"يامساء هالليل ياعطر ودخون ‏ياغرام باهر يا أحلى العمر"

1

قامت غرام على صوت صراخ قوي
طلعت تغسل وجهها وتروح تشوف وش صاير
نزلت لهم وشافت ابوها وسيف يلعبون بلوت ومتحمسين
ابتسمت وقالت : يالله صباح خير الناس تقوم على زقزقة عصافير وانا اقوم على صراخكم
ضحك سيف وطق بيده الارض عشان تجي جنبه : تعالي تعالي شوفي كيف بهزم ابوي
جلست غرام جنبه وتحمست معهم وهي تشجع سيف ومرات تضحك عليه

في بيت ابو جاسر ~

قامو كلهم على ريحة القهوه العربيه ونداء ابوهم لهم
باهر : صبحكم الله بالخير
ابو جاسر : صبحك الله بالرضا
اجتمعو كلهم حول السفره الا غيث
ابو جاسر : وينه ذا الناس حيه وهو ميت قومي يا لمياء ناديه
لمياء : ابشر
قامت لمياء لغيث وبدون اي مجهود جابت مويه بارردده وكبتها على وجهه
شهق غيث وقام بيصفقها وانحاشت وهي تضحك: طيب تشوفين ارقدي بس شوفي وش يجيك
راح يغسل وجهه ويروح يفطر معهم
غيث : صباحكمم اناا
باهر وهو يضحك :ارحب مليون
ابو جاسر : امش افطر بس

جلسو يفطرون ويسولفون وطبعا ماتخلى جلستهم من محارشة غيث للمياء

طلع ابو جاسر للعزبه واخذ معه جاسر وغيث
ابو جاسر : جهزو القهوه والشاهي جارنا ابو فلاح بيجي
تأفف غيث : يليل ذا النشبه كل يوم عندنا ماعنده بيت
صفقه جاسر على كتفه : استح على وجهك وعقاب لك مانيب مسوي شي بشرف عليك بس
غيث قلب عيونه ومشى ورا ابوه يتحلطم : الحين يبه ليش ما اخذت سعود ولا باهر مغر متبطحين وش ذنبي اطلع بذا الظهريه
ابو جاسر : والله لو ماتسكت اني لاخذك كل يوم نعنبو بليسك فيه احد يرقد مثل رقادك شكل الدبابات هابلتك
قابلو بطريقهم ابو فلاح اللي ما خلا ولا كلمه ماقالها عن غيث عشانه صدم فيه بالغلط
غيث : يعمي والله بالغلط
ابو فلاح : اقطع واخس شين وقوي عين لك وجه ترد بعد
مشى جاسر وهو يسحب غيث
سوا غيث القهوه والشاهي وجلس جنب ابوه يقهويهم ويسمع سوالفهم
ابو فلاح : الا يابو جاسر ورا مانطلع لمزرعتك نتونس هناك ومنها يجون اهل المدينه
ابو جاسر : اي والله فكره بشوف اهلي وارد لك
قام غيث وهو طفشان حر ودرجة الحراره فوق ال ٤٠ ويتقهوون شاهي