كابوس

(7)

مقعمزه ع الكنبة ونشبح لي الروشن بس ف عقلي نفكر ف مية حاجه من لما نوضت واني مقعمزه ع نفس المكان اللقيت وجهي انظيف واعطوني دواء لي ايدي خديت المرايه الصغيره وشفت روحي فيه دمعتي نزلت واني نشبح لي روحي تحت عيني ازرق وخدودي مجروحه وفمي كان مفوخ وجنب فمي مجروح يعني وجهي متشوه
مسحت دمعتي ونوضت أوقفت افتحت الدولاب خديت حوايج وخشيت دوشة ولبست حوايجي وطلعت درت مكياج عشان نخفي اتأر الضرب لبست ويشاحي وخديت شنطي وطلعت برا الدار وامشيت لباب الحوش بنفتحه
زكية:وين ع خير
اسراء:بنمشي لخدمتي
زكية:ومن سامحلك
اسراء:مش تبي فلوس خليني نمشي وخودي اللي تبيه
زكية:ايووه خليك هكي تفكري صح توا امشي وماطوليش ف المروحه الحوش لازمه تنظيف
هزيت راسي بمعني ايه وطلعت
لفت زكية وشافت غالية واقفه ومعصبه
زكية:خيرك معصبه
غالية:علاش خليتها تطلع اااه
زكية وهيا تخش لصاله:بتمشي لخدمتها خلها تمشي بالك نحصلوا فلوس منها قبل نفتك من وجها وتمشي لحوش راجلها
غالية قعمزت ف جنب امها:الحظ الاحرف اللي عندها حصلت واحد فلوس لا وبتتزوج السبوع الجاي
زكية:توا حتي انتي بتتزوجي بعدها
غالية:ناس فقر اللي بناخدهم اني لا والكارتة حتي انتم فقر من وين بنشري احوايج
زكية:ماتخافيش و اسراء شن ادير
غالية:خيرها المريضه
زكية:بنحصلوا 10الف من راجلها لا ومش هكي بس راح ناخدو فلوس بتاتها ونشري بيهم بتات ليك انتي
غالية ضحكت:حقه يا ماما معناها بنشري احوايج اكتر من اسراء
زكية:اكيد اصلا اسراء تحمد ربي لو امشت بي شنطه وحده
غالية:خلها الحقيره
ولعت زكية التلفزيون وبدت تتفرج
.
.
.
لبست كمامه وخشيت لمستشفي امشيت لي مكتبي الممرضات بدوا يسلموا عليااا بعدها طلعوا قعمزت ع الكرسي واني نتنهد صوت الباب نفتح بس قاعد ماخش حد
غمظت عيوني:ملاك ياريت لو تجيبي قهوة لانه راسي بيتفجر من الصدع.فتحت عيوني وشهقت لما اللقيته امقعمز ع الطاوله قدامي .
مالك:بعيد الشر عنك فيا ولا فيك
اسراء بخوف:انننننت شن ادير اهني
مالك وهوا يسند في ايديه وراه ضهره ع الطاوله:واللهي استاحشتك شن بندير ليك فتره امعادش جيتي اهني
اسراء:وانت من وين تعرف انه ماجيتش ومن قالك انه اليوم جيت
مالك بتسم بخبت:ياملاكي اني معاك وين ماتمشي عيوني عليك
أسراء:لا انت واحد مريض نفسي
وقفت من ع الكرسي وكنت راح نمشي بس شدني من الكرسي وسحبني من ايدي بقوه قعمزت ع الكرسي عيطت بصوت عالي واني نشد ف ايدي ودموعي ينزلوا :اءءءءءءءءءءء ااااه
استغرب مالك وركز ع ايدي :اسراء خيرك ايدك فيها حاجه
قعدت نبكي بدون مانحس عليه شد ايدي حاولت نسحب ايدي بس ماقدرتش وزدت توجعت
مالك وهوا يفنص فيا:بلا حركه زايده
خوفت منه قعدت نبكي حط ايديه ع كمي وبدي يرفعةفيه بشوي لين نصدم وقت شاف الحرق
مالك وهوا مركز عليا وع دموعي:من دار فيك هكي
تكلمت وشهقت يطلعوا من البكي:ماحد
مالك بصوت عالي:من ___دار __فيك __هكي كلمه هياا
اسراء:نحرقت من الكوشه
مالك وهوا مش مصدق:متأكده
اسراء:ااااااااا ايه
ركز مالك ع عيني اللي في لون ازرق هادي تحتها
قرب يده وحاول الكمامه وهوا يشوف لي وجهي
حس ان فيه شي غلط دخل يده ف جبه وطلع منديل وشاف طاسة الميه اللي ع طاوله خدها وصبها ع وجهي بقوه لين شهقت:تي شن ادير انت يامهبول مريض نفسي انت اااه فهمني شن تحس
حطيت ايديا ع وجهي واني نحاول نغطي وجهي
حط ايديه ع ايديا وبعدهم :خلي ايديك لوطه احسن ليك
أسراء:انت شن تبي مني نبي نفهم اني
مالك بعصبيه:ايديك ___لوطه
خوفت منه وشديت ايديا ف بعض خدي المنديل وبدي يمسح ف وجهي المبلول بدي المكياج يتحاول واتآر الضرب توضح لين نصدم مالك من وجهي
مالك حط يده ع وجهي وهوا يمس ف الجروح:من دار فيك هكي
اسراء :قولتلك ماحد اني طحت
شد وجهي بقوه وهوا يضغط عليه :قولتلك من دار فيك هكي تكلمي احسن ماندفنك ف مكانك
اسراء بوجع:مرت عمي وبنتها
طلق وجهي وهوا يشبحلي واني نمسح ف دموعي ونتنهد ناض أوقف وقال:نوضي امشي معااي لدكتور
اسراء:مش ضروري
مالك وهوا يشد في يدي:قولتلك نوضي
أسراء بوجع:اءءءءي توجع فياااا
طلق ايدي وقال:شوفتي انتي تعصبي فياا امشي قدامي لدكتور
طلعت قدامه وهوا وراي امشيت لي دكتور الحروق
شاف وجهي وعطاني دواء يخفي اتآر الضرب بعد كمل طلعت ماللقيتش استغربت بس اتنهدت وامشيت لي مكتبي
...........................
سفيان :يااام لكن كترتي معااها
زكية:خلها تستاهل
سفيان:مفروض ماخليتهش تطلع
زكية:خلها تطلع مليت وهيا 24ساعه قدام خليقتي
سفيان:انشاءالله ربي يستر
صوت الباب يخبط بالقوي
سفيان:من جانا
زكية:والله مانعرف
ناض سفيان بيفتح الباب:تي باااااهي بااااهي بشوي ع الباب
فتح الباب وحصل بوكس ع وجهه طاح لوطه وهوا شاد خشمه اللي قعد ينزف
زكية جاته تجري قعمزت ف جنب سفيان:يمه ولدي
رفعت عيونها ف ياللي واقف قدامها:انت مني وشن ادير خش علينا ف حوشنا ومتاهجم ع ولدي
حط ايديه ف جيوبه:اني مش غريب اني من اهل الحوش ولا شني ياسفيان
هز راسه سفيان:ايه ياللواء
زكية :شن تخرف يأسفيان
مالك وهوا يقرب ويشد ف سفيان من تيشرته ويسحب فيه :اني توا نقولك شن يخرف
تشد ف مالك من يده وتضرب فيه ع كتفه:اطلق ولدي اطلق ولدي اني قوتلك
مالك قعمز سفيان ع الكرسي وشد زكية من يدها:انتي قاعده تغلطي ف شخص مش قده بس اني نعرف نربيك .سكت شوي وقال : ياخوله
زكية حست بي ايدين شدوها من تالي لفت شبحتلهم
اللقت تلات نساوين لابسات جيش وكانت شخصيتهم ضخمه
زكية:خيركم من انتم شن تبوا .
مالك خدي الحبل وربط سفيان ع الكرسي:دخليها داخل ديري اللي قولتلك عليه وعندها حتي بنت داخل تصرفي معاها
هزت راسها واشرت عليهم وداخلو زكية داخل شافتهم غالية كانت بتهرب بس شدوها وداخلوها لدار وسكرن بابها وبدي يطلع كان صوت عياط زكية وغالية
ضحك مالك وشبح لي سفيان ونزل فيه ضرب:اني شن قولتلك اللي يمس اسراء مسني اني صح
سكت سفيان ضربه مالك:صح ولا لا
هز راسه سفيان وهوا يبكي:ص_ح صح
مالك:بس امك شن درت حرقتي مرتي وشوهت وجها صح ولا لا
هز راسه سفيان:ص_ح
زاد سفيان يبكي وهوا يسمع ف عياط امه واخته:حررام عليك اللي ادير فيه فينا
ضحك مالك:ههههههه قولتلي حرام واللي دارته امك ف مرتي مش حرام لكن اني نعرف انربيها يا خوله خووووووله.بصوت عالي
طلعت خوله تجري:نعم ياللواء
مالك:جيبهلي
خوله :حاضر. وامشت داخل طلعت شاده زكيه هيا واللي معاها بس غالية خلنها ف الدار
حطوا زكية قدام مالك كان وجها كله دم وشعرها صايره فيه حرب من الضرب
مالك وهوا يولع ف الدخان:اني اللي درتيه ف مرتي
مش راح نقدر نعقبك عليه اني بس خوله عقباتك
زكية بوجع وصوت مش مسموع :عن من تتكلم انت اني مانعرفكش مش بنعرف مرتك
ضحك بهزوه:كيف ماتعرفيش مرتي وهيا تسكن معاك ف الحوش
فنصت زكية فهمت انه قصده اسراء:اسررررراء
ضحك مالك وبدي يدخن:ايوووه سريوتي انتي شن درتيلها ضربتيها وحرقتها طبعن الضرب حصلتي نصيبك من خوله والواضح انها ماقصرتش معاك
لكن بالنسبة لي الحرق
بعد الدخان عن فمه وحط ع يد سفيان اللي بدي يعيط زكية فنصت قعدت تبكي وجت قربت لي رجلين مالك وهيا تبوس ع سبيدروه:لا باللهي عليك سامحني خلي ولدي هوا مدخلش اني حرقتها
مالك وهوا يدف فيها برجله وقاعد حاط الدخان ع يد سفيان:اني نعرف مدخلش بس انتي مراه واكيد مش راح نمسك بس نقدر نصفي حسابي عن طريق ولدك يعني راجل لي راجل
زكية:وراسك خلاص واللهي اخر مره اللي تبيه يصير معادش راح نمس أسراء انت اطلق ولدي
اتنهد مالك وهوا يبعد ف الدخان ويشبحله بقرف لوح الدخان جنب زكية:حتي دخاني اتقزز من ولدك
تصدقي المهم انتي اصلا معادش راح تقدري تمدي يدك ع اسراء لانه هيا توا مش بروحها اني وراها
ف أحسن ليك انه أسراء يوم العرس نشوفها وتكون الجروح اللي ع وجها والحرق اللي ع جسمها مختفي لانه بوقتها بنقتلك انتي وصغارك تفهمي فيا
هزت راسها زكية وهيا تبكي تخطها مالك وطلع ولحقته خوله واللي معاها ......
زكية تبكي قربت من سفياني وهيا تهز فيه :سفيان
سفيان يبكي:قولتلك من الاول ماتقربيش منها قولتلك عادي يقتلنا هدا لكن انتي ماصدقتينيش
زكية:من هدا يا سفيان
سفيان:هدا #كابوس حياتنا ياام حتي لو بيعطينا فلوس راح يقعد ينتقم منا عشان اسراء
زكية قعدت مصدومه ونادمه ع ياللي دارته ف اسراء
طلعت غالية وهيا تبكي وقربت حضنت امها .
.
.
.
نزلت من السياره:هياا باي صحيتي ملاك ع التوصيله
ملاك:ولو اسراء مش بينا ياهبلا احني صاحبات
اسراء ابتسمت:تمام بااي توا
ملاك:افتحي تيلفون بيش نكلمك بعدين
اسراء:والله قاعده من غير تيلفون
ملاك:علاش تيلفونك وين
اسراء:قصة طويله المهم سلام توا نتلاقوا
ملاك:تمام سلام
سكرت باب السياره وكنت وامشيت جيهة باب جنان
بس حسيت في شخص يشبحلي لفيت وجهي ونشوف لشارع بس كان فاضي اتنهدت فتحت الباب
وخشيت داخل شوفت باب الحوش من داخل مفتوح استغربت دفيت الباب وخشيت داخل شهقت من المنظر اللي نشوف فيه قدامي زكية وبنتها ولدها حالتهم حاله
اسراء:خيركم شن صار من دار فيكم هكي
زكية:كله منك من يوم خشيتي لحوشنا واحني أيامنا كلها سود
سفيان:يااام خلاااااااص راهو جسمي معادش يتحمل اكتر
غالية تبكي:حتي اني هااا شوفي كيف خلوني افرضي عرسي يتحدد .
قربت من سفيان اللي قاعد مقعمز ع كرسي وشاد ايده المحروقه
اسراء :سفيان شن فيي من دار في ايدك هكي خيرها محروقه
سفيان ناض أوقف بصعوبه:مافيه شي غير اخطيني بس
وكان راح يمشي لداره بس ارجع وقال وهوا يشبحلي:جاهزي روحك ياسراء عرسك السبوع الجاي واحسن ليك لسبوع الجاي مانبيش نشبح وجهك .وسكر باب الدار بقوه
اني دموعي نزلوا رفعت ايدي ونمسح فيهم خلاص معادش راح نبكي نصيبي هكي اني خسرت عيلتي اللي تحبني مش شخص تصنع الحب ليا عشان فلوسي
زكية:انتي اسررررراء
شبحتلها بخوف :نعم
زكية :وراس سريوه تعالي عالجي جروحي
اني مصدومه منها سريوه وتكلم فيا بأسلوب ياربي نبي نعرف شن هوا اللي صار اهني
زكية:تسمعي فيااا شن قولت
هزيت راسي وجيت قعمزت ف جنبها وبديت نعالج
فيهااااا
.
.
.
.
.
فتح باب الحوش سمع صوتها :تعالا يامالك
خش لصاله شاف فتحية وعمته مقعمزه ناضت واقفت وين شافته وبدت اتزغرط وجت تجري حضنته طبعآ مالك كان يضايق من هالحاجات
مبروكه:واخيرا واخيرا بنشوفك عريس
مالك:عمتي مش اول مره نتزوج
مبروكه بعدت عنه وشدت خدوده مالك وهيا تقرص وتحرك فيهم:لا والله بالنسبه لياا هادي اول مره
بعد مالك يدين عمته وهوا يوقف يحاول يبتسم:انتي أمته جيتي
مبروكه:والله اول ماتصلت امك وحكتلي قولت لازم نجي .وقربت باست خدوده مالك الاتنين ورجعت حضنته مالك يشبح ف فتحية ومفنص
فتحية خافت من مالك وقالت بصوت واطي لي مالك:ماقدرتش بتزعل لو ماقولتش الله غالب
بعدت مبروكه وشبحت لي فتحية :اكيد بنزعل واللهي كان درت عرس بدون ماتقول كنت معادش كلمتك ولا جيتكم لين نموت
مالك:تي شن هالكلام ياعمتي بعدين اني مش داير عرس
شهقت مبروكه بصوت عالي:شننننننننننن هيااااااا
لفت شبحت لي فتحية:بجدياات
فتحية :اني نبي لكن هوا رافض
رجعت شبحت لمالك:لا والله لا والله مانرضا بيها انت اخر ماقعد من ريحة خوي ابوبكر ماديره الا عرس وعرس كبير تتكلم بيه الناس كلها وبعدين
اني جهزت حتي بطاقة العرس
مالك عصب:تي اي بطاقات عرس تحكي عليها ياعمتي اني قاعد محترمك عرس مااانبيش اندير واللي مش عاجبه الباب قدامه وخبط ايده ع الحيط وطلع
شهقت فتحية ومبروكه
فتحية:يامااااالك ياامالك غير تعالا
مبروكه ودموع ينزلوا :هادي اخرتها ولد خوي يلزني من حوش خوي
فتحية:يامبروكه انتي تعرفي مالك عصبي ومايتحملش ومايعرفش شن يقول وقت يعصب
مبروكه:بس هدا مش معناته يلززني اني نبي نفرحه بيه واخيرا بيتزوج لكن الحق عليااا اللي بدلك بالفول ، بدله بقشوره.
خدت شنطتها وطلعت وفتحيه وراها تنادي فيها وتتاسف منها بس بلا فايده ركبت ف سيارتها وامشت
مبروكه
فتحية خشت لي حوشها داخل لقتها سوسن وفي ايديه سفرة القهوة:يااام وين عمتي
فتحية وهيا تقعمز ع صالون:روحت
سوسن:علاش درتلها القهوه
فتحية:كله من مالك ربي يهديه طول اللسانه معا عمته
سوسن:معقوله زعلت من مالك ماهو هوا ديمه يطول ف لسانه معا الناس كلها
فتحية:بس هالمره بزايد هالمره
سوسن حطت سفرة القهوه ع الطاوله:مالك هدا بيهبل لكن انتي مادوريش ماما توا يرضيها مالك
فتحية:نشاءالله
.
.
.
مقعمز ف المعسكر ويشوف لي الشباب اللي يدربوا
قعمز جنبه علي:خير ياللواء ف حاجه مضايقتك
طلع الدخان من فمه ونفخ ف الهوا:اليوم كترت كلام معا عمتي
علي:بااهي وين الجديد مفروض تكون تعودت عليك
حك شعره مالك وقال:لا هالمره كترت هلبااا
علي:وشن السبب
مالك حط الدخان في فمه شفط منه وطلع ورفع راسه وهوا يشوف ف الدخان اللي يطلع من فمه فوق:عشان العرس تبيني ندير عرس
علي:اوو ف هادي غلط منك هيا تبي تفرح بيك هيا مش مصدقه انك بتتزوج
مالك:بس اني مش قادر اندير عرس عيب نحسها مش حلوه ف حقي شن بيقول علياا خالي وين بيسمع مش بيدكر بنته
علي:وكان اذكرها انت قعدت من بعد وفات ولدك ومرتك مسكر موضوع الزواج لكن توا تغير رأيك بعد شوفت الدكتوره وبعدين هيا شن ذنبها ماديرش عرس ماتفرحش زي الناس ف هاليوم اللي كل وحده تستناااه فيه وبعدين هيا يتيمه يعني راح تحس بالناقص من دونهم
مالك :ومرت عمها مش كويسه فيها
علي:هاااا شوفت توا هدا وين بتدمر نفسيتها
مالك ناض أوقف ولوح الدخان عفس عليه برجله.
علي:وين ياللواء
مالك:بندير دوره وبنروح نرقد ف الحوش انت خلي عيونك ع شباب وشوف شن ناقصهم وقولي
علي هز راسه:تم
طلع مالك ركب ف سيارته وامشي .
.
.
.
.
خشيت لدار وسكرتها عاليه رقدت ع السرير واني نبكي ع الدنيا اللي ماشوفت فيها خير عمري ماتوقعت راح نتزوج غصب عني أو نتزوج شخص تاني غير سفيان اللي طلع يكذب عليااا ف كل شي
فتحت الكمادينو وطلعت منه بوكس صغير فتحته وكانت فيه مجموعة صور لياا اني وسفيان من اياام بديت علاقتنااا لسنه هادي
زدت نبكي واني نشوف ف صور الهداية اللي هديتهم ليه .....
.
.
.
طق طق طق
نفتح الباب:اهلين مالك كيف حالك
مالك:تمام الحمدلله وانتي كيف حالك
سارة:الحمدلله اتفضل خش داخل
مالك :عمتي وين
سارة:داخل ف دارها خش
خش مالك داخل وقعمز ف الصاله
سارة:توا نمشي ناديها
قعد مالك مقعمز وهوا يسمع ف صوت عمته اللي تعيط وتقول:ماانبيش نشبح وجهه اطلعي قوليهله
سارة :يا ماما عيب يسمع فيك
مبروكه:وشن اللي داره هوا مش عيب
مالك :سامحيني ياعمتي
لفت سارة تشبح ف مالك اللي خش داخل وقعمز جنب رجلين مبروكه:اني اسف ونعرف اللي درته عيب بس انتي تعرفي اني وين نعصب معادش نعرف شن نقول
مبروكه:ايه واضح ماتعرفش شن تقول
مالك شد ايدين مبروكه وباسهم:باهي اشبحيلي
مبروكه:مانيش ماتحاولش بكل معاي
مالك:معقوله يا عميمتي هكي اني متبيش تشبحيلي
لكن عندك الحق اني غالط والله معادش تشوفي وجهي ف حياتك كلها لين نموت
واقف مالك بيمشي لكن شادته من ايديه :ابعيد الشر عنك انتي من ريحة خوي الغالي
رجع قعمز جنب رجلها وقال:يعني سامحتيني
رفعت ايديها حطتهم ع وجهه:اني مانقدر نزعل منك لا والله مانقدر ياوليدي
ابتسم مالك وقرب باسها ع راسها وناض اوقف:معناها ياعمتي رااه معادش في هلبا وقت كان بتوتي روحك
استغربت مبروكه:لي شني بنوتي
مالك:للعرس مش تبي عرس خلاص اني قرارت ندير عرس
ناضت مبروكه تزغرط وتحضن ف مالك اللي يضحك عليها :الحمدلله انك وافقت الحمدلله اصبر بنوريك حاجه
مالك استغرب :شن هيا
بعدت عنه وهيا تفتح ف الدولاب وطلع منه ف بطاقة ومدتها ليه
ضحك مالك:اووف أمته لحقتي ليك ساعه حرجانه وماتبيش تحضري العرس
مبروكه:هادي من اول ماسمعت انك بتزوج احجزت فيه وطلبت منها اديرها هكي عشان انت ف الجيش وهيا دكتوره عجبتك
هز راسه مالك:ايه عجبتني بارك الله فيك ياعمتي
مبروكه:شن بجميلي هدا انت كيف ولدي
بأس ع راسها وقال:هيا اني بنروح
مبروكه:ف حفظ الله توا اني بنمشي لي امك عشان نوزعو بطاقات العرس
طلع مالك من حوش عمته وهوا يركب ف سيارته
ويسوق ولع دخان وبدي يدخن وهوا يفكر اللي داره صح ولا غلط
.
.تسريع الأحداث 🌗🌘
.
.
.في الحلقة القادمة 🤞🪐#الكاتبة_عويشه
........... ........🪐............
نشاءالله تعجبكم الحلقة والرواية حاجه جديده ومختلفه
2022,6,7.❤