أول ما هو جا داخل كدا إسراء قامت جاريه ، بقيت واقفه قدامو براي و انا قلبي شغال دق دق و أعصابي تلفت، أول ما قرب مني و هو غضبان طوالي بقيت ببكي ، ما عارفه بقيت من شنو تحديداً لكن بالجد بكيت بحرقه و طلعت كل القهر الجواي ، قال لي بنبرة ضيق: كنتي وين؟
رفعت راسي و انا دموعي عشره عشره ، ما رديت عليهو لأني حرفياً من شدة الزعل و البكى حلقي اتقفل ، قال لي بنهره بتكلم معاك انا ردي!
انخلعت و طوالي ختيت يديني على خدودي تحسباً لأي كف ممكن يجيني ، قلت ليهو و انا لسه خاته يديني على خدودي: مشيت لـ صحبة عبير بيتهم في الشارع التاني ، قال لي كلمتي منو لمن قمتي ماشه؟
قلت ليهو بصوت راجف ما لقيت زول عشان أكلمو ، عاين لي مسافه و قال لي بتعرفي الخوف لكن ما بتعرفي الأدب ، المهم حركه زي دي ما عايزها تتكرر مره تانيه ممنوع تطلعي من البيت من غير ما تكلميني.....قال كدا و طلع و انا ياداب اتنفست كويس بس دي خالص ما ردة الفعل الكنت متوقعاها منو ، كنت متوقعه منو غضب أكتر من كدا بس صدمني والله....
المهم إسراء تاني ما جاتني راجعه ، و ديلك عملوا ليهم حفله سامعاهم بغنوا و بزغردوا ساي بس نهاي ما طلعت ليهم ، المهم بعد اليوم دا راشد بقى ما شغال بي كتير و اصلاً بقيت ما بشوفو كتير ، قعد هديل في بيتهم التاني و فصل البيت الأنا قاعده فيهو و قال حـ يبني الجزو التاني لـ هديل ، آخر مره اتكلم معاي فيها لمن قال لي بكرا العمال حـ يبدوا يشتغلوا عشان كدا أول ما هم يجوا انتي تمشي تقعدي مع ناس أمي ، قلت ليهو لا ماف داعي بقفل الغرفه علي بس ، قال لي ما تناقشيني ، قلت ليهو اذاً حـ امشي اقعد مع حبوبه لما هم يجوا ، المهم بقيت امشي الجامعه و لمن ارجع بمشي لـ حبوبه في بيت ناس إسراء و أول ما العمال يمشوا بجي راجعه و هديل دي ماف لا سلام لا كلام بيني و بينها يعني فجأه كدا بقيت احس نفسي زعلانه و ممغوصه منها شديد و ما طايقه اشوفها ، الحاجه المحيراني إنهم ما مشوا شهر عسل مع إنو هم الإتنين ما انفرض عليهم العرس دا 🤣
المهم يوم خالتو تهاني لمن كنت معاهم في بيتهم قالت لي بعدين لمن ترجعي بيتكم عندي أمانه وصليها لـ عمتك إشراقه ، قلت ليها كويس ، و فعلاً لمن قمت ماشه شلت منها الأمانه و مشيت عشان أديها لـ عمتي إشراقه ، انا ما عارفه هل هي صدفه إني كل مره أجي و اسمعها بتتكلم عني ولا أصلاً هي 24 ساعه ماسكه سيرتي؟ سمعتها بتقول لـ هديل و عبير ، أكيد كتبتو و سوت ليهو شي و إلا ما كان خلى مرتو معانا هنا و بقى طافش من البيت و ماف زول عارفو بمشي وين ، دخلت و قلت ليها يا عمتي انا لمن أجي اكتب زول ، بكتب ولدك؟
لو بالجد كاتباهو كان منعتو من العرس دا و شلت ليهو الفكره دي من راسو و بعدين ذاتو أكتبو ليه؟ انا لو لاقيه لي طريقه تخارجني منو اقسم بالله دقيقه وحده ما بقعدها معاهو ، قايله القعدها عاجباني يعني؟
ما انتظرتها ترد ، ختيت الأمانه بزهجت على السرير و قلت ليها دي من خالتو تهاني و طوالي طلعت منهم و انا دموعي ماليه عيوني ، أول ما جيت داخله بباب النص راشد جا طالع ، كان ماشي مستعجل و بتكلم بالتلفون ، ما رفعت عيني و عاينت ليهو اتجاوزتو و دخلت و كنت حـ اواصل مشي بس هو مسك يدي ، و عمل لي حركه بعيونو قصدو بيها مالك؟
كان بتكلم بتلفون و ماسك يدي و انا بحاول امنع دموعي بس هي كل ما ليها ماشه تزيد ، ما اتكلمت معاهو كنت بس بمسح دموعي بـ يدي التانيه ، قال للزول البتكلم معاهو : اسمع برجع ليك بعد شويه ، قفل التلفون و قال لي في شنو؟
ما رديت عليهو ، قال لي انا مية مره كلمتك و نبهتك لمن اسألك تردي ، قلت ليهو بزهج و انا ببكي ، أرد اقول ليك شنو مثلاً و اساساً بهمك بشنو ، أبكي ولا أضحك دي حاجه ما بتخصك ، قال لي لا بتخصني ، جريت يدي منو و حاولت أتفك منو بس هو كان ماسكني بقوه ، قال لي ما حـ أخليك تتحركِ من هنا إلا اعرف بتبكي ليه؟
قلت ليهو دا سؤال ليك؟ هو شنو الما ببكي! الجحيم المعيشني فيهو ولا الذل و الإهانه البلقاهو منك ولا أمك البتقول اني كاتباك عشان كدا مخلي هديل معاهم و 24 ساعه برا البيت ، انا لو سكت لو اتكلمت أمك ما بتريحني ، قايلاني مبسوطه بالعيشه دي ولا انت هاميني! و.....قال لي أمي قالت ليك كدا؟
سكته و ما اتكلمت ، سحبني من يدي و مشى بي للغرفه القاعدين فيها ناس أمو ، لمن دخلنا فك يدي ، قال لـ عمتي إشراقه يا أمي انتي قلتي عن مها شنو؟
قالت ليهو بسم الله ، قلت عنها شنو؟ قال ليها قلتي إنها كاتباني صح؟
قالت ليهو هي جات و شكتني ليك؟ قال لي ما مهم ، سألتك سؤال يا أمي ردي علي ، قالت ليهو انا الفارغه دي ما بتنفع معاي خلاص داير تبقى راجل سميع و تجري ورا كلام مرتك؟
قال ليها يا أمي.....قاطعتو و قالت ليهو ما تقول لي أمي مدام انت جاي تشاكل أمك عشان الجنبك دي ، عاينت لي و قالت لي و انتي الزمن كلو كاتله لينا حيلك و عامله فيها مسكينه لكن اخيراً ظهرتي على حقيقتك ، لو دايره تسوي فتنه بيني و بين ولدي انا ما عافيه ليك دنيا و آخره ، راشد قال ليها جوابك وصلني ، قالت ليهو يا ولد هوي أوعك تبقى بتاع فارغه و تجري لي ورا البت دي و.....قاطعها و قال ليها انتي عارفه و كلكم عارفين، حركات السواطه و القواله دي انا ما بتنفع معاي و بعدين كتابة شنو البتتكلمي عنها يا أمي! عليك الله ما تقعدي تباري لي الأوهام دي و تعملي مشاكل ساي ، انفعلت و قالت ليهو الكلام دا لي أنا؟ قال ليها ليكم كلكم ، ما اسمع لي وحده بتتكلم عن التانيه أي وحده تمسك لسانها عليها لأني والله العظيم اسمع حاجه كدا ولا كدا ما حـ يحصل خير ، عبير قالت ليهو الكلام دا لينا كلنا ولا.....قاطعها و قال ليها حتى مها، عاين لي و قال لي و انتي ما اسمك بتتناقري مع زول لا أمي لا غيرها ، قلت ليهو اساساً انا ما شغاله بيهم و البيت دا ما قاعده أجيهو ، قال لي المهم انا كلمتك ، قال لي و هسي ارجعي البيت ، لمن رجعت البيت و بعد ما ارتحت إتصلت على أبرار طبعاً لمن ردت علي شاكلتني شكل و قالت لي طول الأسبوع الفات و انا بتصل عليك بس ما بتردي علي ، معقوله دا كلو يحصل معاك و ما تكلفي نفسك و تتصلي علي؟
قلت ليها عرفتي من وين انتي؟ قالت لي كنت متواصله مع مرام أختك و لمن جات راجعه من السفر مشيت ليها امبارح في بيتكم و أمك حكت لينا الحصل معاك ، اقسم بالله عايزا أطق من الزعل منك ، قلت ليها حقك علي بس والله يا أبرار كنت ماره بأيام صعبه شديد ، انعزلت عن الناس و ما كان عندي مزاج اتكلم مع زول و اقعد احكي ليهو الحاصل معاي لأنو الفضفضه بحد ذاتها كانت متعبه بالنسبه لي ، قالت لي يا قلبي والله ما تستاهلي ، راشد طلع حيوان و فقر و ما نافع و بت عمك كمان الله لا كسبها الحيوانه التافهه الرخيصه و اعمامك ذاتهم كلاب و كريهين ، اصلاً راشد الحيوان دا من يوم عرسك أختك مرام شميتو ، طلع حيوان و نافخ ريشو على الفاضي ، يوم عرس مرام كنت شاماهو بس حالياً كرهتو عديل ، ضحكت ضحكه باهته كدا و قلت ليها لا ياخ عمل ليك شنو! ما كنتي معجبه بيهو شديد!
قالت لي صحي ما وريتك يوم عرس مرام كنت شايفاهو واقف مع عمر أخوك و بعد ما عمر مشى والله حبيت اسلم عليهو و اتكلم معاهو و كدا نظام هو راجل صحبتي و كدا فهمتيني!؟...المهم مشيت ليهو و قلت ليهو السلام عليكم ، رد علي و هو منزل راسو في التلفون ، قلت ليهو كيفك؟ هز لي راسو بس ، رغم إنو غاظني شديد بس بقيت احاول اتظارف معاهو في الآخر قال لي ممكن تحترمي نفسك شويه؟ و بعدين دا حوش رجال و ماف نسوان بجوا هنا ، اقسم بالله يا مها اللحظه ديك اتمنيت الأرض تتشق و تبلعني، حسيتو احرجني شديد و احراجو دا بالنسبه لي كان زي الكف ، والله لمن دموعي نزلو و كل شي مسخ علي عشان كدا ما قدرت أقعد أكتر و قلت ليك حـ ارجع البيت ، قلت ليها ما بصدق! بالغ والله، بس ما كنتي تشتغلي بيهو دا متخلف ساي ، قالت لي بعد كلامو دا عايزاني اقعد عادي كأنو ما عندي كرامه ؟لا والله.....المهم إتكلمت معاها مسافه و قفلت منها ، بعد اسبوع حبوبه طلعت من الحبس و طوالي جاتني ، في اليوم داك العمال ما جوا عشان كدا قعدت في البيت ، جات و قعدنا نتونس سوا لغاية ما راشد جا ، قال ليها يا حجه انتي معانا بيجاي! و جا سلم عليها، قالت ليهو حجه دي تقولها لأمك انا لسه شابه و بفتش لي في عريس ، لمن قالت كدا انا موت من الضحك ، لمن رفعت راسي لقيت راشد بعاين لي لمن عقدني و خلاني أسكت ، حبوبه قالت لي قومي جهزي ليهو الأكل قلت ليها لا لا بكون أكل هناك مع ناس أمو ، طبعاً هنا راشد عاين لي بغيظ كدا ، قالت لي خلاص اعملي ليهو شاي ولا جبنه ، قلت ليها برضو حيكون شربهم هناك ، طوالي راشد قال لي ما شربتهم و ما اتغديت كمان 😊
حبوبه قالت لي خلاص قومي جهزي ليهو الأكل ، عاينت لي بغيظ و قمت جهزت ليهو الأكل ، ختاهو قدام حبوبه و قال ليها أكلي معاي ، قالت ليهو بري انا أكلت قبل شويه مها ختت لي لكن هي ما أكلت و كضابه ساي لو قالت أكلت، قلت ليها حبوبه بالجد انا أكلت و ما جعانه ، قالت لي ما علي انا تعالي تعالي اقعدي مع راشد دا و أكلي ، قلت ليها لا لا ما عايزا والله ، قالت لي انتي بتخجلي منو ولا شنو؟ طوالي راشد عاين لي و ابتسم و انا ما عارفه المخليهو يبتسم شنو ، قلت ليها أخجل من شنو يا حبوبه؟ قالت لي سمح ليه ما عايزا تاكلي معاهو؟ ...ما تقولي لي شبعانه، قالت لي غيتو انتي يا حبوبه ما حتخليني في حالي عشان كدا ماشه اغسل يدي و أجي ، المهم مشيت غسلت يدي و جيت قعدت قصادوا و بدينا ناكل و كل واحد بتلفت على اتجاه معاكس للتاني نهاي ما عاينا لبعض و حبوبه دي بتعاين لينا ساي ، والله كل ما ارفع عيني و أعاين بإتجاها بلقاها مبتسمه و بتعاين لينا لمن عقدتني والله و الأكل ذاتو غلبني عشان كدا طلعت يدي و قمت ، قالت لي يا بتي ....قلت ليها شبعت والله شبعت يا حبوبه ، قالت لـ راشد أتكلم معاها ، هو عاين لي و سكت ، دخلت عملت ليهو الجبنه و جيت قعدت و هو بعد ما شربها ما ناوي يمشي و بقى قاعد يتونس مع حبوبه و انا ما قادره افتح خشمي ، وجودو كان موترني ، حبوبه قالت لي مالك ساكته ولا عشان راشد قاعد؟
قلت ليها يا الله منك يا حبوبه اقول شنو انا ما عندي شي اقولو عشان كدا ساكته ، قالت لي سمح قبل ما راشد دا يجي كنت بتتكلم عادي و ماسكه الونسه على حسابك ، قبل ما أرد عليها تلفوني رن قلت جا في وقتو عشان يريحني من كلام حبوبه ، شلت تلفوني و طلعت برا ، كانت دي تسنيم قالت لي نزلو جدول الإمتحان ، قلت ليها الناس ديل بحبوا الإمتحانات دي زي عيونهم والله انا ما جاهزه، قالت لي ما جاهزه شنو! مازن و شيماء ما قصروا منك و شرحوا ليك الفاتك كلو و أي شي أخدناهو قبل ما انتي تجي تسجلي في الجامعه ، قلت ليها ما عارفه حاسه نفسي ما قادره امتحن ، قالت لي يا بت دا كلام شنو! كدي استهدي بالله ، برلومه انتي ولا أول مره تمتحني؟ قلت ليها ما عارفه افكاري جايطه ، قالت لي كدي اتوضي صلي ليك ركعتين و اقرا البقره و يس ، و اقري و كل ما تحسي بالإحباط و الإكتئاب اقري قرءان و اتوكلي على الله، مع إني ما عارفه الحاصل عليك شنو لكن كلو بإذن الله حـ يعدي ، قلت ليها و نعم بالله ، المهم قفلت منها و هي طوالي رسلت لي الجدول في الواتس ، والله من شفتو بطني طمت منو ...
رجعت لـ ناس حبوبه و راشد كان بعاين للباب كأنو منتظرين أجي داخله و عشان عارفاهو انسان كريه و شكاك قلت ليهم دي صحبتي و طوالي عاينت ليهو ، المهم حبوبه اتونست معانا مسافه و لمن قامت ماشه راشد مشى يوصلها ، المهم انا بليل عملت زي ما تسنيم قالت لي قمت الليل و ما نمت خالص ، جبت شيتاتي و ختيتهم جنبي و قلت لازم لازم في ليلي دا أخلص شيت أو نص شيت ، عملت لي شاي و جبت لي تربيزه و كرسي ، قعدت و قلت بسم الله و بديت ، الماده كانت صعبه صعبه مبالغه، لمن زهجت و نفسنت و بكيت عديل ، و قلت مش القرايه دي خليتها ذاتو ، شربت الشاي و بقيت ماسكه القلم و متمحنه شويه كدا راشد جا داخل ، قمت مخلوعه و طوالي جريت لبست التوب ، عاين لي بغيظ و مشى على الدولاب و انا رجعت قعدت في مكاني ، كان حـ يطلع بس تاني جاني راجع قال لي القرايه غلبتك ولا شنو يا ست الجامعه العايزا تقري !
قلت ليهو ايوه ايوه أشمت كويس ، قال لي ما شمتان والله بس ما مشكله اساساً ما حتفهمي قصدي ، جاب ليهو كرسي و جا قعد قصادي ، قال لي نازله امتحانات؟ هزيت ليهو براسي و انا مستغربه في اللطافه الوقعت فيهو فجأه دي ، قال لي أول ماده شنو؟
مديت ليهو الشيت و انا محبطه ، قال لي يا زوله قولي خير من البدايه كدا؟
تكلت راسي في التربيزه و قلت ليهو المواد دي صعبه و حاسه نفسي ما قدرها والله ، قال لي ارفعي راسك دا و اسمعيني ، رفعت راسي بتكاسل و قلت ليهو شنو؟
قال لي ماف حاجه اسمها ما بقدر انتي ما أول وحده بتقرا جامعه و ما أول وحده بتدرس It ، كتار غيرك قروهو و اجتهدوا فيهو لغاية ما اتخرجوا و انا واحد من الناس ديل بالنسبه لي حب المجال أهم حاجه يعني حسي انو المجال دا حقك و اتعمل ليك ساعتها حـ يكون شغف بالنسبه ليك و حـ تحبي أي حاجه ليها علاقه بيهو ، قلت ليهو ما أظن ، قال لي خلينا نكسب الزمن ، فتح الشيت الأول و قال لي حـ اساعدك والله دقيقه كامله و انا بعاين ليهو لمن قال لي اذا ما عايزا مساعده حـ اطلع ، قلت ليهو لا لا عايزا والله ، المهم هو بدا يشرح لي و يحاول يفهمني و انا مره اتجاوب معاهو و مره لا ، لمن القعده تعبتني و خلاص نعست قلت ليهو حـ ارقد في السرير و انت أشرح لي ، قال لي يا سلام ، عايزا ترتاحي و تقري في نفس الوقت!😂😂
قلت ليهو آيي آيي ، المهم رقدت و هو بقى يشرح لي و يسألني عن الحاجه الشرحها لي في البدايه كنت مركزه بس كلامو الأخير دا ما جبت ليهو خبر ، متأكده انو كان بسألني و كنت بجاوب لكن في الآخر ما عارفه بقيت أقول ليهو في شنو لأني خلاص نعست ، لمن قربت أغمض كدا سمعتو بضحك ، فتحت عيوني و عاينت ليهو مسافه و هو ميت من الضحك! بالجد فاجأني ، أول مره اشوفو بضحك! قلت ليهو مالك بتضحك ؟ جنيت؟
قال لي و هو لسه بضحك ، نومي نومي نكمل بكرا ، قلت ليهو لا قول لي مالك كنت بتضحك؟ قال لي اتذكرت حاجه، قلت ليهو كذاب والله ، بتضحك علي انا مش؟ قلت ليك شنو لأني كنت نعسانه و ما جايبه خبر ، قال لي خلاص بكرا بقول ليك هسي الزمن اتأخر ، المهم هو طلع و انا بقيت اسأل في نفسي يا ربي انا قلت شنو؟
لمن نزلت من السرير عشان اطفي النور ، لمحت تلفون راشد على التربيزه لمن شلتو عشان أوديهو ليهو جات فيهو رساله ، قريتها من فوق كان مكتوب فيها: "حوح " قلت حوح دي شنو كمان ، ما فهمت أي حاجه من الرساله دي و الرقم ما كان مسجل ، بقيت أعاين للكلمه دي بإستغراب لغاية ما راشد جا و خطف مني التلفون ، قلت ليهو حوح دي معناها شنو؟
قال لي دي شنو كمان؟ قلت ليهو في زول مرسل ليك الكلمه دي ، قال لي بالجد؟ قلت ليهو آيي والله، قال لي خلاص بكون زول قاطع موضوع ساي و رصيدو محرقو عشان كدا مرسل الكلمه الما ليها معنى دي ، قلت ليهو يمكن، المهم هو طلع و انا قفلت الباب و طفيت النور و مشيت نمت ...
أنا وأنتِ مثل الحادي والثلاثين من ديسمبر والأول من يناير...
قريبين جداً ولكن بيننا عام🖤🥀
يتبع.....
