၂၀၀၇ခုနှစ်/ဒီဇင်ဘာလ
ဒီဇင်ဘာကျောင်းပိတ်ရက် မတိုင်မီ ကျွန်တော့်အစီအစဉ်ကို အစပြုဖို့ ကြံရွယ်ခဲ့သည် ။ ကျွန်တော်တို့ နဝမတန်း (အေ) အခန်းထဲတွင် ကျွန်တော့်ကို မြင်တိုင်းပြုံးပြတတ်တဲ့ ကောင်မလေးတစ်ယောက်ကို ကျွန်တော် သတိထားမိတာ အတော်ကြာခဲ့ပြီ ။
သူ့နာမည်က အေးပွင့်လွှာဦးတဲ့ ။ အသားညိုညိုညက်ညက်နဲ့ ပြုံးလိုက်တိုင်းပါးချိုင့်ပါတဲ့ သူက ဆံနွယ်ရှည်တွေကို ဖဲကြိုးစိမ်းလေးနဲ့ အမြဲတမ်းစီးနှောင်ထားတတ်တယ်။ သနပ်ခါး ပါးကွက်ပါးပါးကို အမြဲလိမ်းတဲ့သူက မဟာဆန်ဆန်လှပသူပင်။ အရှက်အကြောက်လည်းကြီးသလို စကားလည်းနည်းတဲ့သူက ကျွန်တော့်ကို ပြုံးပြတိုင်း ကျွန်တော်လည်းပြန်ပြုံးပြမိခဲ့တယ်။
မုန့်စားဆင်းချိန်တွင် ကောင်းက ရှယ်လီနဲ့ စကားပြောနေတုန်း ကျွန်တော်တစ်ယောက်တည်း မုန့်ဆိုင်ဘက်ထွက်ခဲ့လိုက်သည်။ မုန့်တီသုတ်ဆိုင်တွင် လူအများပြည့်နှက်နေပြီး အေးပွင့်ကတော့ လူအချို့ရဲ့အနောက်ဘက်မှာ မုန့်တီဝယ်ဖို့စောင့်နေလေသည်။ သူအဲ့လိုစောင့်နေပုံမျိုးနဲ့ဆိုရင် ဒီတစ်သက်မုန့်တီစားရမှာမဟုတ် ။ ကျွန်တော် သူ့ကိုဝယ်ပေးဖို့ဆုံးဖြတ်လိုက်မိသည်။
"အေးပွင့် မုန့်တီဝယ်ဖို့စောင့်နေတာလား "
"ဟင် ....အင်း...ဟုတ်တယ် "
ကျွန်တော်သူ့ကို မေးလိုက်တော့ အံ့ဩသွားပြီး နားရွက်လေးတွေ ရဲသွားတာကို ကျွန်တော်မြင်လိုက်ရသည်။
"ကျွန်တော်သွားဝယ်ပေးမယ်လေ ။ အေးပွင့်ဘယ်လောက်ဖိုးဝယ်မှာလည်း "
"ဟို...အားနာစရာကြီး။ စောင့်နေလိုက်ပါ့မယ်"
"အယ် စောင့်နေရင်တော့ ကုန်သွားလိမ့်မယ် အစ်မတော်ရဲ့ "
"အဲ့ဒါဆိုရင် နှစ်ရာဖိုးဝယ်ပေးပါနော်"
"ဟုတ်ပြီ ခဏစောင့်"
ကျွန်တော်လည်း လူအုပ်ကြီးကိုရှောင်ကွင်းပြီး ဆိုင်ရဲ့အနောက်ဘက်ကိုသွားကာ အသုတ်သည်ကြီးကြီးရဲ့ အနောက်ဘက်ကနေ ကြွတ်ကြွတ်အိတ်ကိုကိုင်ပြီး ထည့်ပေးဖို့ အသင့်စောင့်နေလိုက်သည်။ မကြာခင်မှာပဲ ကျွန်တော့်ရဲ့ အသုတ်ဝယ်ယူခြင်း လုပ်ငန်းပြီးဆုံးသွားလေသည်။
YOU ARE READING
A Thorn In My Heart(နှလုံးသားထဲကဆူးတစ်ချောင်း)(Complete)
Teen Fictionကောင်လေးနှစ်ယောက်၊သူငယ်ချင်းနှစ်ယောက် ကြားက အချစ်အကြောင်းလေးပါပဲ ။ သူတို့တွေမှာ ရှိခဲ့တဲ့ပျော်ရွှင်မှုတွေ ၊ နာကျင်စရာအချိန်တွေကို သူတို့ဘယ်လိုကျော်ဖြတ်မလဲဆိုတဲ့ အကြောင်းလေးပါ ။ Both Zawgyi & Unicode Start Date - 10/12/2021 End Date - 10/2/2022 Cove...
