كابوس

                                        (3)

يرن يرن يرن
فتحت عيونها وهيا تسمع ف صوت تيلفونها
حطت التيلفون ع ودنها :الووو
سفيان:تي وينك ماترديش من امبكري نتصل بيك
اسراء بلا نيه:كنت راقده نعم شن تبي
سفيان:علاش تكلمي فيا هكي
اسراء:اسأل روحك
سفيان:معقوله زعلانه ع امبكري ياعمري اني مانقدرش ندخل بينكم
اسراء:انت ما سمعتش كلامها قهرتني هلبااا
سفيان :معاش اللي يقهرك ياعمري توا نوريها هالكلبه
تبي تربيه من اول وجديد
أسراء:انت تقول ف نفس الكلام من سنين ومادرتش حل
سفيان:عيب عليك ياعمري تقولي هكي انتي تعرفي غالية شن عند امي تحبها اكتر ماتحبني مانقدرش نعاركها ولا نضربها بس واللهي واللهي توا نوريها
اسراء اتنهدت:باهي وعلاش اعطيتهم الفلوس انت قولتلي انك محتاجهم بس طلع العكس طلعت عمتي واختك هما اللي خدو الفلوس
سفيان:ياقلبي امي محتاجه وطلبت مني فلوس تحشمت انقوللها ماعنديش وبعدين فلوسنا واحد صح
اسراء:بس هما ديما يصرفوا فيهم ع الفاضي تخيل غالية شرت احويج اني اللي فلوسي مانشري بيهم وناقصني مية حاجه بعدين حسابي في المصرف يصفر
سفيان:خلاص ياعمري توا اول مايعطوني مرتب الخدمه نشريلك اللي تبيه
اسراء:ع فكره امك تبي احوايج لتقديم ع الناس
سفيان:اااء نعرف توا نمشي ناخد بدين من المحل
اسراء:دين لا تعالا اني عندي مبلغ بسيط اشري بيه
سفيان:تعرفي ياعمري مش راح ننسى جميلك
أسراء:بس بشرط
سفيان:شن هوا
اسراء:ضروري تكلم امك ع موضوعنا وكأنك ع الحوش عادي نسكنوا اهني
سفيان:اءءء اهني بس مش راح ناخدو راحتنا
اسراء:لا عادي نقعدو فتره اهني لين نحصلوا حوش
ومانبيش اعتراض سفيان
سفيان:بااااااه حاضر خلي تم خطوبة غالية ونكلم امي
اسراء:تمام صكر توا بنوض انجهز لناس
سفيان :تمام ياروحي سلام
حطت التيلفون ع السرير وهيا تمسح ف وجهها وتذكر ف اللي صار معاها الصبح :ياربي شن ندير معا هالمختل عقلين احسن حاجه ناخد اجازه هاليومين بالك ينساني اوووف اني خايفه ايدير شي فيااا اني لازم نغصب سفيان يتزوجني ونسكر جميع الفرص عليه لأنه اكيد راح يفوتني لو نتزوج لانه من تصرفاته امبكري شكله واحد صايع يارربي استر عليااا بنوض توا اتجي عزوز القايله توريني
ناضت خشت للحمام
..................
زكية:خودها ع قد عقلها قال شني تتزوجها لا وتسكن معاي انت خاطي بنت خالتك ماتحلم اني عطيت كلمه فيها وبعدين بوها فلوس ويبدأ يدعم فيك
سفيان:نعرف ياام اصلا اني كاره نشبح ف وجها غير عشان فلوسها بس كان هدا راهو ربيتها ع رفع يدها ع غالية
زكية:لا انت رد بالك خليك الحنون الطيب معاها وخلي الباقي عليا
سفيان:باااهي اني بنطلع للمربوعه الناس قريب توصل
زكية:باااه الفرخه سراء عطتك فلوس
سفيان:قالت بتعطيني خلي نمشي نشوفها
زكية:تعالا هني وين بتمشي البنت ف دارها انت اقعد اني نمشي نجيبهم
سفيان:وعلاش كأن ف دارها نمشي حتي اني
زكية:سفيان بلا مايعه ولدي ونعرفك اصياعتك معا البنات رد بالك اديرها معا بنت عمك بعدين نحصلوا فيها وتقعد ف رقبتي انت غير تزوج بنت خالتك اول راجل يجيها  طول بنعطيها ليه خلي نفتك من وجهها
سفيان:احسن نفتك حتي اني منها هيا اني طالع
زكية:باهي واني بنوض انجهز لناس
.
.
.
ف الليل بعد الناس روحت وعجبتهم غاليه طبعآ اني جهزت كل شي وكانت غالية هيا اللي تقدم عليهم وبعدها هيا خشت ترقد واني نظفت الحوش والمطبخ وبعد فتره خشيت لي داري واني نشبح من روشن :قاعد مروحش الساعه قريب 4الفجر وهوا قاعد مروحش يستر ربي لو كان رجع لي زفت اللي يشرب فيه
شوفته وهوا نزل من سيارته ومش قادر يوقف ع طوله فتح باب الجنان كان راح يخش بس طاح لوطه وقعد يضحك طلعت نجري من داري فتحت باب الحوش واني نشوف فيه مقعمز ويضحك
جيتها نجري قعمزت ف جنبها :ايامك السود مش قولت انك وقفت الشرب يا سفيان
رفع وجها فيا وقعد يضحك:اوووو شوفوا مني قدامي هههههههه الدكتوره اسراء اللي ديما تهين فيا بفلوسها
اسراء:انت شن تخرف سفيان نوض أوقف قبل لا يشوفك حد
شديت ايده وكنت بنوضه بس  دفني وطيحني لوطه:تي اخطيني يافرخه وانتي زي الكوله لاصقه فيااا فوتيني فوتي امي معادش تكلمني
وقفت من جديد وقربت منه:انت ماتعرفش شن تقول بلا وعي لانك هياا نوض سفيان حبيبي خلي ندخل لي دارك
سفيان:انتي ماتعرفي شي يا اسراء لو تعرفي كل شي راح تكرهي الساعه اللي حبيتيني فيها بس كل شي ف وقته حلو هههههههههههه
كمل كلامه بضحك خلني نخاف منه هدا مش سفيان اللي حبيته متغير هلبااا زعما هدا وجهه سفيان الحقيقي اتنهدت وقربت منه حطيت يدي ع ضهره ورفعت يده فوق كتفي وحاولت نرفعه فوق ونخليه يوقف طبعآ سفيان كان ضعيف يعني مش رزين هلبا عليااا دخلته داخل الحوش وفتحت باب داره وخشينا داخل وهوا ايغني🎵🎵🎵🎵
حاولت ايده من ع كتفي وقربت لسرير نقص عليه بقوه اني شهقت :سفيان انت كويس
سفيان يضحك:ههههههههههههههه اني في خير خيري
رميت اسبيدروه وغطيته بالورغان وكنت راح نطلع بس سمعته يتكلم:تعرفي انتي اكتر وحده تغيرلي ف جوي
رجعت سكرت الباب وقربت منه:من هيا
سفيان يضحك:نورا اااااه يانورا تعرفي وين مانمشيلك ف الاستراحه تخليني نحس ف روحي بنطير
تجمعوا دموع ف عيوني يعني سكير وحشيش لا وطلعت تمشي لي مكانات الدعاره واني اللي قولت
انك تحبني ومستحيل ادير حاجه زي هكي
بعدت عنه وطلعت نجري من الدار وامشيت لي داري واني نبكي ع حالتي علاش هكي وين مانقول كل شي بيتغير اتصير ينقلب كل شي ويرجع أحرف من الاول توا شن بندير قعمزت جنب الباب واني انحط ف وجهي ع رجليا ونبكي امشي اليل كله نبكي
لين رقدت ع الارض بدون مانحس
.
.
.
.
نزل من سيارته وفتح باب الحوش وخش داخل
فتحية:بااهي اللي روحت
ضحك بفرح وين سمع صوتها ولف شافها واقفه قدامه قرب منها بسرعه وحضنها وهوا يضحك:استاحشتك ياام طولتي هلباا
فتحية وهيا تضغط بيدها  بقوه ع ضهره وتبكي:توقعت اتجيني غادكيا
مالك:سامحيني ياام بس ماقدرتش
بعدت فتحيه عنه وهيا تشبحله شدت ايديه وقربته قعمزو ع المندير:نعرف ياولدي نعرف المهم اني روحت مش راح نرجع والحمدلله الدكتور قال انه وضعي كويس والعمليه ناجحه
مالك اضحك ومد رجليه ع طولهم وحط راسه ف حضنها ع رجليها وهيا حطت ايديها ع شعره:ااااه يام الحوش بلاك فاضي انتي و المهبوله الا وينها مش اهني
فتحية:استنتك هلباا لين نعاسها النوم لانه وصلين من امبكري غير انت الله يصلحك مأخر ف المروحه
مالك خدي يدها اللي ع شعرها باسها :معليشي بس ضغط الشغل
حركت ايديها ع شعرها وهيا تلحظ ف حاجه ع رقبته وبعدت رقبت الجاكه اللي لابسها وهيا تشوف في الوشم اللي ع رقبته حطت يدها عليه:علاش هكي يامالك شن قولتلك اني ع هالوساخ اللي ادير فيه ع جسمك
شد مالك يدها اللي ع رقبته وناض قاعمز وهوا يساوي ف جاكته وهوا ساكت
فتحيه وهيا تتنهد وتحط ف يدها ع قلب مالك:أمته ياولدي بتنساه اللي صار صار الحادث صاير من7 سنين وانت قاعد شايل ف قلبك بديت تتغير يامالك انت مش مالك ولدي اللي ديما يضحك ويلعب ويبصر معانا انت حتي خواتك قعدت تعامل فيهم بجفاء علاش ياولدي عيش حياتك وانساه
مالك:مانقدرش يام طول ما ياللي قتل بوي وخوي وصغاره  ومرتي ولدي حي مش راح نقدر ننسااه
فتحية وهيا تبكي:ياوليدي اللي صار صار وهدا قدر ربي وبعدين من مني بتاخد التار وانت متعرفش صاحبه مني
مالك:من قالك مانعرفش بس اني صابر وانرجي ف ياللي ف بالي ايصير وبعدين خلاص صكري الموضوع وفكينه من النكد اني فرحان انك مروحه
كمل كلامه ورفع ايديه يمسح ف دموعها وباسها من راسها
فتحيه بضحكه:كان تعرف شن جبت ليك من دبي
ابتسم مالك:شن حاجه مليحه شكلها
فتحيه:جبت ذهب لي عروستك
مالك تحاولت الابتسامه:اي عروسه
فتحيه:اني خلاص مستحيل نخليك هكي قرارت انك تتزوج وبنبدا دورلك ف بنت الحلال وماتحاولش تعترض بكل
اتنهد مالك وابتسم:ومن قالك بنعترض وبعدين مش ضروري ادوري عليها بنت الحلال
فتحيه مصدومه :لحظه لحظه يعني انت مش رفض انك تتجاوز .يولولولولولولي 😁زغرطت بصوت عالي وقربت حضنت مالك اللس ضحك عليها:الحمدلله ياربي الحمدالله واخيرآ ولدي بيتجاوز ونشوف صغارك من جديد
تحاولت ابتسامته وبعد عن امه حست فتحيه بي وجهه مالك اللي تغير بسرعه غيرت الموضوع:المهم من هيا بنت الحلال نعرفوها ياولدي احكيلي عليها
مالك رجعت الابتسامه بس بخبت:هيا.................
.
.
.
.
نوضت الصبح ع صوت المنبه اااه ياضهري بينكسر نحس فيه نوضت طفيت المنبه خشيت للحمام درت دوش وفرشيت اسنوني ودرت عليا الوضوء وطلعت
صليت وقريت قرآن واني ندعي لي ربي يفرج عليا ويخليني نعرف شن اندير ف هالقصه كملت ونزلت لوطه واني نشوف فيهم يفطرو بس كالعاده سفيان راقد
زكية:انتي وقت ع خدمتك رااه
اسراء:اخديت اجازه لي يومين
زكية:وعلاش الاجازه وانتي اطيحي الحايط
اسراء:علاش الواحد ماياخدش الاجازه الا لو كان مريض نبي نتريح مليت
وامشيت عنها للمطبخ واني ندير ف نسكافي لانه راسي بيتفرج خش عليا سفيان:سرو احسبيني معاك ف طاسه راسي بيتفجر
اسراء:تعالا دير بروحك عندك ايدين
سفيان استغرب من كلامها:انتي امديره لي روحك شن فيها كان درتيلي معاك ماهو انتي ديما اديريلي شن ياللي اتغير
لفيت بنشبحله واني متقززه من منظره معقوله يا أسراء انتي الدكتوره اتحبي شخص هكي ايدير ف المحرمات كلهم
ركز سفيان ع عيونها الحمر واللي منفوخات شك ف روحه انه امقايل كلام وهوا سكرن امبارح قرب وحط يده ع وجهي بس بعدتها عني :عمري اسراء خيرك ياعيوني فيك شي
اسراء بهزوه:ع اساس ماتعرفش شن فيا ولا كأنك امدير شي امبارح
ف هالحظه اذكر سفيان كلامه زاد قرب مني وحط ايديه ع الرخامة عشان مانتحركش اني خفت بديت نحاول نبعده ونشوف لباب خايفه:حاول عني توا يشوفنا حد
سفيان وهوا قريب من وجهي:انتي تعرفي كويس يا اسراء انه وقت انكون سكرن نبدأ ناخد ونعطي ونص كلامي كدب
خبطته  بأيدي ع صدره بقوه ودمعه من عيني نزلت:كدب صار كدب انك مدمن ع السكير والحشيش
كدب والاستراحه اللي فيها المدام نورا كدب صح
زاد قرب من وجهي وهوا يتكلم ف جنب وذني:انتي تعرفي انه نفقد ف السيطره ع روحي وقت نشرب
ومن اول يوم جيت فيه اهني تعرفي انه نشرب ورضيتي بيا وخليتي قلبك يحبني
عيوني ف الباب:بس قولت سكير بس وراح تسيبه مش حتي دعاره
زاد قرب وحضني وهوا يحط ف راسه ع كتفي ويشم ف شعري بدي يحس انه بديت نهدا بشوي:ماافيش بنت بتاخد مكانك يا سريوتي انتي ف قلبي وعقلي وعيوني وبالنسبه ع امبارح اني كنت صح سكرن بس مش هلبااا يعني نعرف اللي ندير فيه وقولت هكي عشان نقولك انه قولت لي امي ع موضوع زواجنا وفقت
انصدمت من كلامه:كيف يعني اللي صار امبارح مقلب درته فيا
سفيان هز راسه وهوا قاعد حضني:يس مقلب صغيرون فيك
ضحكت ودموعي نزلوا ولفيت ايديا عليه واني نحضن فيه بقوه :الحمدلله يارب واخيرآ حلمي بيتحقق وبنتزوجو
سفيان:شكلك مش خايفه حد يشوفنا لو تبي يعني ف الليل نقدرو ناخدو راحتنا اكتر
بعدت عنه واني نشهق ضربته ع كتفه بعد عني وهوا يضحك:ههههه تي خيرك نبصر عليك ياهمي المهم ديريلي معاك نسكافي
ابتسمت واشرت ع عيوني:من العين هادي قبل هادي
سفيان :يسلموا عيونك الحلوه
سمع صوت زكية اتنادي عليه
سفيان:اني جاااي يااام
غمزلي وطلع برا المطبخ اتنهدت واني ندير ف النسكافي:اااه ياروحي معقوله نشك ف حبيب عمري
واخيرا راح نتجاوز ومن مني حبيبي قلبي ااااه الحمدلله
......................
زكية:ها شن صار معاك درت اللي قولتلك عليه
سفيان وهوا ياكل :ايه درته كله بس نبي نعرف انتي كيف اعرفتي بي اللي صار امبارح
زكية ضربته ع ضهره
سفيان:ااااااءءءءءء يام بشويه قريب موت اختناق
زكية:قداش مره قولتلك الوساخ معادش تاخد والصايعات اللي تعرفهم احسن ليك تفوتهم ولا واللهي يا سفيان نتصل بي ارداع ونقوله ولدي تاجر مخدرات وسلاح واعضاء ودعاره
سفيان فنص:لا يااام مستحيل اديرها اني ولدك
زكية:ادير ف الحرام وتبيني نسكت  انت امبارح ع شوي خربت علينا بطاقة المصرف كان ماا اني سمعت كلامك ليها كنت توا تشحد ف الشارع  وبعدين يا سفيان انت تعرفني كويس اني ع الفلوس انبيعك ونبيع حتي اختك عشان هكي خليك رزين والوساخ اللي دير فيه بطله
والا واللهي واللهي ...........
قطع عليها:خلاص خلاص بلا حلف حاضر حاضر اللي تبيه اني فيه
زكية:ايووه خليك هكي تسمع ف الكلام
........................
بعد مرور يومين
نزلت من السياره واشرت لي سفيان بمعني باي
وخشيت لي المستشفي سلمت ع الممرضات
وع الدكاتره وخشيت لي غرفتي حطيت شنطتي
وطلعت شوفت الحالات
الدكتور قيس:دكتوره اسراء تعالي شوي
اسراء:اتفضل دكتور قيس
الدكتور قيس:تعالي معاي لي غرفة العمليات شوي
اسراء:حاضر .وامشيت معاه وخشيت لي غرفة العمليات كانت فاضيه استغربتها:علاش فاضيه
الدكتور قيس:بصراحه اني جبتك اهني باش نتكلموا ف موضوعنا
اسراء:موضوعنا اي موضوع
الدكتور قيس:يا أسراء الموضوع اللس كلمتك عليه اني نبي نخطبك
اسراء:اااااها ايه ذكرت معليشي يا دكتور قيس بس الموضوع امشي من بالي بكل
الدكتور قيس:كيف امشي من بالك شن قصدك بيها هادي
اسراء:ماقصدي شي بس انت مجرد صديق وزميل يادكتور قيس لا اكتر ولا أقل
دكتور قيس:نعم كيف هادي قصدك انتي ترفضي فيا
اسراء:ايه أفهمه كيف ماتحب
دكتور قيس:اني ترفضيني انتي
اسراء بعصبيه:ايه نرفضك وعلاش مانرفضكش
شدني من يدي بقوه وضغط عليها :انتي تعرفي من تكلمي شكلك انسيت انه هادي المستشفى ليا
اسراء:مش هامني لا انت ولا المستشفى امتاعك وبعدين بعد يدك عني
وبديت نحاول ندفه بس هوا كان يزيد يقرب مني ويضغط ع يدي لين فجأه نشوف فيه طايح لوطه وفمه ينزف رفعت عيوني شوفته واقف ولابس بدلته العسكريه وعيونه يطلعوا ف نار
ياربي هدا شن جابه بس باهي اللي جي
أوقف قيس وقرب منه كان راح يضربه بس بحركه سريعه لوي يده وراه ضهره وضرب وجهه ع الحايط
اني شهقت شن هالمتوحش نزل فيه ضرب ضرب لين شوه وجهه بعد عنه وشبحلي اني خوفت لما شوفته يقرب مني بيشد ايدي بديا نبعد فيها عنه سحبها بقوه وهوا يفنص فيا هديت وخليته يشد يدي شوفته يرفع ف كمي ويشوف ف ايدي صوبعه مطبوعة فيهم وكانت لونها أحمر ركزت علي عيونه اللي نفتحوا وهوا يفنص اني خوفت ياربي هدا بيدير كارته شوفته يطلع ف سلاح ويسحب فيه
اسراء:انت شن بدير حول عنه
بدون مايتكلم فرغ في راسه اني عيطت ونحط ف ايديا ع وذاني وقعمزت لوطه وقعت نبكي ولما فتحت عيوني شوي شوفت قيس غارق ف دمه شهقت واني نشوف لي الارض اللي كلها دم وحتي حوايجي دم طحت ع الارض ومعادش نشوف ف شي كان رجليه يقربوا مني بعدها غمضت عيوني 😴
............................
زكية:الناس تبي تحدد العرس
سفيان:بي هل السرعه والله مانحساب الفرخه غالية
بتعجبهم
غالية بعياط:وعلاش مانعجبهمش اااااه محلاني نهبل بسلامتي
سفيان:تي باااهي توا بديرلي فيها بيوتي ماتش وعمتك جويل وحركات
غالية:وبالك مش عجبك
كيف سفيان بيتكلم قطعت علية زكية:خلاص انتي ويااها نفختوا راسي بعدين انت يافرخ سفيان علاش الفرخه اسراء طولت
سفيان:وين نعرف بالك وهيا ماشيه وشده يبرأ ف ايدها زلقت وخشت ف عينها فقصتها
زكية:صكر فمك يافرخ واتصل بيها توا تقول مادورنيش
سفيان:مانيش توا بتصرف رصيدي
زكية:تي اتصل قولتلك
سفيان:تي باااهي بااهي تعرفي بترد انتي بتعبيلي رصيد
زكية:انت شكلك تبي تربيه من جديد
خدي تيلفونه وبدي يرن يرن
سفيان:ماتردش غريبه قبل عش ماتصدق نتصل
زكية:اتصل من جديد
عاود يتصل من جديد رن رن بعدين طلع مقفل
سفيان:مقفل خيرها هادي
زكية:غريبه
غالية :اكيد عندها عمليه بعدين ليها يومين اجازه خلها تعوض حق اليومين بالك يزيدو مرتبه
سفيان:واللهي تفكري طلعت صح عليك
زكية:خلها ماعنها مادورهش توا هيا زي الكلبه تروح
سفيان:غالية ديريلي حاجه ناكلها
غالية:دير بروحك
سفيان :خزو كلبه أمته بتروحي يا سراء كانت كيف الشغاله عندي
.............................
فتحت عيوني واني نحرك ف ايديا عليهم شوفت السقف لحظه لحظه اني وين وعلاش الدار ظلام غيرت شهقت لما شوفته مقعمز ع الكنبه ف جنبي وف يده دخان ويدخن ويشبحلي
مالك:صح نوم اسراء
......................................
نشاءالله تعجبكم الحلقة والرواية حاجه جديده باحدات واقعيه ✌🍀
#كابوس  #الكاتبة_عويشه