LUBABATU

10

LUBABATU

10

Rahma kabir Mrs MG.
Wattpad@rahmakabir

EWF.

_Masoya Ina matukar godiya da comment dinku tare da addu'anku gareni jazakallah khair_

Lubabatu wajen karfe biyar na yamma ta farka, ta tashi zaune bisa gadon tana me yin hamma tare da shafa cikinta alamar jin yunwa, ta daga kai tare da duba agogon bango dake dakin taga babban sanda akan 5 hakan ne ya bata cewar biyar ne na yamma saboda bata iya agogo ba, ko a gida a haka take ganewa sai kuma agogon waya dake nuna lokaci baro baro, ta sauke nishi a hankali sai ta sauka daga gadon ta shiga bayi ta gabatar da alwala kana ta fito ta rama sallar azahar da la'asar, bayan ta idar sai ta fito falo ta hangi tiren abinci akan center table sai ta yi sauri taje ta bude taga tuwon shinkafa miyar kulewa danya sai kamshin manshanu ke tashi, ta sauke tiren kasa ta shiga cin abincin jikinta yana rawa. Can kasar zuciyarta tana mamakin yadda take cin abinci babu fargaba sannan kuma hartake mance matsayin halin da take ciki, ta rasa gane yadda bata iya sarrafata zuciyarta akan ta hana kanta faruwar wasu abubuwan, tana cikin tashin hankali da tsoro amma kuma wani lokaci tana mance komai, tana cin abinci hawaye yana sauka mata sai dai be hana ta fasa ci ba, sai da ta cinye tas kana ta wanke hannu a cikin kwanan ta sha ruwa ta koma gefe tana mayar da numfashi, takai kusan minti sha biyar a haka kafin daga bisani ta mike tana zaga falon tare da bude duk dakin data gani tayi sa'a duk a bude suke, ko wani daki abin kallo ne domin an kashe masa kudi kamar ba za a mutu ba, dakuna biyar ne a saman Kuma duk da kaya a ciki, sai dakin motsa jiki wanda yaji kaya masu tsada daga gani kayan kasar waje ne, sai karamin kitchen shima da komai a ciki, sai ta ga wata kofa tana budewa taci karo da barandar dake sama ta zaro Ido tana kallon gidajen mutane dake makotaka dasu ga mutane dake wucewa akan layi ga motatoci suna wuce, hakan ya tabbatar mata da suna cikin mutane ba daji suke ba, sai taji dadi a ranta, ta zauna a daya daga kujeru da suke mallakin wajen domin shan iska, ta shagala da kallon cikin gidan wanda yakeda mugun girma ba zata iya cewa ga iyakarsa ba, ta mike iska yana kadata sanyin yana ratsata ga kamshin furanni suna dukan hancinta ta lumshe Ido cikin jin dadin yanayin.

Gida har gida amma ba wajen zama ba.

Tace a zuciyarta tare jin saukar siraran hawaye a kuncinta, ta hango wani matakalan karfe siriri wanda yake a markwade har kasa zai kai mutum zuwa wani bangare, cikin karfin hali ta isa gun ta hau matakalan a tsorace ta kama karfen da duka hannunta tana sauka a hankali tare da binsa duk yadda yake har ta sauka, ta tsinci kanta a bayan gidan cikin wata katuwar lambu wanda yake dauke da kayan marmari, duk da akwai tsoro a tare da ita amma wajen ya bata sha'awa ta shiga ciki sosai iska yana kadata tare da shagala da kallon wajen, ta jima tana aikin kallo domin har saida magriba ta kawo jiki kafin ta farga da duhun wajen tayi sauri tabi wannan matakalan tahau ta koma inda ta fito, ta shiga falon ta rufe ta ciki ta koma dakinta tayi alwala kana ta gabatar da sallah ta zauna a wajen tana istigfari. A dai dai wannan lokacin kewar iyayenta ya dirar mata.

Koya su Umma zasuji in suka ji labarin na mutu?

Tace a ranta tare da tausayinsu dake bin jikinta. Ta shiga tinaninsu da yadda suka rabu, daga karshe sai ta tuno da yadda suka isa Zaria da lokacin da wa inda suka kawota suka wuce yola, ta tuna lallai suma tayi a lokacin.

Kenan ina Sume ya kawo ni nan gidan? To wai nan wani gari nake? Haka zan cigaba da rayuwa? Meye makomar aurena?

Tayi tambayoyin a fili sai ta fashe da kuka, tayi me isarta ba me lallashi a haka har aka kira sallar isha'i ta mike ta gabatar tare da shafa'i da wutri tayi addu'a ta shafa kana ta fita falo, nan ta taga tire din abinci tasan an kawo na dare, aiko ta bude ta samu shinkafa da miya taji nama sai ruwa, sun dena kawo mata drink saboda bata sha. Ta zauna ta cika ciki ta koshi kana ta mike ta sauka falon kasa ta samu tv a kunne ta rashe a kujera ta soma kallo tana zancen zuci.