لمن قعدت عمي قال لي ماف بيت بكون خالي من المشاكل و ما أي مشكله تحصل بيناتكم توروا بيها الناس كلها قبل ما تقعدوا و تحلوها مع بعض ، الطلاق ما حل يا بتي و ما من أول شكله تقولي عايزا الطلاق ، أما بالنسبه لـ إشراقه انا قدامك بحذرها ، عاين لـخالتو إشراقه و قال ليها شايفه البت دي تاني إياك تتحشري في حاجه بتخصها و أي غرض انتي شلتيهو من بيتها ترجعيهو ليها هسي و تاني البيت داك ما تعتبيهو إلا تكلميني ، فارغه ما بتنفع معاي ، خالتو إشراقه هاجت شديد قالت ليهو انا عملت ليها شنو لمن شكتني ليكم؟ الحاجات الشلتهم من بيتها سرقتهم سرقه؟ عاينت لي و قالت لي مش جيت كلمتك حتاً شلتهن؟ سرقتهن منك ولا شاكلتك و شلتهم منك بالقوه؟اتكلمي! ...يا بت هوي انا النفاق و البهتان دا ما بنفع معاي خلي الفتن و ما تكتلي لي حيلك دا و.....عمي قاطعها و قال ليها كفى! ما عايز أي نقاشات بالشكل دا ، يا تتكلمي معاها زي الناس يا ما تتكلمي معاها خالص ، خالتو إشراقه عاينت لـ راشد و قالت ليهو ما سامع أبوك؟ عاجبك الكلام القالو لي ؟....راشد قال لي أبوي ما قال شي غلط ، نقاشات زي دي ما عايزنها في البيت و انتِ يا أمي لو ناقصاك حاجه تعالي كلميني ما تمشي تشيلي حاجه من بيتي ، قالت ليهو لكن انا ما شلتهم منها بالغصب و هي وقت زعلت كان تكلمني اقسم بالله من مكانهم ما كنت حركتهم ، تقولها لي في وشي احسن من ما تشكيني ليكم و لأهلها ، بس ما مشكله عِدتك دي هسي برجعها ليك و لو عايزا بنزل ليك عدتي كلها و بختها عندك و كلو عشان ما تجيبي سيرتي بالعاطل و تقعدي تقولي و تعملي فتن ....
طبعاً انا كنت منزله راسي و حاسه نفسي محرجه شديد و جاني احساس انو ما كان أكلم أهلي و احكي ليهم كل شي بالتفصيل (في حاجه ما حكيتها لأمي و هي لمن قلت لـ عبير راشد مسك يدي و خالتو إشراقه سمعتنا و الكلام القالتو لـ راشد و جارتها ) ، عمي قال ليها المهم نحنا رسمنا ليكم الحدود دي و تاني ما عايز أي زول يتطاول على التاني كل واحد يلزم حدودو و كفى ، و انتي يا بتي تاني لمن تزعلي من حاجه اقعدي معانا و اتناقشي ما تخشي و تقفلي الغرفه عليك و....خالتو إشراقه قالت ليهو و ما تخرب لينا ، عليك الله مهما كنتي زعلانه و عايزا تطرشقي ما تكسري لينا حاجاتنا و.....عمي قال ليها بنبره حاده إشراقه! !
بتردد قلت ليهو عمي انا ما عايزا شي غير الطلاق ، طوالي راشد عاين لي و قال لي لو كسرتي رقبتك ماف ليك طلاق نشوف نهايتك وين و جنك دا حدو وين ، عمي صلاح قال ليهو براحه يا راشد أصلاً أسلوبك دا واحد من الحاجات الخلتها تطلب الطلاق ، راشد قال ليهو يعني عايزني اعاملها بأي اسلوب اذا هي حتى الضرب و الهرش ما نفع معاها فأي اسلوب حـ ينفع مع وحده ما عندها احترام لا لكبير لا لصغير لا لأب لا لـ عم ، الزيها ديل ما بنفع معاهم إلا الأسلوب الزي دا.....قال كدا و طوالي طلع مننا، في نفس اليوم دا خالتو إشراقه جات رجّعت لي الصحاني و انبوبة الغاز و أي شي شالتو مني قالت لي عشان تاني ما تمشي تقولي و تسوطي الواطه ، و في نفس اليوم دا راشد مشى و اشترى ليها كمية من الصحاني و الكبابي الفاخره ، دا القالتو لي عبير ، قالت لي راشد دا مهما كان زول عصبي و أخلاقو ضيقه إلا انو ما بقدر يزعل أمي و دايماً براضيها سواء بطريقه مباشره أو غير مباشره عشان كدا هو أكتر واحد مفضل عندها ، سكتت مسافه بعدها قالت لي مها، أمي دي أصلاً طبعها كدا، ما كان تزعلي منها و تشيلي في قلبك و ما كنتي تشتكي لأهلك بالجد زعلتيني منك ، عاينت ليها و سكته لأني لو اتكلمت كلامي ما حـ يعجبها ، يعني هي شايفاني غلطانه عشان شكيت من زول أذاني و ما شايفه أمها الأذتني غلطانه ....ئهه ما في الآخر دي أمها و مستحيل تقيف معاي ضدها، واصلت كلامها وقالت لي قبيل قبل ما تجوا بشويه أمك اتصلت علينا و جاطت شديد فينا و اتناقشت مع ابوي لمن زعل ، قالت نحنا بنشغلك و بنتعبك و بنعاملك زي الخدامه ، انتي يا مها وقت الموضوع دا مضايقك كدا ليه كنتي بتشتغلي معاي؟ حصل مره انا قلت ليك ساعديني في الحاجه الفلانيه؟ مش براك كنتي بتصري علي عشان اخليك تساعديني؟ ....ايوه نعم أمي مرات كتيره كانت بتناديك و بتقول ليك اشتغلي مع عبير بس لمن تجيني في المطبخ ما كنت برضى ليك براك الكنتي بتساعديني و في الآخر تمشي تقولي لأمك اننا بنعاملك زي الخدامه؟ ؟
مسحت دموعي و قلت ليها عبير احسن تمشي من هنا لأني والله لو جربت اتناقش معاك حـ نزعل من بعض و انا ما عايزا يكون في خلاف بيناتنا ، قالت لي الخلاف انتي عملتيهو و خلاص....طوالي طلعت بعد ما قالت كدا ، في اليوم البعديهو ناس إسراء و هديل جوني، سلموا علي و قعدوا لا هم اتكلموا لا انا اتكلمت، بقينا ساكتين و الجو متوتر و إسراء واضح انها عايزا تسأل بس عشان شايفاني مضايقه و زهجانه ما سألت ، شويه كدا أم إسراء و أم هديل جوا داخلين علينا جوه الغرفه، سلموا علي و طوالي قعدوا ، تهاني يلي هي أم إسراء قالت لي صح السمعناهو؟ قالوا لينا عملتي مشكله كبيره في بيت أهلك هناك ! عاينت ليها و ما رديت ، قالت لي المشاكل دي عادي بتحصل في أي بيت بس الوحده كمان ما تبقى قواله و تعمل فتن بين أهلها و نسابتها و في الآخر نسابتك ديل أهلك برضو فما مفروض......الخ
المهم بقت ترغي و ترغي مره هي و مره خالتو ساره أم هديل خليتهم يرغوا ساي و ما تعبت نفسي و رديت عليهم، لمن خلاص كلامهن خلص و قالوا العايزنوا مشوا مني ، قفلت باب الغرفه علي عشان تاني ماف زول يجيني داخل ، رقدت في السرير و اتكرفست و انا ميته من الجوع ، من أمبارح ما أكلت حاجه ، أثناء ما أنا راقده كدا راشد جا داخل و وراهو طوالي عبير كانت شايله معاها صينية أكل أشر ليها عشان تخت الصينيه ، ختتها و طلعت ، ربع يدينو و قال لي ما تفتكري انك بحركاتك دي حتخلي الناس تتعاطف معاك ، قلت ليهو ايوه واضح و طوالي عاينت للصينيه ، قال لي أنا لو علي لو ما براك مشيتي أكلتي ما بكلف نفسي معاك بس أعمل شنو الحاج شايل همك و من قبيل يوصي في عبير عشانك مع إنك ما بتستاهلي ، قلت ليهو ما عايزا كلام كتير معاك شيل صينيتك و أطلع برا و ياريت تقفل معاك الباب ، غضب غضب أول ما جا علي كدا جاهو إتصال ، شكلو مهم عشان كدا طلع طوالي ، بعد ما مشى ما قدرت اقاوم الأكل القدامي ، ما اترددت طوالي قعدت آكل لغاية ما خلصت الصحاني كلها ، فجأه الزفت داك جا داخل ، عاين لي و عاين للصينيه ، لمن خجلت منو و من عرفت اقبل وين و عشان أدارك الموقف قلت ليهو : و تاني حأكرر الحركه دي كل ما تجيبوا لي أكل حأكشحو زي ما عملت في الأكل الكان هنا ، دخل يدينو جوه جيبو و قال لي دفقتيهو وين ؟ بتردد قلت ليهو بـ برا ، متأكده إنو ما صدقني بس ما اتجادل معاي قعد و سكت مسافه بعدها قال لي عنادك و عدم إحترامك للأكبر منك بضرك انتي قبل أي زول ، اياك تفتكري انو لو رفعتي صوتك حتخوفي زول فينا ، المهم عايز اقول ليك ما عايز حركه زي دي تتكرر و بكون احسن لو اعتذرتي من أعمامي ، نقاشاتنا و مشاكلنا حنحلها بيناتنا ماف داعي تكلمي بيها زول و.....قاطعتو و قلت ليهو ما عايزا أحل معاك أي مشاكل ، طلقني بس ، لمن قلت ليهو كدا معالم وشو اتغيرت ، ما قال حاجه شال نفسو و طلع مني ، من اليوم دا بقى ما بتعامل معاي خالص ، و المكان البكون موجوده فيهو هو ما بجيهو داخل ، يوم كنت بتكلم مع أبرار و بفضفض ليها ، قالت لي انتي غلطانه يا مها أبوك دا في الأول و الآخر ابوك يعني مهما كان قاسي و مهما تعاملو كان كعب ما كنتي تتلائمي معاهو و تقللي من قيمتو ، قلت ليها حتى انتي؟ قالت لي الغلط دا غلط ، قلت ليها يعني هو ما غلط علي؟ ما ظلمني؟
قالت انا ما قلت كدا لكن ما كان لازم تتعاملي مع أبوك بنفس الأسلوب البعاملك بيهو و.....قاطعتها و قلت ليها اقفلي الموضوع انا دا كلو ما هاميني ، كل الهاميني و الواجعني الجامعه الضاعت مني ، قربتو تخلصو السمستر صح؟ قالت لي ايوه باقي شهر و نص تقريباً ، قلت ليها أهلي ظلموني شديد والله .....المهم اتكلمت معاها مسافه و قفلت ، شويه كدا الفقر داك جا داخل ، مشى على الدولاب ، شكلو بفتش في حاجه ، طبعاً بقى يتجاهلني و يعمل نفسو ما شايفني ، قعدت اعاين ليهو ساي و هو بفتش في الآخر قلت ليهو عايز شنو؟
ما رد علي ، قلت ما كان اسألو مالي و مالو ان شاء الله الحاجه البفتشها دي ذاتو ما يلقاها ، فجأه لقى العايزو و طلع ، في اليوم البعديهو كالعاده قاعده جوه الغرفه و سرحانه بعيد جا داخل و من غير ما يعاين لي قال لي جهزي نفسك حتمشي معاي ، قلت ليهو وين؟ ما رد علي ، قلت ليهو لو ما عرفت حنمشي وين ما حـ امشي معاك ، قال لي على راحتك اصلاً انا ما فارقه معاي بتفرق معاك انتي و بكرا لمن تعرفي انا كنت سايقك وين حتسفي التراب من الندم ، بالجد يعني بعد كلامو دا حسيت انو مشيتي معاهو دي مهمه و في صالحي مع اني ما عارفه ماشين وين ، مشيت جهزت نفسي لبست فستان مشكل و طرحه فوشيه و شنطه سوداء ، عبير لمن شافتني لابسه قالت لي ماشين وين انتوا؟ قلت ليها ما عارفه والله، راشد قال سايقني معاهو مشوار لكن وين الله أعلم ، المهم طلعت ليهو برا و ركبت معاهو و طول الطريق ماف واحد اتكلم مع التاني و انا بسأل في نفسي يا ربي دا موديني وين؟
لا أريدُ التحدُث معك مُجددًا ومع ذلك لازلتُ أنتظرُ منكَ رسالة، أريدُ نسيانَك ولا أستطيعُ النومَ دون أن أتذكرك، أتمنى لو أنّي لم أعرفك ومع ذلك أعتبرُك أجملَ ماحدث لي في هذه الدُنيا، أحببتُك حتّى باتَ حُبّي يُؤلمني، أنا فعلاً تعبتُ من تناقُضَ الشُّعور داخلي 💔
يتبع...
