأكده انو عندكم جذور مع "نيلسون مانديلا " 😂مرام قالت ليها لو كل نظائر العشاير و القبايل بقوا زي أمي و مها ديل ما حنسمع بقبيلتين اشتبكوا مع بعض أو اتماوتوا ، لكن للأسف هم اتنين و على وشك الإنقراض 🤣🤣مرام و مشتهى قعدوا يضحكوا قلت ليهم ايوه اتمسخروا كويس و اتساخفوا ، أمي قالت لي خليهن ديل عويرات ساي ، مرام قالت لي انتوا ذاتكم انحرفتوا عن الموضوع و عملتو ليهو يدين و رجلين ، مشتهى كان سؤالها ليه أمي ما عرست من أهلها انتي و أمي براكن منفعلات و بتحبن الفلسفه 👊🤣
قلت ليها كيف انحرفنا عن الموضوع و مشتهى قالت ".....ذاتو فيهو تجنب للمشاكل الممكن تحصل بين قبيلتين "
قالت لي خلاص خلاص يا زوله انطمي غلطانين نحنا البنفتح مواضيع مع فلاسفه و عباقره زيكم 🤣قلت ليها خلاص قفلي فوتوني المسلسل لمن قربت تنتهي ، لحدي الساعه 10 كدا عمر جا داخل ، أمي قالت ليهو اها أخوك وين ما جبتو معاك؟ قال ليها قال حيرجع بكرا ، قالت ليهو غيتو أخوك دا تعبني معاهو ، كويس هو؟ قال ليها كويس الحمدلله...
المهم في اليوم البعديهو جهزت نفسي عشان أمشي الجامعه بس كنت متردده شديد و خايفه أبوي يقول لي ما تمشي ، أمي شافتني شايله شنطتي و متردده قالت لي امشي ساي أصلاً كلهم مافيشين مشوا مع عمك آدم للمقابله ، ارتحت شديد و طوالي طلعت عشان أمشي ، أمي لحقتني و قالت لي اقيفي اقيفي ما شلتي قروشك ، قلت ليها نسيتها عديل ، قالت لي غيتو قلبك دا ربنا يثبتو ، شلت منها القروش و اتحركت من جنبها ، قالت لي ربنا يوفقك و يغطي عليك و يفتحها عليك محل ما تقبلي ، ابتسمت و مشيت ، بكون مطمنه شديد لما أمي تدعي لينا خاصة لمن نكون طالعين أو عايزين نعمل حاجه جديده في حياتنا ، دعواتها و إهتمامها بأدق تفاصيلنا بنسينا كل الهموم و المشاكل و الإزعاجات و المضايقات البتواجهنا برا البيت ، طول ما دعوات أمي دس مرافقانا فنحنا أكيد في السليم 💜
لمن جيت راجعه من الجامعه كانت في صنه غريبه في البيت أمي جات طالعه من الديوان مستعجله و مشت غرفتها مشيت لحقتها ملامح وشها كانت متغيره قلت ليها يمه مالك في شنو؟ قالت لي هسي أبوك اتصل علي قال انو جدك دا اتوفى و قال لي جهزي لينا شنطة ملابسنا عشان حيسافروا بكرا الصباح بدري ، قلت ليها لا حول ولا قوة إلا بالله جدي اتوفى متين ؟ قالت لي شكلو اتوفى من الصباح و ياداب جابوا لينا الخبر لأنو قبيل مدثر أخوي اتصل علي و قال لي البركه فيكم ، قلت ليهو الإتوفى منو بس ما سمعتو كويس عشان هو هناك في الدهب و شبكتهم كعبه فما سمعتو كويس ، قلت ليها هم ليه بكتموا خبر الموت؟ قالت لي ما عارفه المهم نزلي لي الشنطه ديك و دخلي لي فيها ملابسي انا ذاتي مسافره معاهم ، قلت ليها طيب انا ذاتي حمشي معاك ، قالت لي لا انتي اقعدي ناسيه انو عندك جامعه؟ قلت ليها بكرا الخميس و ما عندي تاني إلا يوم الأحد ، انتي مش ما حتطولي هناك؟ قالت لي آيي بقعد معاهم تلات أيام و بجي راجعه ، كان كدي امشي لمي ملابسك و لو في حاجه عايزا غسيل غسليها ، قلت ليها سمح ، قالت لي تلفوني ما فيهو رصيد عشان كدا اتصلي على أبوك و كلميهو يحجز لينا معاهو ، مديت ليها التلفون و قلت ليها كلميهو انتي انا ماشه ألم لي ملابس ، المهم امي اتصلت على أبوي و كلمتو و انا مشيت كويت ملابسي و جبتهم دخلتهم في شنطة أمي لأنو ماف داعي نكتر الشنط و نحنا أصلاً ما حنطول هناك ، المسا كدا مشتهى و مرام جوا داخلين سوا ، مرام قالت لأمي صحي جدي اتوفى؟ أمي قالت ليها آيي ربنا يرحمو و يغفر ليهو ، قالت ليها الخبر صدمني والله قبل شويه اتصل علي عمر و قال لي جدي دا اتوفى و هم ماشين يقطعوا التذاكر عشان يسافروا ، قلت ليها انا و أمي كمان حنسافر معاهم ، مشتهى قالت لينا انا ذاتي ماشه معاكم ، أمي قالت ليها لا انتوا تقعدوا اصلاً كلها تلات أيام و حنجي راجعين و عمر دا ذاتو مفروض يقعد معاكم ، مرام قالت ليها لكن يا أمي جدي دا ما سمعنا بيهو عيان موتو دي جات فجأه كدا ؟ أمي قالت ليها بري والله ما سمعنا انو عيان و خبر وفاتو دا ذاتو جانا متأخر ، اتوفى متين و كيف الله أعلم ، بعد شويه سمعنا صوت الباب ، مشتهى مشت فتحتو ، فجأه بدت تصرخ و تقول حذيفه جا يا أمي حذيفه جا ....كلنا وقفنا على حيلنا و هو جانا داخل ، أمي مشت عليهو و حضنتو عليها و بقت تبكي ، قالت ليهو وقفت قلبي و قلقتني عليك يا ولدي ، في زول نصيح بطلع بخلي بيتو من غير ما يقول للناس هو ماشي وين؟ قال ليها خلاص يا حاجه هندا انا واقف قدامك بصحه و عافيه ، مرام قالت ليهو حذيفه يا شراد معقوله ياخ و قعدت تضحك ، حذيفه قال لأمي قالوا جدي دا بقى في رحمة ربنا ، أمي قالت ليهو آيي الخبر جانا ربنا يتولاهو برحمتو انت الكلمك عمر ولا منو؟
قال ليها آيي اتصل علي عمر كلمني و قال لي انهم بكرا حيسافروا "الأبيض" أمي قالت ليهو ليه هو اتوفى هناك؟ قال ليها آيي اتوفى هناك ، ليهو أسبوعين و حاجه في الأبيض في بيت عمي رضوان لأنو تعب و ودوهو هناك ، أمي قالت ليهو وووبعلينا اتلومنا و اتكومنا لكن انتوا يا أولادي ليه ما كلمتوني و قلتو لي جدكم دا تعب و جابوهو الأبيض؟ بتدخلوا الزول في حتات ضيقه خلاص و أبوك دا ذاتو مفروض يكلمني مستحيل ما يكون عارف إنو جابوا أبوهو عيان! قال ليها والله انا ذاتي ما عرفت إلا قبل 3 أيام و قايلك عارفه والله ، أمي قالت ليهو غيتو اتلومنا مع الناس ...
بعد المغرب مباشرة ناس أبوي جوا داخلين ، لبسنا تيابنا و مشينا أديناهم الفاتحه ...أمي قالت لـ عمر انت جدك دا اتوفى متين و ليه ما قلتي لي انو تعب و جابوا عشان يتعالج في الأبيض؟ قال ليها والله نسيت عديل يا أمي ، الواحد ذاتو بقى زي العندو زهايمر انا شخصياً ما باقي لي إلا أنسى اسمي ، كل مره اقول عايزا اكلمك بنسى و كل حاجه بتروح عن بالي ، قالت ليهو طيب هو اتوفى متين؟ قال ليها اظنو اتوفى من الصباح لأنو لمن عمي آدم اتصل علي الساعه كانت 4 و قال لي دفنوهو ، أمي قالت ليهو والله ببالغوا كان كلموا الناس مالهم؟ ديل أولادو مفروض يعرفوا أول ناس و من ما حالتو بدت تسوء كان يتصلوا على أبوك أو عمك آدم احسن من ما يكلموهم زي الغرباء كدا ، قال ليها دا المفروض لكن ما حصل ، أمي قالت ليهو ما تمشي خليك قاعد مع أخواتك ، قال ليها لا لازم أمشي حذيفه حيقعد معاهم و لمن انا ارجع هو يمشي يديهم الفاتحه و يجي راجع ، قالت ليهو خلاص تمام النقوم نجهز ليك ملابسك.....
المهم اتلمينا كلنا و ليلتنا ديك كلها مسخت علينا و أي زول يعاين بإتجاه ، في اليوم البعديهو أمي صحتني بدري زي الساعه 4 ص كدا قالت لي أمشي استحمي مسافة اعمل الشاي اسريعي قبل ما الباص يفوتنا ، المهم مشيت استحميت و جيت صليت و غيرت ملابسي لبست لي عبايه سوداء و أمي عملت الشاي لناس أبوي ، بعد ما هم صلوا و جهزوا ، عمر جا و قال لينا أطلعن العربيه جات ، طبعاً مرام و مشتهى في سابع نومه ، أمي صحت مرام و قعدت توصي فيها ، مرام قالت ليها البسمعك يا أمي بقول تاني ما جايه راجعه و ضحكت ، أمي قالت ليها ما معروف المهم في أكل في التلاته عملتو ليكن أمبارح عشان بترجعن البيت متأخرات بكفيكن لمدة تلات أيام أو أكتر و أختك دي راجعي ليها دروسها لمن ترجع من المعسكر و ما تنسي لما تطلعوا من البيت اقفلوا الأبواب دي كويس إلا لو حذيفه قاعد خلوها ، ديل مفتاحين واحد ليك و التاني لحذيفه ، مرام قالت ليها خلاص يا أمي والله فهمت 😂
قلت ليها و إياك إياك يا مرام تقربي من دولابي لا انتي لا مشتهى ما ألقى حاجه ناقصه من حاجاتي ، قالت لي كدا ياداب ذكرتيني ، قلت ليها حذرتك انا ، فجأه جانا عمر و قال لينا اطلعن ياخ! المهم ودعنا مرام و طلعنا ، طبعاً حذيفه ما ودعناهو لأنو اصلاً بتعامل معانا بجفا كدا ما طبيعي ما هو بس حتى عمر كدا بشوفوا انو الحنيه دي نقص للرجوله عشان كدا ما بتعاملوا معانا بلطافه أو خليني اقول ما بحبو يظهروا الجانب الحنين فيهم مع اننا أخواتهم ، يعنى زي أهل أبوي ، حذيفه دا مع انو نهاي ما بتفق مع أبوي بس شايل طباعو كلها و عمر دا برضو زيهم ، المهم ركبنا العربيه و كانوا معانا ناس عمي نصر الدين و الشنط رفعوها فوق للعربيه اصلاً كانوا شنطتين بس لينا كلنا لأنو ما حـ نطول هناك ، اتحركنا لحدي ما وصلنا المينا البري ، نزلنا و ما وقفنا طويل لأنو البص كان جاهز ، ركبنا و اتحركنا على الأبيض.....
و ما نحنُ سوى أرواح عابرة في متاهات الحياة نسيرُ على خطى القدر ولا ندري ما المكتوب ..💜🥀
يتبع........
