لمن وصلتو لقيتو واقف و مربع لي يديهو ، وقفت و أخدت لي نفس عميق لأني تعبت من الجري و الخوف ، عاين لـ ساعتو و قال لي : انا مش قلت ليك عندك 7 ثواني بس؟....جاياني بعد 10 ثواني ليه ؟!!
بقيت اتمتم ليهو ساي قال لي المهم تاني لمن أكون بتكلم معاك إياك تمشي ما لم أنتهي من كلامي حركتك دي ما تعيديها تاني مفهوم؟
سبحان الله مع إنو الموضوع ما بستحق الضيق دا كلو يعني شنو اذا مشيت منو و هو لسه ما خلص كلامو! الموضوع عادي ما خطير بس هو عامل فيها فرعون زمانو! !....هزيت ليهو راسي بمعنى حاضر ، و هو لسه مربع يديهو و بعاين لي جوه عيوني و انا ما عارفه اقبل وين و ما عارفه هو مالو و ليه بعاين لي بالطريقه دي و ليه مسك لي يدي مرتين؟!! انسان غريب و ما مفهوم خالص و نوعية راشد دي أكتر نوعيه انا بخاف منها و ما بحب اتعامل معاها لأني ما بقدر احدد شخصيتهم شنو بالظبط و طريقة تفكيرهم كيف؟! يعني في كل مره بقول اني قدرت اصنفو و اعرف شخصيتو و نوع تفكيرو بكتشف فيهو حاجه جديده عكس شخصيتو الراسماها ليهو !!!بالجد جهجه أفكاري و خلاها مضاربه....
قطع تفكيري صوتو و هو بقول : قلتي لي كلو كان تمثيل في تمثيل و كذب في كذب؟ طيب الضمان شنو احتمال كلامك دا ذاتو يكون كذب!؟
قلت ليهو شنو هو؟ لمن رفع لي حاجبو طوالي فهمت و قلت ليهو ما ضروري تصدقني و على كل الأحوال انت لا حتثق فيني لا حتصدق كلامي فـ ماف داعي اصرف عربي كتير ، قال لي تمام صدقتك يلا ممكن اعرف ليه كذبتي و مثلتي التمثيليه الفارغه ديك كلها؟
قلت ليهو عارفاك ما مصدقني لكن حـ اقول ليك و انت حر تصدق أو لا ، يومتها كلامك غاظني شديد ، مع إنك ما بتعرفني شككت فيني لمن سألت سيد الدكان "بتعرفها من وين " قلت أتم ليك الفهم الفي راسك و أخليك تاخد فكره غلط عني عشان تبطل العرس دا كلو ، قال لي يا زوله؟!!
قلت ليهو إنت حُر بعد دا و العندي قلتو ليك و هسي ممكن امشي؟
قال لي لا خليك واقفه ، بقيت واقفه و منتظره اسمع الكلام العايز يقولو و امشي بس هو ما قال حاجه و بقى يعاين لي بس لمن زهجني و حيرني ، البني آدم دا أكيد ما طبيعي و انا اليوم اتأكدت إنو عندو انفصام في الشخصيه ، كائن غريب خلاص و عباره عن مجهول ، بعد ما تعبت من الوقفه قلت ليهو راشد انا تعبت من الوقفه لو ما عايز تقول حاجه ممكن تخليني امشي؟
سبحان الله ولا حول ولا قوة إلا بالله ، اتخيلوا انو ابتسم و قال لي طيب امشي ، مشيت منو و اختفيت من قدامو سريع سريع و انا حاسه قلبي حـيطلع من مكانو! ما عارفه السبب شنو بس حاسه نفسي ما طبيعيه و دا كلو بسبب نظراتو لي ما عارفه عملت فيني شنو ، جسمي كلو بقى متلج و قلبي بقى شغال دق دق زي الدلوكه ، لمن مشيت لـ عبير قالت لي اهاااا قال ليك شنو؟
سكت مسافه و انا بفكر ، بعديها قلت ليها أخوك دا اليوم ما طبيعي خالص! قالت لي كيف؟ قلت ليها اتخيلي انو مسك يدي مرتين و من قبيل يعاين لي ساي! ! لمن حيرني غيتو اليوم أصلو ما طبيعي!
ختت كباية الشاي الكانت في يدها و قالت لي قلتي شنو ؟ضحكت و قالت لي وااااي مبالغه راشد الواحد دا....قاطعتها و قلت ليها هس خلااااص ياخ وطي صوتك و ذاتو ما كان أقول ليك ، قالت لي لا لا كويس اني عرفت الحاجه دي في تغير حصل لـ راشد بعد ما سافر كم اسبوع كدا و جا ...يمكن بعد ما بقى بعيد عنك اكتشف إنو ما بقدر على فراقك و اكتشف قدر شنو هو مغرم بيك عشان كدا عايز يعوض شوق الأسابيع الفاتت دي ، ضربتها في راسها و قلت ليها غبيه انتي؟ شوق شنو و غرام شنو عليك الله! لا لا ماف حاجه بالشكل دا أنا متأكده ، قالت لي طيب فسري لي تصرفاتو دي؟ قلت ليها ما عارفه لكن ما زي ما انتي مفتكره ، قالت لي راشد ما بحب يتعامل بلطافه مع البنات بس كونو يمسك يدك و كمان مرتين دي خطوه خطيييره شديد شكلك سحرتيهو ....قالت كدا و قعدت تضحك بس كلامها كلو كلو ما اقنعني ، راشد شنو الممكن يحب أو يُغرم بزول!؟ فجأه عاينت للباب لأني شفت ضل زول ، لمن ركزت كويس عرفت انو دي عمتي إشراقه! يا رب ما تكون سمعت الكلام القلناهو انا و عبير ...
سبحان الله في نفس اليوم دا لمن عمي قال لي نادي راشد للغدا لقيتو متغير معاي 180 درجه و هنا برضو اتأكدت شديد إنو انسان ما طبيعي! قلت ليهو عمي بناديك للغدا ، كان مركز مع تلفونو و ظنيت انو ما سمعني عشان كدا كررت ليهو الكلام تاني ، قال لي بصوت عالي سامع ياخ ...قولي ليهو جاي ، طبعاً في البدايه اتخلعت بس في الآخر قلت "رجعت حليمه لـ عادتها القديمه " دا واحد مجنون ساي و احسن ما أركز معاهو و ما اتوقع منو حاجه ....من اليوم دا تعاملو معاي بقى أكعب من الأول ، بقى لمن يلقاني شغاله يقول لي تعالي أكوي لي ملابسي أو غسليهم لي مع انو ملابسو بكونوا نضاف و كمان مكويات! بقوا لي اتنين هو من جهه و أمو من جهه تانيه و الزمن كلو بتنق في راسي و بتقول لي ليه ما بتشتغلي مع عبير مع إني الزمن كلو واقفه في المطبخ و بعد ما أنتهي بمشي اغسل لـ ولدها الفقر داك ملابسو و طبعاً أمو متكيفه من تعاملو الكعب دا معاي ، سبحان الله يوم بالصدفه ساي سمعتها بتتكلم مع جارتها و العرفتو من كلامها إنها في اليوم السمعتني فيهو بقول لـ عبير راشد مسك يدي و كدا ، مشت ليهو بحجة إنها عايزاهو يجيب ليها كم حاجه كدا و بيجاي بيجاي قعدت تتونس معاهو ، اتخيلوا إنها قالت ليهو يا ولدي عايزا اقول ليك حاجه لكن ما تفهمني غلط ولا تنحرج مني انا أمك في النهايه ، قال ليها قولي يا أمي في شنو؟ عملت نفسها محرجه منو و متردده ، لمن سألها تاني قالت ليهو عليك الله راشد اتكلم مع مرتك دي و قول ليها ما صح تونس الناس بخصوصياتكم و الحاجات البتحصل بيناتكم ، خايفه اتكلم معاها و تقوم تزعل مني ، شايفاها ما بتسمع من زول قلت أكلمك انت ، اتكلم معاها براحه يا ولدي و وعيها ما صح انها تقول لـ عبير انك مسكت ليها يدها و حاجات زي دي ، المطبخ دا ممكن أي زول يجي داخل ليهو زي أبوك أو رامي أخوك أو أي زول غيرهم شينه والله لو سمعوا كلام زي دا من مرتك ، ان شاء الله ما اكون احرجتك يا ولدي و بتمنى ما اكون دخلت نفسي في خصوصياتك "....
قالت لـ جاراتها طبعاً لمن قلت ليهو كدا اتحرج شديد مني و راسو ما قدر يرفعو ...."
هنا انا ياداب فهمت هو ليه اتغير معاي من اليوم داك ، طبعاً حسب عقلية راشد الحركات الزي دي ممنوعه ما عارفه كيف و ليه مسك يدي بس كلام نبهو و خلاهو يتحرج منها شديد ، بعيداً عن راشد و شخصيتو موضوع زي دا حيكون حساس و محرج لأي راجل أمو تقول ليهو كلام بالشكل دا خاصة لو كان راجل صاحب شخصية معقدة و متشددة زي راشد ، بس المحيرني هي ليه كذبت و اساساً انا و راشد ماف بيناتنا أي خصوصيات و ما حصل اتكلمت مع عبير في حاجه زي دي و اساساً كيف حـ اتكلم عن حاجات ما حصلت من الأساس؟ فـ هي جابت الكلام دا من وين ؟ بس عشان قلت لـ عبير راشد مسك يدي و كنت مستغربه من الحاجه دي كدا بكون طلعت خصوصيات ما ينفع تتقال؟ لو بالجد نيتها كانت صافيه مفروض تجي تتكلم معاي انا ما تمشي تتكلم مع راشد ...من هنا عرفت انو المره دي بالجد ما بتطيقني و عايزا بأي طريقه تخلي ولدها دا يكرهني و هو أساساً بكرهني ، بالجد ندمتني على اليوم القلت فيهو لـ عبير انو اخوها الفقر داك مسك يدي بس كويس اكدا تأكدت من نيتها و هدفها و عرفت قدر شنو هي ممكن تألف قصص من راسها عني و تخلي ولدها يصدقها ، طبعاً راشد الموضوع شكلو احرجو شديد عشان كدا ما قدر يقول لي ليه قلتي لـ عبير انا مسكت يدك أو يسألني عن حاجه ليها علاقه بالموضوع دا ...
