فجأه كدا وقف العربيه و قال لي وصلنا ، لمن نزلت لقيت نفسي واقفه جنب جامعة السودان المفتوحه فرع الأبيض ، بقيت أعاين للجامعه و أعاين لـ راشد بإستغراب ، قلت ليهو جينا هنا ليه؟
قال لي عشان نتفرج و نمشي ، بطلي استهبال و يعني حنكون جينا ليه؟
ابتسمت و قلت ليهو بس يا راشد مستحيل يقبلوني بالسهوله دي! انا ما خلصت السمستر و .....قاطعني و قال خلي الموضوع دا علي ، قلت ليهو بس كيف ، قال لي ندخل جوه الجامعه ولا نرجع البيت؟
إبتسمت و قلت ليهو بحماس ندخل الجامعه أكيد ، و فعلاً دا الحصل ، دخلنا الجامعه جوه و هو بقى لافي بي في الجامعه كلها ، رغم إني متعلقه شديد بجامعة كرري و دفعتي الهناك بس مجبوره اقبل بالقرايه هنا، يعني يا اقبل يا ماف قرايه تانيه ، و المحيرني كيف راشد قدر يعمل كل دا و المحيرني شديد انو حـ يخليني أكمل تعليمي ، بالجد ما قادره أصدق إنو الحاجه دي جات من راشد ، بعد ما تعبت من اللف ، قلت ليهو ما حنسجل ولا شنو؟
قال لي الجامعه عجبتك؟ قلت ليهو ماشي حالها اصلاً في السودان مستحيل تلقى جامعه بنفس المواصفات الإنت خاتيها في بالك ، بعدها مشينا قابلنا واحد كدا ما بعرفو بس واضح إنو علاقتو قويه شديد بـ راشد ، فضلنا في مكتبو و ضيفنا و بقى ياخد و يدي في الكلام مع راشد و شويه كدا بدا يتكلم معاي بس كل ما يسألني عن حاجه راشد برد عليهو بدلي لمن الراجل ضحك و قال ليهو شنو يا ما تخليها تتكلم هي ، المهم هم بقوا يتكلموا مع بعض و انا زهجت من القعده ، قلت لـ راشد حـ أطلع برا و على طول قمت منهم ، طلعت برا و بقيت أعاين للناس الفي الجامعه ، أخيراً ياخ حـ اواصل قرايتي للـ it حبيب قلبي و شغفي 🥀 اثناء ما انا مركزه شديد مع الناس جاني صوت راشد و هو بقول لي : شايفه البنات ديلك و أشر لي عليهم كانوا لابسين لبس شاذ كدا ، قال لي ممنوع تصاحبيهم و ممنوع تصاحبي أي ولد و ممنوع تسجلي أرقامهم عندك بحجة إنهم دفعتك ، حتى هنا في الجامعه ما تقعدي جنبهم و السلام دا ذاتو ما تديهم ليهو، مش قلتي عايزا تقري؟
يبقى جيتك للجامعه حتكون محصوره على المحاضرات و بس بمجرد ما تخلص حتجي البيت و دقيقه وحده ما تقعديها في الجامعه ، طبعاً كنت بعاين ليهو بغيظ و نفسي ارد عليهو بس كدا حـ اخرب لنفسي هسي كديستو بتقوم عليهو و حيحرمني من الجامعه و المره دي للأبد عشان كدا احسن أمسك أعصابي و أبلع لساني ، قلت ليهو حاضر ، طوالي عاين لي بإستغراب و رفع حاحبو ، رغم انو كريه و غياظ و فقر بس حركة رفع الحاجب عندو حاجه حلوه ، قال لي طيب خلينا نمشي جاني اتصال مهم ، قلت ليهو و التسجيل؟ قال لي اعتبري نفسك اتسجلتي و اساساً انا جبتك عشان تشوفي الجامعه فلو ما عجبتك نشوف ليك غيرها ، قلت ليهو لا حلوه ، قال لي طيب خلينا نمشي ، قلت ليهو لا انا جعانه ، قال لي يا شيخه! ما قلت ما حـ تاكلي خالص! قلت ليهو على كيفي ، المهم مشينا للكفتيريا حقة الجامعه ، قال لي عايزا تاكلي شنو؟
قلت ليهو عايزا إندومي و ببسي ، و فعلاً جاب لي طلبي بس هو ما جاب لنفسو شي ، قلت ليهو ليه ما جبت حاجه لنفسك ؟
كان مركز شديد مع تلفونو عشان كدا ما رد علي ، ما انتبه لي إلا لمن طقطقت ليهو أصابعي ، قال لي مالك في شنو تاني؟
قلت ليهو انت ما عايز تاكل؟ قال لي لو عايز ما كنت انتظرتك تسأليني أكلي سريع عشان نتخارج ، في سري قلت ليهو غلطانه انا السألتك ، المهم قعدت أكل في الإندومي و اتلذذ بطعمها و مره مره اشرب من الببسي ، لمن رفعت راسي لقيتو بعاين لي ، ما مره كل ما ارفع راسي بقبضو بعاين لي و لمن اشوفو بعمل نفسو رايح ، قلت ليهو ما تقعد تعاين لي كدا حتعمل لي وجع بطن لو جعان هاك أكل ، ما رد علي و بقى مره يعاين لتلفونو و مره يتلفت حوليهو ، ما عرفتو مالو ، كائن غريب خلاص ، المهم الإندومي دي ذكرتني بـ أخواتي مرام و مشتهى كنا بنجيبها كل يوم و كل مره نجربها بحاجه تانيه ، بالمناسبه دي اتذكرت مشتهى أمبارح أمي قالت لي إنها عيانه ، عاينت لـ راشد و قلت ليهو اتذكرت!
رفع لي حاجبو بمعنى شنو؟ قلت ليهو انت مش كان مشيت لـ ناس مشتهى في البلد و قعدت معاهم يوم واحد و طوالي سافرت؟ مشيت ليهم ليه؟
قال لي بيت عمي و حبيت اغشاهم قبل ما أسافر! المشكله وين؟
قلت ليهو طيب سؤال تاني: انت كيف فجأه كدا قررت تخليني أكمل قرايتي؟ ....عمي صلاح هو القال ليك كدا؟
قال لي اذاً حنسيب التسجيل و فكرة القرايه دي شيليها من بالك ، قلت ليهو بخلعه لا لا خلاص ، بقيت ساكته و باكل بس و انا في بالي اسألو عن حاجه بس خفت يقول لي ماف ليك جامعه ، بقيت مره اعاين ليهو و مره لا في الآخر قال لي اسألي ما تقعدي تعايني لي كدا ، قلت ليهو مع إني ما حابه اسأل بس مدام انت مُصر حـ اسألك ، انت لحد أمبارح كنت شاميني شديد و اليوم فجأه كدا بقيت تتعامل معاي بلطافه ، انت كائن غريب شديد ، و مزاجك زي طقس السودان و غضبك زي البركان و.....قال لي ماف ليك جامعه ، قلت ليهو بإستعجال لا لا بهظر والله ، كل شي إلا الجامعه ، قال لي تمام اكلي سريع ياخ ؟ ما معقوله معاك ساعه كامله في الإندومي دي ، قلت ليهو ما بقدر اكلها بسرعه لازم اتلذذ بيها على راحتي ، قال لي ما بنتظرك انا ، قلت ليهو طيب امشي و انا برجع بالمواصلات ، عاين لي بغيظ كدا و سكت ، أكلت على راحتي و شربت البيبسي حتى قلت ليهو بعد دا خلينا نمشي ، لمن جينا طالعين كانوا في بنات بعاينوا لينا و بتبسموا أو بالأصح بعاينوا لـ راشد و منبرشات فيهو ، ما عارفه حسيت بشنو بس تلقائياً لقيت نفسي ماسكه يد راشد لمن هو إستغرب ، هو ما بحب الحركات دي خاصة قدام الناس عشان كدا براحه فك يدي بس انا مصره تاني مسكتو و تكلت راسي على كتفو و قلت ليهو حاسه نفسي تعبانه عشان كدا ...خلينا نمشي ، طلعنا من الكافتيريا و هو متحسس شديد من حتة اني ماسكه يدو ، قال لي مالك انتي في شنو؟
قلت ليهو ولا شي ، حرام يعني لو مسكت يدك و تكلت راسي على كتفك؟
ما رد علي بس فكاني منو و مشى قدامي بخطوه و انا وراهو و كل ما احاول اصلو بتقدم مني استمرينا كدا لغاية ما طلعنا برا الجامعه 😂 و انا اصلاً ما عايزا امسك يدو تاني لأنو خلاص طلعنا من الكافتيريا ، أول ما ركبنا قلت ليهو هسي جيتنا دي استفدنا منها شنو و نحنا ما سجلنا؟ قال لي منو القال ما سجلنا؟ اساساً انا مظبط الأمور كلها و جبتك بس عشان تشوفي الجامعه لو عجبتك ، قلت ليهو بالجد انا مستغربه كيف الموضوع تم بالسهوله دي من غير أي إجراءات!؟
قال لي ماف شي تم من غير إجراءات ، للمره المليون انا عملت اللازم ، قلت ليهو طيب الراجل المشينا ليهو في المكتب دا منو؟ قال لي دا أخو صحبي ، بعرفو من زمان و هو عميد كليتكم ، قلت ليهو بالجد؟ قال لي لا بالكذب!
شويه كدا تلفون رن ، بس هو ما رد عليهو ، لمن الإتصال اتكرر كذا مره رد و قال برجع ليك بعدين و طوالي قفل الخط و انا كنت بتسائل دا منو دا و ليه راشد دا من قبيل مشغول بتلفونو؟
لمن خت تلفونو انا شلتو ، قال لي اها كمان عايزا منو شنو ؟ قلت ليهو عايزا اتصور ، قال لي و تلفونك مالو؟
قلت ليهو تصويرو ما حلو ، بليييز خليني اتصور بتلفونك و ما تخاف أول ما احول الصور لتلفوني حـ امسحهم من تلفونك ، شال مني تلفونو فتحو و قال لي دقيقتين بس و ترجعيهو لي ، قلت ليهو حاضر ، طبعاً انا الشمار حارقني عشان كدا أول ما مسكتو دخلت لـسجل المكالمات ، لقيت مكالمات كتيره من نفس الرقم بس راشد ما مسجل عليهو اسم ، شفت السجل كلو و اغلبو عباره عن ارقام غريبه ، لمن ما لقيت حاجه ، صغطت على الكاميرا و بقيت اتصور و مره اصور راشد مع انو هو شغال لي ما تصوري ياخ بس انا ما اشتغلت بيهو و صورتو كذا صوره ، لمن وصلنا البيت كنت مبسوطه شديد و عايزا اطير من الفرح و عايزا اجري لـ عبير سريع عشان اكلمها ، أول ما دخلنا راشد قال لي جهزي لي الفطور و كباية جبنه ، قلت ليهو الله! قبل شويه مش قلت انك ما جعان؟ و الجبنه دي مش كان ممكن تشربها هناك في الكافتيريا ، قال لي تعملي القلت ليك عليهو ولا احرمك من الجامعه؟
قلت ليهو بغيظ أف منك ، طيب حـ اعملها و تاني ما تكرهني ، قال لي ماف ليك جامـ....طوالي قاطعتو و قلت ليهو خلاص خلاص بعملها والله ، هو دخل بيتو و انا جريت لـ عبير و الفرحه ما سايعاني ، لقيتا في المطبخ جريت ضميتها شديد ، ضحكت و قالت لي خيراً جيتوا ، والله دا تطور ملحوظ ، راشد وداك وين؟
قلت ليها ما حتصدقي لو قلت ليك كدي اتخيلي نحنا مشينا وين ، قالت لي مشيتوا فطرتوا في مطعم! قلت ليها أبداً ، قالت لي معناها ساقك معاهو سوق أو مول ، قلت ليها أبداً والله ، حـ اقول ليك لأني لـ بكرا ما حتقدري تعرفي نحنا مشينا وين ، نحنا مشينا.....قالت لي وين قولي ياخ ، قلت ليها و انا بضحك مشينا الجامعه ، قالت لي ما فهمت جامعة شنو! قلت ليها راشد حيخليني اكمل قرايتي و اليوم ساقني عشان اشوف الجامعه اذا عجبتني ، اقسم بالله انبسطه شديد لكن خالص ما كنت متوقعه حاجه زي دي من راشد ، صدمه صح؟
لمن قلت ليها كدا معالم وشها اتغيرت و ابتسامتها إتلاشت ، قالت لي كويس والله ، قلت ليها انا شدة ما متحمسه من هسي عايزا اختار ملابس عشان امشي بيهم الجامعه ، بس ملابسي هناك في بيت أهلي! ما مشكله بكرا بكلم عمر عشان يرسلها لي بالبص أو يديها لزول يجيبها لي ، قالت لي كويس ، قلت ليها ماشه اتصل على أمي عشان أكلمها ، أول ما اتجاوزت عتبة المطبخ اتذكرت إنو راشد قال اجهز ليهو الفطور و الجبنه ، رجعت و قلت لـ عبير كنت حـ انسى راشد قال اخت ليهو الفطور و اعمل ليهو الجبنه ، قالت لي خليهو بخت ليهو الفطور انا و الجبنه اصلاً جاهزه حـ أسخنها و اجيبها ليهو ، قلت ليها طيب ، مشيت بهناك لقيت راشد بصلي الضهر ، دخلت غيرت ملابسي و مشيت اتوضيت و صليت ، بعد ما خلصت قال لي وين الفطور؟ قبل ما أرد عبير جات داخله و هي شايله ليهو صينية الفطور ، ختت ليهو الصينيه قدامو و قالت ليهو عايز حاجه تانيه؟ قال ليها لا ، عاينت لي و قالت لي و انتي! اكب ليك معاهو جبنه ولا اعمل ليك شي؟
ما عارفه ليه نبرتها كانت مختلفه و ليه هي زهجانه كدا ، ما عرفتها مالا ، قلت ليها لا ما عايزا حاجه ، طوالي هي مشت و انا شلت تلفوني و دخلت جوه و اتصلت على أمي و كلمتها فرحت شديد و قالت لي كويس والله ربنا يهديهم كلهم و يزل عنهم الجهل الهم فيهو دا كونو خلاك تواصلي قرايتك دي خطوه كويسه شديد ، قلت ليها صحي ما سألتك مشتهى بقت كيف ، قالت لي كويسه ، بس نبرة صوت أمي هي الما كانت كويسه ، قلت ليها في شنو يا أمي ؟متأكده انو مشتهى كويسه؟ .....يا أمي لو في حاجه ما تدسي مني كلميني في شنو ، مالا مشتهى ؟...سكتت مسافه بعديها قالت لي أجهضت ، ختيت يدي على خشمي و وقفت على حيلي و قلت ليها شنو؟ متين الكلام دا و ليت ما كلمتوني ، يعني هسي لو ما سألتك ما كان جبتي لي سيره صح؟
قالت لي اجهضت قبل يومين ، قبل شويه كنت حـ اتصل عليك عشان أكلمك ، قلت ليها بتغشيني يا أمي؟ متأكده انها ما اجهضت قبل يومين ، الأسبوع الفات كنتي بتتكلمي معاي بنفس نبرة الزعل دي لمن سألتك عن مشتهى قلتي لي إنها عيانه ، معناها هي اجهضت قبل اسبوع أو أكتر ، سكتت مسافه بعدها قالت لي في الأسبوع دا هي حاولت تجهض كم مره ، و اليوم الإتصلت عليك فيهو برضو حاولت تجهض الولد بس الله ستر اليوم داك و هندي ليها من غير علمنا جابت ليها حبوب و اجهضت بيهم هسي حالتها حاله ، انا البت دي غلبتني عديل والله للأن ما قادره انو بتي قلت ليها روح قبل ما تشوف الدنيا دي ، هسي ماف زول غيرنا انا و انتي و زينب عارف إنها أجهضت قاصده ، الموضوع دا خليهو سر بيناتنا لأنو لو توفيق أو ابوك عرف حـ يقتلوها والله....
إنصدمت أكتر و لساني إتشلى ، بعد مسافه قلت ليها مالا هي ليه عملت كدا؟
قالت لي قالت ما عايزا الراجل و الوالد دا و انها ذاتا ما جاهزه تبقى أم و تتحمل ليها مسؤولية شافع و هي ذاتا من جات حالتها ما عاجباني ، عشان كدا ما كنت عايزاها تعرس مشتهى دي شافعه ساي و ما حتقدر تتقبل فكرة انها تكون أم لشافع ، قلت ليها طيب هسي حتعملي شنو؟
قالت لي ذاتي ما عارفه اختك قطعت راسي و العملتو انا ما قادره استوعبو هسي بدعي انو ابوك و عمك ما يعرفوا حاجه......اتناقشت مع أمي مسافه في الموضوع دا و لمن قفلت منها كنت في حاله تانيه ، ما كنت قادره استوعب انو مشتهى قتل ليها طفل قبل ما يخلق ، جابت قوة القلب دي من وين انا ما عارفه ، معقوله ما حست بالخوف ! معقوله ضميرها ما كان صاحي!؟
قعدت مسافه خاته يديني على راسي ، بعد مسافه مشيت الصالون ، لقيتا راشد بحضر في كوره ، قعدت و انا ساكته ، وطى الصوت و قال لي مالك؟ ...قلت ليهو ماف شي ، قال لي عبير دي اتأخرت لحدي الآن ما جابت لي الجبنه ، قلت ليهو ماشه أشوفها ، لمن مشيت المطبخ ما لقيتها هناك ، جهزت الجبنه لـ راشد و مشيت وديتها ليهو ، قلت ليهو عمي صلاح دا ما قاعد ولا شنو لأني ما شايفاهو ، قال لي آيي طلع قبيل ، المهم هو بقى يشرب في الجبنه و انا سرحانه بعيد ، ما انتبهت إلا لمن حسيتو خت يدو على كتفي بخلعه زحيت منو و قلت ليهو ما تلمسني ياخ قال لي احساس انو القبيل الكنتي بتلمسي فيها ديك حيطه ! ما ياها نفس اليد الكنتي ماسكاها قبيل هي اللمستك هسي 😏
قلت ليهو عايز شنو تاني! قال لي سرحانه وين انتي؟ قلت ليهو ولا شي و طوالي طلعت برا ، قلت اقول لـ عبير خلينا نمشي لـ ناس إسراء ، لمن مشيت ليها قالت لي ما ماشه و كانت زعلانه شديد لمن حيرتني ، رجعت تاني لـ راشد و انا بالي كلو مع مشتهى لدرجة اني ما ركزت شديد مع عبير و ما سألت نفسي بجديه هي مالا أو حاولت اسألها رغم انها طول اليوم كانت بتتعامل معاي بجفا كدا بس ما ركزت معاها ، في اليوم البعديهو بالعصريه كدا كنت بحضر ساي ، مره اركز مع المسلسل و مره مع قصة مشتهى ، شويه كدا سمعت صوت جوطه جايه من بيت ناس عمي صلاح ، لبست توبي و مشيت ليهم بهناك ، لقيتهم كلهم واقفين في الحوش ، ناس هديل و إسراء و أمهاتهم ، كلهم جوا و شغالين يجوطوا مع عمي صلاح و انا ما عرفتهم مالهم إلا لمن قربت منهم ، خالتو تهاني يلي هي أم إسراء قالت ليهو بناتنا ديل لمن قعدتوهن من الجامعه ماف وحده فينا جات و فتحت خشمها معاكم ، قلنا انتوا اهلهن و وليانهن و مصلحتهن بتهمكم و ما اتجادلنا معاكم لكن كونكم احرموا بناتنا من الجامعه و في الآخر تقروا مرة ولدكم نحنا هنا حـ نتجادل معاكم ، ليه الظلم دا و ليه الحقاره و الأنانيه دي؟ خالتو ساره أم هديل قالت ليهم زي ما خليتو مرة ولدكم تقرا نحنا ذاتنا حنرجع بناتنا للجامعات رغم انكم ضيعتوا ليهن سنينهن و مستقبلهن ، عمي صلاح قال ليهم انا ذاتي ما عارف حاجه ، راشد دا ما كلمني إلا أمبارح بليل ، خالتو إشراقه قالت ليهن ما تجوطن فوقنا ساي انا بت دي مش اختو والله ما همتو ، مشى سجل مرتو بس و اختو ما سأل عنها هدي ليها من أمبارح تبكي ساي لمن عيونها حمرو ، فعلاً لمن عاينت لـ عبير لقيت عيونها مليانه دموع و لحظتها فهمت ليه أمبارح كانت بتتعامل معاي كدا ، خالتو تهاني أول ما شافتني قالت لي ليه يخلي انتي تقري و باقي بنات اعمامو لا ، احسن منهن في شنو انتي عشان يخليك و يمنعهن هن؟
طبعاً جاطوا فيني شديد لمن قربت أبكي ، في الآخر قلت ليهم لو عندكم كلام قولوهو لـ راشد ما لي انا ، قلت كدا و مشيت خليتهم ، كلامهم وجعني شديد التقول انا الحرمت بناتهم من الجامعه ، ما لي ذنب في أي حاجه ، انا عايزا اكمل قرايتي بس بغض النظر عن الإنحرم منو لأنو ما انا السبب ، شويه كدا سمعت صوت راشد بتناقش معاهم ، بعد مسافه جاني داخل و هو زهجان ، وراهو طوالي جات هديل ، وقفتو و قالت ليهو لو ما عرفت نفسك غلطان ما كان مشيت و خليتهم و هم لسه بتناقشوا معاك ، انا ما حـ اكورك ولا حـ اقل أدبي على زول و اقلل من قيمتو جايه اتكلم معاك بهداوه و اسمعني للآخر ، قال ليها هديل ، قالت ليهو خليني اتكلم ، انت لمن منعتنا من الجامعه كلهم زعلوا و حصلت نقاشات كتيره بسبب الموضوع دا إلا انا يا راشد ما ناقشتك ، متذكر قلت ليك شنو؟ ....قلت ليك انا واثقه فيك و في قراراتك و متأكده انك ما بتحرمني من حاجه لو شفت مصلحتنا فيها ، كنت بشاورك في الصغيره و الكبيره و عشان ما عندي أخوان كنت بخليك انت تتحكم في حياتي و تتخذ قرارات مفروض انا اتخذها بس عشان كنت واثقه فيك و مقتنعه بيك للآخر ما حصل ناقشتك ، بس هسي حـ اناقشك ، نحنا ليه ما فكرت تخلينا نكمل قرايتنا؟ عشان ما جطنا و ما قلينا أدبنا على زول؟ سكوتنا هو الخلاكم تهضموا لينا حقوقنا و مها عشان ختت راسها في راسك طوالي قررت تخليها تكمل دراستها صح؟
عن نفسي ما جـايه اكورك في زول أو اقل أدبي ، كل العايزا اقولو ليك ، من اليوم انت ما ليك دخل في حياتي ، من اليوم ما حتدخل في أي حاجه بتخصني و أي حاجه نفسي اعملها حـ اعملها من غير ما أرجع ليك ، كفايه قهر ، كفايه ظلم ، صدق انت آخر واحد اتوقعتو ما يقدر يعدل بين بنات اعمامو و آخر واحد اتوقعت انو تغلبو مره....
طبعاً هديل قالت الكلام دا قدامي و راشد دا ساكت ليها ساكت و سبحان الله نهاي ما اتزهج فيها حتى إنو ما كان بعاين ليها بضيق ، حتى الزهج الجا داخل بيهو اختفى اول ما هي جات لاحقاهو و إتكلمت معاهو و انا واقفه بسمع ليهم بس ، قال ليها هديل انا.....قاطعتو و قالت ليهو ما تبرر لي لأنو ماف فايده ، المهم انا كلمت بالتغيرات الحتحصل و دامك انت الفتحت الباب دا معناها تتحمل العواقب و ردات افعال كل الحوليك ، بعد ما هي مشت زهج شديد و اضايق ضيق ما عادي و انا بس مراقباهو ، عاين لي و قال لي ماف ليك أي قرايه بلا جامعه بلا زفت ، قال كدا و طلع خلاني ببكي ساي ، بعد ما عشمني كسرني و بعد ما خلاني افرح خلاني أزعل ، في اليوم داك شميتهم كلهم و قلت دا بسببهم هم و متأكده لو ما كلام هديل ما كان قال لي كدا ، زعلت منهم شديد و بقيت ما بتكلم مع زول منهم خاصة عبير ، يومين و انا بقعد معاهم في صينيه واحده و خالص ما بقعد في المكان البتكون فيهو عبير أو خالتو إشراقه ، اصلاً بقيت اعمل اكلي في بيتي و بقعد قبلي و راشد دا برضو بقيت ما بتكلم معاهو و هو ذاتو طول اليومين ديل ما حاول يتكلم معاي 💔
همس الخواطر. قلوبنا مليئة برسائل لم تكتب، وإن كتبت لن ترسل، وإن رسلت لن تصل، وإن وصلت لن تفهم.....!!!!!!!
يتبع.....
