قصة : ( نصيب عاشق ) ل سهيلة سعيد المنجي

الحلقة ١١ و ١٢

قصة : { #نصيب_عاشق } 🥀♥️

الحلقة الحادية عشر { ١١ } 🥂

( ندى واقفة مصدومة م الكلام ، ولا عارفة ترد ولا حتى تتحرك ، يبصلها )
ندى بصعوبة وعيون مدمعة : انا ..............................
امام : مكنتيش بتاخدي بالك من عيوني الي كانت دايماً عليكي ، الي اتملت غيرة وكسرة منك ، محستيش ب اي حاجة تثبتلك إني مكنتش شايف غيرك ، مشفتيش خوفي عليكي لو جرالك حاجة ، غيرتي لما كان بيقربلك ، لما كان بيلمسك ، محستييييش !
( تنزل دموعها )
امام : محستيش إن انا الي طبطبت عليكي وقت وجعك مش هو !
( يشدها يقربها عليه اوي ، عيونهم ف عيون بعض )
امام : وإن انا الي بوستك مش هو
( تتخض ندى وتبصله وعيونها مبرقة )
امام : خنته ، اة خنته ، عشان كنت حاسس إنك ليا انا مش ليه هو ، كنت حاسس إنه اخدك مني ، مات هو وانا مشمتش ، والله مشمتش انا اتقهرت ع اخويا ، بس الي قهرني اكتر إنك كنتي عوزاني بديل ، وانا عمري م هكون بديله ي ندى ، الفراق وراد زي اللقا بالظبط ، زي م قلبك اتمسك ف يوم ، هييجي عليه الوقت الي هيطر يفلت فيه ، وانا فلتك خلاص ، فلتك
( يسيب ايدها ويمشي م البيت ، تفضل ندى واقفة مكانها ودموعها عمالة تنزل ، تدخل هيام )
هيام وهي بتقرب ع ندى : بت !
( تلاقيها بتعيط )
هيام بقلق وهي بتمسكها من وشها : ايه دة بتعيطي ليه ، هو ضايقك ؟!
( تترمي ندى ف حضنها ويزيد عياطها ، ع السلم ، نازل امام ووراه حميد )
حميد ب استغراب : ي بني اصبر ، فهمني فيه ايه طيب !
امام وهو خارج م العمارة : هبقا اكلمك
( يجري ع عربيته يركبها ويمشي ، عند ندى ، قاعدة هيام وندى قاعدة قصادها مصدومة م الي اتقال ، كل الي بيدور ف بالها حالياً كل موقف عدى عليها مع امام وازاي مفهمتهوش او حست ولا مرة ، دماغها فيها مليون صوت ومليون شخص بيتكلم واولهم صوت امام ، تنزل دموعها وتحط ايدها ع وشها وتعيط )
هيام بقلق : قوليلي مالك بس !
ندى : هيام سبيني لوحدي دلوقتي معلش ، بعدين نتكلم
( عند امام ، سايق ومش مصدق إنه قال كل دة ، مرتاح إنه خرج الي ف قلبه اخيراً وف نفس الوقت قلبه واجعه ، يتنهد تنهيدة طويلة مع تغميضة عين ، يفتح عيونه )
امام : مرتاح كدة ، مرتاح صح ، لأ ، ولا هترتاح ، ولا هترتاح ي امام !
( يحط ايده ف شعره ويسند دماغه عليها ، عند حميد وهيام )
هيام : انا مش فاهمة حاجة !
حميد : مش فاهمة ايه مهي واضحة ، طلع ابن عمها !
هيام ب استغراب : ايوة فاهمة دة ، بس ليه كانت بتزعق معاه ف الأول وبعدين سكته !
حميد بحيرة : يمكن كان بينهم مشكلة ، مش عارف ! 
هيام وهي بتقوم : طب هخش اشوفها طيب ، انا مش هاين عليا اسيبها كدة !
حميد وهو بيقوم : ماشي ، وانا هروح
هيام : لا انت هتتعشى معانا
حميد : لا ورايا مشوار كدة لسة هخلصه الأول ، ف عاوز الحق
هيام : طيب ماشي
حميد : لو في حاجة ابقي كلميني
هيام : حاضر 
( يمشي حميد ، تقرب هيام عند شقة ندى وتخبط ، تقرب ندى تفتح )
ندى وهي بتمسح ف دموعها : تعالي
هيام ب استغراب وهي بتدخل : انتي لسة بتعيطي ؟!
ندى : لا انا كويسة
( يقعده )
هيام بقلق : كويسة ايه ي بنتي انتي مش شايفة شكلك ، قوليلي في ايه متقلقنيش عليكي !
( تنزل دموع ندى )
هيام : هو ابن عمك عملك حاجة ، قالك حاجة زعلتك ، احكيلي بقااا !
( تفهمها ندى الحوار كله ، عند حميد ، واقف قدام عمارة وماسك الفون بيتكلم )
حميد : قولتلها ، طب ايه طيب ، اطلع ، طب طب ماشي !
( يقفل حميد الفون ويقف متوتر وبعدين يدخل العمارة ويطلع ، يخبط ع باب شقة ، تفتح هالة )
هالة : تعالى ي حميد
حميد وهو بيدخل ب احراج : احم بسم الله
( يقعد ع اقرب كرسي ، تقعد قصاده هالة )
هالة : انا كلمتها عنك وفهمتها كل حاجة
حميد : وقالتلك ايه ؟
هالة : هي اتفاجأت لإنها عرفاك ، وانت دايماً تشوفها تحط وشك ف الأرض ، ف عمرك م لمحتلها حتى !
حميد : انا بس عشان هي متفهمنيش غلط ، مش عاوز اضايقها ، فهماني ؟
هالة : ايوة م انا فهمتها ، ف هي قالت قبل اي حاجة هي لازم تقعد معاك وتتعرف عليك الأول ونشوف الدنيا هتمشي ازاي
حميد : ايوة صح
هالة وهي بتقوم : ف انا هدخل اندها ماشي
حميد بتوتر : ماشي اوك !
( تدخل هالة جوة ، بعد اقل من دقيقة تطلع هلا ، يبصلها حميد )
هلا : سلاموا عليكم
حميد وهو بيقوم : عليكم السلام
( تقعد قصاده ، يقعد ، تلاحظ توتره )
هلا : عامل ايه ي حميد ؟
حميد : انا تمام ، حضرتك عاملة ايه ؟
هلا : كويسة الحمدلله !
حميد وهو باصص للأرض : ااا استاذة هالة قالتلي إنك محتاجة تقعدي معايا يعني نتعرف ع بعض ، ف شوفي اي حاجة عاوزة تسأليها او تعرفيها عني انا هجاوبك ع طول
هلا : روق ي حميد احنا مش ف مدرسة ، انا قلت نتعرف ع بعض ناخد وندي ف الكلام بس مش اكتر ، مش هستجوبك يعني ، فاهمني ؟
حميد بفهم واحراج : ايوة ايوة صح ، لامؤخذة
هلا ب ابتسامة : انت متوتر اوي ، انا بسيطة والله ومش مكلكعة
حميد وهو بيخطف نظرة ل هلا : لا عارف والله عارف
هلا : انت ليه كلمت هالة عني ؟
حميد وهو باصص للأرض : يعني اسمع من هيام اختي إن حضرتك بني ادمة محترمة وكويسة ، وانا كمان شفت حضرتك كذة مرة لما باجي ل هيام اختي ف كلمتها عنك ، وهي فرحت اوي لإنها بتحبك
هلا : ايوة هيام دي حبيبتنا وزبونتنا كمان ومن الناس المحترمة الي عرفناها
حميد : الله يكرمك ، ف قالتلي اكلم استاذة هالة ف كلمتها ع طول
هلا : طب ممكن بلاش حضرتك واستاذة والألقاب دي ، يعني الموضوع مش عاوز رسميات خالص !
حميد ب احراج : ايوة ايوة انا اسف !
هلا : ولا يهمك
حميد : تسلمي
هلا : طب انت عارف عني ايه غير إني محترمة وكويسة ؟
حميد ب ارتباك : اااا إنك ليكي محل هدوم جنب العمارة ، وإنك عندك ٢٣ سنة ، واااااا ...............................
هلا : حميد !
( يبصلها )
هلا ب ابتسامة : طب م انت عيونك حلوة اهو ، ممكن تبصلي بقا وانت بتكلمني ولا سجادتنا عجباك !
حميد وهو باصصلها : جميلة اة
هلا بفهم : هي مين الي جميلة بالظبط
حميد ب ارتباك وهو بيبص للأرض : اااا السجادة السجادة جميلة مشاء الله
هلا : ههههه ماشي
( عند ندى )
هيام بزهول : ايوووه ، دة جريئ اوي إنه يقولك كل دة !!
ندى : امممم
هيام : طب وانتي حاسة ب ايه ؟
ندى بحيرة : مش عارفة ، متشوشة اوي ، كل الي بتمناه إنه مكانش قال كل دة ، شقلب حياتي بجد !
هيام : ولا شقلبها ولا حاجة ، هو لو عاوزك بجد هيروح يكلم اهلك وخلصنا كدة
ندى : بسهولة كدة !
هيام : ايه الصعب فيها ، دة حتى ابن عمك واولى بيكي م الغريب
ندى : انتي عايشة ف مسلسل قديم ، الوضع اصعب من كدة بالنسبالي انا وهو ، انتي ملاحظة إنه قالي كان بيحبني من قبل م اتخطب لأخوه ، دي كارثة ي هيام ، دة غير الي الأستاذ عمله واستغلني عشان كنت مفكراه يامن !
هيام بضحك : لا بس كانت حركة حلوة ههههه
ندى : حلوة ايه بس ، انا كل م بفتكر ببقا بصرخ من جوايا ، ازاي يبوسني وانا خطيبة اخوه ، ازاي امام الي يعمل كدة ، امااااام !!
هيام : الواد عاشق ي بت ، عاشق وواقع لشوشته ، تلاقيه مقدرش يقاوم قربك منه وانتي التانية رايحة تترمي ف حضنه ، عوزاه يعملك ايه يعني
ندى بندم : عندك حق ، انا الي غلطانة فعلاً !
هيام : المهم هتعملي ايه دلوقتي ؟
ندى : ولا حاجة ، هو مش قال خلاص فلتني ، يعني كل دة كانت حاجة فاتت
هيام : يعني هتسكتي ؟