بقيت واقفه و بحاول استوعب إنو بالجد شيماء هي صاحبة الرقم دا! معقوله في شي بينها و بين راشد؟ بعرفوا بعض من وين؟ أكيد في شي بيناتهم و إلا ما كان 24 ساعه بتكلم معاها ، دموعي كانت حتنزل بس منعها ، ما عايزا أبكي على واحد حيوان و نسونجي ، في البدايه عرسني انا جابني و جدعني في بيتو و عاملني اسوأ معامله و بعديني كانت هديل عرسها و جابها بيتو بس ما شغال بيها و هسي الدور جاي على شيماء ، زعلت شديد و قربت أبكي كنت حـ أطق عديل ، طلعت من الكافتيريا و مشيت على بوابة الجامعه طلعت منها و انا مقهوره و واصله الحد من الضيق ، أول ما وصلت البيت جدعت الشنطه بزهج و رميت نفسي على السرير و قعدت أبكي على حرقتين ، الحرقه الأولى لمن عرس هديل و الحرقه التانيه لمن طلع في شي بينو و بين صحبتي ، ما قادره اعرف أو احدد احساسي تجاهو كل العارفاهو إني مقهوره و موجوعه من العملو ، بكيت بكى عمري كلو ما بكيت زيو ، تلفوني جنبي كان برن و انا ما شغاله بيهو ، بكيت قدرتي حتاً مشيت صليت الضهر و باقي اليوم كلو عديتو زهج و من غير أكل لغاية ما راشد جا بعد المغرب ، قال لي ختي لي الأكل ، قلت ليهو من غير ما اعاين ليهو ما عملت أكل ، قال لي شنو؟ و ليه ؟
ما كنت عايزا اتكلم معاهو بس لو ما رديت عليهو حـ يكرهني حياتي و يزفتها لي ، قلت ليهو ما قادره! ....بعد مسافه قال لي ليه مالك عيانه ولا حاجه؟
اتنهدت و قلت ليهو لا ، ما سألني تاني كل العملو إنو طلع برا ، قمت من الهول و دخلت غرفتي و رقدت و بقيت أعاين للسقف ، بعد ربع ساعه سمعت صوت هديل بتناديني طلعت ليها برا و قلت ليها عايزا شنو؟
قالت لي عملت دمعة جداد ختيت منها لـ راشد و لمن فضل منها قلت أضوقك ليها ، طبعاً فهمت هي قاصده توصل لي شنو ، ختتو لي في الطربيزه و مشت ، من مكانو ما رفعتو، صليت العشا بس و مشيت رقدت في غرفتي بكيت كدا لغاية ما نمت ، و في الأثناء دي حسيت بزول ممشي يدو على شعري ، من ريحة العطر عرفت إنو دا راشد ، لمن فتحت عيوني هو اتخلع و طوالي وقف على حيلو ، قلت ليهو عايز شنو؟
قال لي انتي مش هديل دي جابت ليك أكل؟ ليه ما أكلتي؟ قلت ليهو لأني ما عايزا و اساساً ماف زول طلب منها تجيبو لي ، قال لي انا الطلبت منها 😊
سكته و بعديها قلت ليهو ما كان في داعي لو حسيت بالجوع كنت حـ ادخل المطبخ و أكل ما محتاجه زول ينبهني ، قال لي بضيق ياخ انعل.....سكت و طوالي قام طالع و قبل ما يطلع رزع الباب و مشى ، قعدت شويه كدا و تاني حسيت بالجوع طلعت برا لقيت الصحن في مكانو، غسلت يدي و جيت قعدت آكل ، بعدها رجعت غرفتي و انا حاسه نفسي مكتئبه شديد ، مسكت تلفوني و اتصلت على ناس أمي و إطمنت على مشتهى ، قلت لأمي ابوي ما عمل ليها حاجه أو سمعها كلام؟ ...قالت لي أبوك و عمك ديل دي شغلتهم لكن تاني نهاي ما بشتغل بيهم بعد الحصل لـ بتي دي ما حـ أديهم أي فرصه يدخلوا فيها و حالياً موقفاهم عند حدهم و حتى القروش دي بقيت ما بشيلها من أبوك لو جابها لي برجعها ليهو أو بخليها في مكانها ، قلت ليها و عمر و حذيفه موقفهم شنو؟
قالت لي حذيفه دا جا البيت لمن جبنا مشتهى جاط مع أبوك و طلع مشى و تاني ما عارفاهو طفش وين إلا قبل اسبوع عمر قال لي إنو شغال "طلبه" و ببيت في المكان الشغال فيهو ، غيتو عمر الفتره دي شويه بقى يجي و يتفقدنا و يشوف لو ناقصانا حاجه ، قلت ليها بالجد؟
قالت لي آيي والله و ما كلمتك بعد ما جبنا مشتهى بيومين عمر و حذيفه مشوا البلد من غير ما يكلمونا و هناك اضاربوا مع توفيق ، والله إلا ناس الحله مسكوهم منو، قلت ليها يستاهل الكلب، بس انا ليه ما عرفت الكلام دا؟
قالت لي نحنا ذاتنا ما كنا عارفين بس أبوك و عمك آدم كانوا عارفين لأنو نصر الدين اتصل عليهم في نفس اليوم و جاط فيهم لكن هم ما كلمونا و انا عرفت الكلام دا بالصدفه....... المهم قلت ليها أديني اتكلم مع مشتهى ، فعلاً أدتني ليها اتكلمت معاها مسافه و مع زينب ، رجعت التلفون لأمي و في الآخر سألتها عن مرام قالت لي راجلها جا ساقها اشتروا ليهم بيت في بحري و حالياً ساكنين هناك ، قلت ليها كويس والله....
في اليوم البعديهو في الجامعه من جيت داخله اتوجهت طوالي للمكتبه ، قعدت هناك لغاية ما زمن المحاضره جا ، أول ما جيت داخله القاعه تسنيم رفعت لي يدها عشان أجيهم ، عملت نفسي ما شايفاهم و قعدت قدام و هم يشيلوا و يتصلوا علي و انا ما امبارح ما رديت على زول فيهم و لغاية اللحظه عامله التلفون صامت ، شويه كدا و الدكتور بدا محاضرتو ، أول ما خلص قمت سريع و طلعت من القاعه و مشيت المكتبه ما كنت بقرا بس ما عايزا اجتمع مع ناس شيماء ، و استمريت كدا 3 أيام و انا بتهرب منهم لغاية ما يوم مازن جاني و قال لي مالك انتي يا زوله مع ناس تسنيم؟ شايفك بقيتي ما بتمشي معاهم؟
قلت ليهو لا ماف شي بس عايزا اركز في القرايه اكتر، قال لي بالله! السلام بمنعك من القرايه و بعدين نحنا قريب دا خلصنا امتحانات و انتي من هسي عايزا تقري للجاي؟ 🙄
سكته و ما عرفت اقول شنو! قال لي شوفي تسنيم و شيماء صحبات ظابطات شديد برغم انو تسنيم فاصلاني ليها فتره و لغاية اللحظه ما بتتكلم معاي بس ما مشكله ما عتبان عليها ، المهم ما عايزكم تتخاصموا لو في شي يا مها اقعدي معاهم و اتفاهموا ما تفصليهم بالطريقه دي ، قلت ليهو طيب ، شويه كدا أختو مزن جات قعدت معانا و ونسوني مسافه كدا و مشوا، طبعاً البشوف مازن مع أختو بقول أصحاب ، تعاملهم مع بعض حلو اغلب اليوم بكونوا بضحكوا و بهظروا مع بعض ، قارنت بينهم و بيني و بين أخواني حذيفه و عمر ، ياريت لو أخواني كانوا زي مازن ، المهم فكرت كويس في كلام مازن بس والله ما قدرت امشي اقيف قدام شيماء و اسألها عن الموضوع ، خايفاها تصدمني و البينهم يطلع اعمق من كدا 💔
اثناء ما انا قاعده في الكافتيريا ، تسنيم و شيماء و دكتور أحمد جوا داخلين ، أول ما قعدوا شافوني ، دكتور أحمد رفع يدو و سلم علي و ناداني عشان أجيهم ، بس ما اتحركت من مكاني ، قلت ليهو مرتاحه هنا ، وقف على حيلو و كان جاييني بس تسنيم مسكتو من يدو و هزيت ليهو راسي بمعنى خليها ، قال ليها دقيقه بس و جا قعد قصادي ، قال لي شنو يا زوله فاصله الناس دي؟
قلت ليهو ما فاصله زول انا ، قال لي يا زوله!! ....الحاصل شنو بيناتكم ما كنتوا زي السمنه على العسل ، سكت و ما رديت عليهو بس ما قدرت أمسك دموعي ، مدى لي منديل و قال لي احكي لي في شنو ؟
بقيت ببكي لغاية ما تسنيم و شيماء جوا ، شيماء قالت ليهو مالا؟ ...قال ليها منتظرها تحكي لي ، قعدوا جنبي و بقوا يحاولوا يهدوا فيني ، تسنيم قالت رغم إننا زعلانين شديد منك بس ما بنقدر نستحمل دموعك ، احكي لينا مالك يا مها ، ما كنت عايزا أحكي بس هم أصروا علي شديد و كانوا حالفين لا حـيمشوا لا حـ يخلوني امشي إلا أحكي ليهم ، بعد مسافه رفعت راسي و مسحت دموعي عاينت لـ شيماء و قلت ليها بتعرفي راشد من وين؟
عاينت لي بإستغراب و قالت لي راشد منو؟ ما بعرف زول بالإسم دا! قلت ليها دا راجلي و ما تكذبي كنتي بتتصلي عليهو كتير و دايماً بتتكلموا مع بعض و رقمك في تلفونو، قالت لي شنو؟ رقمي انا في تلفونو و كنت بتصل عليهو و بنتكلم مع بعض؟ مها انتي أكيد جنيتي انا اساساً ما بعرف زول بالإسم دا ، قلت ليها دقيقه طيب ، طلعت تلفوني و قلت ليها شلت رقمك من تلفونو و هسي حـ اتصل عليك ، فتحت سجل المكالمات و ضغطت على زر الإتصال و سمعنا صوت رنة التلفون بس الصوت ما كان جاي من تلفون شيماء ، كان جاي من تلفون أحمد ، بقيت أعاين ليهو بإستغراب ، قال لي انتي قصدك راشد منو؟
قلت ليهو راشد صلاح الدين الزاكي ، قال لي ياااازوله!! راشد راجلك؟ دا زولي و صحبي بعرفو من زمان! قلت ليهو بالجد؟
قال لي آيي والله شوفوا الصدف دي ما كنت عارفك والله، شيماء طوالي وقفت على حيلها و قالت لي تاني اتأكدي قبل ما تشكي في الناس و مشت ، حاولت امنعها بس هي ما سمعت مني ، تسنيم قالت لي شكلك فاهمه غلط ، قلت ليها بس الأحد الفات لمن كنا في الكافتيريا اتصلت في الرقم دا و الرنه جات من تلفون شيماء!! أحمد قال لي يوم كنت عازمكم ؟.....ااا دا سوء تفاهم لأنو تسنيم شالت تلفوني و قالت لـ شيماء صورينا بيهو ، و لمن جات مكالمه كلنا كنا سامعين صوت الرنه ، كنت حـ اشيل التلفون من شيماء و أرد بس تسنيم كانت مصره تتصور أول و عشان الرقم غريب قالت لي ارجع ليهو بعدين و يمكن زول ضارب ليك بالغلط و انا تاني نسيت ما رجعت في الرقم ، تسنيم قالت لي كان تجي و تفهمي الحاصل يا مها ما تشيلي نفسك و تمشي من غير ما تفهميني حاجه ، حتى لمن كنا بنتصل عليك ما بتردي علينا ، دكتور أحمد قال لينا خلاص حصل خير و سوء التفاهم وضح و شيماء دي بكرا زعلتها حـ تروح.....
حسيت بالذنب و انو فعلاً غلطت في حقك شيماء بقيت افتش عليها و اتصل بس ما كانت بترد في آخر الدوام لمحتها من بعيد طالعه من الجامعه بخطوات متسارعه جريت لحقتها ، لمن شافتني اتحركت من جنبي مشيت وراها و مسكت يدها ، قلت ليها شيماء انا بالجد آسفه والله ما قصدي.....قالت لي ما قصدك شنو؟ شايفاني شنو قدامك؟ وحده رخيصه و تافهه و جاريه ورا رجال النسوان ، قلت ليها لا ما كدا يا شيماء بس انا لمن اتصلت في الرقم تلفون أحمد كان معاك و انا ما كنت عارفه انو تلفونو بالجد أنا آسفه ، اتنهدت و قالت لي مها ما عايزا معاك كلام انا ، قلت ليها حاولي افهميني الرقم دا كان بتصل في تلفون راشد 24 ساعه و دايماً بكون ماسك التلفون أي وحده في مكاني حـ يخطر على بالها انو بتكلم مع وحده غيرها و عشان اتأكدت اتصلت في الرقم و التلفون كان معاك ، هسي لو انتي كنت مكاني كان عملتي شنو؟
قالت لي يمكن حـ ازعل يمكن حـ ابكي بس ما كنت حـ اكتفى بالحاجه دي و خلاص ازعل على كدا كنت حـ اجي اسأل بطريقه عادي و أسلوب كويس ، لو يومها ما مشيتي و جيتي سألتيني كان عرفتي الحاصل و ما زعلتي على الفاضي ، قلت ليها شيماء يااااخ بالجد انا آسفه ، معليش معليش شديد كمان ، بعد مسافه قالت لي خلاص حصل خير ما زعلانه، قلت ليها بالجد؟ قالت لي لا بالكذب ، ضحكت على جملتها دي لأنو قبل كدا راشد قالها لي، ضميتها و قلت ليها انتي أطيب انسانه في العالم كلو 💜
ضحكت و قالت لي مش دا راشد العرسوك ليهو بالغصب 😏و بسبب غيرتك عليهو فصلتينا كلنا 😂 قلت ليها بطلي ياخ ، قالت لي يلا اعترفي اعترفي سريع ، قلت ليها أبييت قالت لي ما مشكله ، أصلاً عارفاك ميته فيهو ، شويه كدا تسنيم و دكتور أحمد جوا قالوا لينا خلاص المياه رجعت لـ مجاريها؟
قلنا ليهو أيوه ، مازن كان واقف بعيد و بعاين لينا، كنت عايزا اتكلم مع تسنيم بخصوصو بس ما حـ اقدر قدام دكتور أحمد ، دكتور أحمد قال لـ تسنيم بعد دا امشي البيت لو ما كان عندي محاضرات لسه كنت حـ اوصلك معاي ، قالت ليهو ماف مشكله ، المهم هو استأذن مننا و مشى ، كنت متردده شويه بس اتشجعت و قلت لـ تسنيم ما تخاصمي مازن للدرجه دي ، والله هو زول كويس و محترم و عامل حدود لـ نفسو قبل ما أي زول يعملها ليهو ، قالت لي ما عايزا اتناقش في الموضوع ، شيماء قالت ليها انتي متأكده انك فاصلاها منو عشان أحمد قال ليك أهلو ما كويسين؟ قالت لينا انا ماشه بعد دا و طوالي طلعت ، شيماء قالت لي أكيد في سبب تاني ، قلت ليها يمكن
