وهي تجي عندوا فرحانة وقالت صباح الخير سعد أش كدير في الباب.
قال كيدرب فيا غي شويا البرد بما جاو الخدامة ليوم جيتي بكري.
قالت غير كان خطيبي غادي العمل وقال ليا نوصلك نعرف غي مولات داري فين خدامة وتبسمت.
قال سعد مزيان كاع مقلتي ليا راك مخطوبة.
قالت راه انت مسولتينيش وماجبتهاش الضروف هاي هاي على الورد الاحمر لمن أسعد هاذ الشي.
قال لراسي حيت مكاينش لي يجيب لي الورد كنهديه لراسي كنوقف قدام المراية وكنقدمو لراسي .
تبسمت وقالت مزيان راك مهلي في راسك
نسيت ماقلتش لك البارح راه عطيت لحسن الشكلاط وعجبوا وقال ليا فكرة واعرة هاذي قلت ليه را الفكرة ديالك أ سعد.
تبارك الله افكارك واعرة يا و حسن بغا يتعرف عليك لقيت بابا معاود ليه عليك كلشي.
قال مرحبا به في اي وقت انا غي في الفندق مبروك عليكم والله يكمل ليكم بيخير.
قالت امين الله يبارك فيك والله يجيب لك حتى نتا شي بنت الناس لي تستاهلك كيف قلتي وتبسمت .
قال امين ودخل الفندق وبقى مدمر وأثناء العمل وفينما كيشوفها كيدير راسوا مبشر وضاحك باش متحس بيه مدمر على ودها.
دازت اربع ايام وقال حسن لي اسيا ليوما غادي نجي لعندك عرفيني على سعد قالت اوكي وصلات الساعة الرابعة جا حسن
واتصل بي اسيا خرجات عندو ودخلاتوا إلى الفندق وعيطت لي سعد .
سعد غير جا قال مرحبا السي حسن .
قالت اسيا وهي مصدومة اواه كتعرفو.
قال سعد بما انه جاي معاك اكيد غادي يكون حسن .
قال حسن ماعندي مانسالك عرفتيني.
قال سعد مرحبا حسن تفضل ومشاو ريحو وريحت معهم اسيا.
بداو كيتكلمو مع بعضهم وكيتعارفو .
وهو يقول حسن شنو العمل ديالك في الفندق ا سعد.
قال سعد انا المسؤول الاول في غياب الباطرون وعندي النسبة ديالي في الفندق .
اسيا هبطت راسها ودارت يدها على جبهتها وقالت في نفسها هاهوا بدى لكذوب عوتاني ومقدرتش تبقى تسمع وقالت خليت ليكم الراحة غادي نشوف الخدامة ومشات.
قال حسن تبارك الله عليك والله يوفقك.
قال سعد امين ربي يحفضك .
وسد مابغاش يسولو على العمل ديالو بان ليه ان الامر ماكيهموش.
وقال حسن عرفتي ا سعد علاش جيت لعندك.
قال سعد صراحة لا ماعرفتش ولكن مرحبا على اي شيء حبيتي
.قال حسن شكرا لك انت اسعد كتخدم مع اسيا وليتي تعرفها اكتر مني فا أنا جيت باش تنصحني باش نحافض عليها.
تبسم سعد وقال مرحبا انا غادي نعطيك نصيحة عامة بالنسبة للمعاملة مع النساء وركز معايا.
حسن تبسم وقال ضاروري .
حتى سعد تبسم وقال المرأة اقرب حاجة الى قلبها هي الاذن ديالها.
فا خصك كل مرة مرة تقول ليها كلمة حلوة.
وكون حنين معاها وسمع ليها وإلي مشاكلها.
واخا يبان ليك كلامها تافه.
فقط عطيها شويا من وقتك وإسمع ليها غادي تأثر فيها وغادي تعلق بك بزاف.
وهاد الشي كامل غادي يرجع عليك بي النفع ويكون زواجك فيه نوع من الكمال.
قال حسن تبارك الله كأنك دوزتي 30 سنة في الزواج.
تبسم سعد وقال بالنسبة ليا أكثر شيء تعلمت منو هي المعانات كتعلمك أكثر كيفاش تعيش وكيفاش تعامل مع الناس وكتعلمك الصبر وكتولي تشوف الامور على حقيقتها وماكتبقاش تغضب على أشياء بسيطة.
قال حسن كلام موزون من اليوم انا من المعجبين ديالك .
ضحك سعد وقال نو حنا الان أصدقاء .
وبقاو كيتكلمو حتى قال حسن شكرا ليك على النصائح ديالك هاني غادي نمشي
قال ليه سعد تهلا في اسيا هي إنسانة تستحق كل خير.
قال حسن أكيد خليت ليك الراحة.
قال سعد زورنا وقت ماحبيتي.
قال حسن إن شاء الله شكرا لك ومشا حسن عند أسيا تكلم معاها شويا ومشا .
أنت تقرأ
العرافة (بالدارجة المغربية)🇲🇦🇲🇦
Romanceالعرافة رحمة كتقول لي اسيا على فارس احلامها الإسم ديالو حسن وبعد المواصفات وكلام خاص عليه وكتلاقى اسيا بيه وبعد مدة كيخطبها. دازت فترة قصيرة كيجي شاب الإسم ديالو سعد يخدم في الفندق لي كتخدم فيه اسيا وكتلقى فيه اغلب المواصفات لي قالت العرافة 🤔. مقت...
